Published:Updated:

சசிகலா, தினகரன் அடுக்கும் விவசாயிகளின் பிரச்னைகள்... கைகொடுக்குமா டெல்டா பாலிடிக்ஸ்?!

``சசிகலாவும், டி.டி.வி.தினகரனும் எந்நேரமும் அதிமுக-வைப் பற்றி மட்டுமே சிந்தித்துக்கொண்டும், பேசிக்கொண்டும் இருப்பதால் எந்தப் பலனும் இல்லை. விவசாயிகளின் பிரச்னைகளைக் கையிலெடுத்து, டெல்டா பாலிடிக்ஸில் புதிய ரூட்டில் பயணிப்பது அவசியம்!”

டெல்டா மாவட்டங்களில் தங்களது அரசியல் செல்வாக்கை வளர்த்தெடுக்க சசிகலாவும், அமமுக பொதுச்செயலாளர் டி.டி.வி.தினகரனும் விவசாயிகளின் பிரச்னைகள் குறித்துக் குரல் கொடுக்க தொடங்கியிருக்கிறார்கள். அதிமுக-வை மீட்டெடுப்பது குறித்து மட்டுமே இதுவரையிலும் பேசிவந்த சசிகலா, கடந்த சில தினங்களுக்கு முன்பு, இந்தப் பகுதி விவசாயிகளின் கவனத்தை ஈர்க்கும்விதமாக, நெல் கொள்முதலில் ஏற்படும் தாமதம் குறித்தும் அறிக்கை வெளியிட்டிருந்தார்.

சசிகலா
சசிகலா

``டெல்டா மாவட்டங்களில் தற்போது குறுவை அறுவடைப் பணிகள் நடந்துவரும் நிலையில், பல்வேறு நெல் கொள்முதல் நிலையங்களில் பல்லாயிரக்கணக்கான நெல் மூட்டைகள் தேக்கமடைந்திருப்பதாகவும், தொடர்மழையால் நெல் மணிகள் முளைத்துவிட்டதால், கொள்முதல் நிலைய அதிகாரிகள் நெல்லைக் கொள்முதல் செய்ய மறுப்பதாகவும் விவசாயிகள் கவலை தெரிவிக்கின்றனர். எனவே, கொள்முதல் நிலையங்களில் தேங்கியுள்ள நெல் மூட்டைகளை உடனடியாக தமிழக அரசு காலம் தாழ்த்தாமல் கொள்முதல் செய்ய வேண்டும்” எனத் தெரிவித்திருந்தார் சசிகலா.

`பொதுச்செயலாளார் சின்னம்மா’ - அ.தி.மு.க கொடியுடன் அறிக்கை வெளியிட்ட சசிகலா தரப்பு!

இந்த நிலையில், அமமுக பொதுச்செயலாளர் டி.டி.வி.தினகரன் தனது ட்விட்டர் பக்கத்தில், ``பயிர் இன்ஷூரன்ஸுக்கான காலக்கெடுவுக்கான தேதியை நீட்டிக்க வேண்டும் என விவசாயிகள் தொடர்ந்து வலியுறுத்திவருகிறார்கள். ஆனால் தமிழக அரசு அதைக் கண்டுகொள்ளாமல், நவம்பர் 15-ம் தேதிக்குள் பயிர்க் காப்பீட்டுக்கு பிரிமியம் செலுத்த வேண்டும் என நிர்பந்தம் செய்வது சரியானதல்ல. குறுவை நெல் கொள்முதலில் ஏற்பட்ட குளறுபடிகள், பருவமழை பாதிப்பு உள்ளிட்டவற்றால் காவிரி டெல்டா உட்பட தமிழகத்தின் பல மாவட்டங்களில் சம்பா மற்றும் தாளடி நடவுப் பணிகள் இன்னும் முழுமையாக முடிவடையவில்லை. இதனால் நவம்பர் 15-ம் தேதிக்குள் விவசாயிகள் பயிர்க் காப்பீடு செய்வதில் நடைமுறைச் சிக்கல்கள் உள்ளன. இதைப் புரிந்துகொண்டு பயிர்க் காப்பீட்டுக்கான காலக்கெடுவை இந்த மாதக் கடைசிவரை நீட்டிப்பதுடன், அதற்கான வழிமுறைகளை எளிமைப்படுத்தும் நடவடிக்கைகளையும் அரசு எடுக்க வேண்டும். இதற்கு மாறாக, உடனடியாக பயிர்க் காப்பீடு செய்ய விவசாயிகளை தி.மு.க அரசு நிர்பந்திப்பது ஏற்றுக்கொள்ளத்தக்கதல்ல” என்று தெரிவித்திருக்கிறார்.

