Published:Updated:

ஷேர்லக் : முந்தும் ஸ்மால் & மிட்கேப் பங்குகள், ஃபண்டுகள்! - முதலீட்டாளர்கள் கவனத்துக்கு..!

ஷேர்லக்
பிரீமியம் ஸ்டோரி
News
ஷேர்லக்

பொருளாதார மந்தநிலை சீராகும்போது முதலில் லாபமடையப் போவது ஸ்மால் & மிட்கேப் நிறுவனங்களே!

காலையில் வாட்ஸ்அப்பில் தகவல் அனுப்பியபடி சரியாக மாலை 5 மணிக்கு வந்துசேர்ந்தார் ஷேர்லக் . “செப்டம்பர் 1-ம் தேதி முதல் பொதுப் போக்குவரத்து வருமா..?” என நம்மைப் பார்த்துக் கேட்க, நாம் புன்னகையைப் பதிலாகத் தந்துவிட்டு, கேள்விகளைக் கேட்க ஆரம்பித்தோம்.

டாடா மோட்டார்ஸ் நிறுவனம், கடன் இல்லாத நிறுவன இலக்கை அறிவித்திருக்கிறதே?

“ரிலையன்ஸ் சேர்மன் முகேஷ் அம்பானி அவரின் ரிலையன்ஸ் இண்டஸ்ட்ரீஸ் நிறுவனத்தை குறுகியகாலத்தில் கடன் இல்லா நிறுவனமாக மாற்றியதை அடுத்து பல நிறுவனங்கள் அதைப் பின்பற்றத் தொடங்கியிருக்கின்றன. டாடா மோட்டார்ஸ் நிறுவனத்தின் ஆண்டுப் பொதுக்கூட்டம் (ஏ.ஜி.எம்) அண்மையில் நடந்தது. அதில் அதன் சேர்மன் என்.சந்திரசேகர் பேசும்போது, இன்னும் மூன்று ஆண்டுகளில் டாடா மோட்டார்ஸைக் கடன் இல்லா நிறுவனமாக மாற்றப்போவதாக அறிவித்தார். இந்த அறிவிப்பை அடுத்து பங்கின் விலை 3% அதிகரித்திருக்கிறது. தற்போது இந்த நிறுவனத்துக்கு ரூ.48,000 கோடி கடன் இருக்கிறது.’’

ஷேர்லக்
ஷேர்லக்

முதலீடு மற்றும் வருமானத்தில் ஸ்மால்கேப் மற்றும் மிட்கேப் நிறுவனப் பங்குகள் மற்றும் மியூச்சுவல் ஃபண்டுகள் முந்தி வருகின்றனவே?

“மார்ச் 23 இறக்கத்துக்குப் பிறகு, பல ஸ்மால்கேப் மற்றும் மிட்கேப் நிறுவனப் பங்குகளின் விலை 40 - 60% விலை ஏற்றம் கண்டுள்ளன. சில பங்குகளின் விலை 100 சதவிகிதத்துக்கும் அதிகமாகக்கூட வருமானம் தந்திருக்கின்றன. இந்தக் காலகட்டத்தில் லார்ஜ்கேப் பங்குகளின் விலை இந்த அளவுக்கு அதிகமாக அதிகரிக்கவில்லை. பொருளாதார மந்தநிலை மற்றும் கோவிட்-19 பரவல் சீராகும்போது முதலில் லாபமடையப் போவது ஸ்மால் மற்றும் மிட்கேப் நிறுவனங்கள்தான் என்கிறார்கள் அனலிஸ்ட்கள்.

இரண்டு ஆண்டுகளுக்கு மேலாக சரியாக வருமானம் கொடுக்காமல் இறக்கத்திலேயே இருந்துவந்த மிட்கேப் நிறுவனப் பங்குகள், கடந்த இரண்டு மாதங்களாக ஏற்றத்தின் போக்குக்குத் திரும்பியிருக்கின்றன. நடப்பாண்டில் இதுவரைக்கும் நிஃப்டி சுமார் 6% இறக்கத்தில் இருக்கிறது. இதே காலகட்டத்தில், நிஃப்டி மிட்கேப் 100 குறியீடு 2% இறக்கத்தில் இருக்கிறது. இது லார்ஜ்கேப் ஃபண்டுகளைவிட மிட்கேப் பங்குகள் வேகமாக மீண்டு வருவதைக் காட்டுகிறது. அந்த வகையில், பல முன்னணி பங்குத் தரகு நிறுவனங்கள் ஸ்மால் மற்றும் மிட்கேப் பங்குகளை வாங்க பரிந்துரை செய்திருக்கின்றன. சர்வதேசப் பங்குத் தரகு நிறுவனமான மார்கன் ஸ்டேன்லி நிறுவனம் ஆதித்ய பிர்லா கேப்பிட்டல், பாரத் எலெக்ட்ரானிக்ஸ், டாடா பவர், சி.ஜி கன்ஸ்யூமர், ஜஸ்ட் டயல், பி.என்.பி ஹவுஸிங் ஃபைனான்ஸ், நாராயண ஹிருதயாலயா போன்ற பங்குகளை முதலீட்டுக்குக் கவனிக்கலாம் எனத் தெரிவித்திருக்கிறது. இதர பங்கு தரகு நிறுவனங்கள் ஏ.சி.சி, குஜராத் காஸ், இந்திரபிரஸ்தா காஸ், இந்தியன் ஹோட்டல்ஸ் பங்குகளையும் கவனிக்கலாம் என்கின்றன.”

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

பல மியூச்சுவல் ஃபண்டுகள், பங்குகளில் முதலீட்டை அதிகரிக்க என்ன காரணம்?

ஷேர்லக்
ஷேர்லக்

“இந்திய மியூச்சுவல் ஃபண்ட் துறை, 2020 ஜூலையில் கிட்டத்தட்ட ரூ.27.28 லட்சம் கோடியை நிர்வகித்து வந்தது. இதில் டாப் 20 மியூச்சுவல் ஃபண்டுகள், ஈக்விட்டி ஃபண்டுகள் மூலம் நிர்வகித்து வரும் தொகை ரூ. 11.01 லட்சம் கோடியாக இருக்கிறது.

இது கடந்த ஜூன் மாதத்தில் ரூ.10.49 லட்சம் கோடியாக இருந்தது. இந்த அதிகரிப்புக்கு மிரே அஸெட், கனரா ராபிகோ, இன்வெஸ்கோ, ஆக்ஸிஸ் மியூச்சுவல் ஃபண்ட், கோட்டக் மியூச்சுவல் ஃபண்ட், யூ.டி.ஐ மியூச்சுவல் ஃபண்ட் போன்ற மியூச்சுவல் ஃபண்டுகள் அதிக அளவில் பங்குகளில் முதலீடு செய்திருப்பதே முக்கியக் காரணமாகும். இவை நிறுவனப் பங்குகளில் முதலீடு செய்திருப்பது ஜூலை மாதத்தில் 7% அதிகரித்துள்ளது. புதிய முதலீடுகள் வந்திருப்பது மற்றும் மியூச்சுவல் ஃபண்டுகள், கடன் பத்திர முதலீடுகளை நிறுவனப் பங்குகளுக்கு மாற்றியிருப்பது மூலம் நடந்திருக்கிறது.”

ஷேர்லக் : முந்தும் ஸ்மால் & மிட்கேப் பங்குகள், ஃபண்டுகள்! - முதலீட்டாளர்கள் கவனத்துக்கு..!

இந்தியப் பங்குச் சந்தை புதிய உச்சத்துக்குச் செல்லும் என்கிறார்களே?

“இந்தியப் பொருளாதாரம் மேம்படுவதற்கான அறிகுறிகள் தென்பட ஆரம்பித்திருக்கின்றன. விரைவில் ஊரடங்கு முழுமையாக விலக்கிக் கொள்ளப்பட்டு, ரயில் மற்றும் பஸ் போக்குவரத்து தொடங்கிவிடும் என எதிர்பார்க்கப்படுகிறது. மார்ச் மாதத்தில் நிஃப்டி குறியீடு 7511–க்கு இறங்கியது; ஆகஸ்ட் 27-ம் தேதி 11559-க்கு உயர்ந்திருக்கிறது. இது கிட்டத்தட்ட 55% உயர்வு. இது V- வடிவிலான ஏற்றமாகப் பார்க்கப்படுகிறது. வேகமாக ஏறிச் சென்ற தங்கத்தின் விலை கொரோனாவுக்கு தடுப்பு மருந்து தயாரிப்பில் முன்னேற்றம் என்ற தகவல் வரத் தொடங்கியதும் கணிசமாக இறக்கம் கண்டு வருகிறது. இதனால், தங்கத்தை நோக்கிச் சென்ற முதலீடுகள் மீண்டும் பங்குச் சந்தைக்குத் திருப்ப ஆரம்பித்திருக்கின்றன. இந்த நிலை நீடிக்கும் என எதிர்பார்க்கப்படுவதால், சந்தை புதிய உச்சத்துக்குச் செல்லும் என எதிர்பார்க்கப்படுகிறது.

அந்நிய நிதி நிறுவனங்களின் (எஃப்.ஐ.ஐ-க்கள்) முதலீடுகள் அதிகரிப்பாலும், ஆர்.பி.ஐ, மத்திய அரசு எடுத்த பல்வேறு நடவடிக்கைகளாலும் நாட்டில் பணப்புழக்கம் உயர்ந்திருக்கிறது. இதனாலும் சந்தை புதிய உச்சத்துக்குச் செல்லும். குறிப்பாக, தகவல் தொழில்நுட்பம், தனியார் வங்கிகள், பார்மா நிறுவனப் பங்குகள் கணிசமான லாபத்தைத் தரக்கூடும் என்கிறார்கள். ஹெச்.டி.எஃப்.சி பேங்க், ஐ.சி.ஐ.சி.ஐ பேங்க், இன்ஃபோசிஸ், டி.சி.எஸ், டாக்டர் ரெட்டீஸ் உள்ளிட்டப் பங்குகளை முதலீட்டுக்குக் கவனிக்கலாம் என்கிறார்கள் முன்னணி அனலிஸ்ட்கள்.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பங்குச் சந்தை ரகசியங்கள்!

ஷேர்லக் : முந்தும் ஸ்மால் & மிட்கேப் பங்குகள், ஃபண்டுகள்! - முதலீட்டாளர்கள் கவனத்துக்கு..!

‘பங்குச் சந்தை ரகசியங்கள் - பால பாடம்’ என்னும் ஆன்லைன் நிகழ்ச்சியை ஆகஸ்ட் 31-ம் தேதி மாலை 6 - 7 மணிக்கு நாணயம் விகடன் நடத்த உள்ளது. பங்குச் சந்தை மற்றும் கமாடிட்டி வர்த்தக ஆலோசகர் தி.ரா.அருள்ராஜன் (முதன்மை செயல் அதிகாரி, Ectra.in) இந்த நிகழ்ச்சியில் சிறப்புரை வழங்க உள்ளார். நிகழ்ச்சியில் கலந்துகொள்ள அனுமதி இலவசம்.இந்த நிகழ்ச்சிக்குப் பதிவு செய்ய: https://bit.ly/3ap5mhZ

ஓய்வுக்காலத் திட்டமிடல்!

நாணயம் விகடன் மற்றும் ஆதித்ய பிர்லா சன் லைஃப் மியூச்சுவல் ஃபண்ட் இணைந்து ‘ஓய்வுக்கால நிதித் திட்டமிடல்; கைகொடுக்கும் மியூச்சுவல் ஃபண்ட்!’ என்ற நிகழ்ச்சியை ஆன்லைனில் நடத்த உள்ளன. முதலீட்டு ஆலோசகர்கள் வ.நாகப்பன், பி.வி.சுப்ரமணியம் மற்றும் ஆதித்ய பிர்லா சன் லைஃப் மியூச்சுவல் ஃபண்ட் நிறுவனத்தின் கே.எஸ்.ராவ், எஸ்.குருராஜ் சிறப்புரை வழங்குகிறார்கள். நாள்: செப்டம்பர் 6 காலை 10 - 12 மணி. அனுமதி இலவசம். பதிவு செய்ய: https://bit.ly/3gvWJnd