பங்குச் சந்தையில் ராபின் ஹூட் முதலீட்டாளர்கள்..! - உஷார்... உஷார்..!

கடந்த ஆறு மாதங்களில் கோவிட்-19 நோய்த் தொற்று தீவிரமாக இருந்தபோதும், அமெரிக்காவிலும் இந்தியாவிலும் பங்குச் சந்தைகள் வேகமான வளர்ச்சி கண்டன. இதற்குக் காரணம், ராபின் ஹூட் முதலீட்டாளர்கள்தாம் என்று சொல்லப்படுகிறது. யார் இந்த ராபின்ஹூட் முதலீட்டாளர்கள்..? . அமெரிக்காவில் ராபின் ஹூட் என்ற நிறுவனம், அங்கு எல்லோரும் எளிதில் சந்தையில் நுழைந்து பங்குகளை வாங்கவும் விற்கவும் மொபைல் ஆப் ஒன்றை ராபின் ஹூட் என்ற பெயரில் வெளியிட்டது. அது மிகவும் பிரபலமாகி நிறைய புதிய முதலீட்டாளர்களை சந்தைக்குக் கொண்டு வந்தது. அதுபோல, கொரோனா காலத்தில் உலகம் முழுவதும் புதிய முதலீட்டாளர்கள் சந்தைக்கு வந்தவண்ணம் உள்ளனர். இவர்களைத்தான் ராபின் ஹூட் முதலீட்டாளர்கள் என்று குறிப்பிடுகிறார்கள்.

. அமெரிக்காவில் ஆப் மூலம் அதிக இளைஞர்கள் பங்குச் சந்தைக்குள் நுழைந்திருக்கிறார்கள் என்றால், நம் நாட்டில் பல ஆயிரம் இளைஞர்கள் கடந்த மாதங்களில் டீமேட் தொடங்கி யிருக்கிறார்கள். ஊரடங்கு காலத்தில் முதல் நான்கு மாதங்களில் புதிய டீமேட் கணக்குகள் ஆரம்பிப்பது 300% வளர்ச்சி கண்டுள்ளது.

. உஷாரோ உஷார்..!

பங்குச் சந்தை என்பதில் யார் வேண்டுமானாலும் பங்கு வாங்கலாம் அல்லது விற்கலாம். நிறைய பேர் சந்தையில் பங்கு பெறுவது சந்தைக்கு நல்லதே. ஆனால், சந்தையின் ஏற்ற இறக்கங்கள், நெளிவுசுளிவுகள் அறிந்து சந்தையில் பங்கு பெறுவது சாலச் சிறந்தது. அதைத் தவிர்த்து விளையாட்டாக எண்ணி வீடியோ கேம் மாதிரி சந்தையில் பங்கு பெறுவது ஆபத்தானது.

. இது மாதிரியான முதலீட்டாளர்கள் கவனத்தில் கொள்ள வேண்டிய முக்கியமான விஷயங்கள் இதோ...

1. Market is zero sum game என்று சொல்வார்கள். ஒருவரின் நஷ்டம், அடுத்தவரின் லாபம். நமது லாபம் இன்னொருவரின் நஷ்டம். நஷ்டம் வரும்போது அது நிதர்சனமாகவும் நிலையானதாகவும் இருக்கும்.

2. இந்தியாவில் சுமார் 6,000 நிறுவனங்கள் பங்குச் சந்தையில் பட்டியலிடப்பட்டுள்ளன. இதில் தினம்தோறும் சந்தையில் வர்த்தகமாகும் பங்குகள் மிகக் குறைவு. பெரிய நிறுவனங்கள் 100 (லார்ஜ்கேப்), நடுத்தர நிறுவனங்கள் 250 (மிட்கேப்) மற்றவை சிறு நிறுவனங்கள் (ஸ்மால் கேப்). எந்த வகையில் வாங்கினோம் என்று புரிந்து வாங்கவும். ஒவ்வொன்றிலும் சாதக பாதகங்கள் உள்ளன. எனவே, வாங்கும் முன் நல்ல சிறந்த நிறுவனப் பங்குகளைத் தேர்ந்தெடுக்க வேண்டும்.

3. முகமதிப்புக்குக் குறைந்த விலை உள்ள பைசா பங்குகள் (Penny Stocks) ரூ.5-க்குக் கீழ் உள்ள பங்கு, ரூ.50-க்குக் கீழ் உள்ள பங்கு என்று பார்க்காமல், நல்ல நிறுவனப் பங்குகளா என்று ஆராய்வது நல்லது.

4. சந்தை ஏறும்போது பங்குகள் வாங்குவது எளிது. அதே பங்குகளை சந்தை இறங்கும்போது நாம் விற்க முயற்சி செய்தால், நஷ்டத்துக்கு விற்கத் தயாராக இருந்தாலும் முடியாமல் போகலாம். வர்த்தகமாகும் பங்குகளின் தன்மை அறிந்து செயல்பட வேண்டும். உதாரணமாக, சந்தையில் எல்லா நாள்களிலும், எல்லா நேரத்திலும் வர்த்தகமாகாமல் குறைந்த அளவில் வர்த்தகமாகும் பங்குகளைத் தவிர்ப்பது நல்லது.

. 5. நண்பர் கூறினார், அடுத்த வீட்டுக்காரர் சொன்னார், டிவியில் பார்த்தோம், வாட்ஸ் அப்பில் வந்தது என்று பங்குகள் வாங்குவது பெரும்பாலும் லாபம் தருவதில்லை.

. 6. கடந்த 10 வருடங்களில் ஒரு ரூபாய்கூட வருமானம் இல்லாத நிறுவனங்களை இனங்கண்டு தவிர்ப்பது நல்லது.

7. ஒரு பங்கின் விலை இறங்கிக்கொண்டே இருக்கிறது என்றால், அவசரப்பட்டு வாங்க வேண்டாம். காரணம், அது கீழே விழும் கத்தி. அதைப் பிடித்து ஏன் கையைக் காயப்படுத்திக் கொள்ள வேண்டும்?

முடிவாக, மிக மிக அதிக லாபமும் நஷ்டமும் கிடைக்க வாய்ப்புண்டு. மார்ச் மாதத்தில் ரிலையன்ஸ் பங்கை ரூ.850-க்கு வாங்கி செப்டம்பரில் 2,000 ரூபாய்க்கு விற்பது சந்தோஷம். அதே சந்தையில் யெஸ் பேங்க் பங்கை 367 ரூபாய்க்கு வாங்கி, 14 ரூபாயில் விற்றவர்களும் இருக்கவே செய்கிறார்கள் என்பதை மறக்கக் கூடாது.

தனிமனித விறுப்புவெறுப்புகளுக்கேற்ப சந்தை ஏறுவதுமில்லை, இறங்குவதும் இல்லை. சந்தையைப் பற்றி முதலில் தெளிவு பெற்றுக் கொண்டு சந்தைக்குள் வாருங்கள்!

ஒரு பெண் - ஓர் ஆண் - மாரத்தான்! - ஒலிம்பிக் டைரி குறிப்புகள் (அத்தியாயம்-5)

`கோவை புறக்கணிக்கப்படுகிறது?' - சந்தேகம் எழுப்பும் வேலுமணி

``இதுவரைக்கும் இந்த இடம் குப்பைக் கிடங்கு; இனிமேல் குறுங்காடு!" - மகிழ்ச்சியில் திருவாரூர் மக்கள்

ஜூவி செய்தியின் எதிரொலி: குட்கா விற்பனையைத் தடுக்க மாவட்ட அளவில் குழுக்கள்!

Covid Questions: கொரோனாவிலிருந்து குணமாகியுள்ளேன்; கட்டுப்பாடற்ற நீரிழிவு உள்ளது; தடுப்பூசி போடலாமா?

பங்குச் சந்தையில் ராபின் ஹூட் முதலீட்டாளர்கள்..! - உஷார்... உஷார்..!

எம்.கண்ணன், நிதி ஆலோசகர்

விகடன் லேட்டஸ்ட்

ஒரு பெண் - ஓர் ஆண் - மாரத்தான்! - ஒலிம்பிக் டைரி குறிப்புகள் (அத்தியாயம்-5)

`கோவை புறக்கணிக்கப்படுகிறது?' - சந்தேகம் எழுப்பும் வேலுமணி

``இதுவரைக்கும் இந்த இடம் குப்பைக் கிடங்கு; இனிமேல் குறுங்காடு!" - மகிழ்ச்சியில் திருவாரூர் மக்கள்

ஜூவி செய்தியின் எதிரொலி: குட்கா விற்பனையைத் தடுக்க மாவட்ட அளவில் குழுக்கள்!

Covid Questions: கொரோனாவிலிருந்து குணமாகியுள்ளேன்; கட்டுப்பாடற்ற நீரிழிவு உள்ளது; தடுப்பூசி போடலாமா?

விகடன் லேட்டஸ்ட்

பங்குச் சந்தையில் ராபின் ஹூட் முதலீட்டாளர்கள்..! - உஷார்... உஷார்..!

எம்.கண்ணன், நிதி ஆலோசகர்