வெளியிடப்பட்ட நேரம்: 15:59 (26/03/2018)

கடைசி தொடர்பு:17:36 (26/03/2018)

ஸ்மித் விலகல் - ஐ.பி.எல் தொடரில் ராஜஸ்தான் அணியின் கேப்டனாக ரஹானே நியமனம்!

பந்தை சேதப்படுத்திய சர்ச்சையில் சிக்கிய ஆஸ்திரேலிய கேப்டன் ஸ்மித்துக்குப் பதிலாக, விரைவில் தொடங்கும் ஐபிஎல் தொடரில் அஜிங்கியா ராஹானே, ராஜஸ்தான் ராயல்ஸ் அணியின் கேப்டனாக நியமிக்கப்பட்டுள்ளார். 

ரஹானே

தென்னாப்பிரிக்கா அணிக்கெதிரான கேப்டவுன் டெஸ்ட் போட்டியின் மூன்றாவது நாளில், பந்தை சேதப்படுத்தியதாக ஆஸ்திரேலிய வீரர் கேமரூன் பான்கிராஃப்ட் மீது குற்றம் சாட்டப்பட்டது. இந்த சர்ச்சைக்குப் பின்னர் செய்தியாளர்களிடம் பேசிய ஆஸ்திரேலிய கேப்டன் ஸ்மித், பந்தை சேதப்படுத்தியதை ஒப்புக்கொண்டார். இந்த விவகாரம், கிரிக்கெட் உலகில் பெரும் விவாதத்தை ஏற்படுத்திய நிலையில், ஆஸ்திரேலிய அணியின் கேப்டன் பொறுப்பிலிருந்து ஸ்மித் விலகினார். அதேபோல, துணை கேப்டன் வார்னரும் பதவி விலகவே, அந்த டெஸ்டில் விக்கெட் கீப்பர் டிம் பெயின் தலைமையில் ஆஸ்திரேலிய அணி களமிறங்கியது. இந்த விவகாரம்குறித்து விசாரித்த ஐசிசி, ஸ்மித்துக்கு ஒரு போட்டியில் விளையாடத் தடையும், போட்டி ஊதியம் முழுவதையும் அபராதமாக விதித்து உத்தரவிட்டது. 

இந்த நிலையில், ஐபிஎல் தொடரில் ராஜஸ்தான் ராயல்ஸ் அணியின் கேப்டன் பொறுப்பிலிருந்து ஸ்மித் விலகியுள்ளார். அவருக்குப் பதிலாக அஜிங்கியா ரஹானே கேப்டனாகச் செயல்படுவார் என்று ராஜஸ்தான் ராயல்ஸ் அணி நிர்வாகம் அறிவித்துள்ளது. இதுதொடர்பாகப் பேசிய ராஜஸ்தான் ராயல்ஸ் அணியின் உரிமையாளர்களில் ஒருவரான மனோஜ் படாலே, `எந்தவொரு தனி மனிதரை விடவும் கிரிக்கெட் விளையாட்டே பெரியது. இந்தக் கருத்தை நாங்கள் முழுமையாக மதிக்கிறோம்’ என்று தெரிவித்துள்ளார்.