பங்குகள்... வாங்கலாம்... விற்கலாம்! - முதலீட்டாளர்கள் கவனத்துக்கு!

இ ந்தியப் பங்குச் சந்தையின் செயல்பாடுகளைப் பார்க்கும்போது, கடந்த ஆகஸ்ட் மாத இறுதியில் உருவான கரடியின் போக்கிலிருந்து இன்னும் மீண்டுவர வேண்டியிருக்கிறது என்று சொல்லலாம். இந்தக் கரடியின் போக்கிலிருந்து மீண்டுவருவதற்கான செயல்பாடுகள் சந்தையில் நிகழ்ந்தால், ஏற்றத்தின் போக்கைக் காணலாம் என முன்பே குறிப்பிட்டிருந்தோம். ஆனாலும், இரண்டு வாரங்களுக்கு மேலாகியும் சந்தை ஏற்றத்தின் போக்கில் நகர்வதற்கான சாத்தியக்கூறுகள் அமையாததால், இன்னமும் அதே நிலையில் திணறிக்கொண்டிருக்கிறது. . சந்தை நகர்வுகளில் மாற்றத்தை ஏற்படுத்தும் செய்திகளும் பெரிய அளவில் இல்லை. எனவே, சந்தையின் நகர்வுகளும் போக்கும் அந்நியச் சந்தைகளின் செயல்பாடுகளையொட்டியே இருக்கிறது. மேலும், அந்நிய முதலீட்டாளர்கள் தொடர்ந்து பங்குகளை வாங்குவதில் ஆர்வம் காட்டுவதால், சந்தையில் தொடர்ந்து முதலீடு வந்தவண்ணம் இருக்கிறது. ஆனால், உள்நாட்டு முதலீட்டாளர்கள் லாபத்தை எடுப்பதற்கான முயற்சிகளில் ஆர்வமாக இருப்பதால், பங்குகளை விற்று வருகின்றனர். பொதுவாகவே, இரு தரப்பின் செயல்பாடுகளும் மாறி மாறி ஏற்ற இறக்கத்துடன் இருப்பதால், சந்தை சமநிலையில் இயங்கிக்கொண்டிருக்கிறது எனலாம். ஆனாலும், அந்நிய முதலீட்டாளர்களின் செயல்பாடு தொடர்ந்து நல்ல சென்டிமென்டில் இருக்கிறது.

. கடந்த வாரத்தில் நிகழ்ந்த முக்கியமான சுவாரஸ்யமான நிகழ்வு என்றால், அது செபியிடமிருந்து மியூச்சுவல் ஃபண்ட் நிறுவனங்களுக்கு வந்திருக்கும் சுற்றறிக்கை. அதில் மல்ட்டிகேப் ஃபண்டுகளில் முதலீட்டை மாற்றியமைக்குமாறு கூறியுள்ளது. இந்தச் செய்தி ஸ்மால் மற்றும் மிட்கேப் பங்கு பிரிவுகளில் சிறிது பதற்றத்தை ஏற்படுத்தியுள்ளது. குறிப்பாக, ஸ்மால்கேப் பிரிவுகளில் புதிதாக முதலீடுகள் வருவதற்கான எதிர்பார்ப்புகளை உருவாக்கியிருக்கிறது. வர்த்தகர்களும் இந்தப் பிரிவை நோக்கி தங்களது கவனத்தைத் திருப்பியுள்ளனர். இதனால் லார்ஜ்கேப் பிரிவில் வர்த்தகர்களின் ஈடுபாடும் பங்களிப்பும் குறைந்துள்ளது. எனவே, கடந்த வாரத்தில் சந்தை நகர்வும் வர்த்தக வால்யூமும் குறைவான வரம்பில்தான் கன்சாலிடேஷன் ஆகியது.

வங்கித் துறையில் பெரிதும் எதிர்பார்க்கப்படும் மீட்சி இதுவரை நிகழவில்லை. காரணம், தொடர்ந்து வங்கித் துறை காளையின் போக்குக்கு மாறுவதற்கு திணறிக் கொண்டிருக்கிறது. துறை சார்ந்த செய்திகளும் பெரிய அளவில் தாக்கத்தை ஏற்படுத்தாததால் துறையின் சிரமம் தொடர்கிறது. அதேசமயம், கரடியின் போக்கில் சந்தையை மேலும் தள்ளுவதற்கான முயற்சிகளும் வெற்றி பெறவில்லை. எனவே, காளையின் போக்குக்கான நம்பிக்கையும் சந்தையில் தொடர்ந்து காணப்படுகிறது. சந்தையின் நகர்வுகளில் மாற்றத்தை ஏற்படுத்தும் செய்திகள் நிகழ்வுகள் வராதவரை குறிப்பிட்ட வரம்புக்குள் சந்தையின் செயல்பாடுகள் தொடரும். ஸ்மால் கேப் மற்றும் மிட்கேப் பிரிவுகளில் செயல்பாடுகள் அதிகமாக இருக்கும்.

. அட்வான்ஸ்டு என்சைம் டெக்னாலஜீஸ் (ADVENZYMES)

தற்போதைய விலை ரூ.246.35

வாங்கலாம்

இந்தப் பங்கில் இரண்டு வருடங்களுக்கு முன்பு தொடங்கி நீண்டகாலமாக நீடிக்கும் இறக்கமானது முடிவுக்கு வந்து, கடந்த சில மாதங்களில் மீண்டுவந்து ஏற்றம் காணத் தொடங்கியது. இந்தச் செயல்பாட்டில் பங்கின் சமீபத்திய பாட்டம் நிலையில் சிறப்பான பேட்டர்ன் உருவாகியிருக்கிறது. இது ஏற்றத்தின் போக்குக்கான அறிகுறியாக உள்ளது. தற்போது இந்தப் பங்கில் விலை நகர்வானது அதன் ரீட்ரேஸ்மென்ட் நிலைகளைக் கடந்து வந்துள்ளது. எனவே, அதன் நகர்வு ரூ.290 என்ற இலக்கு விலையை நோக்கி நகர்கிறது. ரூ.235-ல் ஸ்டாப்லாஸ் வைத்துக்கொள்ளவும்.

. எல் அண்ட் டி இன்ஃபோடெக் (LTI)

தற்போதைய விலை: ரூ.2,737.95

வாங்கலாம்

தகவல் தொழில்நுட்பத் துறை பங்குகள் தொடர்ந்து நல்ல டிமாண்டில் இருந்து வருகிறது. இந்தத் துறையின் வளர்ச்சியால் எல் அண்ட் டி குழும சாஃப்ட்வேர் நிறுவனப் பங்குகள் நல்ல ஏற்றத்தைக் கண்டுவருகின்றன. இதில் எல்.டி.டி.எஸ் நிறுவனப் பங்குடன் ஒப்பிடுகையில், லார்சன் அண்ட் டூப்ரோ இன்ஃபோடெக் நிறுவனப் பங்கு சிறப்பாகச் செயல்படுகிறது. எனவே, இந்தப் பங்கை வாங்குவதற்குப் பரிந்துரைக்கிறோம். அதேசமயம், இந்தப் பங்கை நீண்டகாலத்துக்கு வைத்திருப்பதற்கான சாத்தியங்களும் உள்ளன. எனவே எதிர்காலத்தில் இறக்கம் அடையும்போது எல்லாம் இந்தப் பங்கில் முதலீடு செய்யும் வாய்ப்பாக எடுத்துக்கொள்ளலாம். மேலும், சந்தை மதிப்பு அடிப்படையில் பங்குச் சந்தையின் முன்னணிப் பங்குகளில் ஒன்றாக இந்த நிறுவனப் பங்கு உருவாவதற்கான வாய்ப்புள்ளது. ரூ.2,500 ஸ்டாப்லாஸுடன் இந்தப் பங்கை வாங்கலாம்.

ஸைடஸ் வெல்னஸ் (ZYDUSWELL)

தற்போதைய விலை: ரூ.1,869.45

வாங்கலாம்

பார்மா துறை பங்குகளில் ஸைடஸ் வெல்னஸ் குறிப்பிடத்தக்க ஒன்றாக விளங்குகிறது. மேலும், ஓ.டி.சி பிளாட்ஃபார்மில் இந்த நிறுவனம் கவனம் செலுத்திவருகிறது. தற்போதுள்ள கொரோனா காலத்தில் இந்த நிறுவனம் வேகமாக வளரும் ஒன்றாக உள்ளது. எனவே, பங்கின் விலையும் நல்ல ஏற்றம் கண்டுள்ளது. விலை மேலும் ஏற்றமடைவதற்கான அறிகுறியுடன் இப்பங்கின் நகர்வுகள் உள்ளன.எனவே, குறுகியகாலத்தில் இந்தப் பங்கு ரூ.2,000 வரை ஏற்றமடையலாம். ரூ.1,775 ஸ்டாப்லாஸுடன் இந்தப் பங்கை வாங்கலாம்.

. டிஸ்க்ளெய்மர்: இங்கு பரிந்துரைக்கப்பட்ட பங்குகள் பரிந்துரை செய்த ஆசிரியர் (டாக்டர் சி.கே.நாராயண், நிர்வாக இயக்குநர், Growth Avenues, SEBI Registration (Research Analyst) INH000001964) வசம் இருக்கக்கூடும். முதலீட்டாளர்கள் பங்குச் சந்தையின் ரிஸ்க் அறிந்து நிபுணர்களின் ஆலோசனைப்படி முதலீட்டை மேற்கொள்ளவும்.

. டிரேடர் பக்கங்கள் மற்றும் எஃப் & ஓ பகுதியைப் படிக்க: https://bit.ly/2E9C4bA