வெளிநாட்டு பங்கு... ஃபண்ட்... இ.டி.எஃப்... சிறு முதலீட்டாளர்களுக்குக் கைகொடுக்குமா?

த ற்போதுதான் கொரோனா ஊரடங்கு நடைமுறை ஓரளவுக்கு முடிவுக்கு வந்துகொண்டிருக்கிறது. ஏற்கெனவே பொருளாதாரம் மந்தநிலையில் இருந்துவருகிறது. . தொற்றுநோய் என அறிவிக்கப்பட்டதிலிருந்து பங்குச் சந்தை கடுமையாகச் சரிந்துவருகிறது. இந்தச் சரிவு முதலீட்டாளர்களுக்குக் கடந்த சில ஆண்டுகளில் இல்லாத அளவுக்கு இழப்பை ஏற்படுத்தியிருக்கிறது.

ஒவ்வொரு முறை சந்தை சரியும்போதும் ஏதாவது ஒரு வாய்ப்பு இருக்கும். தற்போதைய சூழலில் முதலீடு செய்வதற்கு இருக்கும் வாய்ப்புகள் குறித்துப் பார்ப்பதற்கு முன்னர் எந்தத் துறை வளர்ச்சியடையும் என்பதைப் பார்ப்போம்.

. மீண்டெழும் துறைகள்!

ஒவ்வொரு தேக்கநிலைக்குப் பிறகும் பொருளாதாரம் மீண்டெழும் என்பதுதான் உண்மை. ஒரு தொழிலை அடுத்த கட்டத்துக்குக் கொண்டு செல்வதே இது போன்ற தேக்கநிலைகள்தான். தேக்கநிலையில் மக்களிடமும் நிறுவனங்களிடமும் செலவழிக்கும் திறன் குறையும். அதனால் இருக்கும் பணத்தைக் குறைவாக அல்லது தேவைக்கேற்ப செலவோ, முதலீடோ செய்வார்கள். அந்த முதலீடும் அப்போதைக்கு எந்தத் துறை வளர்ச்சியில் இருக்கிறதோ அதில்தான் செய்யப்படும்.

1929-ம் ஆண்டு, சர்வதேசப் பெருமந்தநிலை ஏற்பட்டது. ஆனால், அதற்கு முன்னதாகவே நீராவி இன்ஜின், தொழிற்சாலை ஆகியவை செயல்படத் தொடங்கிவிட்டன. புதிய வாய்ப்புகள் இதற்குப் பிறகுதான் உருவாகின. அதேபோல 1980-களில் உருவான மந்தநிலைக்குப் பிறகு சேவைத்துறையில் பெரிய அளவில் மாற்றங்கள் நடந்தன. டெலிகாம், ஐடி, நிதிச்சேவைத் துறைகளிலும் பெரிய மாற்றங்கள் இருந்தன.

. மனிதனுக்குத் தேவையான தொழில்நுட்பம்!

கோவிட் 19 தொற்றுநோய் உருவாக்கிய மந்தநிலை என்ன மாதிரியான வளர்ச்சியை உருவாக்கும் என்று பார்ப்போம்.

. கடந்த சில ஆண்டுகளில் எந்தெந்தத் தொழில்துறை வளர்ச்சியடைந்திருக்கிறது என்று யோசித்தால், ஒரே வார்த்தையில் கிடைக்கும் பதில் `தொழில்நுட்பம்.’ இதுவரை தொழில்நுட்பம் என்பது நிறுவனங்களுக்காகவே இருந்தது. அதாவது, பிசினஸ் டு பிசினஸ். ஆனால், கடந்த சில ஆண்டுகளுக்கு முன்னர் உருவான தொழில்நுட்பம் என்பது மனிதர்களுக்கான தொழில்நுட்பம் (பிசினஸ் டு கஸ்டமர்ஸ்). மனிதன் செய்யும் வேலையைக் குறைக்கும் தொழில்நுட்பம்தான் அடுத்த சில ஆண்டுகளுக்குப் பிறகு பெரிய அளவில் வளர்ச்சி காண்பதற்கு வாய்ப்புள்ள துறையாக இருக்கும் என்று எதிர்பார்க்கலாம்.

முன்பெல்லாம் டாக்ஸி பிடிக்க வேண்டுமென்றால் நாம்தான் டாக்ஸி ஸ்டாண்டை நோக்கிச் செல்வோம். ஆனால், தற்போது டாக்ஸி நாம் இருக்கும் இடத்துக்கு வருகிறது. அதேபோல, படம் பார்க்க தியேட்டருக்குச் செல்ல வேண்டியதில்லை. வீட்டிலேயே படம் பார்க்கலாம். இதுபோல மனிதனுக்குத் தேவையான தொழில்நுட்பத்தை கையாளும் நிறுவனங்களின் வளர்ச்சி அதிகமாக இருக்கும்.

. வெளிநாட்டு நிறுவனப் பங்குகள்!

மேலே சொன்ன விஷயங்களுடன் ஒப்பிட்டுப் பார்த்தால் ஆப்பிள், மைக்ரோசாஃப்ட், அமேசான், ஃபேஸ்புக், ஆல்பபெட் (கூகுள்) போன்ற நிறுவனங்கள் நம் கண்முன்னே வந்துபோகும். தற்போதைய மந்தநிலைக்குப் பிறகு இது போன்ற நிறுவனப் பங்குகளின் விலை உயர வாய்ப்பிருக்கிறது. இந்தியாவில் இருக்கும் ஒருவர் சில வழிகளில் இது போன்ற பங்குகளில் முதலீடு செய்யலாம். முதலாவது, நேரடியாக வெளிநாட்டுப் பங்குகளை இங்கிருந்தே வாங்க முடியும். ஆண்டுக்கு 2.5 லட்சம் டாலர் வரை முதலீடு செய்யலாம்.

. மியூச்சுவல் பண்டுகள் மூலமாக...

இரண்டாம் வாய்ப்பு மியூச்சுவல் பண்டுகள் மூலமாக வெளிநாட்டு நிறுவனப் பங்குகளில் முதலீடு செய்யலாம். பல மியூச்சுவல் ஃபண்ட் நிறுவனங்கள் அமெரிக்கா சார்ந்த ஃபண்டுகளை நடத்திவருகின்றன.

இந்த ஃபண்டுகளின் போர்ட் ஃபோலியோவில் நாம் ஏற்கெனவே விவாதித்த துறைகளைச் சார்ந்த பங்குகள் மட்டுமல்லாமல், அமெரிக்காவில் செயல்படும் மற்ற துறை சார்ந்த பங்குகளும் இருக்கும். சில ஃபண்டுகள் சர்வதேச அளவில் செயல்படும். அதனால் அமெரிக்கா மட்டுமல்லாமல், பிற நாட்டுச் சந்தைகளிலும் முதலீடு செய்யப்பட்டிருக்கும்.

. இ.டி.எஃப்

மூன்றாவது வாய்ப்பு, `எக்ஸ்சேஞ்ச் டிரேடடு ஃபண்ட்’ என்று சொல்லப்படும் இ.டி.எஃப்-கள். இவை பங்குச் சந்தையில் வர்த்தகமாகும் ஃபண்டுகள். அமெரிக்க பங்குச் சந்தை குறியீடு சார்ந்த சில இ.டி.எஃப்-கள் இந்தியாவில் வர்த்தகமா கின்றன. இவற்றைப் பங்குகளைப்போல நேரடியாக உங்கள் புரோக்கிங் நிறுவனத்தின் மூலமாக வாங்கலாம். இதுபோன்ற வெளிநாட்டு நிறுவன முதலீடுகள் வருங்காலத்தில் நல்ல லாபம் தரலாம்.

. `கோவிட்-19 தொற்று காரணமாக அமெரிக்கா கடும் பாதிப்புக்குள்ளாகியிருக்கிறது. இந்தச் சமயத்தில் அமெரிக்கப் பங்குச் சந்தையில் முதலீடு செய்வது சரியானதாக இருக்குமா’ எனும் கேள்வி எழலாம். ஆனால், மேலே குறிப்பிடப்பட்டிருக்கும் நிறுவனங்கள் அமெரிக்காவில் மட்டுமல்லாமல், சர்வதேச அளவில் தொழிலில் ஈடுபட்டுள்ளன. அதனால் அமெரிக்காவில் பாதிப்பு இருந்தாலும் சர்வதேச அளவில் வருமானம் இருப்பதால் பெரிய சரிவைச் சந்திக்க வாய்ப்பில்லை. இருந்தாலும் ஒருவருடைய பங்குச் சந்தை சார்ந்த முதலீட்டில் 15 முதல் 20% அளவில் மட்டுமே வெளிநாட்டு நிறுவனப் பங்குகளில் வைத்துக்கொள்ளலாம்.

. ரிஸ்க் என்ன?

பங்கு விலை உயர்வு அல்லது சரிவு என்பது மட்டுமே இந்த முதலீட்டிலுள்ள ரிஸ்க் இல்லை. டாலருக்கு நிகரான ரூபாய் மதிப்பைப் பொறுத்தும் இந்த முதலீட்டின் வருமானம் கூடவோ குறையவோ இருக்கலாம். இதுவரை இது போன்ற இ.டி.எஃப்-கள் நல்ல லாபத்தைக் கொடுத்திருக்கின்றன. அதற்கு, பங்கு விலை உயர்வு மட்டுமல்லாமல் ரூபாய் மதிப்பு சரிவதும் ஒரு காரணமாக இருந்திருக்கிறது.உதாரணமாக, மோதிலால் ஆஸ்வால் நாஸ்டாக் 100 பண்ட் கடந்த ஓராண்டில் சுமார் 30% லாபம் கொடுத்திருக்கிறது. ஆனால், கடந்த ஓராண்டில் நாஸ்டாக் குறியீடு 21% மட்டுமே வளர்ச்சியடைந்திருக்கிறது. ரூபாய் மதிப்பு சரிந்திருப்பதால், கூடுதலாக ஒன்பது சதவிகித லாபம் கிடைத்திருக்கிறது. ஒருவேளை ரூபாய் மதிப்பு உயர்ந்தால், நமக்குக் கிடைக்கும் லாபம் குறையும் அல்லது நஷ்டம் அதிகரிக்கும் என்பதைப் புரிந்துகொள்ள வேண்டும். ரூபாய் மதிப்பு தற்போது சாதகமாக இருந்தாலும், இனி அது பாதகமாக மாறவும் வாய்ப்புண்டு.

. இந்தியப் பங்குகளை மட்டும் கவனத்தில் கொள்ளாமல் சர்வதேச அளவில் செயல்படும் நிறுவனப் பங்குகளையும் கவனிக்கத் தொடங்கலாம். . சிறு முதலீட்டாளர்கள் வெளிநாட்டு நிறுவனப் பங்குகளில் முதலீடு செய்வது அதிக ரிஸ்க்காக அமையக்கூடும்; பல்வேறு வெளிநாட்டுப் பங்குகளில் முதலீடு செய்யும் மியூச்சுவல் ஃபண்டுகள் மற்றும் இ.டி.எஃப்-களில் முதலீடு செய்வது நல்லது!

வெளிநாட்டு பங்கு... ஃபண்ட்... இ.டி.எஃப்... சிறு முதலீட்டாளர்களுக்குக் கைகொடுக்குமா?

நாணயம் விகடன் டீம்