Published:Updated:

வன்னியர் இடஒதுக்கீடு... வழக்குகளைக் காட்டி வஞ்சிக்கிறதா தி.மு.க அரசு?

ராமதாஸ், ஸ்டாலின், எடப்பாடிபழனிசாமி
பிரீமியம் ஸ்டோரி
ராமதாஸ், ஸ்டாலின், எடப்பாடிபழனிசாமி

அமைச்சர் சிவசங்கர் தெளிவில்லாமல் ஒரு கருத்தைச் சொல்லிவிட்டு இப்போது, ‘சொல்லவில்லை’ என்று மாற்றிப் பேசுகிறார்.

வன்னியர் இடஒதுக்கீடு... வழக்குகளைக் காட்டி வஞ்சிக்கிறதா தி.மு.க அரசு?

அமைச்சர் சிவசங்கர் தெளிவில்லாமல் ஒரு கருத்தைச் சொல்லிவிட்டு இப்போது, ‘சொல்லவில்லை’ என்று மாற்றிப் பேசுகிறார்.

Published:Updated:
ராமதாஸ், ஸ்டாலின், எடப்பாடிபழனிசாமி
பிரீமியம் ஸ்டோரி
ராமதாஸ், ஸ்டாலின், எடப்பாடிபழனிசாமி

அ.தி.மு.க அரசு தனது இறுதி நாளில் நிறைவேற்றிய வன்னியர் சமூகத்துக்கான 10.5 சதவிகித உள் இட ஒதுக்கீடு, ஆளுநர் ஒப்புதல் பெறப்பட்டு அரசாணையும் வெளியிடப்பட்டுவிட்டது. ஆனால், தற்போதைய தி.மு.க அரசோ, நீதிமன்ற வழக்குகளை முன்வைத்து இட ஒதுக்கீட்டை அமல்படுத்தத் தயங்குவதால் ஏகத்துக்கும் டென்ஷனாகியிருக்கிறது தைலாபுரம் தோட்டம்!

இந்தியாவில் எந்த மாநிலத்திலும் இல்லாத வகையில் தமிழகத்தில் மட்டும்தான் 69 சதவிகித இட ஒதுக்கீடு அமலில் உள்ளது. மிகவும் பிற்படுத்தப்பட்டோர் சமூகத்துக்கு 20 சதவிகிதம், பிற்படுத்தப்பட்டோர் சமூகத்துக்கு 30 சதவிகிதம், பட்டியல் சமூகத்துக்கு 18 சதவிகிதம், பழங்குடியினருக்கு ஒரு சதவிகிதம் அதில் அடங்கும்.

வன்னியர் இடஒதுக்கீடு... வழக்குகளைக் காட்டி வஞ்சிக்கிறதா தி.மு.க அரசு?

‘வன்னியர்களுக்குத் தனி இட ஒதுக்கீடு வேண்டும்’ என்று தீவிரமாகப் பா.ம.க போராடியதைத் தொடர்ந்துதான், 1989-ல் முதல்வராகப் பொறுப்பேற்ற கருணாநிதி, வன்னியர் உள்ளிட்ட 108 சமூகங்களை இணைத்து ‘மிகவும் பிற்படுத்தப்பட்டோர்’ என்று வகைப்படுத்தி மொத்தமாக 20 சதவிகித இட ஒதுக்கீட்டை அமல்படுத்தினார். ஆனால், ‘மக்கள்தொகையில் மிகுதியாக இருக்கும் வன்னியர் சமூகத்துக்கு 20 சதவிகித தனி இட ஒதுக்கீடு வேண்டும்’ என பா.ம.க நிறுவனர் ராமதாஸ் தொடர்ந்து வலியுறுத்திவந்தார். 2019 நாடாளுமன்றத் தேர்தலில் அ.தி.மு.க-வுடன் கூட்டணி சேர்ந்த பா.ம.க., மீண்டும் இட ஒதுக்கீடு கோரிக்கையை முன்வைத்து 2020, பிப்ரவரி மாதம் தமிழகம் தழுவிய போராட்டங்களில் ஈடுபட்டது. ஆரம்பத்தில் எடப்பாடி பழனிசாமி அரசு தயங்கினாலும், தமிழக சட்டமன்றத் தேர்தல் அறிவிக்கப்பட்ட பிப்ரவரி 26-ம் தேதி மாலை சட்டசபையில், வன்னியர் சமூகத்துக்கு 10.5 சதவிகித உள் இட ஒதுக்கீட்டை அறிவித்தது. தொடர்ந்து ஆளுநர் ஒப்புதல் பெறப்பட்டு, அரசாணையும் வெளியிடப்பட்டது.

இந்தநிலையில்தான், புதிதாகப் பொறுப்பேற்ற தி.மு.க அரசு, வன்னியர் இட ஒதுக்கீட்டை அமல்படுத்துமா என்ற கேள்வி எழுந்திருக்கிறது. இப்படியான சூழலில்தான், பிற்படுத்தப்பட்டோர் நலத்துறை அமைச்சர் எஸ்.எஸ்.சிவசங்கர், ‘வன்னியர் இட ஒதுக்கீடு தொடர்பாக வழக்குகள் இருப்பதால், அதை அமல்படுத்துவது சாத்தியப்படாது’ என்று ஒரு பேட்டியில் சொன்னதாகத் தகவல் வெளியானது. உடனடியாக அறிக்கை வெளியிட்ட ராமதாஸ், ‘69 சதவிகித இட ஒதுக்கீட்டை எதிர்த்தும், இஸ்லாமியர்களுக்கும், அருந்ததியருக்கும் அளிக்கப்பட்ட 3.5 இட ஒதுக்கீட்டை எதிர்த்தும் ஏராளமான வழக்குகள் நிலுவையில் உள்ளன. ஆனாலும், அந்த இட ஒதுக்கீடுகள் நடைமுறைப் படுத்தப்படுகின்றன. அதுபோலத்தான் வன்னியர் உள் இட ஒதுக்கீடு தொடர்பாகவும் வழக்குகள் உள்ளன. தடையாணை எதுவும் பிறப்பிக்கப் படாததால், அதை அமல்படுத்துவதில் எந்தச் சிக்கலும் இல்லை’ என்று குறிப்பிட்டிருந்தார். இதனால், இட ஒதுக்கீடு விவகாரம் மீண்டும் சூடுபிடிக்கத் தொடங்கியிருக்கிறது.

இந்த விவகாரத்தில் அமைச்சர் சிவசங்கரின் பேச்சைக் கண்டிக்கும் பா.ம.க-வின் செய்தித் தொடர்பாளர் வினோபா நம்மிடம், “அமைச்சர் சிவசங்கர் தெளிவில்லாமல் ஒரு கருத்தைச் சொல்லிவிட்டு இப்போது, ‘சொல்லவில்லை’ என்று மாற்றிப் பேசுகிறார். இன்றும் பி.பி.சி தமிழில் அவரது பேட்டி இருக்கிறது. அதில், ‘இட ஒதுக்கீடு தொடர்பாக வழக்கு நிலுவையிலிருப்பதால், அடுத்தகட்டத்துக்குப் போக முடியாது. நீதிமன்ற அவமதிப்புக்கு ஆளாக வேண்டிவரும்’ என்று பேசியிருக்கிறார். நீதிமன்றம் சொன்னதைச் செய்யாதபோதுதான் நீதிமன்ற அவமதிப்புக்கு ஆளாக நேரிடும். இது அமைச்சரின் கருத்தா அல்லது தி.மு.க அரசின் நிலைப்பாடா என்ற கேள்வியைக்கூட ராமதாஸ் ஐயா கேட்டிருக்கிறார்.

‘மராத்தா’ சமூகத்துக்கான இட ஒதுக்கீட்டை நீதிமன்றம் தடை செய்தபோது, ‘பொருளாதாரத்தில் பின்தங்கியவர்கள்’ என்று மாற்றி இட ஒதுக்கீட்டை அமல்படுத்தியது மகாராஷ்டிரா அரசு. வன்னியர்களுக்கான இட ஒதுக்கீட்டை அமல்படுத்தினால், தி.மு.க-வுக்கு வாக்களித்த மற்ற சமூகத்தினர் அதிருப்தியடைவார்கள் என்ற வாதமும் தவறானது. இதற்காகத்தான் மற்ற சமூகத்தினர் தி.மு.க-வுக்கு வாக்களித்தனர் என்றால் அதில் லாஜிக் இல்லை. எனவே, தாமதமின்றி வன்னியர் உள் இட ஒதுக்கீட்டை அமல்படுத்த வேண்டும்” என்றார்.

அ.தி.மு.க செய்தித் தொடர்பாளரான ஜே.சி.டி.பிரபாகரும் மேற்கண்ட கருத்தையே வலியுறுத்துகிறார். “இது தொடர்பாக வழக்குகள் இருக்கின்றனதான்... ஆனால், தடையாணை எதுவும் பிறப்பிக்கப்படவில்லை. நீண்டகால காத்திருப்புக்குப் பிறகு வன்னியர் சமூகத்துக்குக் கிடைத்த இந்தச் சலுகையை நிறுத்திவைப்பது சரியல்ல. வன்னியர் உள் இட ஒதுக்கீட்டை நிறைவேற்றுவதால், மற்ற சமூகத்தினர் அதிருப்தி அடைவார்கள் என்று தி.மு.க அரசு அச்சம் கொண்டால், அவர்களுக்குத் தேவையானதைச் செய்துகொடுத்து திருப்திப்படுத்த வேண்டுமே தவிர, வன்னியர் இட ஒதுக்கீடு சட்டத்தை நீர்த்துப்போகச் செய்யக் கூடாது” என்றார்.

சிவசங்கர், வினோபா, ஜே.சி.டிபிரபாகர்
சிவசங்கர், வினோபா, ஜே.சி.டிபிரபாகர்

பிற்படுத்தப்பட்டோர் நலத்துறை அமைச்சர் எஸ்.எஸ்.சிவசங்கரோ, “ராமதாஸ் தவறான அறிக்கையை வெளியிட்டிருக்கிறார். நான் அப்படியெல்லாம் சொல்லவில்லை. கொரோனா நிவாரணப் பணிகளில் இருப்பதால் விரிவாகப் பிறகு பேசுகிறேன்” என்பதுடன் முடித்துக்கொண்டார்.

இதன் உள் விஷயம் அறிந்த வன்னியர் சமூகத் தலைவர் ஒருவர் நம்மிடம், “தி.மு.க அரசு வன்னியர் இட ஒதுக்கீட்டில் கைவைத்துவிடக் கூடாது என்பதற்காகத்தான் தி.மு.க அமைச்சரவைப் பதவியேற்பு நிகழ்ச்சிக்கு ஜி.கே.மணியை அனுப்பிவைத்தார் ராமதாஸ். இட ஒதுக்கீடு உள்ளிட்ட விஷயங்களில் இணக்கமாகச் செல்ல வேண்டும் என்பதற்காகத்தான், மருத்துவர்களுக்கு ஊக்கத்தொகை அளித்தது உட்பட பல விஷயங்களுக்கு முதல்வர் ஸ்டாலினை பா.ம.க பாராட்டிவருகிறது. அப்படி இருக்கும்போது, வழக்குகளைக் காரணம் காட்டி இட ஒதுக்கீடு விஷயத்தில் தமிழக அரசு வன்னியர் சமூகத்தினரை வஞ்சிக்கக் கூடாது” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism