இந்த ஆண்டு இவர்களின் விலை ஆச்சர்யப்படுத்தலாம்... ஐ.பி.எல் ஏலம் எப்படி இருக்கும்? பாகம் - 7 #IPLAuction

பாகம் -1 | பாகம் -2 | பாகம் - 3 | பாகம் - 4 | பாகம் - 5 | பாகம் - 6

578 வீரர்கள்... அதில் 360 பேர் இந்தியர்கள்... இவர்கள் பெயர் திரையில் காட்டப்படும்... எட்டு அணிகளில் யார் இவரை எடுக்க விரும்புகிறார்கள் என்ற பரபரப்பு கிரிக்கெட் உலகம் முழுதும் தொற்றிக்கொள்ளும். பலத்த ஆலோசனைகள் நடக்கும். நட்சத்திர வீரர்களின் பெயர்கள் வரும்போது 8 அணிகளின் கைகளும் உயரும். ஒருசில உள்ளூர் வீரர்களின் பெயர் சொல்லப்படும்போது, அமைதி மட்டுமே நிலவும். ஏலம் தொடங்கியதும் எழும் சலசலப்புகள் ஓய்ந்து, அந்தச் சின்ன மரச்சுத்தி மேஜையில் தட்டப்படும். சில ஆண்டுகள் முன்பு வெறும் காலில் பௌலிங் செய்துகொண்டிருந்த ஒரு 20 வயது வீரனின் சம்பளம் கோடிகளில் நிர்ணயிக்கப்படும். ஆச்சர்யம் நிகழும். #IPLAuction

IPL 

சில நேரங்களில் அதிர்ச்சிகளும். இப்படியான ஆச்சர்யங்களை பலமுறை கண்டுள்ளது ஐ.பி.எல். நட்ராஜன், தைமல் மில்ஸ் போன்ற வீரர்களெல்லாம் ஐ.பி.எல் தொடரால் சொர்க்கம் கண்டவர்கள். "என் வாழ்நாளில் இவ்வளவு தொகையை நான் பார்த்ததே கிடையாது. இனி பார்ப்பேனா என்றும் தெரியவில்லை" என்று ஆர்.சி.பி அணியால் வாங்கப்பட்டதும் தெரிவித்தார் இங்கிலாந்து வீரர் தைமல் மில்ஸ். இதுமட்டுமல்ல, கிறிஸ் மோரிஸ், பவன் நெகி, முருகன் அஷ்வின் போன்ற வீரர்களும் எதிர்பார்த்த தொகையைவிட மிகவும் அதிகமான தொகைக்கு விலைபோனது பலரையும் ஆச்சர்யப்படுத்தியது. இம்முறையும் சில வீரர்களின் ஏலம் நம்மை ஆச்சர்யப்படுத்தப்போகிறது. அவற்றுள் சில வெளிநாட்டு வீரர்களைப் பற்றிப் பார்ப்போம்...

காலின் டி க்ரேந்தோம்

நியூசிலாந்து அணியின் சமீபத்திய சென்சேஷன். அதிரடி பேட்ஸ்மேன், மீடியம் pace பௌலர். சர் ரிச்சார்ட் ஹேட்லி, கிறிஸ் கெய்ர்ன்ஸ், ஸ்காட் ஸ்டைரிஸ், ஜேக்கப் ஓரம் வரிசையில் அடுத்த சூப்பர் ஆல்ரவுண்டர். டி-20 போட்டிகளில் இவரது ஸ்ட்ரைக் ரேட் 168.21. டி-20 மட்டுமல்ல, டெஸ்ட் போட்டிகளிலும் இவரது டீலிங் அப்படித்தான். அதில் இவரது ஸ்ட்ரைக் ரேட் 98.98! கடந்த டிசம்பர் மாதம் வெஸ்ட் இண்டீஸுக்கு எதிரான டெஸ்ட் போட்டியில் 71 பந்துகளில் சதமடித்து அசத்தியவர், கடந்த வாரம் பாகிஸ்தானுடனான ஒருநாள் போட்டியில் 40 பந்துகளில் 74 ரன்கள் எடுத்து அணியை வெற்றி பெறவைத்தார். இவை வெறும் சாம்பிள்தான். கடந்த சில மாதங்களாக இவரது ஃபார்ம் வேறு லெவல். எந்த ஃபார்மட்டாக இருந்தாலும் வெளுத்து வாங்கும் க்ரேந்தோம், கடந்த ஐ.பி.எல் தொடரில் கொல்கத்தா நைட்ரைடர்ஸ் அணிக்காக விளையாடினார். சுனில் நரைன், ஆண்ட்ரே ரஸ்ஸல் ஆகியோரை அந்த அணி தக்கவைத்துள்ளதால், மற்ற வெளிநாட்டு வீரர்களுக்கு RTM கார்டு பயன்படுத்த முடியாது. அதனால் ஏலத்தில் இவருக்கு நல்ல கிராக்கி இருக்கும். slog overs எனப்படும் கடைசி ஓவர்களில் பௌலர்களை என்கவுன்டர் செய்வது க்ரேந்தோமுக்கு ஹாபி. நான்கு ஓவர் முழுதாகப் போடுவதற்கான ஆள் இல்லையென்றாலும், ஆறாவது பௌலருக்கான நல்ல ஆப்ஷன்.

Grandhomme - IPL

மார்கஸ் ஸ்டோய்னிஸ்

கடந்த 3 ஆண்டுகளாக ஐ.பி.எல் தொடரில் விளையாடிவரும் ஸ்டோய்னிஸ், இதுவரை 12 போட்டிகளில் மட்டுமே விளையாடியுள்ளார். பெரிய அளவில் சோபிக்காததால், அவருக்கு அதிக வாய்ப்புகள் கிடைக்கவில்லை. ஆஸ்திரேலிய அணியிலும் நிலைமை அப்படித்தான் இருந்தது. ஆனால், 2017-ல் டாப் கியர் பிடித்துவிட்டார் ஸ்டோய்னிஸ். அதிரடியாகவும், அதேசமயம் நிலைத்து நின்றும் ஆடக்கூடிய ஸ்டோய்னிஸ், ஆஸ்திரேலிய மிடில் ஆர்டரில் மிகமுக்கிய அங்கம் வகிக்கிறார். இதுவரை 11 ஒருநாள் போட்டிகளில் மட்டுமே ஆடியுள்ள இவரது சராசரி 66.42. கிரேந்தோம் போல சூறாவளியாகச் சுழன்றடிக்க மாட்டார். ஆனால், மிடில் ஓவர்களில் விக்கெட் வீழ்ச்சியைத் தடுத்து, நல்ல அடித்தளம் அமைக்கக்கூடியவர். 20 ஓவர் போட்டிகளில் விக்கெட் எடுக்கக்கூடியவர். இந்திய அணியுடனான ஒருநாள் தொடரில், ஆஸ்திரேலிய வீரர்கள் தடுமாற, நம்பிக்கையுடன் நிலைத்து நின்று ஆடினார். அந்தத் தொடரில் இவரது சராசரி 76.50. பிக்பேஷ் தொடரில் மெல்போர்ன் ஸ்டார்ஸ் அணிக்காகவும் சிறப்பாக செயல்பட்டுள்ளார். சிறந்த பெர்ஃபாமன்ஸ் மட்டுமின்றி, இந்தியாவில் விளையாடிய அனுபவமும் இருப்பதால், நிச்சயம் நல்ல தொகைக்கு ஏலம் போவார். மேக்ஸ்வெல், அம்லா, மில்லர் போன்ற வீரர்கள் இருக்கும்போது, இவரைத் தக்கவைக்க கிங்ஸ் லெவன் RTM கார்டு பயன்படுத்துமா என்பது சந்தேகம்தான்.

Stoinis - IPL

ஈவின் லூயிஸ்

2016 ஆகஸ்ட் மாதம், அமெரிக்காவில் நடந்த இந்தியா vs வெஸ்ட் இண்டீஸ் போட்டியிலிருந்து தொடங்கியது லூயிஸின் ஆட்டம். அதன் பிறகு குட்டி கெய்லாக மாறிவிட்டார் இந்த டிரினிடாட் வீரர். அதே இடதுகை பேட்டிங்... அதே அதிரடி... சந்தேகமே வேண்டாம்... இவர்தான் அடுத்த கிறிஸ் கெய்ல். யாரென்றே தெரியாத வீரர்களை வைத்துக்கொண்டு, போகுமிடங்களில் மட்டுமல்லாமல், உள்ளூரிலும் அடிவாங்கிக்கொண்டிருந்த வெஸ்ட் இண்டீஸ் அணிக்கு, நீண்ட நாள் கழித்துக் கிடைத்திருக்கும் ஓர் அரிய பேட்ஸ்மேன் லூயிஸ். மற்றவர்களைப் போல் ஒரு போட்டியில் அடித்துவிட்டு, நாலு போட்டிகளில் சொதப்பும் வகையறா இல்லை. இவர் களத்தில் இறங்கினால் குறைந்தபட்சம் 25 ரன்களாவது எடுத்துவிடுவார். நாலு போட்டிக்கு ஒருமுறை சதமோ, அரைசதமோ அடிப்பது உறுதி. சர்வதேச டி20 போட்டிகளில் இவரது ஸ்ட்ரைக் ரேட் 154.96! 'இந்திய ஆடுகளங்களில் இவரால் ஜொலிக்க முடியுமா...? நிச்சயம் முடியும். ஏனெனில், வங்கதேச பிரீமியர் லீக்கில், கெய்லுக்கு அடுத்தபடியாக இவர்தான் டாப் ஸ்கோரர். அத்தொடரில் 36 சராசரியோடு 396 ரன்கள் எடுத்தார் லூயிஸ். 'அது வங்கதேசம்'...'அட எல்லாம் ஒண்ணுதானே... இங்கயும் பௌன்ஸ், ஸ்விங் ஆகாது, அங்கயும் ஆகாது... இங்கயும் ஸ்பின் பிட்ச், அங்கயும் ஸ்பின் பிட்ச்... எல்லாம் ஒரேமாதிரி தானே!' வெஸ்ட் இண்டீஸ் ஓப்பனர்களோடு சமீப காலங்களில் மிரட்டிய மும்பை இந்தியன்ஸ், சென்னை சூப்பர் கிங்ஸ் அணிகள் இப்போது இவரை வளைத்துப் போடக் காத்திருக்கலாம்.

Ewin Lewis - IPL

ஈஷ் சோதி

லெக் ஸ்பின்னர் என்ற ஒரு தகுதியே, இவர் கோடிகளில் ஏலம் போவதற்குப் போதுமான ஒன்று. நம்பர் 1 டி-20 பௌலர் என்ற அங்கீகாரம், ஏலத்தின்போது எப்படியும் கோடிகளைக் கொட்டவைக்கும். ஆரம்ப காலத்தில், அணியில் இடம்பிடிக்க முடியாமல் தவித்த இந்த இந்திய வம்சாவளி வீரருக்கு, இந்தியாவில் நடந்த டி-20 உலகக்கோப்பை நிரந்தர இடம் பெற்றுக்கொடுக்க, இப்போது பட்டையைக் கிளப்பி வருகிறார். இதுவரை 19 டி-20 போட்டிகளில் விளையாடியுள்ள சோதி, விக்கெட் வீழ்த்தத் தவறியது ஒரேயொரு போட்டியில் மட்டுமே. எப்படியும் விக்கெட் எடுத்துவிடுவார். விக்கெட் வீழ்த்துவது மட்டுமல்ல, ரன் குவிப்பைக் கட்டுப்படுத்துவதும் இவரது முன்னேற்றத்துக்கான முக்கியக் காரணம். சர்வதேச டி-20 அரங்கில், இவரது எகானமி 6.85 தான். இந்திய மண்ணில் சிறப்பாகப் பந்துவீசியிருப்பதால், நிச்சயம் இவரை ஏலத்தில் எடுக்க அனைத்து அணிகளும் போட்டி போடும். 2016 டி-20 உலகக்கோப்பையில், 5 போட்டிகளில் 10 விக்கெட்டுகள் வீழ்த்தி அசத்தினார் சோதி. கடந்த நவம்பர் மாதம் நடந்த இந்தியாவுடனான டி-20 தொடரிலும் 3 போட்டிகளில் 5 விக்கெட்டுகள் எடுத்தார். இவரது இந்த செயல்பாடுகளே போதும் கோடிகளில் ஏலம் போக! சுனில் நரைனைத் தக்கவைத்துள்ளதால், இன்னொரு வெளிநாட்டு ஸ்பின்னரை கொல்கத்தா அணி வாங்க நினைக்காது. மற்ற 7 அணிகளுமே இவருக்காகப் போட்டி போடக்கூடும்.

Ish Sodhi - IPL

‘இந்த வரிசையில் ரஷித் கான், காலின் முன்ரோ ஜேசன் ராய்லாம் எங்க' என்ற கேள்வி எழலாம். ரஷித் கான் - கடந்த ஐ.பி.எல் தொடரில் 17 விக்கெட்டுகள் வீழ்த்தி அசத்திய இந்த ஆப்கானிஸ்தான் வீரர், கடந்த ஆண்டின் ஐ.சி.சி ஒருநாள் அனியில் இடம்பிடிக்கும் அளவுக்கு வளர்ந்துவிட்டார். கடந்த ஐ.பி.எல் தொடரிலேயே பலத்த எதிர்பார்ப்புக்கு நடுவில்தான் விளையாடினார் ஜேசன் ராய். அவரது அதிரடி ஆட்டம் எதிர்பார்த்ததுதான். ரஷித் கான், ஜேசன் ராய், முன்ரோ போன்றவர்கள் தொடர்ச்சியாக அசத்தி வருவதோடு, அதற்கான அங்கீகாரத்தையும் உடனே பெற்றுவிட்டனர். அவர்கள் இந்த ஏலத்தில் அதிக தொகைக்குப் போவது ஆச்சர்யம் கிடையாது. அதேவேளை, செஞ்சுரியனில் இந்தியாவைச் சாய்த்த தென்னாப்பிரிக்க ஃபாஸ்ட் பௌலர் லுங்கி என்கிடி, ஆஸ்திரேலிய பௌலர் ஜேசன் பெரெண்டார்ஃப், நியூசிலாந்தின் நீல் வேக்னர் போன்றோரும் எதிர்பார்த்த தொகையைவிட அதிக தொகைக்கு ஏலம்போகக்கூடும்.

புது ஈடன் கார்டன்... புது ஏலம்... புது நைட்ரைடர்ஸ்...! ஐ.பி.எல் ஏலம் எப்படி இருக்கும்? பாகம் - 6 #IPLAuction

கங்குலி, கெய்ல் வரிசையில்... இந்த ஆண்டு? - அடுத்த பாகத்தில்

Do you like the story?

Please Appreciate the Author by clapping!