கைகொடுக்கும் எஃப்.எம்.சி.ஜி பங்குகள்! - சந்தை இறக்கத்தில் சரியான ஆலோசனை

உ லகம் முழுவதும் கொரோனா தாக்கம் தீவிரமாக இருக்கும் நிலையில், ஏறக்குறைய எல்லாத் துறைகளுமே கடும் வீழ்ச்சியைக் கண்டுள்ளன. ஆனால், எஃப்.எம்.சி.ஜி (Fast Moving Consumer Goods) துறை மட்டும் நல்ல வளர்ச்சியைக் கண்டுவருகிறது. . பொதுவாக, `எஃப்.எம்.சி.ஜி பொருள்கள்’ என அழைக்கப்படும் பாக்கெட்டில் அடைக்கப்பட்ட உணவுப் பொருள்கள், குளிர்பானங்கள், பிஸ்கெட்கள், குளியலறைப் பயன்பாட்டுப் பொருள்கள் போன்றவை அத்தியாவசியப் பொருள்களாக இருப்பதால், அவற்றுக்கு அதிக தேவை இருக்கிறது. இந்த எஃப்.எம்.சி.ஜி பொருள்களுக்கு எந்தக் காலத்திலும் தேவை இருக்கும் என்பதால், இந்தத் துறை சார்ந்த நிறுவனங்களின் செயல்பாடுகளும் நன்றாக இருக்கும். எனவே, இந்த நிறுவனப் பங்குகள் கொடுக்கும் லாபமும் கவர்ச்சிகரமாக இருக்கும். கொரோனா காலத்தில் எஃப்.எம்.சி.ஜி துறையில் என்னென்ன விஷயங்களைக் கவனிக்க வேண்டும் என்று பார்ப்போம்.

. எஃப்.எம்.சி.ஜி பொருள்களின் நுகர்வு!

இந்த ஊரடங்கு காலத்தில் மக்களின் நுகர்வு முறை பெரிய மாற்றத்தைக் கண்டிருக்கிறது. ஊரடங்கு அறிவிக்கப்பட்ட வுடனேயே அத்தியாவசியப் பொருள்கள் கிடைக்காமல் போய்விடுமோ என்ற அச்சத்தின் காரணமாக மக்கள் அனைத்துப் பொருள்களையும் வாங்கிக் குவிக்க ஆரம்பித்தனர். இதனால் கடைகளில் நுகர்வுப் பொருள்களுக்கான தட்டுப்பாடும் நிலவியது. மேலும், ஊரடங்கு காலத்தில் குளிர்பானங்களின் நுகர்வு அளவு சரிந்திருக்கிறது. மக்கள் அதிகம் பொருள்கள் வாங்கக் கடைகளுக்கு வராத காரணத்தால் குளிர்பானங்கள் அதிக அளவில் விற்பனை ஆகவில்லை. இது எஃப்.எம்.சி.ஜி நிறுவனங்களின் இரண்டாவது காலாண்டு நிதிநிலை முடிவுகளில் நிச்சயம் பாதிப்பை ஏற்படுத்தும்.

. இம்பல்ஸ் உணவுகள்!

மக்கள் உண்பதற்குத் தேவையான நூடுல்ஸ்கள், பிஸ்கட் வகைகள், பதப்படுத்தப்பட்ட ஸ்நாக்ஸ்கள் போன்றவை அதிக அளவில் விற்பனை ஆகியுள்ளன. ஊரடங்கின் ஆரம்ப கட்டத்தில் அதைப் பற்றிய சரியான புரிந்துகொள்ளல் இல்லாத காரணத்தால், மக்கள் பொருள்களை வாங்கிக் குவித்தனர். அரசும் அத்தியாவசியப் பொருள்களை மட்டுமே விற்க அனுமதித்தது. இதனால், அத்தியாவசியப் பொருள்களான அரிசி, எண்ணெய், சர்க்கரை மற்றும் பருப்பு வகைகளின் தேவை முன்னெப்போதும் இல்லாத அளவுக்கு அதிகரித்தது.

. `கொரோனா பரவலைத் தடுக்க தனிநபர் சுகாதாரம் மற்றும் சுற்றுப்புறத்தைத் தூய்மையாக வைத்தல் ஆகியவை முக்கியம்’ என்று கூறப்பட்டதால் சோப்பு, சானிடைஸர் மற்றும் வீட்டைச் சுத்தம் செய்யப் பயன்படுத்தப்படும் பொருள்கள் ஆகியவை அதிகம் விற்பனையாகின்றன. ஆரம்பகட்டத்தில் சானிடைஸர்களின் விற்பனையில் தட்டுப்பாடு ஏற்பட்டாலும், இப்போது அதிக அளவில் விற்பனை செய்யப்படுகின்றன.

. நிறுவனங்களின் சிறப்பான செயல்பாட்டால் கடந்த ஒரு மாதத்தில் மட்டும் நிஃப்டி எஃப்.எம்.சி.ஜி குறியீடு 21% அதிகரித்திருக்கிறது. . அதனால், தற்போது பார்மாவுக்கு அடுத்து அதிகபட்ச ஆதாயத்தை எஃப்.எம்.சி.ஜி பெற்றிருக்கிறது. இதே காலத்தில், பார்மா இண்டெக்ஸ் 37% உயர்ந்திருக்கிறது.

சவால்கள்!

தற்போதிருக்கும் காலகட்டத்தில் எஃப்.எம்.சி.ஜி துறை மிகப்பெரிய சவால்களைச் சந்திக்க நேர்ந்திருக்கிறது. ஊரடங்கு காலத்தில் மூலப்பொருள்களின் தட்டுப்பாடு, குறைந்த வேலையாட்களின் வரவு மற்றும் போக்குவரத்து ஆகியவை இந்தத் துறைக்குப் பெரும் தடையாக உள்ளன. இப்போதே இந்தத் துறையின் எதிர்காலத்தை நிர்ணயித்துவிட முடியாது. ஆனால், இனிவரும் காலத்தில், மக்கள் இ-காமர்ஸ், ஹோம் டெலிவரிக்கு முன்னுரிமை அளிப்பார்கள். இதற்கேற்ப எஃப்.எம்.சி.ஜி நிறுவனங்கள் மாற்றிக்கொள்ள நேரிடும்.

. இனிவரும் காலத்தில் காய்கறிகள், இறைச்சிகளைத் தரமான மற்றும் பாதுகாப்பான முறையில் விற்கும் விற்பனையாளர்களிடமே மக்கள் வாங்க விரும்புவார்கள். . அத்துடன் இனிமேல் இந்தியாவில் உடல்நலத்துக்கேற்ற முறையிலிருக்கும் உணவுகளின் தேவையே அதிகரிக்கும். இதற்கு முன்னர் இந்தியாவில் இந்த மாதிரியான உணவுப் பொருள்களுக்கான தேவை நகர்ப்புறங்களிலுள்ள பணக்காரர்களிடையே மட்டும் இருந்தது. தற்போது இந்தத் தேவை அனைவரிடத்திலும் ஏற்பட்டிருக்கிறது. இதனால் எஃப்.எம்.சி.ஜி நிறுவனங்கள் தங்கள் பொருள்களைச் சுத்தமான முறையிலும் உடலுக்கு ஏற்ற வகையிலும் தயார் செய்வதில் கவனம் செலுத்த வேண்டியது முக்கியம்.

. நகர்ப்புறங்களைப் பொறுத்தவரை எஃப்.எம்.சி.ஜி பொருள்களின் நுகர்வு அளவு அடுத்த இரண்டு மாதங்களில் அதிகரிக்கக்கூடும். ஆனால், இந்தியப் பொருளாதாரத்தில் 60-70% பங்கு வகிக்கும் கிராமப்புறங்களில் நுகர்வு அளவு குறைந்தே காணப்படும். கிராமப்புறங்களில் தேவையின் அளவு சரிந்துவிட்டால், பின்னர் நல்ல நிலைமைக்கு வர நீண்டகாலம் எடுக்கும். கொரோனா நாள்களுக்குப் பிறகும் இந்தத் துறையின் தேவை எப்போதும் இருந்துகொண்டேயிருக்கும் என்பதால், எஃப்.எம்.சி.ஜி நிறுவனங்கள் மக்களுக்கேற்ப தகவமைத்துக்கொண்டாலே போதுமானது, இனி இந்தத் துறை சார்ந்த சில முக்கியமான பங்குகளைப் பார்ப்போம்.

