வெளியிடப்பட்ட நேரம்: 19:30 (25/02/2018)

கடைசி தொடர்பு:19:30 (25/02/2018)

’ஐ.பி.எல். தொடர் அட்டவணையை மாற்றியமைக்க முடியாது’ - ஐ.சி.சியின் கோரிக்கையை நிராகரித்த பி.சி.சி.ஐ.!

ஐ.பி.எல். போட்டிகளின் தேதிகளை மாற்றியமைக்க வேண்டும் என்ற சர்வதேசக் கிரிக்கெட் கவுன்சிலின் (ஐ.சி.சி.) கோரிக்கையை இந்தியக் கிரிக்கெட் கட்டுப்பாட்டு வாரியம் (பி.சி.சி.ஐ) நிராகரித்துள்ளது. 

உலகின் முன்னணி கிரிக்கெட் லீக் போட்டிகளுள் ஒன்றான இந்தியன் பிரீமியர் லீக் போட்டிகள் வரும் ஏப்ரல் 7-ம் தேதி தொடங்கி, மே மாதம் 27-ம் தேதி வரை நடைபெறுகின்றன. முதல் போட்டியும், இறுதிப் போட்டியும் மும்பை வான்கடே மைதானத்தில்  நடைபெறுகின்றன. முதல் போட்டியில் மும்பை இந்தியன்ஸ் அணியும், 2 ஆண்டுகள் தடைக்குப் பின்னர் ஐ.பி.எல்லுக்குத் திரும்பியுள்ள தோனி தலைமையிலான சென்னை சூப்பர் கிங்ஸ்  அணியும் மோதுகின்றன. 

இந்தநிலையில், ஏப்ரல் 22 முதல் 26-ம் தேதி வரை கொல்கத்தாவில் ஐ.சி.சி. உயர்மட்டக் குழுக் கூட்டம் நடைபெற இருப்பதால், அந்த தேதிகளில் நடைபெறும் போட்டிகளின் தேதிகளை மாற்றியமைக்க வேண்டும் என கோரிக்கை விடுக்கப்பட்டது. ஐ.சி.சியின் அந்த கோரிக்கையை பி.சி.சி.ஐ. நிராகரித்துள்ளது. இதுகுறித்து பேசிய பி.சி.சி.ஐ. அதிகாரி ஒருவர், `கொல்கத்தாவில் நடைபெறும் ஆலோசனைக் கூட்டத்தை ஒட்டி ஐ.பி.எல். போட்டிகளின் தேதிகளை மாற்ற ஐ.சி.சி. தரப்பில் கோரிக்கை விடுக்கப்பட்டது. ஆனால், அவ்வாறு அந்த தேதிகளில் நடைபெறும் போட்டிகளை மாற்றினால், ஒட்டுமொத்த தொடரும் பாதிக்கப்படும். கொல்கத்தாவில் கூட்டம் நடைபெறும் நாள்களான ஏப்ரல் 22 முதல் 26-ம் தேதி வரை ஈடர்ன் கார்டன் மைதானத்தில் எந்த போட்டியும் நடைபெறவில்லை. 
ஈடன் கார்டன் மைதானத்தில் ஏப்ரல் 16-ம் தேதி நடைபெறும் போட்டிக்குப் பின்னர், மே மாதம் 3-ம் தேதிதான் போட்டி நடைபெற இருக்கிறது. இதனால், ஐ.பி.எல். தொடரின் அட்டவணையில் மாற்றம் செய்ய இயலாது என்று விளக்கமளித்து விட்டோம்’ என்றார்.