Published:Updated:

ஸ்பெஷாலிட்டி கெமிக்கல்ஸ் பங்கு விலை... இன்னும் உயருமா..? ஒரு விரிவான அலசல்

C H E M I C A L S T O C K S

பிரீமியம் ஸ்டோரி

இந்தியப் பங்குச் சந்தைகள் உச்சத்தில் இருக்கும் நிலையில், முதலீட்டு வாய்ப்புக்களைத் தவற விட்டவர்கள், இனி எத்தகைய பங்குகளில் முதலீடு செய்வது என்று யோசித்து வருகிறார்கள்.

ஷியாம் சுந்தர் 
கமாடிட்டி நிபுணர்
ஷியாம் சுந்தர் கமாடிட்டி நிபுணர்

அதிகரிக்கும் வாய்ப்பு...

உலக ஸ்பெஷாலிட்டி கெமிக்கல் சந்தையில் ஆசிய நாடுகளின் பங்களிப்பு என்பது தவிர்க்க முடியாத ஒன்றாகிவிட்டது. வருகிற 2025-ம் ஆண்டு வரை இந்தியா மற்றும் சீனா ஆகிய நாடுகளின் அபரிமிதமான வளர்ச்சி காரணமாக ஸ்பெஷாலிட்டி கெமிக்கல்கள் சுமார் 70% வரை தேவை இருக்க வாய்ப்பிருப்பதாக ஆய்வுகள் தெரிவிக்கின்றன.

இதில் இந்தியாவின் பங்கு 2018-ல் 28 பில்லியன் டாலராக (ரூ.2,03,000 கோடி) இருந்தது; இது 2025-ம் ஆண்டில் 40 பில்லியன் டாலராக (ரூ.2,90,000 கோடி) அதிகரிக்கும் என எதிர்பார்க்கப்படுகிறது.

ஸ்பெஷாலிட்டி கெமிக்கல்ஸ்
ஸ்பெஷாலிட்டி கெமிக்கல்ஸ்

பல்வேறு துறைகளில் அதிகரிக்கும் தேவை...

கிட்டத்தட்ட 40 வகையான பகுத்தறியப்பட்ட வேதியியல் பொருள்களில் புதைந்து கிடக்கும் அதிமுக்கியமான மதிப்பு மிகுந்த, வளர்ச்சி இருக்கக்கூடிய, அதிக தாக்கம் நிறைந்த, எதிர்காலத் திறன் பெற்றிருக்கக்கூடிய 12 பிரிவுகளில் ஆசிய நாடுகளின் தேவையைப் பூர்த்தி செய்யக்கூடியவற்றைக் கண்டறிந்து அவற்றில் முதலீடுகளை மேற்கொள்வது மிக அவசியமானது.

அழகு சாதனப் பொருள்கள், ஒட்டுப்பசைகள், கசிவு நீக்கும் அடைப்பான்கள், அச்சடிக்க பயன்படும் இங்க் வகைகள், உணவுப் பொருள்கள் மற்றும் நீர் மேலாண்மை போன்றவற்றில் இதன் பங்களிப்பு பெருமளவு இருக்கும் எனக் கண்டறியப்பட்டுள்ளது.

அதிகரித்த லாபம்...

2015 முதல் 2018-ம் ஆண்டு வரையிலான காலத்தில் ஆசிய பிராந்தியத்தில் உள்ள நாடுகள் இந்தத் துறையில் நல்ல லாபத்தை ஈட்டி யுள்ளன. 2018-ம் ஆண்டில் ஸ்பெஷாலிட்டி கெமிக்கல் துறையில் ஜப்பான் அதிகபட்சமாக 45.3 மில்லியன் டாலரையும், சீனா 21.3 மில்லியன் டாலரையும், இந்தியா 6.5 மில்லியன் டாலரையும் (ரூபாய் மதிப்பில் 471 கோடி) லாபமாகச் சம்பாதித்து உள்ளன. 2018-ம் ஆண்டில் ஸ்பெஷாலிட்டி துறை வர்த்தகமானது, உலக அளவில் 710 மில்லியன் டாலர்களையொட்டி நடை பெற்றுள்ளது. 2012 தொடங்கி 2018 வரையிலான காலத்தில் ஸ்பெஷாலிட்டி துறை சார்ந்த மொத்த முதலீடுகளில் சுமார் 60 - 70 மில்லியன் டாலர் வரை ஆசிய நாடுகளுக்குத் திரும்பியுள்ளன.

ஆசிய நாடுகளின் அடிப்படை யான, விருப்பம் சார்ந்த நுகர்வில் ஏற்பட்டுள்ள மாற்றமே இதற்குக் காரணம். கொரோனா காரணமாகத் தற்போது தொய்வு ஏற்பட்டிருந்தாலும், 2021-2025 காலகட்டத்தில் இந்தத் துறையின் வளர்ச்சி 110 - 130 மில்லியன் டாலர் வரை இருக்கக்கூடும் எனக் கணிக்கப்பட்டுள்ளது.

கொரோனா தந்த வாய்ப்பு...

கோவிட் 19 காரணமாக ஸ்பெஷலிட்டி கெமிக்கல் உற்பத்தி உலக அளவில் குறைந்ததுடன், ஓரிடத்திலிருந்து மற்றொரு இடத்துக்கு எடுத்துச் செல்வதிலும் பல்வேறு இடையூறுகள் ஏற்பட்டன. இதனால் தேவை அதிகரித்து, உற்பத்தியில் தடங்கல் ஏற்பட்டு, ஒருவிதமான நிச்சயமற்ற தன்மையை ஏற்படுத்தியுள்ளன. இந்த வகையான கெமிக்கல்களை உற்பத்தி செய்யும் நிறுவனங்கள் 2020-ம் ஆண்டின் மத்தியிலும் கடைசியிலும், ஒட்டு மொத்தமாக உற்பத்தி நிறுத்தம் செய்ததாலும், தற்போது அதிலிருந்து மீண்டு வந்து உற்பத்தியைத் தொடங் கும்போது, தேவை அதிகரித்து, அதன் தாக்கம் மூலப்பொருள்களின் விலையில் பிரதிபலித்து வருகிறது. மூலப்பொருள்களின் விலை பன்மடங்கு அதிகரித்துவிட்டதால், தொழில் நிறுவனங்கள் உலக அளவில் இறக்குமதி செய்ய முன்வருகின்றன. இதனால் இந்திய நிறுவனங்களுக்கு சாதகமான சூழ்நிலையைத் தோற்று வித்துள்ளது.

பெட்ரோ கெமிக்கல் மற்றும் அதிலிருந்து பிரித்தெடுக்கப்படுகிற மற்ற பொருள்களுக்கான தேவை அதிகரித் துள்ளது. பெட்ரோகெமிக்கல் பொருள் களான பாலியுரித்தீன் ரெசின்ஸ், சால் வண்ட்ஸ், அக்கர்லிக் ரெசின்ஸ், க்ளைக்கால், எத்தில் அசிடேட், எம்.டி.ஐ/ டி.டி.ஐ ஆகியவை மிகப்பெரிய விலை யேற்றத்தைச் சந்தித்து வருகின்றன.

ஸ்வீடன் மற்றும் சிங்கப்பூர் ஆகிய நாடுகளில் உற்பத்தி நிறுவனங்கள் மூடப் பட்டதாலும், சீனாவில் விபத்து காராணமாகவும் பாலியெஸ்டர் ரெசின் உற்பத்தி தடைப்பட்டுள்ளது.

அமெரிக்காவின் கல்ப் கோஸ்ட்டில் உருவான பனிப்புயல் காரணமாக டெக்ஸாஸ் மாகாணத்தில் டி.டி.ஐ/ எம்.டி.ஐ தயாரிக்கும் பல நிறுவனங்கள் மூடப்பட்டுள்ளதால், எம்.டி.ஐ 3,30,000 டன்கள் மற்றும் டி.டி.ஐ சுமார் 2,20,000 டன்கள் என்ற அளவுக்கு உற்பத்தி இழப்பைச் சந்தித்து வருகின்றன.

கொரியா நாட்டு நிறுவனங்களின் ஒட்டுமொத்த முடக்கம், தென் ஆப்பிரிக்காவின் சாசல் நிறுவனத்தின் உற்பத்தியில் ஏற்பட்டுள்ள தடை, சீனாவின் பெட்ரோகெமிக்கல் நிறுவனங் களில் ஏற்பட்ட தீ விபத்து காரணமாகச் செயல்படாமல் இருப்பது என்று உலக அளவில் மூலப்பொருள்களுக்கு பெரிய அளவிலான தேவை ஏற்பட்டுள்ளது.

இது மட்டுமல்லாமால், இந்தியாவின் இரண்டு முக்கிய வர்த்தக துறைமுகங் களான மும்பை ஜே.என்.பி.டி மற்றும் குஜராத்தில் உள்ள முந்த்ரா ஆகிய துறைமுகங்களில் வழக்கத்தைவிட, துறைமுகப் போக்குவரத்துக் கட்டணங் கள் அதிகமாக வசூலிக்கப்படுகின்றன. போதிய ஏற்றுமதி உபகரணங்கள் இல்லாததும், இந்தியா முழுக்க கன்ட்டெய்னர்கள் பற்றாக்குறையாக இருப்பதும் இதற்கு முக்கியமான காரணங்களாகச் சொல்லப் படுகின்றன. இந்தியா மட்டும் அல்லாமல் உலக அளவில் சீனாவின் குவிங்டோ, ஷாங்காய், யு,ஏ.இ, ஜெபேல்அலி, நான்ஷா போன்ற துறைமுகங்களிலும் இதே நிலை காணப்படுவதாகச் செய்திகள் வெளியாகியுள்ளன. இதனால் ஏற்றுமதி செய்வதில் காலதாமதம் ஏற்படுவதுடன், செலவுகள் அதிகரிக்கக் காரண மாகவும் அமைந்துவிடுகின்றன.

கடல் போக்குவரத்துக் கட்டணங்கள், ஜனவரியுடன் ஒப்பிடும்போது மூன்று முதல் நான்கு மடக்கு வரை அதிகரித்து உள்ளதாகக் கூறப்படுகின்றன. இதனால் உலக அளவிலும், இந்திய அளவிலும் வேதிப்பொருள் களின் விலைகள் மிகப்பெரிய அளவில் அதிகரித்துள்ளன.

ஸ்பெஷாலிட்டி கெமிக்கல்ஸ்
ஸ்பெஷாலிட்டி கெமிக்கல்ஸ்

ஸ்பெஷாலிட்டி கெமிக்கல்களைத் தயாரிக்கும் பங்கு நிறுவனங்கள்...

அசிடோன் - வீட்டு உபயோகப் பொருள்கள் (ஃபினால்), தொழில் சார்ந்த தேவைகளான டை, பார்மா தயாரிப்புகளுக்குத் தேவையான வேதிப்பொருள்கள் அக்ரோ இண்டஸ்ட்ரீஸ் நிறுவனங்களுக்குத் தேவையான பொருள்கள் ஆகியற்றிலும் இதன் பயன்பாடு காணப்படுகிறது.

முக்கியமான நிறுவனங்கள் - தீபக் நைட்ரேட்ஸ், ஹெச்.ஓ.சி.எல்.

எத்திலின் - இயற்கை எரிவாயுவிலிருந்தோ பெட்ரோலியத்திலிருந்தோ தயாரிக்கப்படுகிறது. எத்திலின் தனியாகவோ, பாலி எத்திலின், பாலி வினைல் குளோரைடு, பாலிஸ்டிரைன், பாலியெஸ்டர் ரெசின் போன்ற வற்றுடன் கூட்டுப் பொருளாகப் பயன்படுத்தப்படுகின்றன.

இதன் 60% பயன்பாடு பாலி எத்திலின் மூலமாக காணப் படுகிறது. நாம் அன்றாடம் பயன்படுத்தும் டிட்டர்ஜென்ட், அட் ஹெசிவ்ஸ், லூப்ரிகன்ட்ஸ், ஷாம்பு, அழுக்கை நீக்கக்கூடிய திரவங்கள் என்று பல்வேறு பொருள்களில் இதன் பாயன்பாடு இருக்கிறது.

முக்கியமான நிறுவனங்கள் - பி.ஏ.எஸ்.எஃப் (BASF), ரிலையன்ஸ் இண்டஸ்ட்ரீஸ்.

பாலிஸ்டிரைன் – தோல், டெக்ஸ்டைல் பொருள்கள், கட்டுமானம் ஆகியவற்றில் இவற்றின் பயன்பாடு காணப் படுகிறது. இந்திய நிறுவனங்கள் பாலிஸ்டிரைன், இ.பி.எஸ் ரெசின், பாலிமர் ஆகியவற்றை அதிக அளவில் ஏற்றுமதி செய்து வருகின்றன.

முக்கியமான நிறுவனங்கள் - சுப்ரீம் பெட்ரோ கெமிக்கல்ஸ் மற்றும் பி.ஏ.எஸ்.எஃப்.

பாலி புரொபிலின் – பேக்கேஜிங், லேமினேஷன் ஃபிலிம், வெப்பம் தடுக்கும் லேபில் போன்றவற்றுக்கு இதன் தேவை காணப்படுகிறது. இதன் பயன்பாடு உணவுப் பொருள்களைப் பாதுகாக்கும் பேக்கிங் பொருள்களிலும் பயன்படுத்தப் படுகின்றன.

முக்கியமான நிறுவனங்கள் - காஸ்மோ ஃபிலிம்ஸ், ஜிண்டால் பாலி ஃபிலிம்ஸ்.

டி.டி.ஐ - மெத்தைகள், தலையணை, குக்ல்ட், கார் சீட்கள், பர்ஸ் போன்ற அனைத்து வகை மிருதுவான பொருள் களைத் தயாரிப்பதில் முக்கியப் பங்கு வகிக்கிறது. ஃபர்னிச்சர் குஷன்கள், விமான இருக்கைகள், தொழிற்சாலைகளில் பயன்படுத்தப்படும் காஸ்கெட்டுகள் போன்றவற்றிலும் இதன் பயன்பாடு முக்கியம் பெறுகிறது.

முக்கிய நிறுவனம் - ஜி.என்.எஃப்.சி

க்ளைகால்-எத்திலின் க்ளைக்காலிருந்து எம்.இ.ஜி, டி.இ.ஜி, டி.இ.ஜி என்ற மூன்று விதமான பொருள்கள் தயாரிக்கபடுகின்றன.

எம்.இ.ஜி (மோனோ எத்திலின் க்ளைக்கால்) - வேதிப்பொருளின் பயன்பாடு டெக்ஸ்டைல் துறையில் பாலியெஸ்டர் யார்ன் மற்றும் ஃபைபர், வாகனத் துறையில் ஆன்டி ஃப்ரீசர் கூலன்ட், பெயின்ட் ஆகியவற்றில் பெரும்பங்கு வகிக்கிறது.

டி.இ.ஜி (டை எத்திலின் க்லைக்கால்) - வாகனத் துறையில் பிரேக் ஃப்லூயிட், ஃபைபர் கிலாஸ், பெயின்ட் மற்றும் அக்ரோ கெமிக்கல்ஸ் ஆகியவற்றிலும் பயன்பாடு அதிகரித்துக் காணப் படுகிறது.

டி.இ.ஜி - (ட்ரை எத்திலின் க்ளைக்கால்) எண்ணெய் மற்றும் எரிவாயுத் துறையில் பயன்படுத்தப் படுகிறது.

முக்கியமான நிறுவனங்கள் - இந்தியா க்ளைக்கால், எலண்டாஸ் பெக் (இந்தியா) லிமிடெட்.

ஸ்பெஷாலிட்டி கெமிக்கல்கள்
ஸ்பெஷாலிட்டி கெமிக்கல்கள்

விலையேற்றம் நீடிக்குமா..?

இப்போதைய நிலையில், இன்னும் வரக்கூடிய இரண்டு காலாண்டு களுக்குத் தேவைக்கும் சப்ளைக்குமான இடைவெளி குறைய வாய்ப்பில்லை என்று கருதப்படுகிறது.

இருந்தபோதிலும் இந்தத் துறை பொருள்கள் அனைத்தும் பெட்ரோ லியத்திலிருந்து பிரித்தெடுக்கப் படுவதால், கச்சா எண்ணெய்யின் விலைப்போக்கை உன்னிப்பாகக் கவனித்து முதலீடு செய்ய வேண்டியது அவசியம்.

இந்த ஆண்டில் மட்டும், சர்வதேச சந்தையில் கச்சா எண்ணெய் 30% விலை விலையேற்றம் கண்டுள்ளது. கோவிட்19-ன் காரணமாக உற்பத்தி யிலும் சப்ளையிலும் எண்ணற்ற இடையூறுகள் ஏற்பட்டுள்ளதால், ஒருவிதமான நிலையற்ற தன்மை நிலவுகிறது. பங்குகளின் விலை பன்மடங்கு அதிகரித்துள்ளதால், கவனத்துடன் முடிவெடுக்க வேண்டியது கட்டாயமாகும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு