Published:Updated:

திருச்சி டு டோக்கியோ: ``கனவு மாறி இருக்கு!" - ஒலிம்பிக் செல்லும் திருச்சி தனலெட்சுமி

Dhanalakshmi
Dhanalakshmi ( Photo: Vikatan / Dixith )

``திருச்சி மைதானத்தில் சிறுமி தனலெட்சுமி ஓடத் தொடங்கியபோது, ஒலிம்பிக்தான் அவளின் உச்ச இலக்கு. இன்று அதை வசப்படுத்தியுள்ளது பெரும் நம்பிக்கை தந்திருக்கிறது".

திருச்சியைச் சேர்ந்த ஓட்டப்பந்தய வீரர் தனலெட்சுமி, ஜப்பான் தலைநகர் டோக்கியாவில் இம்மாதம் நடைபெற உள்ள ஒலிம்பிக் போட்டியில் 4×400 மீட்டர் தொடர் ஓட்டப் பிரிவில் இந்தியாவின் சார்பில் கலந்துகொள்ளத் தேர்வாகியுள்ளார்.

திருச்சி மாவட்டம், குண்டூரைச் சேர்ந்த தனலெட்சுமி கடந்த மார்ச் மாதம் நடைபெற்ற தேசிய ஃபெடரேஷன் போட்டியில், 100 மீ ஓட்டத்தில் இந்தியாவின் முன்னணி தடகள வீராங்கனையான டூட்டி சந்தை பின்னுக்குத் முதலிடம் பெற்றார். இருந்தும், அப்போது ஒலிம்பிக் போட்டிக்குத் தகுதி பெற நிர்ணயிக்கபட்டிருந்த இலக்கை அவரால் எட்டமுடியவில்லை. இதனால் 100 மீட்டர், 200 மீட்டர் ஓட்டப் பந்தயத்தில் ஒலிம்பிக்கில் பங்கேற்கும் வாய்ப்பை இழந்தார்.

Dhanalakshmi with her mother
Dhanalakshmi with her mother
Photo: Vikatan / Dixith
``சர்வதேச பதக்கங்களை திருச்சிக்கு எடுத்துகிட்டு வருவேன்!" - தனலெட்சுமி #SheInspires

இந்நிலையில், வருகிற 23-ந் தேதி தொடங்கவுள்ள ஒலிம்பிக் போட்டியில் கலந்துகொள்வதற்காக விளையாட்டு வீரர்களுக்கான தேர்வுப் போட்டிகள், கடந்த ஒரு மாதமாக பாட்டியாலாவில் நடைபெற்று வருகின்றன. இதில் தனலெட்சுமியும் பங்கேற்றிருந்தார். நேற்று முன்தினம் நடைபெற்ற 400 மீட்டர் தொடர் (ரிலே) ஓட்டத்தில் பங்கேற்று தனலெட்சுமி 3-வது இடத்தை பிடித்துள்ளார். இதன் மூலம் வருகிற 23-ந் தேதி டோக்கியோவில் நடைபெறவுள்ள ஒலிம்பிக்கில் 400 மீட்டர் தொடர் ஓட்டப் போட்டிக்கு அவர் தேர்வாகி உள்ளார்.

தனலெட்சுமியின் அப்பா சேகர் இறந்துவிட்டார். அம்மா உஷாதான் இவரின் பலம். தந்தையின் கனவு மற்றும் தன்னுடைய ஆசையாக இருந்த ஓட்டப்பந்தயத்தில் சாதிக்க வேண்டும் என்று 9-ம் வகுப்பில் இருந்து பயிற்சி எடுத்து வருகிறார். இவருடைய சூழலைப் பார்த்தும், திறமையைப் பார்த்தும் சர்வதேச தடகள வீரரான மணிகண்ட ஆறுமுகம் இவருக்குப் பயிற்சி வழங்கி வருகிறார்.

ஒலிம்பிக் போட்டிக்குத் தேர்வாகி உள்ளது குறித்து தனலெட்சுமியிடம் வாழ்த்துகளைக் கூறி பேசினோம்.

``மிக மிக சந்தோஷமாக இருக்கிறது. நான் ஒலிம்பிக் போட்டிக்கு இந்தியா சார்பில் தேர்வானது கனவுத் தருணம் போல உள்ளது. மார்ச் மாதம் நடைபெற்ற தேர்வுப் போட்டியில் சாதனை படைத்தும் இலக்கை எட்டமுடியாததால் ஒலிம்பிக் வாய்ப்பை இழந்தேன், அதனால் பெரிதாக நம்பிக்கை இல்லாமல் இருந்தேன். ஆனால் என் முயற்சியும், என்னுடைய கோச் அளித்த பயிற்சியும் என்னை ஒலிம்பிக் வரை முன்னேற்றியுள்ளது. கண்டிப்பாக ஒலிம்பிக் போட்டியிலும் வெற்றி பெறுவேன் என்ற நம்பிக்கை உள்ளது. திருச்சி மைதானத்தில் சிறுமி தனலெட்சுமி ஓடத் தொடங்கியபோது, ஒலிம்பிக்தான் அவளின் உச்ச இலக்கு. இன்று அதை வசப்படுத்தியுள்ளது பெரும் நம்பிக்கை தந்திருக்கிறது '' என்றார்.

கோச் ஆறுமுகத்துடன் தனலட்சுமி
கோச் ஆறுமுகத்துடன் தனலட்சுமி
பாட்டியின் அரவணைப்பு, கைகூடிய ஒலிம்பிக் கனவு; யார் இந்த மதுரை ரேவதி?

தனலெட்சுமியின் கோச் மணிகண்ட ஆறுமுகத்திடம் பேசினோம். ``தனலெட்சுமி மேல் எனக்கு முழு நம்பிக்கை இருந்தது. அவர் நிச்சயமாக ஒலிம்பிக் தேர்வுப் போட்டியில் வெற்றி பெறுவார் என்று நம்பினேன். தொடர்ந்து ஒலிம்பிக் போட்டியிலும் அவர் வெற்றி பெறுவார். அவரது கடின முயற்சி அவரை கண்டிப்பாக வெற்றியாளராக்கும்'' என்றார்.

டோக்கியோ வெற்றியை பறித்து வரட்டும் திருச்சி புயல்!

அடுத்த கட்டுரைக்கு