Published:Updated:

சிவசேனா: பால் தாக்கரே பிறந்தநாளில் முடிவுக்கு வந்த உத்தவ் தாக்கரேவின் தலைவர் பதவி - அடுத்தது யார்?!

உத்தவ் தாக்கரேயுடன் பால் தாக்கரே
News
உத்தவ் தாக்கரேயுடன் பால் தாக்கரே

மறைந்த சிவசேனா தலைவர் பால் தாக்கரேவின் பிறந்தநாளில் உத்தவ் தாக்கரேவின் தலைவர் பதவி முடிவுக்கு வந்திருக்கிறது. அடுத்து தலைவராகப் பதவியேற்க முடியாத நிலையில் உத்தவ் தாக்கரே இருக்கிறார்.

சிவசேனா: பால் தாக்கரே பிறந்தநாளில் முடிவுக்கு வந்த உத்தவ் தாக்கரேவின் தலைவர் பதவி - அடுத்தது யார்?!

மறைந்த சிவசேனா தலைவர் பால் தாக்கரேவின் பிறந்தநாளில் உத்தவ் தாக்கரேவின் தலைவர் பதவி முடிவுக்கு வந்திருக்கிறது. அடுத்து தலைவராகப் பதவியேற்க முடியாத நிலையில் உத்தவ் தாக்கரே இருக்கிறார்.

Published:Updated:
உத்தவ் தாக்கரேயுடன் பால் தாக்கரே
News
உத்தவ் தாக்கரேயுடன் பால் தாக்கரே

`மண்ணின் மைந்தர்களின் உரிமையை நிலைநாட்டுவதற்காக’ என்று மறைந்த பால் தாக்கரேயால் உருவாக்கப்பட்ட சிவசேனா பல முறை விரிசல்களைச் சந்தித்தாலும், தற்போது ஏற்பட்டிருக்கிறது போன்ற ஒரு பிளவைச் சந்தித்தது கிடையாது. தற்போது சிவசேனாவின் பெரும்பாலான எம்.எல்.ஏ-க்கள், எம்.பி-க்கள், முதல்வர் ஏக்நாத் ஷிண்டே தலைமையிலான சிவசேனா அணிக்குச் சென்றுவிட்டனர். இதனால் சிவசேனாவுக்கு இது சோதனைக்காலம் என்றுதான் சொல்ல வேண்டும். கடந்த மே மாதம் சிவசேனாவில் ஏற்பட்ட பிளவு காரணமாக இப்போது யாரது அணி உண்மையான சிவசேனா என்ற கேள்வி எழுந்திருக்கிறது. இது தொடர்பாக வழக்கு சுப்ரீம் கோர்ட், தேர்தல் கமிஷன் என இரண்டிலும் இருக்கிறது.

சிவசேனா: பால் தாக்கரே பிறந்தநாளில் முடிவுக்கு வந்த உத்தவ் தாக்கரேவின் தலைவர் பதவி - அடுத்தது யார்?!

தேர்தல் கமிஷன் ஏக்நாத் ஷிண்டே, உத்தவ் தாக்கரேவின் மனுக்களை விசாரிக்க ஆரம்பித்திருக்கிறது. அடுத்த மாதத்தில் இந்த விவகாரத்தில் இறுதித் தீர்ப்பு கிடைக்கும் என்று உறுதியாக இருதரப்பினரும் நம்புகின்றனர். இந்த மாதம் 30-ம் தேதிக்குள் இருதரப்பினரும் தங்களிடம் இருக்கும் ஆவணங்கள் அனைத்தையும் தாக்கல் செய்யும்படி தேர்தல் கமிஷன் உத்தரவிட்டிருக்கிறது. தற்போது சிவசேனா தலைவராக இருக்கும் உத்தவ் தாக்கரேவின் பதவிக்காலம் இன்றோடு முடிவுக்கு வருகிறது.

அதாவது இன்று பால் தாக்கரேவின் பிறந்த தினமாகும். பால் தாக்கரேவின் பிறந்தநாளில் உத்தவ் தாக்கரேவின் தலைவர் பதவிக்காலம் முடிவுக்கு வருகிறது. இதனால், உத்தவ் தாக்கரே தொடர்ந்து தலைவர் பதவியில் நீடிப்பாரா என்ற சந்தேகம் எழுந்திருக்கிறது. தேர்தல் கமிஷன் நடைமுறைகள் முடிவுக்கு வரும்வரை கட்சியில் தேர்தல் நடத்த முடியாது. கட்சியில் பெரும்பாலான எம்.எல்.ஏ-க்கள், எம்.பி-க்கள் தங்களுக்கு ஆதரவாக இருப்பதால் ஏக்நாத் ஷிண்டேதான் கட்சித் தலைவர் என்று ஏக்நாத் ஷிண்டே அணியினர் கூறுகின்றனர்.

தற்போது ஏக்நாத் ஷிண்டேயை அவரின் அணியினர் தங்களது கட்சியின் முதன்மை நிர்வாகி என்று அழைக்கின்றனர். ஆனால், கட்சியில் அப்படி ஒரு பதவியே இல்லை என்று உத்தவ் தாக்கரே கட்சியினர் வாதிடுகின்றனர். இது குறித்து உத்தவ் தாக்கரேவின் அணி எம்.பி. சஞ்சய் ராவத் கூறுகையில், ``உத்தவ் தாக்கரேதான் கட்சியின் தலைவர், யார் கட்சியின் தலைவராக இருக்க வேண்டும் என்று முடிவு செய்ய கட்சிக்கு அதிகாரம் இருக்கிறது” என்று குறிப்பிட்டார்.

ஏக்நாத் ஷிண்டே, உத்தவ் தாக்கரே
ஏக்நாத் ஷிண்டே, உத்தவ் தாக்கரே

இதே போன்று சிவசேனா (உத்தவ் அணி) முன்னாள் அமைச்சர் அனில் பரப் அளித்த பேட்டியில், ``கட்சித் தொண்டர்களுக்கும், கட்சித் தலைவர்களுக்கும் உத்தவ் தாக்கரேதான் தலைவர். இதற்கு தேர்தல் கமிஷனில் சட்டபூர்வமாக அங்கீகாரம் பெறுவோம்” என்று தெரிவித்தார். சட்டமன்றத்தில் இன்று பால்தாக்கரேவின் படம் திறக்கப்படவிருக்கிறது. இதில் முதல்வர் ஏக்நாத் ஷிண்டே, துணை முதல்வர் தேவேந்திர பட்னாவிஸ் ஆகியோர் கலந்துகொள்கின்றனர்.

இதில் கலந்துகொள்ளும்படி தாக்கரே குடும்பத்தைச் சேர்ந்த அனைவருக்கும் அழைப்பு விடுக்கப்பட்டிருக்கிறது. உத்தவ் தாக்கரே தன்னுடைய குடும்பத்தோடு கலந்துகொள்வாரா என்ற கேள்வி எழுந்திருக்கிறது. அதேசமயம் ராஜ் தாக்கரே கலந்துகொள்வார் என்று எதிர்பார்க்கப்படுகிறது. பால் தாக்கரே கட்டிக்காத்த சிவசேனாவுக்கு அவரது பிறந்தநாளில் உத்தவ் தாக்கரே தலைவராக இல்லாமல் போனது கட்சித்தொண்டர்களை மிகவும் கவலையடையச் செய்திருக்கிறது. உத்தவ் தாக்கரே கட்சியினர் தங்களுக்கு சுப்ரீம் கோர்ட்டில் நீதி கிடைக்கும் என்று உறுதியாக நம்புகின்றனர்.

ஓரிரு மாதங்களில் மும்பை மாநகராட்சிக்குத் தேர்தல் அறிவிக்கப்படவிருக்கிறது. அதற்குள் யாரது அணி உண்மையான சிவசேனா என்பதை தேர்தல் கமிஷன் முடிவு செய்யும் என எதிர்பார்க்கப்படுகிறது. கட்சியின் சின்னமான வில் அம்பு யாருக்காவது ஒதுக்கப்படுமா அல்லது முடக்கப்படுமா என்றும் விரைவில் தெரியவரும்.