Published:Updated:

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

பொருளாதாரம்
பிரீமியம் ஸ்டோரி
பொருளாதாரம்

பொருளாதாரம்

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

பொருளாதாரம்

Published:Updated:
பொருளாதாரம்
பிரீமியம் ஸ்டோரி
பொருளாதாரம்

டப்பு நிதியாண்டின் (2019-20), முதல் காலாண்டின் பொருளாதார வளர்ச்சி பல ஆண்டுகளில் இல்லாத அளவுக்கு ஐந்து சதவிகிதமாகக் குறைந்திருப்பதாகக் கடந்த 01.08.2019 அன்று தகவல் வெளியானது. இது, இந்திய பங்குச் சந்தை முதலீட்டாளர்களை வெகுவாக பாதித்தது. அதன் பிறகு, நம் பொருளாதாரத்தின் போக்கு குறித்து தொடர்ச்சியாக வெளிவந்த புள்ளிவிவரங்கள் உற்சாகம் தருபவையாக இல்லை. ஆனால், கடந்த சில வாரங்களாகப் பங்குச் சந்தையின் முக்கியக் குறியீடுகள் புதிய உச்சங்களை எட்டி வருகின்றன.

ஆர்.மோகனப் பிரபு, CFA
ஆர்.மோகனப் பிரபு, CFA

வெளிநாட்டு முதலீட்டாளர்கள் இந்தியாவை மீண்டும் முற்றுகையிடத் தொடங்கியிருக்கிறார்கள். இந்த தடாலடி ஏற்றம், பங்குச் சந்தையின் வீழ்ச்சிக்காகக் காத்திருந்த பல முதலீட்டாளர்களுக்கு ஏமாற்றத்தையும் ஆச்சர்யத்தையும் ஒருங்கே உண்டாக்கியிருக்கிறது. இதற்கு என்ன காரணம்?

எப்படி இருக்கிறது இந்தியப் பொருளாதாரம்?

அரசு மற்றும் தனியார் நிறுவனங்கள் தரும் புள்ளிவிவரங்கள், இந்தியாவின் தற்போதைய பொருளாதாரச் சிக்கல்கள் மிகவும் ஆழமானவை என்பதையே காட்டுகின்றன. கடந்த எட்டு ஆண்டுகளில் இல்லாத அளவாக செப்டம்பர் (2019) மாதத்துக்கான தொழில் உற்பத்தி (IIP) -4.3% என்ற அளவுக்குச் சரிந்திருப்பதாக மத்திய புள்ளியியல் அலுவலகம் (NSO) கடந்த 11.11.2019-ல் வெளியிட்ட அறிக்கையில் தெரிவித்திருக்கிறது.

முன்னதாக, செப்டம்பரில் அடிப்படைக் கட்டுமானத் துறை -5.2% அளவுக்கு வீழ்ச்சியடைந்ததாகத் தகவல்கள் வெளியாகின. வளர்ச்சியில் குறைபாடு என்பது மாறிப்போய், சரிவு அல்லது வீழ்ச்சி என்ற நிலையை நம் பொருளாதாரம் எட்டியிருப்பது கவலையளிக்கிறது.

மேலும், கடந்த மே 2019-க்குப் பிறகான மாதாந்தர ஜி.எஸ்.டி வரி வசூல் தொடர்ச்சியாக ரூ.1 லட்சம் கோடிக்கும் குறைவாக இருக்கும் நிலையில் `நேரடி வரி வருவாயும், பட்ஜெட் எதிர்பார்ப்பும் எதிர்பார்த்ததைவிடக் குறைவாகவே இருக்கும்’ என்ற ஊகங்கள் வெளியாகிவருகின்றன. வரி வருவாய் வீழ்ச்சி அரசின் நலத்திட்டச் செலவினங்களைப் பாதிப்பதுடன், இந்திய அரசின் சர்வதேசத் தர நிர்ணயத்தையும் பாதிக்கிறது.

ஒட்டுமொத்த விகடனுக்கும் ஒரே ஷார்ட்கட்!

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

பொருளாதார மீட்சிக்காக அதிக நிதியைச் செலவிட வேண்டிய கட்டாயத்திலிருக்கும் மத்திய அரசுக்கு இன்னொரு சிக்கல். அதாவது, மத்திய அரசின் நிதிப் பற்றாக்குறையும் தற்போது வெகுவாக உயர்ந்திருக்கிறது. ஏற்கெனவே, சர்வதேசத் தர நிர்ணய நிறுவனமான ‘மூடிஸ்’ இந்திய அரசின் ரேட்டிங்கை ‘ஸ்டெபில்’ என்ற நிலையிலிருந்து ‘நெகட்டிவ்’ என்ற நிலைக்குக் குறைத்திருக்கிறது. இதைத் தொடர்ந்து `மற்ற சர்வதேச நிறுவனங்கள் என்ன செய்யப்போகின்றனவோ...’ என்ற கவலையும் பலருக்கு எழுந்திருக்கிறது.

சரிந்துவரும் இந்தியப் பொருளாதாரத்தை மீட்க, மத்திய ரிசர்வ் வங்கி தன் பங்காக வட்டி விகிதத்தைப் பல தவணைகளாகக் குறைத்துவந்திருக்கிறது. இந்த ஆண்டில் மட்டும் 1.35% அளவுக்கு வட்டி விகிதம் ஏற்கெனவே குறைத்திருக்கும் நிலையில், ரிசர்வ் வங்கியின் கொள்கை வட்டி விகிதமான `ரெப்போ ரேட்’ கடந்த 9 ஆண்டுகளில் இல்லாத அளவுக்கு அடிமட்டத்திலிருக்கிறது.

மிதமான பணவீக்கம் ரிசர்வ் வங்கியின் வட்டி விகிதக் குறைப்புக்கு உறுதுணையாக இருந்துவந்திருக்கும் நிலையில், அக்டோபர் மாதத்துக்கான சில்லறை அல்லது நுகர்வோர் பணவீக்கம் கடந்த 165 மாதங்களில் இல்லாத அளவுக்கு 4.62 சதவிகிதமாக உயர்ந்திருக்கிறது. உணவுப் பொருள்களின் விலை தொடர்ந்து அதிகரித்துவரும் தற்போதைய காலகட்டத்தில், ரிசர்வ் வங்கி வட்டி விகிதத்தை மேலும் குறைப்பது கடினமான காரியமாகிவிடும். `பொருளாதாரத்தை மந்தநிலையிலிருந்து மீட்பதற்காக, வட்டி விகிதங்களை மேலும் குறைக்க வேண்டும்’ எனத் தொடர்ந்து கோரிவந்த கார்ப்பரேட் நிறுவனங்களின் நம்பிக்கைக்கு வேட்டுவைப்பதாக பணவீக்க உயர்வு அமைந்துவிட்டது.

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

நிகழ்காலப் புள்ளிவிவரங்கள் மட்டுமன்றி, எதிர்காலம் குறித்து வெளிவரும் கணிப்புகளும் மகிழ்ச்சி தருவதாக இல்லை. உலக வங்கியும், சர்வதேச நிதி ஆணையமும் நடப்பு நிதியாண்டின் இந்தியாவுக்கான வளர்ச்சி விகிதத்தை வெகுவாகக் குறைத்திருக்கின்றன. ரிசர்வ் வங்கியும்கூட தன் அண்மைய நிதி ஆய்வறிக்கைகளில், தொடர்ச்சியாகப் பொருளாதார வளர்ச்சி விகிதத்தைக் குறைத்துவருகிறது.

கடந்த ஐந்து வருடங்களில் இல்லாத அளவுக்கு நுகர்வோர் நம்பிக்கை சரிந்திருப்பதாகக் கடந்த 04.10.2019-ல் வெளியிடப்பட்ட ரிசர்வ் வங்கியின் சர்வே முடிவுகள் தெரிவிக்கின்றன. தொழில்துறையின் நம்பிக்கையைப் பிரதிபலிக்கும் ‘நிக்கி பி.எம்.ஐ குறியீடு’ இரண்டு மாதங்களாகத் தொடர்ந்து குறைந்துகொண்டே வருகிறது.

இந்தியாவைப் பொறுத்தவரை நீண்டகால நோக்கில் ஏராளமான பாசிட்டிவ் விஷயங்கள் உள்ளன. இவ்வளவு பெரிய பொருளாதாரப் பின்னடைவுக்குப் பின்னரும்கூட உலக அளவில் இந்தியாதான் வெகு வேகமாக வளரும் பெரிய பொருளாதார நாடாக உள்ளது.

மோட்டார் வாகனத் தயாரிப்பு நிறுவனங்கள் உற்பத்தி விடுமுறையை அறிவித்துவருகின்றன. இந்தியாவின் இருபதாண்டுகால ஆட்டோ புரட்சிக்குப் பிறகு, தற்போது கச்சா எண்ணெய் தேவையும் குறைந்துவருகிறது. முக்கியமான தொழில்துறை மாநிலமான மகாராஷ்டிராவில்கூட மின் தேவை சரிந்துவருகிறது. கடந்த அக்டோபர் மாதத்தில் மட்டும் மின் தேவை 13% குறைந்திருப்பதாகத் தகவல்கள் தெரிவிக்கின்றன. இப்படிப் பொருளாதாரத்தின் பல துறைகளும் கடும் நெருக்கடியைச் சந்தித்துவரும்போது, பங்குச் சந்தை முக்கியக் குறியீடுகள் மட்டும் வீறுநடை போடுவதற்கான காரணங்களைப் பார்ப்போம்.

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

1. கார்ப்பரேட் வரி விகிதம் தடாலடியாகக் குறைக்கப்பட்டது!

`கடந்த இருபதாண்டுகளில் மிகப்பெரிய சீர்திருத்தம்’ எனப் பெரு நிறுவனங்களால் வர்ணிக்கப்படும் கார்ப்பரேட் வரிக் குறைப்பை மத்திய நிதி அமைச்சர் கடந்த செப்டம்பர் மாதம் அறிவித்த சில நிமிடங்களிலேயே சென்செக்ஸ் சில ஆயிரம் புள்ளிகள் ஏற்றம் கண்டது. சுமார் 10% வரிக் குறைப்பால் சாதாரண நிறுவனங்களின் பங்கு வருவாய் 15% உயரும் வாய்ப்பு ஏற்பட்டது.

மந்தமான பொருளாதாரச் சூழ்நிலையால் விற்பனை பெருமளவு உயராதபட்சத்தில்கூட இந்திய நிறுவனங்களின் பங்கு மதிப்பீட்டில், உடனடி ஏற்றம் காண வழிவகுத்தது இந்த வரிக் குறைப்பு நடவடிக்கை. கார்ப்பரேட் வரிக் குறைப்பைத் தொடர்ந்து, நீண்டகால முதலீடுகளுக்கான ஆதாய வரி நீக்கம், தனிநபர் வருமான வரிக் குறைப்பு ஆகியவற்றுக்கான எதிர்பார்ப்புகள் சந்தையில் பெருமளவு உயர்ந்ததும் பங்குச் சந்தையின் தடாலடி உயர்வுக்குக் காரணங்களாக அமைந்தன.

2. சாதகமான சர்வதேச நிலவரங்கள்

இந்தியப் பொருளாதாரத்தில் பல்வேறு சிக்கல்கள் இருந்தபோதிலும், அமெரிக்க - சீன நாடுகளுக்கிடையேயான வர்த்தகப் பேச்சுவார்த்தைகளில் நல்ல முன்னேற்றம் கிடைத்திருப்பதாக வெளிவந்த தகவல்கள் பங்குச் சந்தையின் போக்கில் பெரும் திருப்புமுனையை ஏற்படுத்தின. சீன மற்றும் அமெரிக்க அரசுகள் தவணை முறையில் கூடுதல் இறக்குமதி வரிகளைக் குறைத்துக்கொள்ள ஒப்புக்கொண்டிருக்கின்றன. அந்த வகையில், கடந்த 7.11.2019 அன்று சீன வர்த்தக அமைச்சகம் வெளியிட்ட அறிவிப்பை உலகச் சந்தைகள் கொண்டாடித் தீர்த்தன.

`சில கருத்து வேறுபாடுகள் இருந்தாலும், கிட்டத்தட்ட கணவன்-மனைவி உறவைப் போன்றதுதான் அமெரிக்க - சீன வர்த்தக உறவு; எளிதில் முறிந்து போகாது’ என்ற நம்பிக்கை முதலீட்டாளர்களிடையே தோன்றியிருக்கிறது. அதேபோல, ‘பிரெக்ஸிட்’ ஒப்பந்தம் நிறைவேறியதாக பிரிட்டன் பிரதமர் அறிவித்தபோதும் சந்தைகள் பெரும் ஏற்றத்தைச் சந்தித்தன.

உலகின் முக்கியப் பொருளாதார நாடான அமெரிக்காவில் ஐம்பதாண்டுகளில் இல்லாத அளவுக்கு வேலைவாய்ப்பின்மை குறைவாக இருப்பதாக வெளிவந்த தகவல்கள், உலகப் பொருளாதார மந்தநிலை குறித்த அச்சங்களைப் பெருமளவு தணித்தன. மேலும், இந்தியா- பாகிஸ்தான் நாடுகளுக்கிடையேயான பதற்றம் தணிந்தது, ஹாங்காங் போராட்டம் தற்காலிகமாகக் குறைந்திருப்பது, ஐ.எஸ்.ஐ.எஸ் தலைவர் அமெரிக்கப் படைகளால் கொல்லப்பட்டது போன்ற அரசியல்ரீதியான தகவல்கள் பங்குச் சந்தை ஏற்றத்துக்கு ஆதரவாக இருந்தன.

அராம்கோ நிறுவனத்தின் மீதான தீவிரவாதத் தாக்குதல் கச்சா எண்ணெய்ச் சந்தையைப் பெருமளவு பாதிக்கும் என்ற அச்சத்துக்கு மாறாக கச்சா எண்ணெய் விலை தொடர்ந்து கட்டுக்குள்ளிருப்பது இறக்குமதி நாடான இந்தியாவுக்குச் சாதகமாக அமைந்திருக்கிறது.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

3. வட்டி விகிதம் குறைப்பு

அமெரிக்காவிலிருந்து வெளிவரும் பொருளாதாரத் தகவல்கள் கலவையாக இருந்த போதும், அந்த நாட்டின் மத்திய வங்கி (ஃபெடரல் ரிசர்வ்) கடந்த 30.10.2019 அன்று தனது கொள்கை வட்டி விகிதத்தை மீண்டும் ஒரு முறை 0.25% அளவுக்குக் குறைத்தது. வட்டி வருவாய் மிகக் குறைவாக இருக்கும்போது, முதலீட்டாளர்களின் பார்வை பங்குச் சந்தைகளை நோக்கித் திரும்புகிறது.

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

ஜப்பான், ஐரோப்பா, சுவிஸ் போன்ற உலகின் வளர்ந்த பிராந்தியங்களில் ஏற்கெனவே நெகட்டிவ் வட்டி விகிதங்கள் நடைமுறையில் இருப்பது குறிப்பிடத்தக்கது. மேலும், வட்டி விகிதங்கள் குறைவது, பங்குச் சந்தை வருவாய் குறித்த எதிர்பார்ப்பைக் குறைக்கச் செய்யும்; பங்குச் சந்தையின் மதிப்பீடு உயரவும் வழிவகுக்கும்.

நடப்பு நிதியாண்டில் ஏப்ரல் மாதத்துக்குப் பிறகு செப்டம்பர் வரையிலான ஐந்து மாதங்களாக இந்தியப் பங்குச் சந்தையில் பங்குகளை (நிகர) விற்பனை செய்துகொண்டிருந்த பன்னாட்டு முதலீட்டாளர்கள், கடந்த இரு மாதங்களாக (நிகர) முதலீடு செய்வதற்கு உலகெங்கும் நிலவும் குறைந்த வட்டிச் சூழலும் முக்கியக் காரணம்.

சர்வதேச அரங்கில் மட்டுமன்றி, இந்தியாவிலும் தற்போது குறைந்த வட்டிச் சூழலே நிலவுகிறது. இந்திய ரிசர்வ் வங்கி, பல தவணைகளாகத் தன் கொள்கை வட்டி விகிதத்தை 1.35% குறைத்திருக்கிறது. வங்கிகளும் தங்களின் டெபாசிட் வட்டி விகிதங்களைப் பெருமளவுக்குக் குறைத்திருக்கின்றன. மற்றொரு முக்கிய முதலீட்டு வாய்ப்பான ரியல் எஸ்டேட் துறையின் செயல்பாடுகளும் சிறப்பாக இல்லாத காரணத்தால் உள்ளூர் முதலீட்டாளர்களின் கவனம் தற்போது பங்குச் சந்தையை நோக்கியே இருக்கிறது.

4. ஆங்காங்கே பச்சை முளைகள்

நமது பொருளாதாரத்தை மந்தநிலையிலிருந்து மீட்பதற்காக மத்திய அரசு பல்வேறு நடவடிக்கைகளில் ஈடுபட்டுவருகிறது. கார்ப்பரேட் வரிக் குறைப்பு போன்ற நேரடி நடவடிக்கைகளும், வங்கிகள் மூலம் அதிக கடன் வழங்குவது, பணி ஒப்பந்தக்காரர்களுக்கு பாக்கிப் பணத்தை வழங்குவதைத் துரிதப் படுத்துவது போன்ற மறைமுக நடவடிக்கைகளும் ஓரளவுக்குப் பலன் கொடுக்க ஆரம்பித்திருப்பதை பங்குச் சந்தை முதலீட்டாளர்கள் உன்னிப்பாக கவனித்து வருகின்றனர். குறிப்பாக, தீபாவளிக்கு முந்தைய வாரத்தில் நடத்தப்பட்ட லோன் மேளாவில் சுமார் ரூ.81,000 கோடி விநியோகிக்கப் பட்டிருப்பதாகத் தகவல்கள் வெளியாகின.

இறங்கும் பொருளாதாரம்... ஏறும் பங்குச் சந்தை... ஐந்து காரணங்கள்!

தீபாவளியையொட்டிய அக்டோபர் மாதத்தில் வாகன விற்பனை மேம்பட்டிருப்பதாக சியாம் (SIAM) அறிவித்திருப்பதும் ஓர் இனிப்பான செய்தி. தென்மேற்குப் பருவமழை இந்தியாவின் பெரும்பாலான பகுதிகளில் இயல்புக்கும் மேலாக அமைந்திருப்பது, `நடப்பாண்டில் விவசாயத் துறையின் செயல்பாடு சிறப்பாக இருக்கும்’ என்ற நம்பிக்கையை ஏற்படுத்தியிருக்கிறது.

ஒட்டுமொத்த பொருளாதாரத்தில் விவசாயத்தின் பங்கு சிறிதுதான் என்றாலும், நாட்டின் பெரும்பாலான மக்கள் விவசாயத் துறையை சார்ந்திருப்பதால், விவசாயத் துறை செழிப்பாக இருப்பது நுகர்வோர் சந்தையில் பெரும் தாக்கத்தை ஏற்படுத்தும். நுகர்வோர் பொருள்களைத் தயாரிக்கும் மற்ற தொழில்துறைகளுக்கும் இது நேர்மறையான தாக்கத்தை உருவாக்கும்.

5. பெரு நிறுவனங்களின் ஆதிக்கம்

`உலகளாவிய பங்குச் சந்தையின் தற்போதைய தொடர்ச்சியான உயர்வுக்கு முக்கியக் காரணம், சில குறிப்பிட்ட உயர்தர நிறுவனங்களின் பங்குகள்தான்’ என்று ஒரு பொதுவான குற்றச்சாட்டு உண்டு. இந்த விஷயத்தில் இந்தியப் பங்குச் சந்தையும் விதிவிலக்கல்ல.

அமெரிக்காவில் ஐம்பதாண்டுகளில் இல்லாத அளவுக்கு வேலைவாய்ப்பின்மை குறைவாக இருப்பதாக வெளிவந்த தகவல்கள், உலகப் பொருளாதார மந்தநிலை குறித்த அச்சங்களைப் பெருமளவு தணித்தன.

அமெரிக்காவின் முக்கியப் பங்குச் சந்தைக் குறியீடுகளின் வரலாற்று உச்சங்களுக்கு ஃபேஸ்புக், அமேசான், கூகுள், ஆப்பிள் போன்ற சில பெரிய நிறுவனப் பங்குகள் மட்டுமே காரணமாக இருப்பதுபோல நம் பங்குச் சந்தையிலும் ரிலையன்ஸ், ஹெச்.டிஎஃப்.சி பேங்க், டி.சி.எஸ் போன்ற சில நிறுவனங்களே பங்குச் சந்தைக் குறியீடுகளின் அதீத வளர்ச்சிக்கு முக்கியக் காரணமாக இருக்கின்றன. பெருவாரியான சிறிய மற்றும் நடுத்தரப் பங்குகள் தற்போதைய பங்குச் சந்தை ஏற்றத்தில் பங்கு பெறவில்லை என்பதை நாம் கவனிக்கத் தவறக் கூடாது.

கடந்த காலமும் வருங்காலமும்

பொருளாதாரப் புள்ளியியல் விவரங்கள் கடந்தகால நிகழ்வுகளை விருப்பு வெறுப்பில்லாமல் பதிவுசெய்கின்றன. ஆனால், பங்குச் சந்தையோ, முதலீட்டாளர்களின் வருங்காலத்தின் மீதான நம்பிக்கையைப் பிரதிபலிக்கின்றன.

இந்தியாவைப் பொறுத்தவரை நீண்டகால நோக்கில் ஏராளமான பாசிட்டிவ் விஷயங்கள் உள்ளன. இவ்வளவு பெரிய பொருளாதாரப் பின்னடைவுக்குப் பின்னரும்கூட உலக அளவில் இந்தியாதான் வெகு வேகமாக வளரும் பெரிய பொருளாதார நாடாக உள்ளது. இந்தியாவில்தான் இளம் வயதினர் அதிக எண்ணிக்கையில் இருக்கிறார்கள். இந்தியாவின் மிகப் பெரிய நுகர்வோர் சந்தையும் முதலீட்டாளர்களுக்கு ஏராளமான வாய்ப்புகளை வாரி வழங்குகிறது.

தொடர்ச்சியான பொருளாதாரப் பின்னடைவு நீண்டகால நோக்கில் பங்குச் சந்தையில் நிச்சயம் பிரதிபலிக்கும். என்றாலும், மாறிவரும் பொருளாதாரச் சூழலுக்கேற்ப தகவமைத்துக்கொள்ளும் திறன் படைத்த நிறுவனங்களைக் கண்டறிந்து, உரிய விலையில் பங்குகளை வாங்கி முதலீடு செய்து வெற்றி காணலாமே!

(இந்தக் கட்டுரையில் இடம்பெற்றிருக்கும் கருத்துகள் கட்டுரையாளரின் தனிப்பட்ட கருத்துகளே.)