Published:Updated:

டி.சி.எஸ் ஷேர் பைபேக்... தரலாமா, கூடாதா? - முதலீட்டாளர்கள் என்ன செய்ய வேண்டும்?

டி.சி.எஸ் 
ஷேர் பைபேக்
பிரீமியம் ஸ்டோரி
News
டி.சி.எஸ் ஷேர் பைபேக்

முதலீட்டாளர் வசம் இருக்கும் ஒரு நிறுவனப் பங்குகளை அதே நிறுவனத்துக்குத் திரும்ப விற்பனை செய்வதுதான் பைபேக்!

முன்னணி ஐ.டி நிறுவனங்களான டி.சி.எஸ் (TCS) அண்மையில் ரூ.16,000 கோடி மதிப்புக்கு முதலீட்டாளர்களிடமிருந்து அதன் நிறுவனப் பங்குகளைத் திரும்ப வாங்குவதாக (Share Buyback) அறிவித்தது. இதேபோல, விப்ரோ (WIPRO) நிறுவனமும் ரூ.9,000 கோடிக்கு பைபேக்கை அறிவித்தது. இந்த பைபேக் அறிவிப்பை பயன்படுத்தி, ஏற்கெனவே வாங்கி வைத்துள்ள பங்குகளைத் திரும்பத் தரலாமா என முதலீட்டாளர்கள் யோசித்து வருகிறார்கள். இந்தக் கேள்விக்கு பதில் தெரிந்துகொள்ளும்முன், பைபேக் என்றால் என்ன என்று பார்த்துவிடுவோம்.

பைபேக் என்றால்..?

ஒரு முதலீட்டாளர் அவர் வசம் இருக்கும் ஒரு நிறுவனத்தின் பங்குகளை அதே நிறுவனத்துக்குத் திரும்ப விற்பனை செய்வது பைபேக் (Buyback) என அழைக்கப்படும். இது பங்குச் சந்தையில் பங்குகளை விற்பது போன்றதுதான். பங்குச் சந்தையில் நாம் பங்குகளை விற்கும்போது அதை வாங்குபவர் யார் என்பது நமக்குத் தெரியாது. ஆனால், பைபேக் திட்டத்தில் பங்குகளை வாங்குவது அந்த நிறுவனம்தான். ஏன் நிறுவனம் அப்படிச் செய்கிறது?

டி.சி.எஸ் ஷேர் பைபேக்... தரலாமா, கூடாதா? - முதலீட்டாளர்கள் என்ன செய்ய வேண்டும்?

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

நல்ல லாபம் சம்பாதிக்கும் நிறுவனம், லாபத்தின் ஒரு பகுதியை முதலீட்டாளர்களுக்கு டிவிடெண்ட் வடிவில் பகிர்ந்து அளித்து விட்டு, மீதமுள்ள லாபத்தை தன் எதிர்காலத் தேவைக்காகக் கையிருப்பாக வைத்திருக்கும். கையிருப்பு கணிசமாகவும் எதிர்காலத் தேவையைவிட அதிகமான அளவிலும் இருக்கும் பட்சத்தில், அந்த நிறுவனம் அந்தக் கையிருப்பை மீண்டும் முதலீட்டாளர்களுக்குப் பிரித்துக் கொடுக்க முடிவு செய்யலாம். இதை மூன்று முறைகளில் செய்ய முடியும்.

1. நிறுவனம், பங்கு முதலீட்டாளர்களுக்கு சிறப்பு டிவிடெண்ட் (Special Dividend) வழங்கலாம். அப்பாட் (Abbott) நிறுவனம் 2019-20 ஆண்டுக்கு இறுதி டிவிடெண்ட் ரூ.107 தவிர, சிறப்பு டிவிடெண்டாக ரூ.143 வழங்கியது.

2. பங்கு முதலீட்டாளர்களுக்குக் கடன் பத்திரங்கள் (Bonus Debentures) இலவசமாக வழங்கலாம். இந்தக் கடன் பத்திரங்களின்முக மதிப்பை பின்னாளில் அந்த நிறுவனம் பணமாக முதலீட்டார்களுக்குத் திரும்பத் தந்துவிடும். அதுவரை முதலீட்டாளர்களுக்கு வட்டியும் வழங்கப்படும். உதாரணமாக பிரிட்டானியா (Britannia) நிறுவனம் 2019-ம் ஆண்டு அதன் பங்குதாரர்களுக்கு இலவசக் கடன் பத்திரங்களை வழங்கியது.

3. முதலீட்டாளர்களிடமிருந்து பங்குகளை திரும்பப் பெற்று (பைபேக்), அதற்குரிய தொகையை வழங்குவதாகும்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

பைபேக் நடைமுறைகள்

நிறுவனங்கள் முதலீட்டாளர்களிடமிருந்து பங்குகளைத் திரும்ப வாங்க முற்படும்போது கம்பெனிகள் சட்டம் 2013 (Companies Act, 2013) மற்றும் செபி விதிமுறைகளைக் கடைப்பிடிக்க வேண்டும். மொத்த பைபேக்கின் மதிப்பு, அந்த நிறுவனத்தின் அளிக்கப்பட்ட பங்கு மூலதனம் (paid-up capital) மற்றும் ரொக்கக் கையிருப்பு (Free Reserves) தொகையைவிட 10 சதவிகிதத்துக்கு அதிகமாக இருந்தால், முதலீட்டாளர்களிட மிருந்து சிறப்புத் தீர்மானம்மூலம் ஒப்புதல் பெறுவது அவசியம். பைபேக்கின் மொத்தத் தொகை அதிகபட்சம் நிறுவனத்தின் அளிக்கப் பட்ட பங்கு மூலதனம் மற்றும் கையிருப்புத் தொகையின் மதிப்பில் 25% வரை இருக்கலாம்.

டி.சி.எஸ் ஷேர் பைபேக்... தரலாமா, கூடாதா? - முதலீட்டாளர்கள் என்ன செய்ய வேண்டும்?

இரண்டு முறைகளில் பங்குகளைத் திரும்ப வாங்கலாம்!

1. ஒரு நிறுவனம் அதன் பங்குகளை பங்குச் சந்தையிலிருந்து திரும்ப வாங்கலாம். அதற்குமுன், பைபேக்குக்காகச் செலவிடப்படும் மொத்தத் தொகைக்கும், சந்தையிலிருந்து பங்கு வாங்குவதற்கான அதிகபட்ச விலைக்கும் நிறுவனத்தின் பங்கு முதலீட்டாளர்களிடமிருந்து ஒப்புதல் பெற வேண்டும்.

இப்படிப் பங்குகளை வாங்கும் முறை கிட்டத்தட்ட நாம் பங்குச் சந்தையிலிருந்து பங்கு வாங்குவது போன்றதே. ஒரே ஒரு வித்தியாசம் இங்கு பங்குகளை வாங்குவது அதே நிறுவனமாகும். இந்த முறை பங்குச் சந்தைமூலம் பங்குகளைத் திரும்ப வாங்குவது (Buyback through Open Market route) ஆகும். இன்ஃபோசிஸ் (Infosys) நிறுவனம் 2019-ம் ஆண்டு பங்கு முதலீட்டார்களிடம் ஒப்புதல் பெற்று, ரூ.8,260 கோடி மதிப்புள்ள பங்குகளை வாங்கியது; ஒரு பங்கின் சராசரி விலை ரூ.747 (ஒப்புதல்படி, உச்சபட்ச விலை ரூ.800).

2. இரண்டாவது முறையில் செபி அமைப்பின் விதிமுறைகளுக்கு உட்பட்டு விகிதாசார அடிப்படையில் அனைத்து முதலீட்டாளர் களிடமிருந்தும் ஒரு நிறுவனம் பங்குகளைத் திரும்ப வாங்குவதாகும் (Buyback through Tender route). இந்த முறையில் அந்த நிறுவனம் அனைத்து முதலீட்டாளர்களிடமிருந்தும் முன்னரே நிர்ணயிக்கப்பட்ட விலையில் விகிதாசார அடிப்படையில், குறிப்பிட்ட சதவிகிதப் பங்குகளைத் திரும்ப வாங்கிக் கொள்ளும். உதாரணத்துக்கு, 2018-ல் டி.சி.எஸ் ரூ.16,000 கோடி மதிப்புள்ள பங்குகளை, பங்கு ஒன்று ரூ.2,100 என்ற விலையில் வாங்கியதைக் குறிப்பிடலாம்.

டிவிடெண்ட் வருமானத்தைவிட பைபேக் மூலம் அதிக தொகை கிடைக்கும். அதே நேரத்தில், 30% விட குறைந்த வரி வரம்பில் வருபவர்களுக்கு டிவிடெண்ட் பெறுவது லாபகரமாக இருக்கும்!

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

டி.சி.எஸ் பைபேக் 2020

டி.சி.எஸ் நிறுவனம், பங்கு ஒன்றை ரூ.3,000 என்ற விலையில் 533.33 லட்சம் பங்குகளை மொத்தம் ரூ.16,000 கோடிக்கு வாங்கத் திட்டமிட்டுள்ளது. ஏல முறையில் (Tender Offer route) பங்குகள், அனைத்துப் பங்குதாரர்களிடம் இருந்தும் அவர்களிடம் ஏற்கெனவே இருக்கும் பங்குகளின் விகிதாசார அடிப்படையில் திரும்ப வாங்கப்படுகிறது. பங்குகளைத் திரும்ப வாங்கும் மதிப்பு ரூ.16,000 கோடி என்பது இந்த நிறுவனத்தின் நிகர மதிப்பில் 25 சதவிகிதத்துக்கும் குறைவானதாகும்.

டி.சி.எஸ் ஷேர் பைபேக்... தரலாமா, கூடாதா? - முதலீட்டாளர்கள் என்ன செய்ய வேண்டும்?

பைபேக் முறையும் வரிச் சட்ட மாற்றங்களும்!

ஏப்ரல் 2020-க்கு முன் ஒரு நிறுவனம் அதன் முதலீட்டாளர் களுக்கு டிவிடெண்ட் வழங்கும் போது, மொத்த டிவிடெண்ட் தொகைக்கு டிவிடெண்ட் விநியோக வரி (டி.டி.டி) 20.56% செலுத்த வேண்டியிருந்தது. அதே நேரத்தில், பைபேக் மூலம் இதே தொகையை முதலீட்டாளர்களுக்கு வழங்கும் போது வரி எதுவும் கிடையாது. இதனால் பெரும்பாலான நிறுவனங்கள், லாபத்தை டிவிடெண் டாக வழங்குவதற்குப் பதில் பைபேக் முறையைக் கையாண்டன.

பைபேக் முறைக்கு உதவும் விதமாக, பங்குச் சந்தை மூலம் நிறுவனம் பங்குகளை வாங்க செபி வழிவகுத்தது. இவ்வழி பைபேக் பங்குகளும், நீண்டகால மூலதன ஆதாய வரி (long term capital gains tax) விலக்கு பெறுவதற்கு வகை செய்தது. சில நிறுவனங்கள் வழக்கமான டிவிடெண்ட் தொகையைக் குறைத்துக்கொண்டு, பைபேக் முறையைக் கடைப்பிடிக்க முற்பட்டன. உதாரணமாக, சன் பார்மா (Sun Pharma) 2016-ல் இவ்வாறு செய்தது.

மத்திய அரசு ஜூலை 2019-ல் வரிச் சட்டத்தைத் திருத்தி, பைபேக் செய்யும் நிறுவனத்தின்மீது 23.296% ‘பைபேக் வரி’ விதித்தது. ஆனால், முதலீட்டாளருக்குக் கிடைக்கும் பைபேக் தொகைக்கு முழு வரி விலக்கு அளிக்கப்பட்டது. ‘பைபேக் வரி’ டிவிடெண்ட் விநியோக வரியைவிட (20.56%) அதிகமாக இருந்ததால், பைபேக் கவர்ச்சி யற்றதாக மாற்றியது. பங்குதாரர்களுக்கு வெகுமதி அளிக்க நிறுவனங்கள் மீண்டும் இயல்பான அல்லது சிறப்பு டிவிடெண்டுக்கு மாறின.

ஏப்ரல் 2020 முதல் வழங்கப்படும் டிவிடெண்டுக்கு, டிவிடெண்ட் விநியோக வரி கிடையாது. முதலீட்டாளர்கள் பெறும் டிவிடெண்ட் வருமானத்துக்கு அவர்களின் அடிப்படை வருமான வரி வரம்புக்கேற்ப வரி கட்ட வேண்டும். உச்சபட்ச வரி வரம்பில் இருக்கும் முதலீட்டாளர், அவர் பெறும் டிவிடெண்ட் வருமானத்துக்கு 42.744% வரி கட்ட வேண்டும். ஆனால், பைபேக் வரி 23.296% மட்டுமே. எனவே, பைபேக் மூலம் நிறுவனங்கள், கணிசமான வரிக் குறைப்பு செய்ய வகை செய்யப்பட்டுள்ளது.

சிறப்பு டிவிடெண்ட்டுக்குப் பதில் பைபேக் ஏன்?

டி.சி.எஸ் நிறுவனத்தின் நிறுவனர் டாடா சன்ஸ் ஆகும். டி.சி.எஸ் நிறுவனத்தின் மொத்த பங்குகளில் 72.02% டாடா சன்ஸ்க்கு சொந்தமாகும். ரூ.16,000 கோடிக்கு பைபேக் செய்யும் டி.சி.எஸ், வரியாக ரூ.3,727 கோடி கட்ட வேண்டும். ஆக மொத்த பைபேக் செலவு ரூ.19,727 கோடி ஆகும். பைபேக் மூலம் டாடா சன்ஸ் அதன் 72.02% பங்குகளுக்கு ரூ.11,523 கோடியைப் பெறும். இந்த முழுத் தொகைக்கு டாடா சன்ஸ்க்கு வரி கிடையாது.

டி.சி.எஸ் ஷேர் பைபேக்... தரலாமா, கூடாதா? - முதலீட்டாளர்கள் என்ன செய்ய வேண்டும்?

இதுவே டிவிடெண்டாக வழங்கப்பட்டால் டாடா சன்ஸ் ரூ.14,207 கோடி டிவிடெண்ட் பெறும். 2019 செப்டம்பரில் மாற்றியமைக்கப் பட்ட வரித் திட்டத்தின்கீழ், டாடா சன்ஸ் ரூ.3,576 கோடி (25.168%) வரி கட்ட வேண்டும். அந்த வகையில் அதற்குக் கிடைக்கும் நிகர டிவிடெண்ட் ரூ.10,631 கோடியாக இருக்கும். அதாவது, பைபேக் மூலம் பெறும் தொகையைவிட, ரூ.892 கோடி குறைவாக இருக்கும். அந்த வகையில், பைபேக் லாபகரமாக உள்ளது. சிறப்பு டிவிடெண்ட்டுக்குப் பதில் டி.சி.எஸ் பைபேக் செய்வதற்கான மூலக் காரணம் இதுதான்.

30% வரி மற்றும் அதற்குமேலான வரி வரம்பில் வரும் அனைத்து முதலீட்டாளர் களுக்கும் பைபேக் அதிக லாபகரமாக இருக்கும். அவர்களுக்கு டிவிடெண்ட் வருமானத்தைவிட பைபேக் மூலம் அதிக தொகை கிடைக்கும். அதே நேரத்தில், 30 சதவிகிதத்தைவிட குறைந்த வரி வரம்பில் வருபவர்களுக்கு டிவிடெண்ட் பெறுவது லாபகரமாக இருக்கும்.

எஸ்.டி.சி.ஜி - குறுகியகால மூலதன ஆதாயம், எல்.டி.சி.ஜி - நீண்டகால மூலதன ஆதாயம்
எஸ்.டி.சி.ஜி - குறுகியகால மூலதன ஆதாயம், எல்.டி.சி.ஜி - நீண்டகால மூலதன ஆதாயம்

முதலீட்டாளர்கள் என்ன செய்ய வேண்டும்?

முதலீட்டாளர்கள் பங்குகளை நிறுவனத் திடம் ஒப்படைக்கும்போது, பைபேக் செய்யப் படும் நிறுவனப் பங்கின் சந்தை விலை, பைபேக் விலையைவிட (ரூ.3,000) குறைவாக இருந்தால், பங்குகளை பைபேக்கில் கொடுத்துவிடுவது லாபகரமாக இருக்கும்.

அதேநேரத்தில், சந்தை விலை படிப்படியாக அதிகரித்து பைபேக் விலையைவிட அதிகமாக இருக்குமானால், முதலீட்டாளர் அந்தப் பங்கை வாங்கிய விலை, மூலதன ஆதாய வரி ஆகியவற்றைக் கணக்கிட்டு பைபேக்கில் பங்குகளைக் கொடுப்பது லாபமா எனப் பார்க்க வேண்டும்.

பைபேக் விலையைவிட, சந்தை விலை அதிகமாக இருந்தாலும், சந்தையில் விற்பதைவிட பைபேக் மூலம் முதலீட்டாளர்கள் அதிக தொகையைப் பெறும் வாய்ப்புள்ளது. இதற்குக் காரணம், மூலதன ஆதாய வரியாகும். எனவே, சந்தை விலை, பைபேக் விலையை மட்டும் வைத்து முடிவு எடுக்கக் கூடாது. கூடவே எவ்வளவு வரி கட்ட வேண்டிவரும் என்பதைக் கணக்கிட்டு, அதுபோக கிடைப்பதில் எது அதிகம் என்பதைப் பார்க்க வேண்டும்.

மேலே அட்டவணையில் உள்ள உதாரணங் களைப் பாருங்கள். அட்டவணையில் நிலை 2 மற்றும் 4-ல், சந்தை விலை பைபேக் விலையை விட அதிகமாக இருந்தால், வரிக்குப் பின் பைபேக் மூலம் அதிக தொகை கிடைக்கிறது.

பங்கின் விலை இன்னும் அதிகரிக்கும் என்று நம்பும் நீண்டகால முதலீட்டாளர்கள் பலர் இந்த பைபேக்கில் பங்கேற்க மாட்டார்கள். அதுபோன்ற சூழ்நிலையில், பங்கேற்கும் முதலீட்டாளர்களிடமிருந்து அதிக பங்குகளை நிறுவனம் வாங்கக்கூடும். குறிப்பாக, சிறு முதலீட்டாளர்களிடமிருந்து அதிக பங்குகளை வாங்க வாய்ப்புள்ளது. டி.சி.எஸ் பங்கு நீண்ட காலத்தில் நல்ல லாபம் தரும் என ஆணித்தரமாக நம்பும் முதலீட்டாளர்கள் இந்த பைபேக்கைப் புறக்கணிக்கும் முடிவை நன்கு யோசித்து எடுக்கலாம்!