வெளியிடப்பட்ட நேரம்: 11:18 (28/02/2018)

கடைசி தொடர்பு:11:18 (28/02/2018)

`ஐபிஎல் தொடரில் டி.ஆர்.எஸ்.!’ - பிசிசிஐ பச்சைக்கொடி

நடுவரின் முடிவை மறுபரிசீலனைசெய்யும் டி.ஆர்.எஸ். முறையை ஐபிஎல் தொடரில் கொண்டுவர, இந்திய கிரிக்கெட் கட்டுப்பாட்டு வாரியம் (பிசிசிஐ) அனுமதி அளித்துள்ளது. 

உலகின் முன்னணி கிரிக்கெட் லீக் போட்டிகளுள் ஒன்றான இந்தியன் பிரீமியர் லீக் போட்டிகள், வரும் ஏப்ரல் 7-ம் தேதி தொடங்கி, மே மாதம் 27-ம் தேதி வரை நடைபெறுகின்றன. முதல் போட்டியும் இறுதிப் போட்டியும் மும்பை வான்கடே மைதானத்தில்  நடைபெறுகின்றன. முதல் போட்டியில் மும்பை இந்தியன்ஸ் அணியும், 2 ஆண்டுகள் தடைக்குப் பின்னர் ஐபிஎல்-லுக்குத் திரும்பியுள்ள தோனி தலைமையிலான சென்னை சூப்பர் கிங்ஸ் அணியும் மோதுகின்றன. 

நடுவரின் முடிவை மறுபரிசீலனை செய்யும் டி.ஆர்.எஸ் முறையைத் தொடக்கம் முதலே பிசிசிஐ எதிர்த்து வந்தது. டி.ஆர்.எஸ் முறைக்கு எதிராகக் கடுமையான நிலைப்பாட்டையே பிசிசிஐ கொண்டிருந்தது எனலாம். இந்த நிலையில், ஏப்ரலில் தொடங்க இருக்கும் ஐபிஎல் தொடரில் டி.ஆர்.எஸ் முறையைக் கொண்டுவர பிசிசிஐ முடிவுசெய்துவிட்டதாகத் தகவல்கள் வெளியாகியுள்ளன. ஆங்கில செய்தித்தாள் ஒன்றுக்குப் பேட்டியளித்துள்ள பிசிசிஐ நிர்வாகி ஒருவர் இந்தத் தகவலை உறுதிப்படுத்தியுள்ளார். 

அவர் மேலும்,`இந்திய அணி பங்கேற்கும் சர்வதேச தொடர்களில், கடந்த ஒன்றரை ஆண்டுகளாகவே டி.ஆர்.எஸ் முறை பயன்படுத்தப்பட்டுவருகிறது. அதேபோல, பிசிசிஐ நடத்தும் தொடர்களில் கிரிக்கெட் உலகின் பல்வேறு தொழில்நுட்பங்களும் பயன்படுத்தப்பட்டுவரும் நிலையில், டி.ஆர்.எஸ் முறையை ஏன் பயன்படுத்தப்படக் கூடாது’ என்றார். 

பிசிசிஐ நடத்தும் உள்ளூர் தொடர்களில், இதுவரை டி.ஆர்.எஸ் முறை பயன்படுத்தப்பட்டதில்லை. இதை கருத்தில்கொண்டே, உள்ளூர் நடுவர்களுக்கு டி.ஆர்.எஸ் முறைகுறித்த பயிற்சியைக் கடந்த டிசம்பரில் அளித்தது. ஆந்திர மாநிலம், விசாகப்பட்டினத்தில் நடந்த இந்த பயிற்சி அரங்கில் மொத்தம் 10 நடுவர்களுக்குப் பயிற்சி அளிக்கப்பட்டுள்ளது' என்றார்.