சசிகலாவும், டி.டி.வி.தினகரனும் விவசாயிகளின் பிரச்னைகள் குறித்து தீவிரமாகப் பேசத் தொடங்கியிருப்பது, டெல்டா மாவட்டங்களில் கவனத்தை ஈர்த்திருக்கிறது. இது குறித்துப் பேசும் அரசியல் பார்வையாளர்கள், ``தமிழ்நாட்டைப் பொறுத்தவரை குறிப்பாக, காவிரி டெல்டா மாவட்டங்களில் அரசியலில் காலூன்ற விவசாயிகளின் மனதில் இடம்பிடிப்பது மிகவும் அவசியம் என்ற சூழல் உருவாகியிருக்கிறது. கடந்த அதிமுக ஆட்சியின்போது, திமுக தலைவர் மு.க.ஸ்டாலின் விவசாயிகளின் பிரச்னைகளுக்காகத் தொடர்ச்சியாகக் குரல் கொடுத்துவந்தார். இதனால் விவசாயிகளின் மத்தியில் ஸ்டாலினின் செல்வாக்குப் பல மடங்கு உயர்ந்தது. இதனால்தான் 2019 நாடாளுமன்றத் தேர்தல், 2021 சட்டமன்றத் தேர்தலில் டெல்டா மாவட்டங்களில் திமுக அதிக வாக்குகளைப் பெற்று வெற்றிபெற்றது.

டி.டி.வி.தினகரன்
டி.டி.வி.தினகரன்

நாம் தமிழர் கட்சி கணிசமான எண்ணிக்கையில் வாக்குகளை வாங்கவும், சீமானின் விவசாயிகள் ஆதரவு வாய்ஸ் பெரிதும் கைகொடுத்தது. சசிகலாவும் டி.டி.வி.தினகரனும் எந்நேரமும் அதிமுக-வைப் பற்றி மட்டுமே சிந்தித்துக்கொண்டும், பேசிக்கொண்டும் இருப்பதால் எந்தப் பலனும் இல்லை. விவசாயிகளின் பிரச்னைகளைக் கையில் எடுத்து, டெல்டா பாலிடிக்ஸில் புதிய ரூட்டில் பயணிப்பது நிச்சயம் இவர்களுக்குக் கைகொடுக்கும்’’ என்கிறார்கள்.

``சசிகலா பாதை வேறு...என் பாதை வேறு!'' - டி.டி.வி.தினகரன்

ஆனால், இது குறித்துப் பேசும் அமமுக-வினர் ``சசிகலாவும் தினகரனும் எந்த ஓர் உள்நோக்கமும் அரசியல் எதிர்பார்ப்பும் இல்லாமல்தான், விவசாயிகளுக்காகக் குரல் கொடுக்கிறார்கள். இவர்கள் டெல்டாவின் மண்ணின் மைந்தர்கள். விவசாயிகளுக்காகப் பேசுவது என்பது இயல்பானது. இதை அரசியலோடு முடிச்சுப் போட்டுப் பேசுவது சரியல்ல’’ என்கிறார்கள்.

விவசாயிகள் தரப்பில் இது குறித்துப் பேசியபோது, ``எங்களுக்காக உண்மையான அக்கறையில பேசுறாங்களா இல்லை அரசியல் ஆதாயத்துக்காகப் பேசுறாங்களாங்கறது போக போகத்தான் தெரியும். ஆனால் வெறும் பேச்சை மட்டும் நம்பியெல்லாம் யாரு பின்னாடியும் விவசாயிகள் போயிட மாட்டோம்’’ என்கிறார்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு