வெளியிடப்பட்ட நேரம்: 08:40 (08/12/2017)

கடைசி தொடர்பு:08:40 (08/12/2017)

ஐந்தாவது முறையாக சிறந்த கால்பந்து வீரர் விருதைவென்ற கிறிஸ்டியானோ ரொனால்டோ!

உலகின் தலைசிறந்த கால்பந்து வீரருக்கு வழங்கப்படும் Ballon d’Or விருதை போர்ச்சுகலைச் சேர்ந்த கிறிஸ்டியானோ ரொனால்டோ ஐந்தாவது முறையாக வென்றிருக்கிறார். 

Photo Credit: Twitter/Cristiano


கால்பந்து அரங்கில் மிகவும் மதிக்கப்படும் விருதுகளில் இந்த விருது முக்கியமானது. 32 வயதான ரொனால்டோ ஏற்கெனவே, இந்த விருதை 2008, 2013, 2014 மற்றும் 2016 ஆகிய ஆண்டுகளில் வென்றிருந்தார். கடந்த ஆண்டைப் போலவே இந்தாண்டும் அர்ஜென்டினா வீரர் மெஸ்ஸியை முந்தி சிறந்த கால்பந்து வீரர் விருதை வென்றிருக்கிறார் ரொனால்டோ. இதன்மூலம், அதிக முறை (5) இந்த விருதை வென்ற மெஸ்ஸியின் சாதனையையும் அவர் சமன் செய்திருக்கிறார். பிரான்ஸ் தலைநகர் பாரீஸில் நடைபெற்ற விழாவில் ரொனால்டோவுக்கு இந்த விருது அளிக்கப்பட்டது. விருதைப் பெற்ற ரொனால்டோ, 'நான் மகிழ்ச்சியாக இருக்கிறேன். ஒவ்வொரு ஆண்டும் நான் எதிர்பார்த்துக் காத்திருப்பது இந்த தருணத்தைத்தான். கடந்தாண்டு வென்ற கோப்பைகள் எனக்கு இந்த விருதைப் பெற்றுத் தந்துள்ளது. ரியல் மேட்ரிட் அணியின் சகவீரர்களுக்கும், இந்த விருதைப் பெற உதவிய மற்ற அனைவருக்கும் எனது நன்றியைத் தெரிவித்துக்கொள்கிறேன்’ என்று நெகிழ்ச்சியாகப் பேசியிருக்கிறார். பிரான்ஸின் கால்பந்து இதழ் ஆண்டுதோறும் அளிக்கும் இந்த விருதுக்கு பத்திரிகையாளர்களின் வாக்குகள் அடிப்படையில் வீரர்கள் தேர்வுசெய்யப்படுகின்றனர். இந்தாண்டு விருதுக்கான 30 வீரர்கள் கொண்ட பட்டியலில் அர்ஜென்டினா வீரர் மெஸ்ஸி இரண்டாம் இடமும், பிரேசில் வீரர் நெய்மர், மூன்றாம் இடமும் பிடித்தனர்.