Vikatan.com

www.vikatan.com would like to send you push notifications.

Notifications can be turned off anytime from browser settings.

உதறல் பௌலர்கள்... அதிரடி பேட்ஸ்மென்... ஹைதராபாத் த்ரில்லர்! #SRHvMI

கடைசி ஓவர்களில் எல்லாம் சிக்ஸர்கள் அடிக்கப்பட்டதே இந்த ஐ.பி.எல் தொடரின் த்ரில் வெற்றிகளுக்குக் காரணம். அந்த கடைசி ஓவர் சிக்ஸர் மும்பை - ஹைதராபாத் மேட்ச்சிலும் தொடர, மும்பையை வீழ்த்தியது ஹைதரபாத். தொடர்ந்து இரண்டாவது மேட்ச்சிலும் தோல்வியைச் சந்தித்திருக்கிறது நடப்பு சாம்பியன் மும்பை இந்தியன்ஸ். கடைசி ஓவர் திரில்லருக்கு முன் நடந்தது என்ன? #SRHvMI

பொலார்டு

இந்த ஐ.பி.எல் தொடரில் எல்லா கேப்டன்களுமே சொல்லிவைத்ததுபோல டாஸ் வென்றதும் பெளலிங்கைத்தான் தேர்ந்தெடுக்கிறார்கள். நேற்றும் அதுதான் நடந்தது. டாஸ் வென்ற ஹைதராபாத் கேப்டன் கேன் வில்லியம்சன் பெளலிங்கைத் தேர்ந்தெடுத்தார். அணியில் 5 பெளலர்கள். 5 பெளலர்களுக்கும் நான்கு ஓவர்கள் என ரூல்புக்கில் இருப்பதுபோல தெளிவான பெளலிங் ப்ளானோடு இருந்தார் கேன் வில்லியம்சன். 

ஹர்திக் பாண்டியா மிஸ்ஸிங்!

முதல் மேட்ச்சில் காயம் அடைந்த ஹர்திக் பாண்டியாவுக்குப் பதிலாக பிரதீப் சங்வானையும், சென்னைக்கு எதிரான முதல் மேட்ச்சில் அதிக ரன்கள் கொடுத்த மிட்சல் மெக்லாகனுக்குப் பதிலாக பென் கட்டிங்கையும் அணிக்குள் கொண்டுவந்திருந்தார் மும்பை கேப்டன் ரோஹித் ஷர்மா. ஹைதராபாத் அணியில் புவனேஷ்குமார் குமாருக்குப் பதிலாக சந்தீப் ஷர்மா இடம்பிடித்திருந்தார்.

                உதறல் பௌலர்கள்... அதிரடி பேட்ஸ்மென்... மும்பையை வென்ற சன்ரைசர்ஸ் மொமன்ட்ஸ் க்ளிக் செய்க

அவுட் ஆஃப் ஃபார்ம் ரோஹித்!

சந்தீப் ஷர்மா, ரோஹித் ஷர்மாவுக்குப் பந்துவீச ஆட்டம் தொடங்கியது. ரோஷித் ஷர்மா சுத்தமாக ஃபார்மிலேயே இல்லை என்பதற்கு முதல் மூன்று பந்துகளே சாட்சி. ஒரு பந்தைக் கூட கனெக்ட் செய்ய முடியாமல் திணறினார் ரோஹித். முதல் மூன்று பந்துகளும் டாட் பால் ஆனதால் நான்காவது பந்தைத் தூக்கியடித்தார். மூன்று ஃபீல்டர்கள் கேட்ச் பிடிக்க ஓட, கடைசியில் தீபக் ஹீடாவின் கையில் பட்டு நழுவியது கேட்ச் வாய்ப்பு. முதல் ஓவரில் ஒரு ரன் மட்டுமே கொடுத்து ஹைதராபாத்துக்கு சூப்பர் தொடக்கத்தைக் கொடுத்தார் சந்தீப். 

இரண்டாவது ஓவரை ஆஸ்திரேலியாவின் இளம் வேகப்பந்து வீச்சாளர் பில்லி ஸ்டான்லேக் வீசினார். முதல் ஓவரில் விட்டதைப்பிடித்துவிட வேண்டும் என்கிற வெறி ரோஹித் ஷர்மாவிடம் தெரிந்தது. இரண்டாவது ஓவரின் முதல் பந்து டாட் பாலாகிவிட, தலைக்கு மேல் வந்த இரண்டாவது பந்தை தூக்கியடித்தார் ரோஹித், ஆட்டத்தின் முதல் சிக்ஸர்.  ஐந்தாவது பந்தை மீண்டும் பவுண்டரிக்கு விளாசினார் ரோஹித். ஆனால், அடுத்தப்பந்திலேயே கேட்ச் கொடுத்து 10 ரன்களில் ஆட்டம் இழந்தார் ரோஹித். முதல் இரண்டு போட்டிகளிலுமே அடித்து ஆட வேண்டும் என்று மட்டும் நினைத்தாரே தவிர, சரியாகப் பந்துகளைக் கணித்து விளையாடவில்லை. மோசமானப் பந்துகளை அடித்து ஆடினால் ஓகே. கடினமானப் பந்துகளைக் கூட அடித்து ஆட வேண்டும் என்று நினைத்ததால் விக்கெட்டை இழந்தார்.

#SRHvMI

 

கூக்ளி கான்!

ரோஹித் ஆட்டம் இழந்துவிட மற்றொரு ஓப்பனிங் பேட்ஸ்மேன் ஈவின் லூயிஸ் பவுண்டர்கள் அடித்துகொண்டிருந்தார். ரோஹித்துக்கு அடுத்துவந்த இஷான் கிஷன் இரண்டு பவுண்டரிகள் அடித்துவிட்டு ஆட்டம் இழந்தார். அடுத்துவந்த சூர்யகுமார் யாதவ் நிதானமான ஆட்டம் ஆடினார். இதற்கிடையே 6-வது ஓவரில் கவுலின் பந்துவீச்சில் போல்டானார் லூயிஸ். 2 சிக்ஸர் உள்பட 17 பந்துகளில் 29 ரன்கள் அடித்திருந்தார் லூயிஸ். சூர்யகுமார் யாதவ் 31 பந்துகளில் 28 ரன்கள் எடுத்து ஆட்டம் இழக்க, க்ருனால் பாண்டியா 15 ரன்களில் ஆட்டம் இழந்தார். சீரான இடைவெளிகளில் ஹைதராபாத் பெளலர்களுக்கு விக்கெட்டுகள் கிடைத்துக்கொண்டேயிருந்தது. பொலார்ட் 3 பவுண்டரி, 2 சிக்ஸர் என 28 ரன்கள் அடித்துவிட்டு அவுட் ஆனார். பில்லி கட்லிங்கை சூப்பர் கூக்ளி மூலம் போல்டாக்கினார் ஆப்கானிஸ்தான் வீரர் ரஷித் கான். ஆட்டத்தின் கடைசி ஓவரில் மும்பையின் சுழற்பந்து வீச்சாளர் மார்க்கண்டே திரும்பி நின்று ஒரு பவுண்டரி விளாச மும்பை இந்தியன்ஸ் 20 ஓவர்களில் 147 ரன்கள் அடித்தது. 

பகுதிநேர பெளலர்கள் யாரையும் வில்லியம்சன் பயன்படுத்தவில்லை. 5 பெளலர்கள்தான் என்றாலும் மாற்றி மாற்றிப் பயன்படுத்திக்கொண்டேயிருந்தார் வில்லியம்சன். ஹைதராபாத்தின் 5 பெளலர்களும் சிறப்பாக பந்து வீசியிருந்தாலும் ரஷித் கான்தான் டாப். 4 ஓவர்களில் வெறும் 13 ரன்களே விட்டுக்கொடுத்து 1 விக்கெட்டையும் கைப்பற்றியிருந்தார். இவரது பெளலங்கில் ஈஸியாகப் பிடித்திருக்கவேண்டிய கேட்ச்சைக் கூட ஹைதராபாத் வீரர்கள் கோட்டைவிட்டிருந்தனர். ஸ்டான்லேக் மட்டுமே 4 ஓவர்களில் அதிகபட்சமாக 42 ரன்கள் கொடுத்திருந்தார். கடைசி 5 ஓவர்களில் 36 ரன்கள் மட்டுமே எடுத்தது மும்பை. 

#SRHvMI

நிதானமான சேஸிங்!

120 பந்துகளில் 148 ரன்கள் எடுத்தால்போதும் என்னும் ஈஸியான டார்கெட். தவான், சாஹா, கேன் வில்லியம்சன், மணிஷ் பாண்டே, ஷகிப் அல் ஹசன், ஹூடா, பதான் என வரிசைகட்டி ஹார்ட் ஹிட்டிங் பேட்ஸ்மேன்களை வைத்திருக்கும் ஹைதராபாத் ஈஸியாக வென்றுவிடும் என்பதே எல்லோரின் எதிர்பார்ப்பும். ஆனால், மும்பை பெளலர்களின் பந்துவீச்சு ஹைதராபாத் பேட்ஸ்மேன்களை நிலைகுலையவைத்தது.

                உதறல் பௌலர்கள்... அதிரடி பேட்ஸ்மென்... மும்பையை வென்ற சன்ரைசர்ஸ் மொமன்ட்ஸ் க்ளிக் செய்க

சாஹாவும், தவானும் நிதானமாக ஆடி நல்ல ஸ்டார்ட்டைக் கொடுத்தனர். ஆனால், ரோஹித் ஷர்மா சங்வான், பும்ரா, கட்லிங், மார்க்கண்டே, பாண்டியா, முஷ்ஃபிகர் ரஹிம் என பெளலர்களை மாற்றிக்கொண்டேயிருக்க, ஹைதராபாத்தால் அடித்து ஆடமுடியவில்லை. முதல் விக்கெட்டாக 7-வது ஓவரில் சென்னையை கலங்கடித்த மார்க்கண்டே ஹைதராபாத்தின் ஓப்பனிங் பார்ட்னர்ஷிப்பைக் குலைத்தார். சாஹா 22 ரன்னில் எல்பிடபிள்யு முறையில் ஆட்டம் இழந்தார். அடுத்த ஓவரிலேயே கேப்டன் கேன் வில்லியம்சன் அவுட். 6 ரன்னில் விக்கெட் கீப்பரிடம் கேட்ச் கொடுத்து அவுட் ஆனார். ஆனால், இந்த விக்கெட் மும்பைக்கு டிஆர்எஸ் அப்பீல் கேட்டபிறகுதான் கிடைத்தது.

மார்க்கண்டேவின் சூப்பர் ஓவர்கள்!

மீண்டும் அடுத்த ஓவரில் விக்கெட். மீண்டும் மார்க்கண்டே. 28 பந்துகளில் 45 ரன், 8 பவுண்டரிகள் என சிறப்பாக ஆடிக்கொண்டிருந்த தவான் அவுட். பும்ராவிடம் கேட்ச் கொடுத்து அவுட் ஆனார் தவான். இதன்பிறகு அடுத்தடுத்து சோதனைகளாகச் சந்தித்தது ஹைதராபாத். மணிஷ் பாண்டே, ஷகிப் அல் ஹசன், யூசுஃப் பதான் என ஆளாளுக்கு 10 ரன்களைக் கடந்ததும் லூஸ் ஷாட்கள் அடிக்க விக்கெட் விழுந்துகொண்டேயிருந்தது.

ஒருபக்கம் தீபக் ஹூடா மட்டும் களத்தில் நிற்க, ரஷித் கான், கவுல், சந்தீப் ஷர்மா என அடுத்தடுத்த மூன்று பேட்ஸ்மேன்களும் டக் அவுட் ஆகி வெளியேற, மும்பை வென்றுவிடும் என்கிற நிலை உருவானது.  4 ஓவர்களில் 4 விக்கெட்டுகள் எடுத்தார் மார்க்கண்டே. சாஹா, தவான், மணீஷ் பாண்டே, ஷகிப் அல் ஹசன் என நான்குமே முக்கியமான விக்கெட்டுகள்!

#SRHvMI

வில்லன் கட்லிங்!

கடைசி ஓவர் 11 ரன்கள் எடுத்தால் வெற்றி. தீபக் ஹூடாவும், கடைசி பேட்ஸ்மேன் ஸ்டான்லேக்கும் களத்தில் நிற்க, கட்லிங்கிடம் பந்தைக் கொடுத்தார் ரோஹித் ஷர்மா. முதல் மேட்ச்சில் சென்னை அணிக்கு எதிராக முஷ்ஃபிகர் ரஹீமிடம் பந்தைக் கொடுத்து அடி வாங்கியதால்தான் இந்தமுறை கட்லிங்கிடம் கொடுத்தார் ரோஹித். ஆனால், கட்லிங்கின் முதல் பந்திலேயே சிக்ஸர். ஹூடாவுக்கு இதைவிட ஈஸியானப் பந்து கிடைக்காது. ஃபுல் டாஸில் வந்த பந்தை எக்ஸ்ட்ரா கவர் திசையில் சிக்ஸருக்குப் பறக்கவிட்டார் ஹூடா. இதனால் 5 பந்துகளில் 5 ரன்கள் என டார்க்கெட் குறைந்தது.

கட்லிங்குக்கு உதறல் எடுக்க ஆரம்பித்தது. அடுத்தப்பந்தை வைடாக வீசினார். 1 ரன் குறைந்து எக்ஸ்ட்ராவாக இன்னொரு பந்தும் ஹைதராபாத்துக்கு கிடைத்தது. ஆனால், அதற்கு அடுத்த இரண்டு பந்துகளையும் மிகச்சிறப்பாக வீசினார் கட்லிங். ஹூடாவால் சிங்கிள்தான் அடிக்க முடிந்தது. 3 பந்துகளில் 3 ரன்கள் தேவை. ஸ்டான்லேக்கும், ஹூடாவும் அடுத்தடுத்த பந்துகளில் சிங்கிள் எடுக்க ஆட்டம் `டை’ ஆனது. கடைசி பாலில் கடைசி ரன், கடைசி பேட்ஸ்மேன் என ஆட்டம் பரபரப்பின் உச்சத்தில் இருந்தது. ஆஸ்திரேலியா பாணியில் எல்லா ஃபீல்டர்களையும் ரோஹித் ஷர்மா பேட்ஸ்மேனுக்கு அருகில் கொண்டுவந்து நிறுத்த, பதற்றப்படாமல் ஆடினார் ஸ்டான்லேக். ஸ்லோவாக, மிடில் ஸ்டம்ப்பை நோக்கிவந்த பந்தை தூக்கியடித்தார் ஸ்டான்லேக். வெற்றிபெற்றுவிட்டார்கள் என்பதால் மும்பை ஃபீல்டர் சரியாக ஓடக்கூடவில்லை. கடைசி பால் பவுண்டரியாக ஹீரோவானார் ஸ்டான்லேக். அதேசமயம் கடைசி ஓவர் உதறல்படி வில்லன் ஆனார் கட்லிங். 

#SRHvMI

மும்பை - ஹைதரபாத் மேட்ச்சில் பராட்டப்படவேண்டியவர்கள் பெளலர்கள்தான். 20/20 கிரிக்கெட்டில் பேட்டிங்கைவிட பெளலிங்தான் சிரமமானது. கட்லிங்கின் கடைசி ஓவரைத்தவிர சிறப்பாகப் பந்து வீசியும் மும்பையால் வெற்றிபெறமுடியவில்லை. காரணம் பேட்டிங் சொதப்பல். சாம்பியன் மும்பை பேட்டிங்கை மீண்டும் மீட்டெடுத்தால் மட்டுமே வெற்றி கிடைக்கும்!

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement