Published:Updated:

ஷேர்லக்: நீண்டகால முதலீட்டுக்கு ஏற்ற சந்தை!

ஒட்டுமொத்த விகடனுக்கும் ஒரே ஷார்ட்கட்

Use App
ஷேர்லக்: நீண்டகால முதலீட்டுக்கு ஏற்ற சந்தை!
ஷேர்லக்: நீண்டகால முதலீட்டுக்கு ஏற்ற சந்தை!

ஷேர்லக்: நீண்டகால முதலீட்டுக்கு ஏற்ற சந்தை!

பிரீமியம் ஸ்டோரி

ஷேர்லக் கேட்டுக்கொண்டபடி நாம் வெள்ளிக்கிழமை காலையிலேயே கேள்விகளை அனுப்பிவைத்தோம். சரியாக மாலை நான்கு மணிக்கு நம் மெயிலுக்குப் பதில்களை அனுப்பிவைத்தார் ஷேர்லக். இனி நம் கேள்விகளும், அவரது பதில்களும்...

கடன் போர்ட்ஃபோலியோ வாங்குவதை எஸ்.பி.ஐ அதிகரித்துள்ளதே?

“தனது கடன் போர்ட்ஃபோலியோவை கவர்ச்சிகரமான வட்டி விகிதத்தில் விரிவுபடுத்த இதுவே நல்ல வாய்ப்பு என எஸ்.பி.ஐ வங்கி கருதுவதால்,  வங்கி அல்லாத நிதி நிறுவனங்களிடமிருந்து நல்ல தரமான போர்ட்ஃபோலியோ சொத்துகளை வாங்குவதற்கான இலக்கை மூன்று மடங்காக்கி உள்ளது. முதலில், நடப்பு நிதியாண்டில்  15,000 கோடி ரூபாய் அளவுக்குக் கடன் போர்ட்ஃபோலியோவை வாங்க திட்டமிட்டிருந்த எஸ்.பி.ஐ, தற்போது அந்த இலக்கை மும்மடங்கு உயர்த்தி, 45,000 கோடி ரூபாயாக அதிகரித்துள்ளது. இதன் காரணமாக, அக்டோபர் 10-ம் தேதியன்று வங்கி அல்லாத நிதி நிறுவனங்களின் பங்குகள் விலை ஏற்றத்தைச் சந்தித்தன. ஸ்ரீராம் டிரான்ஸ்போர்ட் ஃபைனான்ஸ் 14%, பஜாஜ் ஃபைனானஸ் 10.18%, டி.ஹெச்.எஃப்.எல் பங்கு விலை 18% உயர்ந்து காணப்பட்டன. அதேபோன்று ஜே.எம் ஃபைனான்ஷியல் 7.9%, ஐ.ஐ.எஃப்.எல் 3.72% உயர்ந்து காணப்பட்டன. எஸ்.பி.ஐ பங்கு விலையும் உயர ஆரம்பித்துள்ளது.”

ஷேர்லக்: நீண்டகால முதலீட்டுக்கு ஏற்ற சந்தை!

இரண்டாது காலாண்டு முடிவுகள் வர ஆரம்பித்திருக்கிறதே?

“பந்தன் வங்கியின் வட்டி வருவாய் அதிகரித்ததால் நிகர லாபம் 47.3% அதிகரித்துள்ளது. காலாண்டு முடிவு வெளியான அன்று, பந்தன் வங்கி பங்கு விலை 7% அதிகரித்துக் காணப்பட்டது.

டி.சி.எஸ்-ன் நிகர லாபம் 24% அதிகரித்துள்ளது. அதேநேரத்தில், எதிர்பார்த்ததைவிட  செப்டம்பர் காலாண்டு முடிவு சற்று மந்தமாக இருப்பதால், முதலீட்டாளர்களின் சென்டிமென்ட் பாதிக்கப்பட்டுள்ளது. இதன் பங்கின் விலை வெள்ளிக்கிழமை சுமார் 3% குறைந்தது. அக்டோபரில் மட்டும் இந்தப் பங்கின் விலை 15% இறக்கம் கண்டிருக்கிறது.”

 2019-ம் ஆண்டின் முதலாவது காலாண்டில் ஆர்.பி.ஐ வட்டியை உயர்த்தும் என்கிறார்களே?

“2019, முதலாவது காலாண்டுக்கான நிதிக் கொள்கை அறிவிப்பின்போது, ரிசர்வ் வங்கி வட்டியை 0.25% உயர்த்தும் என பன்னாட்டு நிதி நிறுவனமான கோல்டுமேன் சாக்ஸ் தெரிவித்துள்ளது. பணவீக்கத்தை ரிசர்வ் வங்கி குறைத்து மதிப்பிட்டுள்ளதாகத் தெரிவித்துள்ள கோல்டுமேன் சாக்ஸ், அது 5.2 சதவிகிதமாக இருக்கும் என மதிப்பிட்டுள்ளது. மேலும், 2019-ம் நிதியாண்டின் இரண்டாவது, மூன்றாவது மற்றும் நான்காவது காலாண்டிலும் வட்டியை தலா 0.25% ரிசர்வ் வங்கி உயர்த்தக்கூடும் என்கிறது.”

என்.எல்.சி பங்கு விலை ஏற்றம் கண்டுள்ளதே?

“என்.எல்.சி நிறுவனத்தின் இயக்குநர் குழு கூட்டத்தில், பங்கு ஒன்று 88 ரூபாய் என்ற விலையில், (முந்தைய நாள் வர்த்தக முடிவில் காணப்பட்ட விலையைவிட 18.99% அதிகமாக) 1,250 கோடி ரூபாய் மதிப்புள்ள அதன் 14.19 கோடி பங்குகளை திரும்ப வாங்க (பைபேக்) ஒப்புதல் அளிக்கப்பட்டது. இதைத் தொடர்ந்து, புதன் கிழமையன்று காலை, அதன் பங்கு விலை 11.89% உயர்ந்து 82.75 ரூபாயாகக் காணப்பட்டது. என்.எல்.சி நிறுவனத்தில் மத்திய அரசு 83.94% பங்கு களை வைத்துள்ள நிலையில், இதன் விலை கடந்த ஓராண்டில் 14.74 சதவிகிதமும், இந்த ஆண்டு தொடக்கத்திலிருந்து 27.51 சதவிகிதமும் இழப்பைச் சந்தித்தது குறிப்பிடத்தக்கது.”

டாடா மோட்டார்ஸ் பங்கு விலை வீழ்ச்சி கண்டுள்ளதே?

“டாடா மோட்டார்ஸ் செப்டம்பர் மாத விற்பனை, இங்கிலாந்தில் கடந்த ஆறாண்டுகளில் இல்லாத சரிவைச் சந்தித்துள்ளது. அதேபோன்று சீனாவிலும் அதன் வாகன விற்பனை 46.2% சரிவைச் சந்தித்துள்ளது. இதுகுறித்த தகவல் வெளியானதைத் தொடர்ந்து, அக்டோபர் 9-ம் தேதியன்று டாடா மோட்டார்ஸ் பங்கு விலை, 13.14% சரிந்தது.

லார்ஜ்கேப் பங்கான டாடா மோட்டார்ஸ், அதற்கு முந்தைய ஐந்து தினங்களாக 18.67% சரிவைச் சந்தித்த நிலையில், கடந்த ஓராண்டில் 56.25% சரிவைச் சந்தித்துள்ளது. அதேநேரத்தில், சுமார் 40 பங்கு தரகு நிறுவனங்களில் 25 நிறுவனங் கள், இந்த நிறுவனப் பங்கில் முதலீடு செய்யலாம் என பரிந்துரை செய்துள்ளன. ஒரே ஒரு பங்கு தரகு நிறுவனம் மட்டும்தான் விற்றுவிட்டு வெளியேறச் சொல்லியிருக்கிறது.”

ஷேர்லக்: நீண்டகால முதலீட்டுக்கு ஏற்ற சந்தை!

சர்வதேச பங்குச் சந்தைகள் சரிந்துள்ள நிலையில், தங்கம் விலையில் ஏற்றம் ஏதுமில்லையே?

“வழக்கமாக பங்குச் சந்தைகள் சரிந்தால், தங்கத்தின் விலையில் ஏற்றம் வரும். ஆனால், வியாழக்கிழமையன்று அமெரிக்க பங்குச் சந்தை உள்ளிட்ட சர்வதேச சந்தைகள் சரிந்தபோதிலும், தங்கத்தின் விலையில் ஏற்றம் ஏதுமில்லை.

இத்தனைக்கும் இந்த வாரத் தொடக்கத்தில், ஒரு அவுன்ஸ் தங்கம் 1,185 டாலர் என்ற விலையிலிருந்து சற்று உயர்ந்தபோதிலும், வியாழன்று பங்குச் சந்தையில் ஏற்பட்ட சரிவு, அதில் பெரிய தாக்கம் எதையும் ஏற்படுத்தவில்லை என்றே பொருளாதார வல்லுநர்கள் கூறுகின்றனர்.”

இந்தியப் பங்குச் சந்தை இன்னும் அதிக ஏற்ற இறக்கத்தில் இருக்கிறதே?

“எல்லாம் சர்வதேச காரணங்கள் தான். அமெரிக்கா-சீனா வர்த்தகப் போர், கச்சா எண்ணெய் விலை ஏற்றம், லிக்விடிட்டி போன்றவை காரணங்களாக இருந்தாலும், முதலீட்டாளர்களின் சென்டிமென்ட் மிக முக்கியப் பங்கு வகிக்கிறது.

தற்போதைய பங்குச் சந்தை இறக்கம் என்பது இந்தியாவுக்கு மட்டுமல்ல; சர்வதேச சந்தைகளின் நிலவரமும் சொல்லிக் கொள்ளும்படி இல்லை. 2018-ம் ஆண்டில் அக்டோபர் 11-ம் தேதி வரைக்கும் மிக அதிகமாக,  அதாவது 22% சீனப் பங்குச் சந்தை வீழ்ச்சிக் கண்டி ருக்கிறது.

அடுத்த இடங்களில் தென் கொரியா (-14%), தென் ஆப்பிரிக்கா (-13%), இந்தோனேஷியா (-10%) ஆகிய நாடுகள் உள்ளது. இந்தக் கால கட்டத்தில் இந்தியச் சந்தைகளின் இறக்கம் என்பது வெறும் 0.2% ஆகதான் உள்ளது. அந்த வகையில், நல்ல நிறுவனப் பங்குகள் மலிவான விலையில் கிடைக்கும்போது போர்ஃட்போலியோவில் சேர்த்து வருவது நீண்ட காலத்தில் கணிசமான லாபத்தைப் பெற உதவும் என்கிறார்கள் முன்னணி அனலிஸ்ட்கள்.”

இப்போதைய இந்தியப் பங்குச் சந்தை சரிவு, பெரும் முதலீட்டாளர்களைக்கூட விட்டு வைக்கவில்லை போலிருக்கிறதே?

“பங்குச் சந்தையில் செப்டம்பரில் ஏற்பட்ட தொடர் வீழ்ச்சி, புகழ்பெற்ற முதலீட்டாளர்களின் பி.எம்.எஸ் (போர்ட்ஃபோலியோ மேனேஜ்மென்ட் சர்வீசஸ்)  மூலம் நிர்வகிக்கப்படும் ஃபண்டுகளைக் கூட விட்டு வைக்கவில்லை.

கொச்சியைச் சேர்ந்த பொரிஞ்சு வெலியாத் பி.எம்.எஸ், செப்டம்பரில் 20% சரிவைச் சந்தித்துள்ளதாக, செபி வெளியிட்ட புள்ளி விவரத் தகவல் தெரிவிக்கிறது. அதேசமயம் இது கடந்த ஜூலை மற்றும் ஆகஸ்டில் முறையே 3.70% மற்றும் 6.33% ஆதாயம் அடைந்திருந்தன. பசந்த் மகேஸ்வரி வெல்த் அடைவர்ஸ் நிறுவனத்தின் பி.எம்.எஸ் மதிப்பு செப்டம்பரில் 21.5% வீழ்ச்சி கண்டுள்ளது. இது ஆகஸ்ட் மற்றும் ஜூலை மாதங்களில் முறையே 2.4% மற்றும் 15.9% வருமானத்தைக் கொடுத்திருக்கிறது.”

தேர்தல் நெருங்கிவரும் நிலையில், அது முதலீட்டாளர்களுக்குச் சாதகமாக இருக்குமா அல்லது பாதகமாக இருக்குமா?

“கடந்த 20 ஆண்டுகளுக்கும் மேலான புள்ளி விவரங்களை ஆராயும்போது, தேர்தல் ஆண்டில், குறிப்பாகத் தேர்தலுக்கு ஆறு மாதங்களுக்கு முன்பிருந்தே பங்குச் சந்தையில் சரிவு ஏற்படத் தொடங்கி, ஒரு மிகப்பெரிய கரெக்‌ஷனுக்குப் பின்னர் நிலைமை மாறுகிறது. தற்போது இந்தியப் சந்தையில் அதுபோன்ற கரெக்‌ஷன் நிலைமைதான் காணப்படுகிறது.

தேர்தல் முடிந்து, புதிய அரசு ஆட்சியமைத்த பின்னரும், பங்குச் சந்தையில் ஆறு மாத காலத்துக்கு இந்த இறக்கம் நீடிக்கும். கடந்த காலங்களில் இதுபோன்ற காலத்தில் முதலீடு செய்தவர்களில் ஐந்தில் நான்கு பேர் ஆதாயமடைந்திருப்பதாகப் புள்ளி விவரங்கள் சொல்கின்றன. எனவே, நீண்ட கால முதலீட்டாளர்கள், தற்போதைய இறக்க நிலையை வாய்ப்பாகப் பயன்படுத்திக்கொண்டு முதலீடுகளைத் தொடங்கலாம் என்பதே நிபுணர்களின் கருத்தாக உள்ளது.”

- ஷேர்லக்

ஓவியம்: அரஸ்


பி.ஏ.சி.எல் மோசடி : 1,13,352 பேருக்கு ரூ.2,500 திருப்பி அளிப்பு!

பி.ஏ.சி.எல் நிறுவனம் 5.5 கோடி முதலீட்டாளர்களிடமிருந்து சுமார் 49,100 கோடி ரூபாய் மோசடி செய்துள்ளது. பி.ஏ.சி.எல் நிறுவனத்தின் சொத்துகளை விற்பனை செய்யும் வேலையில் செபி அமைப்பு இறங்கியது. விற்பனை மூலமான தொகையில் முதலீட்டாளர்களுக்கு தலா ரூ.2,500 ரூபாயைத் திருப்பித்தர செபி முடிவு செய்தது. அதற்காக பி.ஏ.சி.எல் நிறுவனத்தின் முதலீட்டாளர்களிடமிருந்து கடந்த 2018, மார்ச் 31-ம் தேதி வரை விண்ணப்பத்தைப் பெற்றது. 1,13,355 முதலீட்டாளர்களுக்கு 2,500 ரூபாய் திருப்பித் தரப்பட்டுள்ளதாக செபி வெளியிட்டுள்ள அறிக்கை தெரிவிக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு