'எங்கள் இலக்கு எம்.எல்.ஏ. அல்ல!' - தினகரனின் அடுத்த மூவ்!

தினகரன்

ஆர்.கே.நகரில் வெற்றிபெற்ற தினகரனின் அடுத்த இலக்கு முதல்வர் நாற்காலி என்று சொல்லத் தொடங்கியுள்ளனர் அவரது ஆதரவாளர்கள். அதற்காக ஸ்லீப்பர் செல்ஸ் அமைச்சர்கள், எம்.எல்.ஏ-க்களிடம் பேச்சுவார்த்தை நடந்துவருவதாக உள்விவர வட்டாரங்கள் தெரிவித்தன. 

 ஆர்.கே.நகர் இடைத்தேர்தலில் யாரும் எதிர்பார்க்காத வகையில் வெற்றிவாகையைச் சூடியிருக்கிறார் சுயேச்சை வேட்பாளர் தினகரன். அவரது வெற்றி, அ.தி.மு.க. தலைமைக்குப் பெரும் சவாலை ஏற்படுத்தியிருக்கிறது. அதுதொடர்பாக ஓ.பன்னீர்செல்வம், எடப்பாடி பழனிசாமி மற்றும் கட்சியின் மூத்த நிர்வாகிகள் கட்சித் தலைமை அலுவலகத்தில் ஆலோசனை நடத்தினர். அப்போது ஆர்.கே.நகர் இடைத்தேர்தல் தோல்விகுறித்து விவாதிக்கப்பட்டது. தினகரனின் வெற்றிக்கு உறுதுணையாக இருந்த நிர்வாகிகளை ஓ.பன்னீர்செல்வம், பழனிசாமி ஆகியோர் நீக்கினர். அவர்களில் தென்சென்னை வடக்கு மாவட்டச் செயலாளர் வி.பி.கலைராஜன், நெல்லை மாநகர் மாவட்டச் செயலாளர் பாப்புலர் முத்தையா, கர்நாடக மாநிலச் செயலாளர் புகழேந்தி, செய்தி தொடர்புக்  குழு உறுப்பினர் நாஞ்சில்சம்பத், மகளிரணி துணைச் செயலாளரும் செய்தி தொடர்புக்குழு உறுப்பினருமான சி.ஆர்.சரஸ்வதி ஆகிய 5 பேர் கட்சியிலிருந்து நீக்கப்பட்டனர். வடசென்னை வடக்கு மாவட்டச் செயலாளர் வெற்றிவேல், வேலூர் கிழக்கு மாவட்டச் செயலாளர் பார்த்திபன், தஞ்சாவூர் வடக்கு மாவட்டச் செயலாளர் ரெங்கசாமி, தேனி மாவட்டச் செயலாளர் தங்க தமிழ்செல்வன் ஆகிய 4 பேர் பொறுப்பிலிருந்து நீக்கப்பட்டுள்ளனர்.  தினகரனுக்கு ஆதரவாக இருக்கும் நிர்வாகிகளை நீக்கவும் முடிவு செய்யப்பட்டு அதற்கான வேலைகள் நடந்துவருகின்றன. 

தினகரன்

இடைத்தேர்தலில் கிடைத்த வெற்றியால் உற்சாகத்துடன் இருக்கின்றனர் தினகரன் மற்றும் அவரது ஆதரவாளர்கள். அவர்களில் சிலரிடம் பேசினோம். 
"ஆர்.கே.நகர் இடைத்தேர்தல் மூலம் எங்களது செல்வாக்கு நிரூபணமாகியுள்ளது. தேர்தல் பிரசாரத்தில் சசிகலா, தினகரன்மீது சுமத்தப்பட்ட பழி, ஜெயலலிதா சிகிச்சை வீடியோ மூலம் துடைக்கப்பட்டது. அ.தி.மு.க.வில் யார் துரோகிகள்? என்பது தொண்டர்களுக்குத் தெரியும். நாங்கள் துரோகம் செய்திருந்தால் இந்த வெற்றியைப் பெற்றிருக்க முடியாது. இரட்டை இலைச் சின்னத்தில் போட்டியிட்ட மதுசூதனனுக்கு மக்கள் சரியான பாடம் புகட்டியுள்ளனர்.

ஆர்.கே.நகரின் வெற்றியைப் பார்த்து பயந்த ஓ.பன்னீர்செல்வம், எடப்பாடி பழனிசாமி தரப்பினர் தினகரனின் ஆதரவாளர்களைக் கட்சியிலிருந்து நீக்கியுள்ளனர். எங்களை நீக்க அவர்களுக்கு அதிகாரம் இல்லை. தவறுக்கு மேல் தவறுகளைச் செய்துவருகின்றனர். ஜெயலலிதா வெற்றி பெற்ற தொகுதியில்கூட மீண்டும் வெற்றி பெற முடியாதவர்களால் எங்களை எதுவும் செய்யமுடியாது. மக்களின் ஆதரவு எங்களுக்குத்தான் உள்ளது. ஆர்.கே.நகரில் வெற்றி குறித்த தகவலைக் கேள்விபட்ட சசிகலா, சந்தோஷத்திலிருக்கிறார். அவரை இன்னும் இரண்டு தினங்களில் தினகரன் சந்திக்கவுள்ளார்.

இதற்கிடையில், தினகரன் வெற்றிக்கு அ.தி.மு.க.வினரின் பங்கு அதிகம் உள்ளது. அவர்களுக்கு தினகரன் சார்பில் நன்றியைத் தெரிவித்துக்கொள்கிறேன். அவர்கள்மீது ஓ.பன்னீர்செல்வம், பழனிசாமி தரப்பினர் நடவடிக்கை எடுக்க முடியாத தர்மசங்கடத்தில் உள்ளனர். எங்களது இலக்கு எம்.எல்.ஏ. அல்ல. ஆர்.கே.நகர் தொகுதியிலிருந்து எம்.எல்.ஏ.வாக தேர்ந்தெடுக்கப்பட்ட தினகரன் விரைவில் தமிழகத்தின் முதல்வர் அரியணையில் அமருவார். அதுதான் எங்களின் இலக்கு. எடப்பாடி பழனிசாமியை முதல்வராக்கியது சசிகலாதான். சசிகலாவின் தயவால்தான் ஓ.பன்னீர்செல்வமும் முதல்வரானார்.

அ.தி.மு.க கூட்டத்தில் ஓ.பன்னீர்செல்வம், எடப்பாடி பழனிசாமி

கட்சிக்குத் துரோகம் செய்தவர்களுக்கு கல்தா கொடுக்கப்படவுள்ளது. கட்சியும் ஆட்சியும் இனி எங்கள் கையில். தினகரனை முதல்வராக்க எங்களது ஸ்லீப்பர் செல் அமைச்சர்களும் எம்.எல்.ஏ-க்களும் தயாராகிவிட்டனர். தினகரன் வெற்றி பெற்றதும் அவர்கள் போனில் வாழ்த்துகளைத் தெரிவித்தனர். அவர்கள் யார் என்று ஓ.பன்னீர்செல்வம், பழனிசாமி தரப்பினருக்குத் தெரியும். இருப்பினும் அவர்கள்மீது நடவடிக்கை எடுக்கமுடியாது. ஏற்கெனவே 18 எம்.எல்.ஏ-க்களை தகுதி நீக்கம் செய்ததால் ஆட்சிக்கே சிக்கல் எழுந்தது. எம்.எல்.ஏ-க்கள் தகுதி நீக்கம் செய்யப்பட்ட வழக்கில் எங்களுக்குச் சாதகமான தீர்ப்பு கிடைக்கும் என்று நம்புகிறோம். 
18 எம்.எல்.ஏ-க்களின் தகுதி நீக்கம் செல்லாது என்ற தீர்ப்பு கிடைத்ததும் சட்டசபையில் நம்பிக்கை வாக்கெடுப்பு நடத்தி அதில் எங்களது மெஜாரிட்டியை நிரூபிப்போம். அப்போது, ஓ.பன்னீர்செல்வம், பழனிசாமியின் கூடாரம் காலியாகிவிடும். எங்களது எதிரி தி.மு.க.தான். தி.மு.க.வுடன் சேர்ந்து ஆட்சியைக் கைப்பற்ற வேண்டிய அவசியம் எங்களுக்கு இல்லை. ஆர்.கே.நகரில் ஜெயலலிதாவின் வாரிசாகக் கருதி தினகரனை மக்கள் வெற்றி பெற வைத்துள்ளனர். மக்களின் நம்பிக்கையை நிச்சயம் காப்பாற்றுவோம். தமிழகத்திலேயே முன்மாதிரியான தொகுதியாக ஆர்.கே.நகரை மாற்றுவோம். ஜெயலலிதா அறிவித்த திட்டங்களோடு, மக்களுக்குத் தேவையான அடிப்படை வசதிகளை நிறைவேற்றுவோம். அதற்கான ஏற்பாடுகளை தினகரன் செய்துவருகிறார். சசிகலாவைச் சந்தித்தப்பிறகு எங்களின் அடுத்தகட்ட நடவடிக்கைகள் ஓ.பன்னீர்செல்வம், பழனிசாமி தரப்பினருக்குக் கடும் அதிர்ச்சியாக இருக்கும்" என்றனர். 

Do you like the story?

Please Appreciate the Author by clapping!