Published:Updated:

ஷேர்லக் : மிட்கேப், ஸ்மால்கேப் பங்குகள்... வாங்கிக் குவிக்கும் புரமோட்டர்கள்!

நிஃப்டி 50 மிட் அண்ட் ஸ்மால்கேப் குறியீடுகள் 15-20% வரை வருமானம் கொடுக்கும் என பல தரகு நிறுவனங்கள் தெரிவித்துள்ளன.

பிரீமியம் ஸ்டோரி

ழக்கத்துக்கு மாறாக ஷேர்லக் மாலை 3:00 மணிக்கே வந்து சேர்ந்தார். “மாலை 5:00 மணிக்கு மும்பையிலிருந்து முக்கியமான நண்பர் ஒருவர் வருகிறார். அவரைச் சந்திக்கப் போக வேண்டும். கேள்விகளைக் கேளுங்கள்” என்றார். நாம் அவரது அவசரத்தைப் புரிந்துகொண்டு கேள்விகளைக் கேட்க ஆரம்பித்தோம்.

ஷேர்லக் : மிட்கேப், ஸ்மால்கேப் பங்குகள்... வாங்கிக் குவிக்கும் புரமோட்டர்கள்!

மிட்கேப் மற்றும் ஸ்மால்கேப் நிறுவனப் பங்குகளில் அவற்றின் புரமோட்டர்கள் முதலீட்டை அதிகரித்து வருகிறார்களே, என்ன காரணம்?

“சமீப காலமாக மிட்கேப் மற்றும் ஸ்மால்கேப் நிறுவனப் பங்குகளில் பெரும்பாலானவை விலை குறைந்து கிடக்கின்றன. தற்போதைய விலை மிகவும் கவர்ச்சிகரமாக இருப்பதாக அந்த நிறுவனங்களின் புரமோட்டார்கள் கருதுகிறார்கள். இதனால் பல மிட்கேப் மற்றும் ஸ்மால்கேப் பங்குகளில் முதலீட்டை அதிகரிக்கும் நோக்கில் அவர்கள் செயல்பட ஆரம்பித்திருக்கிறார்கள். ரேமண்ட், சாக்ஸ்கென் டெக்னாலாஜீஸ், வோல்டேம்ப் டிரான்ஸ்ஃபார்மர், பயர் கார்ப் சயின்ஸ் மற்றும் கிரிவ்ஸ் காட்டன் உள்ளிட்ட மிட்கேப் மற்றும் ஸ்மால்கேப் பங்குகளில் அதன் புரமோட்டர்கள் முதலீட்டைக் கணிசமாக அதிகரித்திருக்கிறார்கள்.”

2020-ம் ஆண்டில் மிட்கேப் மற்றும் ஸ்மால்கேப் பங்குகளின் விலை 20% அதிகரித்திருக்கிறதாமே!

“கடந்த இரண்டு ஆண்டுகளில் மிட்கேப் மற்றும் ஸ்மால்கேப் குறியீடுகள் சிறப்பாகச் செயல்படவில்லை. ஆனால், நடப்பு 2020-ம் ஆண்டில் இந்த நிலை மாறும் என எதிர்பார்க்கப்படுகிறது. ஏனெனில், மத்திய அரசாங்கம் நாட்டின் பொருளாதாரத்தை உயர்த்துவதற்காக முக்கியத் துறைகளின் வளர்ச்சிமீது கவனம் செலுத்தும் என எதிர்பார்க்கப்படுகிறது. இதனால் நிஃப்டி 50 மிட் அண்ட் ஸ்மால்கேப் குறியீடுகள் 15-20% வரை வருமானம் கொடுக்கும் என பல தரகு நிறுவனங்கள் தெரிவித்துள்ளன.

2020-ம் ஆண்டில் நிஃப்டி 50 குறியீடு 10% அதிகரித்து 13500 ஆகவும், மிட்கேப் குறியீடு சுமார் 20% அதிகரித்து 20500 ஆகவும் உயரும் என்று தரகு நிறுவனங்கள் கணித்திருக்கின்றன. டி.எல்.ஃப், ஐ.சி.ஐ.சி.ஐ புரூடென்ஷியல், சன் பார்மா, ஜே.எஸ்.டபிள்யூ ஸ்டீல், ஏ.சி.சி, கெயில் இந்தியா, ஹெச்.டி.எஃப்.சி, ஐ.டி.சி, மஹிந்திரா அண்ட் மஹிந்திரா, எஸ்.பி.ஐ, யூ.பி.எல், சியென்ட், கே.பி.ஆர் மில் போன்ற பங்குகளை நடப்பு ஆண்டில் 20 சதவிகிதத்துக்கு மேல் வருமானம் ஈட்டக்கூடிய பங்குகளாக தரகு நிறுவனங்கள் சுட்டிக்காட்டியிருக்கின்றன.”

எஸ்கார்ட்ஸ் பங்கு விலை சரிவுக்கு முக்கியமான காரணம் ஏதாவது இருக்கிறதா?

“பிரபல முதலீட்டாளர்களில் ஒருவரான ராகேஷ் ஜுன்ஜுன்வாலா, தான் வைத்திருந்த எஸ்கார்ட்ஸ் நிறுவனத்தின் பங்குகளை சமீபத்தில் விற்பனை செய்தார். இதனால் அந்த நிறுவனத்தின் பங்கு விலை சரிந்தது. இந்த நிறுவனத்தின் 94.75 லட்சம் பங்குகள் அவருடைய பங்கு போர்ட்ஃபோலியோவில் இருந்தன. அதிலிருந்து 5.25 லட்சம் பங்குகளை அவர் விற்பனை செய்தார். கடந்த செப்டம்பர், 2010-ம் ஆண்டில் தன்னுடைய போர்ட்ஃபோலியோவில் 8.16% எஸ்கார்ட்ஸ் பங்குகளை வைத்திருந்தார். இந்தப் பங்கு விற்பனைக்குப் பிறகு 7.73% எஸ்கார்ட்ஸ் பங்குகள் அவருடைய போர்ட்ஃபோலியோவில் இருக்கின்றன.”

நிஃப்டி 50 மிட் அண்ட் ஸ்மால்கேப் குறியீடுகள் 15-20% வரை வருமானம் கொடுக்கும் என பல தரகு நிறுவனங்கள் தெரிவித்துள்ளன.

தெமிஸ் மெடிகேர் நிறுவனப் பங்குகளின் திடீர் விலை உயர்ந்திருக்கிறது. ஏன் என்று சொல்லுங்கள்.

“கடந்த வாரத்தில் தெமிஸ் மெடிகேர் (Themis Medicare) நிறுவனத்தின் பங்கு விலை ஒரே நாளில் 5% அதிகரித்திருக்கிறது. இந்த நிறுவனத்துக்கு ஆட்டோமொபைல் நிறுவனங்களிடமிருந்து ‘ஃபெராகிரைலம் 1% ஜெல்’ என்ற மருந்துக்கான ஆர்டர்கள் வர ஆரம்பித்திருக்கின்றன. இனி வெளியிடப்படும் அனைத்து வாகனங்களின் முதலுதவி கிட்களில் ‘ஃபெராகிரைலம் 1% ஜெல்’ இருக்க வேண்டும் என இந்திய சாலைப் போக்குவரத்து மற்றும் நெடுஞ்சாலைத் துறை அமைச்சகம் உத்தரவிட்டிருக்கிறது. இதனால் இந்த மருந்துக்கு அதிக தேவை உருவாகியிருக்கிறது. இந்தப் பங்கின் விலை உயர்ந்ததற்கு இதுதான் காரணம்!”

ஷேர்லக்
ஷேர்லக்

ஃபோர்ட்டீஸ் ஹெல்த்கேர் நிறுவனப் பங்கில் ராகேஷ் ஜுன்ஜுன்வாலா முதலீட்டை அதிகரித்துள்ளாராமே?

“யெஸ், பெருமுதலீட்டாளரான ராகேஷ் ஜுன்ஜுன்வாலா, ஃபோர்ட்டீஸ் ஹெல்த்கேர் நிறுவனத்திலுள்ள தனது பங்குகளின் அளவை அதிகரித்ததை அடுத்து கடந்த வாரத்தில் மூன்று நாள்களாக அந்த நிறுவனத்தின் பங்கு விலையில் ஏற்றம் ஏற்பட்டது.

ராகேஷ் ஜு ன்ஜுன்வாலாவுக்கு ஃபோர்ட்டீஸ் நிறுவனத்தில் 1.66% பங்குகள் இருக்கின்றன. மூன்றாவது காலாண்டின் இறுதியில் அதை 2.65 சதவிகிதமாக அதிகரித்தார். அதன் காரணமாக அந்த நிறுவனத்தின் பங்கு விலை தொடர்ந்து மூன்று நாள்களாக ஏற்றமடைந்து, மொத்தம் 7.5% அதிகரித்தது. மேலும், டிசம்பர் காலாண்டில் ஃபோர்ட்டீஸ் நிறுவனத்தில் யூ.பி.எஸ் பிரின்சிபல் கேப்பிட்டல் ஆசியா, வென்கார்ட் டோட்டல் இன்டர்நேஷனல் ஸ்டாக் இண்டெக்ஸ் ஃபண்ட் மற்றும் யார்க் ஆசியன் ஆப்பர்ச்சூனிட்டீஸ் இன்வெஸ்ட்மென்ட்ஸ் மாஸ்டர் ஃபண்ட் ஆகிய வெளிநாட்டு முதலீட்டு நிறுவனங்களின் முதலீடுகள் 43.24% வரை அதிகரித்தன. இதன் காரணமாகவும் அந்த நிறுவனத்தின் பங்கு விலையில் ஏற்றம் ஏற்பட்டுள்ளது.”

என்.எஸ்.இ ஐ.பி.ஓ வெளியீட்டுக்காகத் திட்டமிட்டுள்ளது என்றும், செபியின் ஒப்புதல் கிடைப்பதைப் பொறுத்தே தேதி நிர்ணயிக்கப்படும் என்றும் சொல்லப்படுகிறது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பல ஆண்டுகளுக்குப்பிறகு ஐ.பி.ஓ வெளியிடும் பணியில் மீண்டும் என்.எஸ்.இ இறங்கியிருக்கிறதாமே!

“ஆமாம். நடப்பு நிதியாண்டில் செப்டம்பர் மாதத்தில் என்.எஸ்.இ (தேசியப் பங்குச் சந்தை) ஐ.பி.ஓ-வை வெளியிட திட்டமிட்டிருக்கிறது. இதனை என்.எஸ்.இ-யின் எம்.டி-யும் சி.இ.ஓ-வுமான விக்ரம் லிமாயி உறுதிப்படுத்தியுள்ளார். என்.எஸ்.இ ஐ.பி.ஓ வெளியீட்டின்மூலம் சந்தையில் பட்டியலிடுவது தொடர்பாக செபியை அணுகியுள்ளதாகக் கூறியுள்ளார் அவர்.

என்.எஸ்.இ-யின் 5.19% பங்குகளை எஸ்.பி.ஐ வைத்துள்ளது. இவற்றில் சிறிது பங்குகளை எஸ்.பி.ஐ விற்பனை செய்யத் தொடங்கியுள்ளது. ஐ.பி.ஓ வெளியீட்டுக்கு செபியின் ஒப்புதலைப் பெற்றபின் அதற்கான பணியை மேற்கொள்ள வணிக வங்கியை நியமிக்கவுள்ளதாகவும் என்.எஸ்.இ தரப்பில் கூறப்பட்டுள்ளது. நடப்பு நிதியாண்டின் மூன்றாவது காலாண்டில் ஐ.பி.ஓ வெளியீட்டுக்காகத் திட்டமிட்டுள்ளது என்றும், செபியின் ஒப்புதல் கிடைப்பதைப் பொறுத்தே தேதி நிர்ணயிக்கப்படும் என்றும் சொல்லப்படுகிறது.