. 1. டாடா கன்ஸ்யூமர் புராடக்ட்ஸ் (TATACONSUM )

தற்போதைய விலை: ரூ.351.60

இந்த நிறுவனம், உணவுப் பொருள்கள் மற்றும் குளிர்பானங்களை உற்பத்தி செய்து விற்பனை செய்கிறது. டாடா டீ, டெட்லீ, டாடா சால்ட் மற்றும் டாடா சாம்பான் ஆகியவை மக்களிடம் அதிக வரவேற்பைப் பெற்றிருக்கும் டாடா நிறுவனத்தின் பிராண்டுகள். இந்தியாவில் மட்டும் இவை 20 கோடி வீடுகளில் பயன்படுத்தப்படுகின்றன.டாடா டீ மட்டும் உலகம் முழுவதும் 33 கோடி மக்களால் பயன்படுத்தப்படுகிறது. இதனால் இது உலகிலேயே அதிக மக்களால் பயன்படுத்தப்படும் இரண்டாவது டீ பிராண்டாக இருக்கிறது. டாடாவின் நுகர்வுப் பொருள்கள் தரத்தாலும் புதுமையாலும் நல்ல முறையில் வளர்ச்சியடைந்துள்ளன. இந்த நிறுவனத்தின் நிதிநிலை விவரங்கள் நல்ல முறையில் உள்ளன. மேலும், இந்த நிறுவனப் பொருள்களுக்கான தேவை எதிர்காலத்திலும் எப்போதும்போல அதிக அளவிலேயே இருக்கும். டாடா கன்ஸ்யூமர் புராடக்ட்ஸ் பங்கு விலை கடந்த மார்ச், 24-ம் தேதி 220 ரூபாய் இருந்தது. ஏப்ரல் 30-ம் தேதி 355 ரூபாயைத் தொட்டிருக்கிறது. இன்னும் விலை அதிகரிக்கும் என எதிர்பார்க்கப்படுகிறது.

. 2. மாரிகோ (MARICO)

தற்போதைய விலை: ரூ.287

அழகுக்கலைப் பொருள்கள் மற்றும் உடல் நலம் சார்ந்த பொருள்களை விற்பனை செய்யும் மாரிகோ, இந்தியாவின் முன்னணி நிறுவனம். தற்போது இது ஆசியா மற்றும் ஆப்பிரிக்கக் கண்டங்களிலுள்ள 25 நாடுகளில் வியாபாரத்தை விஸ்தரித்திருக்கிறது. இந்த நிறுவனம் சருமப் பராமரிப்பு , முடி பராமரிப்பு, எண்ணெய், சத்தான உணவுகள், ஆண்களுக்கான அழகுக்கலைப் பொருள்கள் மற்றும் ஃபேப்ரிக் பொருள்களைத் தயாரிக்கிறது. இந்தியச் சந்தையில் மாரிகோவின் பாராசூட் எண்ணெய்கள், பாராசூட் அட்வான்ஸ்டு, சஃபோலா, ஹேர் அண்ட் கேர், நிஹர் நேசுரல்ஸ், லிவான், செட் வெட், மெடிகேர் மற்றும் ரிவைவ் ஆகியவை பாப்புலர் பிராண்டுகள். இந்த நிறுவனப் பங்குகளின் விலை மார்ச் மாத இறுதி வரை 238 ரூபாயாக இருந்தது. ஊரடங்கால் தற்போது இந்த நிறுவனத்தின் பொருள்களுக்கு அதிக தேவை ஏற்பட்டிருப்பதால், இது பங்கின் விலையிலும் பிரதிபலித்திருக்கிறது. ஏப்ரல் 30-ல் 285 ரூபாயில் வர்த்தகமானது. இதே நிலை தொடர்ந்தால், பங்குகளின் விலை 390 ரூபாயை எட்ட வாய்ப்பிருக்கிறது.

. 3.இமாமி (EMAMILTD)

தற்போதைய விலை: ரூ.194.65.

இந்தியாவில் இமாமி, சரும மற்றும் உடல் பராமரிப்புத் தொழிலில் வேகமாக வளர்ந்துவரும் நிறுவனம். இதன் தயாரிப்புகளான போரோ ப்ளஸ், நவரத்னா, ஃபேர் அண்ட் ஹேண்ட்ஸம், ஜண்டுபாம், மென்தோ ப்ளஸ் பாம், ஃபாஸ்ட் ரீலிஃப், கேஷ் கிங் போன்றவை இந்தியாவில் அதிக மக்களால் பயன்படுத்தப்படுகின்றன. ஊரடங்குக்குப் பிறகு சலூன் கடைகளுக்குச் செல்வதில் சிக்கல் ஏற்பட்டிருப்பதால், தலை மற்றும் சருமப் பராமரிப்பின் தேவை அதிகரித்திருக்கிறது. இதனால் இந்தப் பங்கின் விலையும் அதிகரித்திருக்கிறது.

. 4. ஜூப்லியன்ட் ஃபுட்வொர்க்ஸ் (JUBLFOOD )

தற்போதைய விலை: ரூ.1,608.50

இந்தியாவில் அதிக அளவில் உணவு டெலிவரி செய்யும் நிறுவனங்களான டொமினோஸ் பீட்சா மற்றும் டன்கின் டோனட்ஸ்-ஸின் உரிமைகள் ஜூப்லியன்ட் ஃபுட்வொர்க்ஸ் வசமே உள்ளன. இந்த நிறுவனம் சார்பில் இந்தியாவில் 1,200-க்கும் மேற்பட்ட அவுட்லெட்கள் செயல்படுகின்றன. ஊரடங்கின்போது இதன் ஹோம் டெலிவரி விற்பனை அதிகரித்திருக்கிறது. மேலும், நிறுவனத்தின் லாபமும் அதிகரித்திருக்கிறது. கடந்த நான்கு வாரங்களில் மட்டும் இந்த நிறுவனப் பங்கு விலை வேகமாக ஏறி வருகிறது. வரும் காலங்களிலும் இந்த நிறுவனப் பொருள்களின் தேவை அதிகரிக்கும் என்பதால், எதிர்காலத்திலும் இதன் பங்கு விலை உயர்ந்தே காணப்படும்.

5. ஐ.டி.சி (ITC)

தற்போதைய விலை: ரூ.182.05

இந்தியாவின் எஃப்.எம்.சி.ஜி துறையில் ஐ.டி.சி முக்கியப் பங்குவகிக்கிறது. இதன் 25 தயாரிப்புகள் முறையே உணவு, தனிநபர் பராமரிப்புப் பொருள்கள் மற்றும் லைஃப்ஸ்டைல் பொருள்கள் எனப் பரந்து விரிந்துள்ளன. இந்தியாவிலுள்ள அனைத்து வீடுகளிலும் இந்த நிறுவனத்தின் ஏதாவது ஒரு பிராண்ட் பொருளாவது இருப்பதுபோல, நீண்டகால முதலீட்டாளர்களின் போர்ட்ஃபோலியோவில் நிச்சயம் இதன் பங்குகள் இடம்பெற்றிருக்கும். கொரோனா காலத்தில் இந்த நிறுவனப் பொருள்களின் விற்பனை அதிகரித்திருக்கிறது. இத்துடன் இதன் வரிக்குப் பிந்தைய வருமானம் அதிகரித்திருக்கிறது. இந்தப் பங்குகளின் விலை கடந்த மார்ச் 13 அன்று 135 ரூபாயாக இருந்தது, தற்போது, 180 ரூபாயைத் தொட்டுள்ளது. இது 190 ரூபாயைக் கடந்துவிட்டால் 240 ரூபாய் வரை உயரக்கூடும் என எதிர்பார்க்கலாம்.

குறிப்பு: பங்குகள் விலை 30.4.20 நிலவரம்.

கைகொடுக்கும் எஃப்.எம்.சி.ஜி பங்குகள்! - சந்தை இறக்கத்தில் சரியான ஆலோசனை

நாணயம் விகடன் டீம்