வெளியிடப்பட்ட நேரம்: 21:30 (28/03/2018)

கடைசி தொடர்பு:22:19 (28/03/2018)

`2 ஆண்டுகளுக்கு ஸ்மித் கேப்டனாக முடியாது!’ - ஆஸி. கிரிக்கெட் வாரியத்தின் தண்டனை விவரங்கள்

தென்னாப்பிரிக்காவுக்கு எதிரான கேப்டவுன் டெஸ்டில் பந்தைச் சேதப்படுத்திய புகாரில் ஸ்மித், வார்னர் மற்றும் பான்கிராஃப்ட் ஆகியோர் மீது ஆஸ்திரேலியக் கிரிக்கெட் வாரியம் நடவடிக்கை எடுத்துள்ளது. 

ஸ்மித்

தென்னாப்பிரிக்காவுக்கு எதிரான டெஸ்ட் தொடரில் பந்தைச் சேதப்படுத்தியதன் பலனை ஆஸ்திரேலிய வீரர்கள் ஸ்மித், வார்னர் அனுபவிக்க தொடங்கியுள்ளனர். ஆம், கிரிக்கெட் உலகில் விஸ்வரூபம் எடுத்துள்ள இவ்விவகாரத்தால் ஆஸ்திரேலிய அணி நிர்வாகம் கடுமையான அதிருப்தியில் இருக்கிறது. வார்னர், ஸ்மித் மற்றும் பான்கிராஃப்ட்டுக்குத் தண்டனை விவரங்களை ஆஸ்திரேலிய கிரிக்கெட் வாரிய நிர்வாகம் அறிவித்துள்ளது. இதுதொடர்பாக தென்னாப்பிரிக்காவில் முகாமிட்டு ஆஸ்திரேலிய கிரிக்கெட் வாரிய நிர்வாகிகள் விசாரணை நடத்தினர். ஆஸ்திரேலிய கிரிக்கெட் வாரியம் சார்பில் தலைவர் டேவிட் பீவெர், நிர்வாகிகள் ஏர்ல் எட்டிங்ஸ், பாப் எவெரி, ஜான் ஹார்டன், டோனி ஹேரிசன், ஜாக்கி ஹே மற்றும் மைக்கேல் ட்ரெண்ட்னிக் ஆகியோர் கொண்ட குழு விசாரணை நடத்தியது. மேலும், முன்னாள் வீரர்களான மார்க் டெய்லர் மற்றும் மைக்கேல் காஸ்பரோவிச் ஆகியோர் கொண்ட குழு இதுதொடர்பாக இரண்டரை மணி நேரத்துக்கும் மேலாக விசாரணை நடத்தியது. அவர்கள் நடத்திய விசாரணையில், ``பந்தைச் சேதப்படுத்தவும், அதனை பான் கிராஃப்ட்டை வைத்து செயல்படுத்தவும் வார்னர் முடிவெடுத்துள்ளார். இந்தத் திட்டம் கேப்டன் ஸ்மித்துக்குத் தெரிந்திருந்தும், அவர் அதை தடுக்கவில்லை" என்பது தெரியவந்துள்ளது. 

ஸ்மித், வார்னர்

photo credit: ICC

இந்நிலையில், ஸ்மித், வார்னர் மற்றும் பான்கிராஃப்ட் ஆகியோருக்கு விதிக்கப்பட்டுள்ள முழு தண்டனை விவரங்களை ஆஸ்திரேலிய கிரிக்கெட் நிர்வாகம் வெளியிட்டுள்ளது. பான்கிராஃப்ட்டுக்கு 9 மாதங்கள் தடை, வார்னர், ஸ்மித்துக்கு ஒரு வருடம் தடை உள்ளிட்ட தண்டனைகள் விதிக்கப்பட்டுள்ளன. 

தண்டனையின் முழு விவரங்கள்... 

* ஸ்மித், வார்னர் ஆகியோர் உள்ளூர் மற்றும் சர்வதேசப் போட்டிகளில் விளையாட ஓராண்டுக்குத் தடை.

* பான்கிராஃப்ட் 9 மாதங்கள் உள்ளூர் மற்றும் சர்வதேசப் போட்டிகளில் விளையாட தடை.

* ஓராண்டுத் தடைக்குப் பின் ஸ்மித் அணிக்குத் திரும்பினாலும், அவருக்கு மீண்டும் கேப்டன் பொறுப்பு உடனடியாக வழங்க முடியாது. தடைக்குப் பின்னர் ஓராண்டு அவருக்குக் கேப்டன் பொறுப்பு வழங்கப்படாது. பரிசீலனைக்குப் பிறகே அவருக்கு மீண்டும் தலைமைப் பொறுப்பு வழங்கப்படும். 

* பான்கிராஃப்ட் அணிக்குத் திரும்பினாலும் இதே நடைமுறைதான் பின்பற்றப்படும். 

* இந்த விகாரத்தில் மூளையாகச் செயல்பட்ட வார்னர் தடைக்குப் பின்னர் அணிக்குத் திரும்பினாலும், அவர் எதிர்காலத்தில் கேப்டன் உள்ளிட்ட எந்தவித தலைமைப் பொறுப்புகளுக்கும் பரிசீலனை செய்யப்படமாட்டார்.

* மூவரும் 100 மணி நேரங்கள் கிரிக்கெட் தொடர்பான பொதுநல சேவையில் ஈடுபட வேண்டும்.

* அதே சமயம் மூவரும் கிளப் போட்டிகளில் விளையாட தடையில்லை. 

* இந்தத் தடைக்கு எதிராக மேல்முறையீடு செய்ய ஸ்மித், வார்னர் மற்றும் பான்கிராஃப்ட் ஆகியோருக்கு 7 நாள்கள் காலஅவகாசம் அளிக்கப்பட்டுள்ளது. 

நீங்க எப்படி பீல் பண்றீங்க