Published:Updated:

ஷேர்லக்: எஃப் & ஓ எக்ஸ்பைரி... அக்டோபரில் நிஃப்டி 12000 புள்ளிகள்!

Shareluck
பிரீமியம் ஸ்டோரி
News
Shareluck

ஷேர்லக்

ந்ததும் வராததுமாக ஒரு பெரிய தும்மலைப் போட்டார் ஷேர்லக். ‘‘விட்டுவிட்டுப் பெய்யும் மழை, என் மூக்கைப் பதம் பார்த்துவிட்டது’’ என்றவரிடம் சுடச்சுட சுக்குமல்லி காபியை நீட்டினோம். ‘‘சூப்பர், தேவை அறிந்து உபசரிப்பதில் விகடனுக்கு நிகர் வேறு யார்’’ என்று சொல்லி, சுக்குமல்லி காபியைக் குடித்து தொண்டையைச் சரிசெய்துகொண்டார். பிறகு உற்சாகமாக நம் கேள்விகளுக்குப் பதில் சொல்ல ஆரம்பித்தார்.

ஷேர்லக்: எஃப் & ஓ எக்ஸ்பைரி... அக்டோபரில் நிஃப்டி 12000 புள்ளிகள்!

கார்ப்பரேட் வரியை மத்திய நிதி அமைச்சர் குறைத்துவிட்டார். ஆனால், பொருளாதாரம் குறித்த கவலைகள் இன்னும் தீர்ந்தபாடில்லையே!

“பொதுத்துறை, தனியார் துறை வங்கிகள், வங்கிசாரா நிதி நிறுவனங்கள் மற்றும் குறு நிதி நிறுவனங்களின் தலைவர்கள் மற்றும் தலைமைச் செயல் அதிகாரிகளுடன் டெல்லியில் நிதி அமைச்சர் நிர்மலா சீதாராமன் ஆலோசனை நடத்தினார். இந்தச் சந்திப்பில்தான் அடுத்த ஆறு மாதத்தில் பொருளாதார வளர்ச்சி சீரடையும் என அவர் நம்பிக்கை தெரிவித்திருக்கிறார். மேலும், கடன் வழங்குவது, பணப்புழக்கம் மற்றும் மக்களின் தேவை குறித்து அதில் விவாதிக்கப்பட்டது. சில்லறை வணிகத்தில் பணம் ஒரு பிரச்னையாக இல்லை. ஏனெனில், பொதுத்துறை வங்கிகள் உள்பட அனைத்து நிதி அமைப்புகளிடமும் கடன் வழங்கப் போதுமான பணம் கையிருப்பில் இருக்கிறது. ஒருசில துறைகள் தவிர, பிற துறைகளின் செயல்பாடு பழைய நிலைக்குத் திரும்பியுள்ளது.

விவசாயிகள் மற்றும் சிறு, குறு, நடுத்தர நிறுவனங்களுக்குக் கடன் வழங்கும் திட்டம் 400 மாவட்டங்களில் அக்டோபர் 3-ம் தேதியிலிருந்து ஆரம்பமாகும். முதல்கட்டமாக 250 மாவட்டங்களில் இந்தக் கடன் வழங்கும் முகாம்கள் நடத்தப்பட உள்ளன. இது பண்டிகைக் காலம் என்பதால், கடன்களுக்கு நல்ல வரவேற்பு இருக்கும் என எதிர்பார்ப்பதாகவும் சேவைத் துறையில் இந்தத் திட்டத்துக்கு நல்ல வரவேற்பு இருக்கும் என்றும் நிதி அமைச்சர் தெரிவித்திருப்பது, முதலீட் டாளர்களுக்கு மகிழ்ச்சியை ஏற்படுத்தியிருக்கிறது.’’

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

இன்னும் ஓராண்டில் சென்செக்ஸ் 43000 புள்ளிகளுக்கு உயரும் என பி.என்.பி பரிபா நிறுவனம் சொல்லியிருப்பதை நம்பலாமா?

“அடுத்த 12 மாதக்காலத்தில் சென்செக்ஸ் 43000 புள்ளிகளை எட்டக்கூடும் என்று பி.என்.பி பரிபா நிறுவனம் தெரிவித்துள்ளது. குறிப்பாக, நடப்பு ஆண்டு டிசம்பரில் 40500 புள்ளிகளை எட்டுமென்று இலக்கு நிர்ணயித்துள்ளது. இந்த இலக்கை எட்டுவதற்கு தற்போதுள்ள நிலையிலிருந்து சென்செக்ஸ் சுமார் 8% அதிகரிக்க வேண்டும். நிதி அமைச்சர் சமீபத்தில் அறிவித்த வரிக் குறைப்பு நடவடிக்கையால் ஏற்படும் முழுப்பலனும் வாடிக்கை யாளர்களுக்குக் கடத்தப்பட வேண்டும். அப்படிச் செய்தால் தான் இது சாத்தியப்படும் என்று கூறியுள்ளது.

ஷேர்லக்: எஃப் & ஓ எக்ஸ்பைரி... அக்டோபரில் நிஃப்டி 12000 புள்ளிகள்!

ஸ்மால்கேப் மற்றும் மிட்கேப் பங்குகள், வரலாற்று சராசரியை விடக் குறைவான விலையில் வர்த்தகமாயின. லார்ஜ்கேப் பங்கு களில் பிரிட்டானியா, அல்ட்ரா டெக் சிமென்ட், பவர் கிரிட், கெயில் மற்றும் மோட்டோகார்ப், மிட்கேப் பங்குகளில் நெஸ்லே இந்தியா, ஜி.எஸ்.கே கன்ஸ்யூமர் மற்றும் ஸ்மால் கேப் பங்குகளில் மணப்புரம் ஃபைனான்ஸ், ரெப்கோ ஹோம் ஃபைனான்ஸ் போன்ற நிறுவனங்களின் பங்குகளை முதலீட்டுக்குக் கவனிக்கலாம் என அது குறிப்பிட்டுள்ளது.

உலக அளவில் பொருளாதார மந்தநிலை, போர்ப் பதற்றத்தால் கச்சா எண்ணெய் விலை உயர்வு போன்ற பிரச்னைகள் இருந்தாலும், உலகிலுள்ள மத்திய வங்கிகள் பலவும் தங்கள் நிதிக்கொள்கைகளை மாற்றியமைப்பதன்மூலம் இந்த இலக்கு ஈடேறும் என பி.என்.பி பரிபா தெரிவித்துள்ளது. எனவே, சென்செக்ஸ் பெரிதாக வளர்ச்சியடையும் என்று கணித்துள்ளது.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

எஸ்.பி.ஐ வங்கிப் பங்கு விலையில் திடீர்ச்சரிவு ஏற்பட்டதன் காரணம் என்ன?

“மார்கன் ஸ்டான்லி நிறுவனம் கடந்த புதன் அன்று எஸ்.பி.ஐ வங்கியின் ரேட்டிங்கை ‘ஈக்குவல் வெயிட்’ என்ற அளவுக்குத் தரம் குறைத்து அறிவித்தது. இந்த அறிவிப்பு வெளியானதுமே வர்த்தக நாளின் இடையே அதன் பங்கு விலை 7.4% வரை வீழ்ச்சிகண்டது. ஒரு வர்த்தக நாளில் ஏற்பட்ட வீழ்ச்சியின் அடிப்படையில், கடந்த நான்கு ஆண்டுகளில் அந்த வங்கியின் பங்கு விலையில் ஏற்பட்ட பெரிய வீழ்ச்சியாக இது உள்ளது. எஸ்.ஐ.பி வங்கியின் சொத்து மதிப்பு மற்றும் நிகர வட்டி லாப வரம்புகளில் நிச்சயமற்ற தன்மை இருப்பதால், தரம் குறைத்துள்ளதாகத் தெரிகிறது. வர்த்தக நாளின் இறுதியில், மார்கன் ஸ்டான்லி நிர்ணயித்த இலக்கு விலையான 330 ரூபாயைவிட 15% குறைவாக 280.15 ரூபாய்க்கு இறங்கியது. மிகப் பெரிய அளவிலான கடன் வழங்குநர்களில் ஒன்றான எஸ்.பி.ஐ வங்கிக்கு வாராக்கடன் தொகை பெரிதாக உள்ளது. எனவே, இதிலிருந்து உடனே மீண்டுவருவதற்கான வாய்ப்பு இல்லை என்று மார்கன் ஸ்டான்லி கருதுகிறது. வங்கியின் மேக்ரோ வகை வாராக் கடன் நிலையை மேம்படுத்தாதவரை வங்கிக்கான தரமதிப்பீட்டை மாற்றுவது சாத்தியமில்லை என்றும் சொல்லியிருக்கிறது.’’

இந்தியாவின் ஜி.டி.பி வளர்ச்சி குறையும் என ஆசியன் டெவலப்மென்ட் வங்கி கணிக்கக் காரணம் என்ன?

“ஆசியன் டெவலப்மென்ட் வங்கி (ஏ.டி.பி), நடப்பு 2019-20-ம் நிதியாண்டில், இந்தியாவின் ஜிடி.பி வளர்ச்சி குறித்த கணிப்பை 6.5% எனக் குறைத்துக்கொண்டுள்ளது. கடந்த ஜூலை மாதத்தில் வெளியிட்ட கணிப்பில், 7% எனக் குறிப்பிட்டிருந்தது. பொருளாதார மந்தநிலையால், குறைவான நுகர்வு மற்றும் குறைவான முதலீடுகள் காரணமாகப் பல்வேறு உற்பத்தி மற்றும் சேவைத் துறைகள் பாதிக்கப்பட்டுள்ளன. அதன் காரணமாக, இந்தியாவின் வளர்ச்சி விகிதத்தை குறைந்துள்ளதாகக் கூறப்படுகிறது. செயல் திறன்மிக்க கொள்கைகளைக் கொண்டுவருவதன் மூலம் உள்நாட்டு தேவைப்பாடு மற்றும் முதலீடு களில் மேம்பாடு ஏற்பட்டால் வரும் 2020-21-ம் நிதியாண்டில் 7.2 சதவிகிதத்துக்குப் பொருளாதார வளர்ச்சி ஏற்படும் என்று கணிக்கப்பட்டுள்ளது.

ஷேர்லக்: எஃப் & ஓ எக்ஸ்பைரி... அக்டோபரில் நிஃப்டி 12000 புள்ளிகள்!

பணப்புழக்கத் தட்டுப்பாடு, குறைந்த தேவைப்பாடு உள்ளிட்ட பல்வேறு காரணங்களால் இந்தியப் பொருளாதார வளர்ச்சி கடந்த ஆறு ஆண்டுகளில் குறைவாக 5 சதவிகிதமாக உள்ளது. அதிகரிக்கும் வர்த்தகப் பதற்றம் போன்ற காரணங்களால் நடப்புக் கணக்குப் பற்றாக்குறை 2.2 சதவிகிதமாக உள்ளது. இதுபோன்ற பல்வேறு காரணங்களும் இந்தியாவின் ஜி.டி.பி வளர்ச்சி குறையக் காரணமாகக் கூறப்படுகிறது.”

அரபிந்தோ பார்மா நிறுவன உரிமையாளர் களுக்கு செபி ரூ.23 கோடி அபராதம் விதித்திருக்கிறதே?

“அரபிந்தோ பார்மா நிறுவனம், பங்கு வர்த்தக விதிமுறைகளை மீறி இன்சைடர் டிரேடிங்கில் ஈடுபட்டதாக செபி குற்றம் சாட்டியுள்ளது. அதற்காக அரபிந்தோ பார்மா நிறுவனத்தின் உரிமையாளர் பி.வி.ராம்பிரசாத் ரெட்டி, அவரது மனைவி பி.சுனீலா ராணி மற்றும் அந்த மோசடியில் தொடர்புடைய மற்ற நிறுவனங்களுக்கும் சேர்த்து மொத்தம் ரூ.22.6 கோடி அபராதம் விதித்துள்ளது. 2008 ஜூலை 22 முதல் 2009 மார்ச் 20 வரை, அரபிந்தோ பார்மா நிறுவனப் பங்கு வர்த்தகத்தில் செபிக்குச் சந்தேகம் ஏற்பட்டதால் விசாரணை நடத்தியது.

அரபிந்தோ நிறுவனமானது, உரிமம் மற்றும் விநியோகம் தொடர்பாக ஃபைசர் நிறுவனத்துடன் ஒப்பந்தம் போட்டது. அந்த ஒப்பந்தம் தொடர்பான நடவடிக்கைகள், வெளியில் தெரியாமல் நடந்துகொண்டிருக்கும் போதே, அரபிந்தோ பார்மா நிறுவன உரிமையாளர்கள், தங்கள் வசமுள்ள பங்குகளில் கணிசமான பகுதியைக் கூடுதல் விலைக்கு விற்பனை செய்திருக்கிறார்கள். இன்சைடர் டிரேடிங்கில் ஈடுபட்டதற்காக அரபிந்தோ பார்மா நிறுவன புரமோட்டர்கள் மற்றும் தொடர்புடையவர்களுக்கு அபராதம் விதிக்கப்பட்டுள்ளது.”

ஐ.டி.பி.ஐ வங்கி பங்கு விலை ஒரே நாளில் 11% அதிகரிக்கக் காரணம் என்ன?

“ஐ.டி.பி.ஐ வங்கிக்கு மத்திய அரசாங்கம் ரூ.4,557 கோடியை அளிக்கிறது. மேலும், இந்த வங்கியில் அதிக பங்கு மூலதனத்தைக் கொண்டிருக்கும் அரசுக்குச் சொந்தமான எல்.ஐ.சி கூடுதலாக, ரூ.4,743 கோடியை வழங்குகிறது. இதனைத் தொடர்ந்து, கடந்த வாரத்தில் புதன் கிழமை மட்டும் இந்த வங்கிப் பங்கின் விலை 10.7% உயர்ந்தது. கடந்த நான்கு வர்த்தக தினங்களில் பங்கு விலை 38 சதவிகிதத்துக்கும் அதிகமாக உயர்ந்தது. மொத்த வாராக்கடன் விகிதம் ஜூன் 30, 2019 நிலவரப்படி, 29.12 சதவிகிதமாகக் குறைந்துள்ளது. இது ஒரு வருடத்திற்குமுன்பு 30.78 சதவிகிதமாக இருந்தது.”

பங்குச் சந்தை எழுத்தாளர் சோம.வள்ளியப்பன் எழுதும் அட்டகாசமான தொடரைப் படிக்க : https://bit.ly/2lzBmeo

ஷேர்லக்: எஃப் & ஓ எக்ஸ்பைரி... அக்டோபரில் நிஃப்டி 12000 புள்ளிகள்!

வெள்ளிக்கிழமை அன்று இந்தியா புல்ஸ் நிறுவனப் பங்குகளின் விலை குறைந்திருக் கிறதே!

‘‘இந்தியா புல்ஸ் வென்சர்ஸ் பங்கு விலை 16.92 சதவிகிதமும், இந்தியா புல்ஸ் ரியல் எஸ்டேட் 9.58 சதவிகிதமும், இந்தியா புல்ஸ் ஹவுஸிங் நிறுவனம் 6.11 சதவிகிதமும், இந்தியா புல்ஸ் ஹோல்சேல் 4.98 சதவிகிதமும் இறக்கம் கண்டிருக்கிறது. ‘ரவுண்ட் ட்ரிப்பிங்’ முறைகேட்டில் ஈடுபட்டதாக இந்த நிறுவனம்மீது பொதுநல வழக்கு டெல்லி உயர்நீதிமன்றத்தில் தொடங்கப்பட்டது ஒரு காரணம். தவிர, இந்த நிறுவனத்தின் ரேட்டிங்கை கேர் (CARE) நிறுவனம் குறைத்திருக்கிறது. லட்சுமி விலாஸ் பேங்கை இந்த நிறுவனம் ‘டேக்ஓவர்’ செய்வதால் ஏற்படும் சவால்கள் காரணமாக ரேட்டிங் குறைக்கப்பட்டுள்ளதாகச் சொல்லியிருக்கிறது. இந்தப் பங்கில் முதலீடு செய்திருக்கும் முதலீட்டாளர்கள் எதற்கும் உஷாராக இருப்பது நல்லது.’’

முத்தூட் ஃபைனான்ஸ் என்.சி.டி மூலம் ரூ.1,000 கோடி திரட்டியது ஏன்?

‘‘முத்தூட் ஃபைனான்ஸ், பங்குகளாக மாற்ற முடியாத கடன் பத்திரங்களை (என்.சி.டி) வெளியிட்டு நிதி திரட்டுகிறது. அடிப்படையில் ரூ.100 கோடிக்கு இந்தக் கடன் பத்திரங்கள் வெளியிடப்படுகின்றன. அதிக தேவையிருந்தால் கூடுதலாக ரூ.900 கோடி வரைக்கும் திரட்டப்படும். ஆக மொத்தம், என்.சி.டி வெளியீட்டின்மூலம் ரூ.1,000 கோடி திரட்டப்படுகிறது. இந்த என்.சி.டி-க்கு அக்டோபர் 25 வரை விண்ணப்பிக்கலாம். மாதம் அல்லது ஆண்டுக்கு ஒருமுறை வட்டி வருமானம் பெறும் வசதி உள்ளது. அல்லது முதிர்வின்போது, மொத்தமாகப் பெறுதல் உள்ளிட்ட பத்து முதலீட்டுத் தேர்வுகள் உள்ளன. ஆண்டுக்கு வட்டி வருமானம் 9.25% முதல் 10.00% வரை கிடைக்கும். இந்த என்.சி.டி காரணமாக இந்தப் பங்கின் விலை வெள்ளிக்கிழமை அன்று சுமார் 1% வரை விலை ஏற்றம் கண்டது.’’

ஐ.பி.ஓ-க்களுக்குப் புத்துயிர் கிடைக்கும் என செபி தலைவர் அஜய் தியாகி சொல்லியிருக்கிறாரே!

“வெளிநாட்டு போர்ட்ஃபோலியோ முதலீட்டாளர்களுடன் (எஃப்.பி.ஐ) தொடர்புகொள்வதற்காக இந்த வாரம் அமெரிக்காவுக்குச் செல்லவிருக்கிறார் செபி தலைவர் அஜய் தியாகி. சமீபத்திய பங்குச் சந்தை சரிவானது ஐ.பி.ஓ-க்களையும் பாதிப்புக்குள்ளாகியிருக்கிறது. இதனால் இந்த ஆண்டில், ஆறு நிறுவனங்கள் மட்டுமே புதிய பங்கு வெளியீடுமூலம் நிதி திரட்ட முடிந்திருக்கிறது. இந்த நிலையில், புதிய பங்கு வெளியிடுவதும் அதிகரித்திருக்கிறது. தற்சமயம், ஐ.பி.ஓ வெளியிட 24-க்கும் மேற்பட்ட நிறுவனங்களுக்கு செபி ஒப்புதல் அளித்துள்ளது. விரைவில் ஐ.பி.ஓ-களுக்குப் புத்துயிர் கிடைக்கும் எனத் தெரிவித்துள்ளார் அஜய் தியாகி.”

அக்டோபரில் நிஃப்டி புள்ளிகள் 12000 புள்ளிகளுக்குமேல் அதிகரிக்கக்கூடும் என்கிறார்களே?

‘‘கடந்த வியாழக்கிழமையன்று ஃப்யூச்சர்ஸ் அண்டு ஆப்ஷன்ஸ் (எஃப் அண்டு ஓ) நிறைவு பெற்றது. இந்த எக்ஸ்பைரியில் நிஃப்டியில் ரோல் ஓவர் 73.1 சதவிகிதமாக உள்ளது. கடந்த மூன்று மாத சராசரி 74.28% ஆகும். டிரேடர்கள் லாங் பொசிஷன்களை அக்டோபர் மாதத்துக்கு எடுத்துச் சென்றிருக் கிறார்கள். எஃப் அண்டு ஓ ரோல் ஓவர் புள்ளிவிவரங்கள் வரும் அக்டோபர் மாதத்தில் இந்தியப் பங்குச் சந்தை ஏற்றத்தில் இருக்கும் என்பதைக் குறிக்கின்றன.

பங்குச் சந்தை வர்த்தகர்கள் மோடி தலைமையிலான அரசின் நடவடிக்கைகள் நாட்டின் பொருளாதார வளர்ச்சியை மேம்படுத்தும் என நம்புகிறார்கள். நிதி அமைச்சர் நிர்மலா சீதா ராமனின் சமீபத்திய கார்ப்பரேட் வரிச் சலுகை அறிவிப்பால், பங்குச் சந்தையின் சென்டிமென்ட் மேம்படும் என்று நினைக்கிறார்கள். இதனால் நிஃப்டி புள்ளிகள் தற்போதைய நிலையிலிருந்து அதிகரித்து, 12000 புள்ளிகளைத் தொடும் என்று எதிர்பார்க்கப் படுகிறது’’ என்றவர், வரும் புதன்கிழமை காந்தி ஜெயந்தி வருவதால் சந்தை விடுமுறை எனச் சொல்லிவிட்டுக் கிளம்பினார்.