Published:Updated:

எடப்பாடி அரசு நன்மை செய்யாது! - குமுறும் ஜாக்டோ-ஜியோ!

ஒட்டுமொத்த விகடனுக்கும் ஒரே ஷார்ட்கட்

Use App
எடப்பாடி அரசு நன்மை செய்யாது! - குமுறும் ஜாக்டோ-ஜியோ!
எடப்பாடி அரசு நன்மை செய்யாது! - குமுறும் ஜாக்டோ-ஜியோ!

எடப்பாடி அரசு நன்மை செய்யாது! - குமுறும் ஜாக்டோ-ஜியோ!

பிரீமியம் ஸ்டோரி

ஜாக்டோ-ஜியோ அமைப்பினர் கடந்த ஜனவரியில் நடத்திய போராட்டம் ஒரு வழியாக முடிவுக்கு வந்தாலும், அதன் எதிரொலி வருகிற நாடாளுமன்றத் தேர்தலில் ஆளும் கட்சிக்குப் பெரும் குடைச்சலைக் கொடுக்கும் என்று தெரிகிறது. அந்த அளவுக்கு அரசுமீது ஆத்திரத்தில் உள்ளனர் அரசு ஊழியர்கள்.

ஜாக்டோ-ஜியோ அமைப்பினர் தங்கள் கோரிக்கைகளை வலியுறுத்தி, கடந்த ஜனவரி 21-ம் தேதி முதல் 30-ம் தேதிவரை  போராட்டத்தில் ஈடுபட்டனர். போராடியவர்கள் மீது அரசு எடுத்துள்ள நடவடிக்கைகளை ரத்து செய்யக்கோரியும், புதிய பென்ஷன் திட்டத்தில் உள்ள சந்தேகங்கள் குறித்தும் உயர் நீதிமன்றத்தில் ஏற்கெனவே நடந்துவரும் வழக்கில் ஜாக்டோ-ஜியோ அமைப்பினர் புதிய மனுவைத் தாக்கல் செய்துள்ளனர். மதுரை உயர் நீதிமன்றக் கிளையில் கடந்த 4-ம் தேதி நீதிபதிகள் கிருபாகரன், சுந்தர் ஆகியோர் கொண்ட அமர்வில்  விசாரணைக்கு வந்த இந்த வழக்கில், ஜாக்டோ - ஜியோ தரப்பில் மூத்த வழக்கறிஞர்கள் என்.ஜி.ஆர்.பிரசாத், லஜபதிராய், சங்கரன் ஆகியோரும், அரசுத் தரப்பில் கூடுதல் தலைமை வழக்கறிஞர் அரவிந்த் பாண்டியனும் கடுமையாக வாதாடினார்கள்.

ஜாக்டோ - ஜியோ தரப்பில், “கோரிக்கைகளை முன்வைத்து 2017-ம் ஆண்டில் அரசு ஊழியர்கள், ஆசிரியர்கள் போராட்டம் நடத்தியபோது, உயர் நீதிமன்றம் இடைக்கால உத்தரவு பிறப்பித்தது. அப்போது தலைமைச்செயலாளர் ஆஜராகி, இடைக்கால உத்தரவின் பேரில் உடனே நடவடிக்கை எடுப்பதாக உறுதியளித்தார். ஆனால், எந்த நடவடிக்கையும் எடுக்கவில்லை.  அதனால்தான் ஊழியர்கள் மீண்டும் போராட்டத்தில் ஈடுபட்டனர். முதல்வர் கேட்டுக்கொண்டதால் வேலைநிறுத்தத்தை வாபஸ் வாங்கினர். எனினும் ஆசிரியர், அரசு ஊழியர்களை இடைநீக்கம் செய்தும், இடமாறுதல் செய்தும் அரசு பழிவாங்குகிறது. அதுபோல், 7-வது சம்பளக் கமிஷனில் உள்ள முரண்பாடுகள் இன்றுவரைக் களையப்படவில்லை. தலைமைச்செயலாளர், நிதித்துறைச் செயலாளர் போன்றவர்கள் நிலுவைத் தொகையை முழுவதுமாகப் பெற்றுக்கொண்டுள்ளனர். ஆனால், ஊழியர்களுக்கு மட்டும் ஒன்பது மாதங்கள் கடந்த பின்னும் நிலுவைத் தொகையை வழங்க மறுக்கின்றனர். பல மாநிலங்களில் புதிய பென்ஷன் திட்டத்தை ஏற்றுக்கொள்ளவில்லை. டெல்லி மாநில அரசு இதற்கு எதிராகத் தீர்மானம் நிறைவேற்றியுள்ளது. புதிய பென்ஷன் திட்டத்தில், ஓய்வுபெற்றவர்களுக்கு இன்றுவரை ஓய்வூதியப் பலன்கள் வழங்கப்பட வில்லை. புதிய பென்ஷன் திட்டத்தில் பிடிக்கப்படும் பணம் எங்கே போகிறது என்று தெரியவில்லை. பங்களிப்புத் தொகையை அரசு செலுத்துவதில்லை. அரசு ஊழியர்களின் கோரிக்கைகளில் உள்ள நியாயத்தை அரசு உணர வேண்டும்” என்று வாதிட்டனர்.

எடப்பாடி அரசு நன்மை செய்யாது! - குமுறும் ஜாக்டோ-ஜியோ!

அரசுத் தரப்பில் வாதிட்ட வழக்கறிஞர், “அரசை மிரட்டும் வகையில் ஒவ்வொரு முறையும் போராட்டம் நடத்திவருகிறார்கள். இதுபோன்ற கடுமையான நடவடிக்கைகள் எடுக்கும்போதுதான், அவர்களுக்கு பயம் இருக்கும். ஓய்வுபெற்றவர்கள் சங்கப் பொறுப்புகளில் இருந்துகொண்டு ஊழியர்களைத் தவறாக வழி நடத்துகிறார்கள். நாடு முழுவதும் புதிய பென்ஷன் திட்டம் நடைமுறையில் உள்ளது. இதுவரை புதிய பென்ஷன் திட்டத்தில் 11,335 பேர் விண்ணப்பித்துள்ளனர். அவர்களுக்கு ரூ.441 கோடி பணப்பலன்கள் வழங்கப்பட்டுள்ளன. 10,116 பேருக்கு பென்ஷன் வழங்கப்பட்டுள்ளது. பென்ஷனுக்குப் பிடிக்கப்படும் பணம், வங்கிகளில் டெபாசிட் செய்யப்பட்டு வருகிறது. தனிப்பட்ட சிலரின் பிரச்னைகளை ஒட்டுமொத்த அரசு ஊழியர்களின் பிரச்னையாக மிகைப்படுத்துகிறார்கள். தவறான தகவல்களை முன்வைக்கிறார்கள்” என்றார்.

இரு தரப்பு வாதங்களைக் கேட்டுக்கொண்ட நீதிபதிகள், ‘‘தேர்வு காலத்தில் வேலைநிறுத்தம் செய்வதால் மாணவர்களுக்குப் பாதிப்பை உண்டாக்குகிறது. வேலைநிறுத்தம் செய்வது உரிமையாக இருந்தாலும் இதை ஏற்றுக்கொள்ள முடியாது. அதனால், பணியிட மாறுதலை ரத்துசெய்ய உத்தரவிட முடியாது. புதிய பென்ஷன் திட்டத்துக்கு ஒப்புக்கொண்டு அரசு ஊழியர்கள் பணியில் சேர்ந்துவிட்டு, அது வேண்டாமென்று சொன்னால் எப்படி?” என்று கேட்டனர். மேலும், “புதிய பென்ஷன் திட்டத்தில் ஊழியர்களுக்கு உள்ள சந்தேகங்களுக்கு அரசு ஆதாரங்களுடன் பதில் அளிக்கவேண்டும்” என்றும் நீதிபதிகள் உத்தரவிட்டனர்.

இது குறித்து நம்மிடம் பேசிய ஜாக்டோ - ஜியோ நிர்வாகி ஒருவர், “எங்களது நியாயமான கோரிக்கைகளை முன்வைத்துத்தான் போராட்டத்தில் ஈடுபட்டோம். முதல்வர் கேட்டுக் கொண்டதால் போராட்டத்தைக் கைவிட்டோம். ஆனால், போராட்டத்தை ஒடுக்கிவிட்டதை ஆளும் கட்சி சாதனையாக போஸ்டர் அடித்துக் கொண்டாடுகிறது. எனினும் ஆசிரியர், அரசு ஊழியர்களை இடைநீக்கம் செய்தும், இடமாறுதல் செய்தும் அரசு பழிவாங்குகிறது. எங்களுக்கு அரசு மீது கோபம் இல்லை. எங்களுக்கு உரிய பலன்களை உரிய நேரத்தில் உரிய முறையில் வழங்குங்கள் என்றுதான் கேட்கிறோம். பழைய பென்ஷன் திட்டத்தை நடைமுறைப்படுத்துவோம் என்று முன்னாள் முதல்வர் ஜெயலலிதா சொன்ன வாக்குறுதியை நம்பி அ.தி.மு.க-வுக்கு வாக்களித்தோம். இவ்வளவுக்குப் பிறகும் இந்த அரசு எங்களுக்கு நன்மை செய்யாது என்று புரிகிறது. இந்த நிலையில், எப்படி ஆளும் கட்சிக்கு நாங்கள் ஓட்டுப்போட முடியும்?” என்று கேள்வி எழுப்பினார்.

நியாயமான கேள்விதான்.

- செ.சல்மான்,  படம்: வி.ஸ்ரீனிவாசுலு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு