ஆஸ்திரேலிய தொடரிலும் அஷ்வின், ஜடேஜா இல்லாத இந்திய அணி!

ஆஸ்திரேலிய அணிக்கெதிரான முதல் மூன்று ஒருநாள் போட்டிகளுக்கான இந்திய அணி அறிவிக்கப்பட்டுள்ளது. 


இந்தியாவுக்குச் சுற்றுப்பயணம் மேற்கொண்டுள்ள ஸ்டீவன் ஸ்மித் தலைமையிலான ஆஸ்திரேலிய அணி 5 ஒருநாள் மற்றும் 3 டி20 போட்டிகள் கொண்ட தொடரில் விளையாடுகிறது. இவ்விரு அணிகள் மோதும் முதல் ஒருநாள் போட்டி சென்னை சேப்பாக்கம் மைதானத்தில் செப்டம்பர் 17-ம் தேதி தொடங்குகிறது. இந்த போட்டிக்கான டிக்கெட் விற்பனை தொடங்கி நடைபெற்றுவருகிறது. 
இந்தநிலையில், ஆஸ்திரேலிய அணிக்கெதிரான முதல் 3 ஒருநாள் போட்டிகளுக்கான இந்திய அணி அறிவிக்கப்பட்டுள்ளது.

விராட் கோலி தலைமையிலான இந்திய அணியில், ரோஹித் ஷர்மா, ஷிகர் தவான், கே.எல்.ராகுல், மனீஷ் பாண்டே, கேதார் ஜாதவ், அஜிங்கியா ரஹானே, மகேந்திரசிங் தோனி, ஹர்திக் பாண்ட்யா, அக்சர் படேல், குல்தீப் யாதவ், யுஷ்வேந்திர சஹால், ஜஸ்ப்ரீத் பும்ரா, புவனேஷ்வர் குமார், உமேஷ் யாதவ் மற்றும் முகமது ஷமி ஆகியோர் இடம்பெற்றுள்ளனர். இலங்கை அணிக்கெதிரான ஒருநாள் மற்றும் டி20 தொடர்களின் ஓய்வுகொடுக்கப்பட்ட முன்னணி சுழற்பந்துவீச்சாளர்களான ரவிச்சந்திரன் அஷ்வின் மற்றும் ரவீந்திர ஜடேஜா ஆகியோருக்கு இந்த தொடரிலும் ஓய்வு அளிக்கப்பட்டுள்ளது. 

முதல் ஒருநாள் போட்டி நடைபெறும் சென்னை சேப்பாக்கம் மைதானத்தில் கடந்த 1996-ம் ஆண்டுக்குப் பிறகு ஆஸ்திரேலிய அணி சர்வதேச ஒருநாள் போட்டிகளில் பங்கேற்க இருக்கிறது. கடந்த 1996-ம் ஆண்டு இந்தியாவில் நடைபெற்ற உலகக்கோப்பை தொடரின் காலிறுதிப் போட்டி சென்னையில் நடந்தது. நியூசிலாந்துக்கு எதிரான அந்த போட்டியில் மார்க் வாக் சதத்தின் உதவியால் ஆஸ்திரேலிய அணி வெற்றி வாகை சூடியிருந்தது. 
 

Do you like the story?

Please Appreciate the Author by clapping!