இந்த ஐ.பி.ஓ முழுவதும் ஓ.எஃப்.எஸ் முறையில் நடக்கும் என்றும், ஏற்கெனவே இதன் பங்குகளை வைத்துள்ள பங்குதாரர்கள் தங்கள் பங்குகளை விற்பனை செய்வார்கள் என்றும் தெரியவருகிறது. முன்னதாக, கடந்த 2016-ம் ஆண்டிலேயே இதுதொடர்பாக செபியை என்.எஸ்.இ அணுகியது. ஆனால், சில காரணங்களுக்காக அந்த முயற்சியைத் தொடராமல் என்.எஸ்.இ கிடப்பில் போட்டுவைத்தது வாசகர்களுக்குத் தெரிந்திருக்கலாம்.”

மேன் இன்ஃப்ரா கன்ஸ்ட்ரக்சன் நிறுவனத்தின் பங்கு விலை ஏற்றத்துக்கு என்ன காரணம்?

“மேன் இன்ஃப்ரா கன்ஸ்ட்ரக்சன் நிறுவனத்துக்கு இந்திய அரசுக்குச் சொந்தமான இந்தியன் போர்ட் ரயில் & ரோப்வே கார்ப்பரேஷன் நிறுவனத்தின் ரூ.78.83 கோடி மதிப்புள்ள பணி ஆணை கிடைத்துள்ளது. அதையடுத்து கடந்த வாரத்தில் ஒரே நாளில் வர்த்தகத்தின் இடையே அந்த நிறுவனத்தின் பங்கு விலை 5% வரை ஏற்றம் பெற்றது.

கூடுதல் பணி ஆணையாக ரயில் யார்ட் வசதிகளை மேம்படுத்துவதற்காக ரூ.91.92 கோடி மதிப்பிலும் கிடைத்திருக்கிறது. ஆக மொத்தம், ரூ.170.75 கோடி மதிப்பீட்டிலான பணியில் ஈடுபடவுள்ளது. இந்தத் தகவல் வெளியானதையடுத்து இந்தப் பங்கின் விலை உயர்ந்தது’’ என்றவர், புறப்படும்முன் ‘‘இந்த வாரத்தில் எஃப் அண்ட் ஓ எக்ஸ்பைரி வருகிறது. பட்ஜெட் எதிர்பார்ப்பு காரணமாக சந்தை ஏற்ற இறக்கத்துடன் இருக்கும். பட்ஜெட் அன்று சந்தை உண்டு. எனவே, கவனம் அவசியம்” எனச் சொல்லிவிட்டுக் கிளம்பினார்.

குறைந்தது வளர்ச்சி வேகம்!

மியூச்சுவல் ஃபண்ட் துறையானது 2019-ம் ஆண்டில் 68 லட்சம் ஃபோலியோ கணக்குகளைச் சேர்த்திருக்கிறது. தற்போதைய மொத்த எண்ணிக்கை 8.7 கோடியாக இருக்கிறது.இருப்பினும், முந்தைய மூன்று ஆண்டுகளுடன் ஒப்பிடும்போது, 2019-ம் ஆண்டில் ஃபோலியோ கணக்குகளின் வளர்ச்சி வேகம் குறைந்திருக்கிறது. கடந்த 2018-ம் ஆண்டின் டிசம்பர் மாதத்தில் 8.03 கோடி ஃபோலியோ கணக்குகள் இருந்தன.

2019-ம் ஆண்டில் மொத்தம் 1.38 கோடிக்கு மேற்பட்ட முதலீட்டாளர்களின் கணக்குகள் சேர்க்கப்பட்டன. அதற்கு முந்தைய ஆண்டில் 1.36 கோடி கணக்குகள் சேர்க்கப்பட்டன என்பது குறிப்பிடத்தக்கது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு