Published:Updated:

எண்ணெய் நிறுவனப் பங்குகளை வாங்கலாமா?

ஒட்டுமொத்த விகடனுக்கும் ஒரே ஷார்ட்கட்

Use App
எண்ணெய் நிறுவனப் பங்குகளை வாங்கலாமா?
எண்ணெய் நிறுவனப் பங்குகளை வாங்கலாமா?

எண்ணெய் நிறுவனப் பங்குகளை வாங்கலாமா?

பிரீமியம் ஸ்டோரி

ச்சா எண்ணெய் விலை எப்போதும் ஏற்ற இறக்கத்தோடு இருக்கக்கூடியது. எனவே, கச்சா எண்ணெய் உற்பத்தி, சுத்திகரிப்பு, விற்பனை போன்றவற்றில் ஈடுபடும் எண்ணெய் நிறுவனங்களின் லாபமும், அவற்றின் பங்கு விலையும் ஏற்ற இறக்கத்தோடுதான் இருக்கும். கச்சா எண்ணெய் விலை மாற்ற வரலாற்றைப் பார்த்தால், 1980-ம் ஆண்டில் ஒரு பேரல் விலை 120 டாலர்கள் என்ற உச்சத்தைத் தொட்டிருக்கிறது. அதற்குப்பிறகு 2008-ம் ஆண்டில் 148 டாலர்கள் என்ற உச்சத்தையும், 2011-ம் ஆண்டில் 127 டாலர்கள் என்ற உச்சத்தையும், 2013-ம் ஆண்டில் 116 டாலர்கள் என்ற உச்சத்தையும் தொட்டிருக்கிறது. இதிலிருந்து, மூன்றுவிதமான காரணிகள், கச்சா எண்ணெய் விலையேற்றத்திற்குக் காரணமாக இருப்பதை நாம் தெரிந்துகொள்ளலாம்.

1. சர்வதேச கச்சா எண்ணெய் விலை

2. டாலருக்கு நிகரான இந்திய ரூபாயின் மதிப்பு

3. கச்சா எண்ணெய்க்கான தேவை

ஓ.என்.ஜி.சி நிறுவனம், கச்சா எண்ணெய்யைச் சுத்திகரிக்க மட்டும் செய்கிறது. இது தவிர்த்த மற்ற எண்ணெய் நிறுவனங்களான ஐ.ஓ.சி,    ஹெச்.பி.சி.எல், பி.பி.சி.எல், ரிலையன்ஸ் மற்றும் எஸ்ஸார் போன்ற நிறுவனங்கள் பெருமளவு விற்பனையிலும், ஓரளவு சுத்திகரிப்பிலும் ஈடுபடுகின்றன. இதில், சுத்திகரிப்பின்மூலம் கிடைக்கும் லாபத்தை, மொத்த சுத்திகரிப்பு லாபம் (Gross Refining Margin - GRM) என்கிறார்கள்.

எண்ணெய் நிறுவனப் பங்குகளை வாங்கலாமா?

நடப்பு நிதியாண்டின் முதல் காலாண்டில் ஐ.ஓ.சி நிறுவனத்தின் ஜி.ஆர்.எம் பேரலுக்கு 4.32 டாலர். இது கடந்த ஆண்டின் இதே காலாண்டில் 9.98 டாலர் என்றிருந்தது. ஹெச்.பி.சி.எல் நிறுவனத்தில் தற்போது 5.86 டாலராக உள்ளது. கடந்த ஆண்டில் 6.83 டாலர். எஸ்ஸார் நிறுவனத்தில்  தற்போது 10 டாலர். ரிலையன்ஸ் நிறுவனத்தில் 11.9 டாலர். 

விநியோகத்தைப் பொறுத்தவரை, ஐ.ஓ.சி அதிக எண்ணிக்கையிலான பெட்ரோல் நிரப்பு நிலையங்களை நடத்துகிறது. இதையடுத்து, ஹெச்.பி.சி.எல், பி.பி.சி.எல் மற்றும் ரிலையன்ஸ் நிறுவனங்கள் வருகின்றன. கடந்த ஆறு ஆண்டுகளில் இந்தியாவிலுள்ள பெட்ரோல் நிரப்பு நிலையங்களின் எண்ணிக்கை 45% அதிகரித்துள்ளது. உலக அளவில், இந்தத் துறையில் வெகுவேகமாக வளர்ந்துவரும் நாடாக இந்தியா உள்ளது. 

இதன்மூலம்  விலை ஏற்ற இறக்கத்திற்கான காரணங் களை எளிதாகப் புரிந்து கொள்ளலாம். பெட்ரோ லியப் பொருள்களின் விலை அதிகரித்தபோதும், டாலருக்கு நிகரான ரூபாய் மதிப்பு சரிந்தபோதும், பெட் ரோலியத்துக்கான பொருள் கள் தேவை குறைந்தபோதும் முதலீட்டாளர்கள் எண்ணெய் நிறுவனப் பங்கு களில் முதலீடு செய்ய ஆர்வம் காட்டுவதற்கான வேறு சில காரணங்களைத் தற்போது காண்போம்.

வாகனத் துறை வளர்ச்சி

இந்தியப் பொருளாதாரத் தில் விரைவாக வளர்ந்துவரும் துறைகளில் வாகன விற்பனையும் ஒன்று. கடந்த  2017-18-ம் நிதியாண்டில் வாகன விற்பனை 12% வளர்ச்சி பெற்றுள்ளது. வாகன விற்பனையில் இந்தியா விரைவாக வளர்ச்சியடைந்து, உலக அளவில் நான்காவது இடத்தைப் பெற்றுள்ளது. இந்தத் துறையில் ஜெர்மனியை இந்தியா பின்னுக்குத் தள்ளியுள்ளது குறிப்பிடத்தக்கதாகும்.

வாகன விற்பனையானது போக்குவரத்துத் தேவைக்காகவும், செல்வசெழிப்பைக் காட்டுவதற்காகவும் அதிகரிக்கிறது. இருசக்கர வாகனம், நான்கு சக்கர வாகனம் ஆகிய இரண்டுக்கும் இது பொருந்தும். பொதுத்துறை போக்குவரத்தின் மந்தமான வளர்ச்சியும்கூட வாகன விற்பனை அதிகரிப்பிற்குக் காரணமாகும். ஓலா, ஊபர் போன்ற வாகன சேவை வழங்கும் நிறுவனங்களும்கூட வாகனப் பெருக்கத்திற்குக் காரணமாகும். இந்த வாகனங்கள் அனைத்திற்கும் பெட்ரோலியத் தேவை இருக்கிறது. ஆக, வாகன விற்பனை அதிகரித்துவருவது, பெட்ரோலியத் தேவை அதிகரிப்புக்குக் காரணமாகிறது. எனவே எண்ணெய் நிறுவனங்களுக்கான தேவையும் அதிகரிக்கிறது.

எண்ணெய் நிறுவனப் பங்குகளை வாங்கலாமா?

விமானப் போக்குவரத்து வளர்ச்சி

இந்திய விமானப் போக்குவரத்துத் துறையும் வேகமாக வளர்ந்துவரும் துறையாகும். இந்திய விமானப் போக்குவரத்துத் துறையானது உலக அளவில் மூன்றாவது பெரிய இடத்தைப் பிடிக்க வாய்ப் புள்ளது. நாம் வியாபாரத்திற் காகவும், பணி நிமித்தமாகவும், சுற்றுலாவுக்காகவும் விமானப் போக்குவரத்தை அதிகமாகப் பயன்படுத்து கிறோம். உள்நாட்டு விமானப் போக்குவரத்துத் துறை கடந்த 2017-18-ல் 18.28% வளர்ச்சி கண்டுள்ளது. இதன் காரணமாக விமான பெட்ரோலியத் தேவை அதிகரித்துள்ளது. இதுவும் எண்ணெய் நிறுவனங்களின் வளர்ச்சிக்குப் பெரிதும் காரணமாகிறது.

குறைவான தயாரிப்பு மற்றும் ஈரானுக்குத் தடை

பெட்ரோலிய விலையை உயர்த்துவதற்காக, பெட்ரோலிய உற்பத்தியைக் குறைக்க, பெட்ரோலிய ஏற்றுமதி நாடுகளின் அமைப்பு கடந்த ஆண்டு முடிவெடுத்தது. உற்பத்திக் குறைவு காரணமாக சீன மற்றும் இந்தியச் சந்தைகளில் பெட்ரோலியத் தேவை அதிகரித்து, அதன் விலை ஒரு பேரலுக்கு 35 - 40 டாலர்கள் என்ற அளவிலிருந்து 85 டாலர்களாக உயர்ந்தது. எண்ணெய் உற்பத்தி நாடுகள் சிலவற்றில் தடைகளை நீக்கினார்கள். இந்த நிலையில், கூடுதலாக எண்ணெய் தேவைப்படுவோர் தங்களை அணுகினால், அதிக அளவில் எண்ணெய் விற்பனை செய்யத் தயாராக இருப்பதாக ரஷ்யா அறிவித்தது. 2018-ம் ஆண்டில் பி.பி(BP) வெளியிட்ட உலக எரிசக்தி புள்ளிவிவரத்தில் உலக அளவில் நாளொன்றுக்கு 92.6 மில்லியன் பேரல்கள் பெட்ரோலியப் பொருள்கள் உற்பத்தி செய்து சாதனை படைத்துள்ளதாகத் தெரிய வந்துள்ளது.

பெட்ரோலியப் பொருள்கள் உற்பத்தியில் தொடர்ச்சியாக எட்டாவது ஆண்டு உயர்வு கண்டுள்ளது குறிப்பிடத்தக்கதாகும். பெட்ரோலியப் பொருள்கள் பயன்பாட்டோடு பயோகேஸ், நிலக்கரி, இயற்கை எரிவாயு போன்றவற்றின் பயன்பாடும் சேர்வதால் மொத்த எரிசக்தி பயன்பாடு சற்று அதிகரித்து, நாளொன்றுக்கு 98.2 மில்லியன் பேரல்கள் என்ற சாதனையை எட்டியுள்ளது.

பேரலுக்கு 100 டாலர் வரை

பெட்ரோலியத் தேவைகள் அதிகரித்துள்ள சூழலில் ஈரான் மீதான அமெரிக்கத் தடை நவம்பர் நான்காம் தேதி நடைமுறைப்படுத்தப் படுகிறது. இதன் காரணமாக சப்ளை குறைந்து, கச்சா எண்ணெய் விலை பேரலுக்கு 100 டாலர்கள்வரை எட்ட வாய்ப்புள்ளது என மே மாதத்தில் வெளியான அமெரிக்காவின் மெரில் லின்ச் வங்கியின் அறிக்கை தெரிவிக்கிறது. அப்படி நடந்தால் இந்தியாவிலும் பெட்ரோல், டீசல் விலை அதிகரிக்கக்கூடும்.

கச்சா எண்ணெய்யை ஈரான் ஏற்றுமதி செய்யத் தடை மற்றும் எண்ணெய் உற்பத்தியில் வலுவான ஒபெக் கூட்டமைப்பு நிலைப்பாடும் சேர்ந்து இந்திய எண்ணெய் சுத்திகரிப்பு நிறுவனங்களுக்கும் பாதிப்பை ஏற்படுத்துகின்றன.

அமெரிக்கா தனது நிலைப் பாட்டை மாற்றிக்கொள்ளுமென அவர்கள் நம்புகிறார்கள். கடந்த 2017-ம் ஆண்டில் அமெரிக்காவிலிருந்து இந்தியாவிற்கான எண்ணெய் ஏற்றுமதி 8 மில்லியன் பேரல்களாக இருந்தது. இந்த அளவை 2018 ஜூலை முதல் 15 மில்லியன் பேரல்களாக உயர்த்துவதாக அமெரிக்கா அறிவித்தது.

எனினும், இலவச சரக்கு சேவை, தளர்த்தப்பட்ட கடன் வழிமுறைகள் என ஈரான் பல்வேறு சலுகைகளை இந்தியாவிற்குத் தருவதால், அதோடு ஒப்பிடுகையில் அமெரிக்காவிலிருந்து இறக்குமதி செய்வதற்கான செலவு அதிகமாகவே உள்ளது. எனவே, இந்தத் தடைகள் சுத்திகரிப்பு நிறுவனங்களைப் பாதித்தாலும், இறுதியில் எண்ணெய் நிறுவனங்களுக்கு லாபமாகவே அமையும்.

முதலீட்டை அதிகரிக்கலாம்

மேற்கூறியவற்றின் மூலம் பெட்ரோலியத் தேவைகள் தற்போது அதிகரித்திருப்பது கண்கூடாகத் தெரிகிறது. பெட்ரோலிய விலையில் சிறிய அளவில் குறைத்திருப்பது பெட்ரோலிய நிறுவனங்களுக்குப் பாதிப்பைத் தராது.

எனினும், இந்த அறிவிப்பு வந்தபோது பங்கு விலைகள்  சரிந்தன. எப்படியிருப்பினும், தண்ணீருக்கு அடுத்தபடியான தேவையாக எரிசக்தி இருப்பதால், பெட்ரோலிய நிறுவனப் பங்குகள் இன்னமும் முதலீட்டாளர்களை ஈர்க்கின்றன. இந்தப் பங்குகளில் ஏற்கெனவே முதலீடு செய்திருப்பவர்கள், முதலீட்டை அதிகரிக்கலாம். இதுவரை முதலீடே செய்யாத வர்கள் இந்தப் பங்குகளில் முதலீடு செய்யலாம்.

- ரெஜி தாமஸ், பங்குச் சந்தை நிபுணர்

தொகுப்பு: தெ.சு.கவுதமன்

இந்திய வாடிக்கையாளர்களின் மனநிலை!

நம் மக்கள் பெட்ரோல் போடுவதைத் துல்லியமாகக் கவனித்தோமானால், பெரும்பாலும் இவர்கள் லிட்டர் கணக்கில் வாங்காமல் ரூ.100, ரூ.200, ரூ.500, ரூ.1,000 என்ற கணக்கில்தான் வாங்குவார்கள். இப்படி ஒரு குறிப்பிட்ட தொகையில் பெட்ரோல் போடும் வழக்கத்தால், பெட்ரோல் விலை குறைவாக இருக்கும்போது கிடைக்கிற அளவைவிட விலை அதிகரிக்கும்போது அளவு குறைவாகக் கிடைக்கும். இது நமக்குப் புரியாததால், விலை குறைவாக இருக்கும்போது அதிகமான பெட்ரோல் வாங்கினால் லாபம் என்பதை அறிவதில்லை. தற்போது பெட்ரோல் விலை தினமும் மாறுவதால், குறிப்பிட்ட தொகைக்குக் கொஞ்சம் கொஞ்சமாக அடிக்கடி பெட்ரோல் வாங்குகிறார்கள். இதனால் எண்ணெய் நிறுவனங்களுக்கு லாபம் அதிகரிக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு