ஈடன் கார்டனிலேயே கொல்கத்தா சிதைக்கப்பட்ட கதை..! ஹைதராபாத்தின் கெத்து #KKRvSRH

ராஜஸ்தான் ராயல்ஸ், மும்பை இந்தியன்ஸ், கொல்கத்தா நைட் ரைடர்ஸ் என மூன்று அணிகளையுமே பெரிய டென்ஷன் எல்லாம் இல்லாமல் ஈஸியாகவே வென்றிருக்கிறது ஹைதராபாத். இதற்கு முழுக் காரணம் ஹைதராபாத்தின் தெளிவான பெளலிங் அட்டாக்.

ஈடன் கார்டனிலேயே  கொல்கத்தா சிதைக்கப்பட்ட கதை..! ஹைதராபாத்தின் கெத்து #KKRvSRH

20/20 கிரிக்கெட்டின் ஆன்மா விரட்டி விரட்டி வெளுக்கும் சிக்ஸர்களிலோ, பவுண்டரிகளிலோ இல்லை. அது பெளலிங்கில் இருக்கிறது. 90-களில் பேட்ஸ்மேன்களுக்கு நிகராக பெளலர்களைக் குறிப்பிடுவோமே நினைவிருக்கிறதா? வால்ஸ், ஆம்ப்ரோஸ், வாசிம் அக்ரம், வக்கார் யூனுஸ், ஷாயிப் அக்தர், மெக்ராத், வார்னே என டெண்டுல்கர், லாரா, மார்க் வாக் என பேட்ஸ்மேன்களுக்கு இணையாக பெளலர்களையும் பார்த்த காலம் அது.  #KKRvSRH

KKRvSRH

2000-த்துக்குப் பிறகு கிரிக்கெட் முழுக்க முழுக்க பேட்ஸ்மேன்களின் காலமாகிவிட்டது. அதுவும் 20/20, ஐபிஎல் ஆரம்பிக்கப்பட்ட பிறகு எவ்வளவு பெரிய பெளலராக இருந்தாலும் ஈவு இரக்கமின்றி அடித்து நொறுக்கப்பட்டனர். கடைசி ஓவரில் 30 ரன் தேவையாக இருந்தாலுமே சிக்ஸர்கள் பறக்க, பெளண்டரிகள் தெறிக்க ஐபிஎல் ஆட்டம் வேற லெவலில் போய்க்கொண்டிருக்கிறது. இங்குதான் ஹைதராபாத் கவனம் ஈர்க்கிறது. ஹைதராபாத் பெளலர்கள் 20/20 கிரிக்கெட்டை பெளலர்களின் ஆட்டமாக மாற்றிக்கொண்டிருக்கிறார்கள்.

பெளலிங்கில் நீங்கள் ஸ்ட்ராங்காக இருந்தால் எப்படிப்பட்ட வெற்றிகள் கிடைக்கும் என்பதற்கு ஹைதராபாத்தே சாட்சி. ராஜஸ்தான் ராயல்ஸ், மும்பை இந்தியன்ஸைத் தொடர்ந்து ஹாட்ரிக் வெற்றியாக கொல்கத்தாவையும் வீழ்த்தி பாயின்ட்ஸ் பட்டியலில் கெத்தாக முதலிடத்தில் இருக்கிறது சன் ரைஸர்ஸ் ஹைதரபாத். 

தொடர்ந்து மூன்றாவது ஆட்டமாக சேஸ்தான் செய்தது ஹைதராபாத். இதுவரை ஹைதராபாத்துக்கு எதிரான எந்தப் போட்டியிலும் எதிர் அணி வீரர்கள் 150 ரன்களைத் தாண்டியதில்லை. நேற்றையை போட்டியிலும் பெளலிங்கையே தனது ஆயுதமாகக் கொண்டு கொல்கத்தாவை சந்தித்தது அந்த அணி. ஈடன் கார்டன் மைதானத்தில் வைத்தே கொல்கத்தாவை ஹைதராபாத் சிதைத்து எப்படி?

அதே டாஸ்... அதே ஃபீல்டிங்!

2018 ஐபிஎல் வழக்கப்படி டாஸ் வென்ற ஹைதராபாத் கேப்டன் கேன் வில்லியம்சன் ஃபீல்டிங்கையே தேர்ந்தெடுத்தார். சென்னை போட்டியில் கடைசி ஓவரில் ரன்களை வாரி வழங்கிய வினய்குமாருக்கு பதிலாக மிட்செல் ஜான்சனையும், ரிங்கு, குரானுக்கு பதிலாக ஷுப்மான் கில்லையும், இளம் வீரர் ஷிவம் மவியையும் அணிக்குள் கொண்டுவந்தது கொல்கத்தா. ஷிவம் மவிக்கு இது முதல் போட்டி. காயம் காரணமாக மும்பைக்கு எதிரான போட்டியில் விளையாடாத புவனேஷ்குமார் ஹைதராபாத் அணியில் மீண்டும் இடம்பிடித்திருந்தார்.

KKRvSRH

ஓப்பனிங் நரேன் இல்லை!

சென்னை, பெங்களூரு அணிகளுக்கு இடையேயான போட்டிகளில் ஓப்பனிங் இறங்கிய சுனில் நரேனுக்குப் பதிலாக கிறிஸ் லின்னுடன் ஓப்பனிங் இறங்கினார் ராபின் உத்தப்பா. ஆனால், இந்த வித்தியாச காம்போ நீண்ட நேரம் தாக்குப்பிடிக்கவில்லை. முதல் ஓவர் வீசிய புவனேஷ்குமாரின் முதல் நான்கு பந்துகளையும் சமாளிக்க முடியாமல் திணறினார் உத்தப்பா. ஐந்தாவது பந்தில் எப்படியோ ஒரு சிங்கிள் எடுக்க முதல் ஓவரின் முடிவில் 1 ரன் மட்டுமே எடுத்தது கொல்கத்தா.

ஸ்டான்லேக்கின் இரண்டாவது ஓவரில் இரண்டு பவுண்டரிகளை விளாசி கொல்கத்தாவுக்கு நம்பிக்கையைக் கொடுத்தார் கிறிஸ் லின். ஆனால், அடுத்த புவனேஷ்குமார் ஓவரிலேயே வீழ்ந்தார் உத்தப்பா. எட்ஜ் ஆகி விக்கெட் கீப்பருக்கு பந்து பறக்க, அவுட் இல்லை என அறித்தார் நடுவர். ஆனால் உடனடியாக கேன் வில்லியம்சன் ரிவியூ கேட்க, உத்தப்பா அவுட் என அறிவிக்கப்பட்டது.

அடுத்த ஸ்டான்லேக்கின் ஓவரில் நான்கு பந்துகளை டாட் பாலாக்கினார் ரானா. 4 ஓவரின் முடிவில் 23 ரன்கள் மட்டுமே எடுத்திருந்தது கொல்கத்தா. சித்தார்த் கவுல் பந்து வீச வந்தார். ஓரே ஓவரில் மூன்று பவுண்டரிகள். கிறிஸ் லின் தெறிக்கவிட்டார். 'அடுத்த ஓவர் எனக்குத்தான்' என டர்ன் எடுத்து ஆடுவதுபோல ரஷித் கானின் ஓவரில் ஒரு சிக்ஸர், ஒரு பவுண்டரி விளாசினார் ரானா. 

மழை... மழை..!

கவுல் அடிக்கப்பட்டதால் ஷகிப் அல் ஹசனிடம் பந்தைக் கொடுத்தார் கேன் வில்லியம்சன். முந்தைய ஓவர்களில் பவுண்டரியும் சிக்ஸருமாக வெளுத்த லின், ரானா இருவருமே சிங்கிள்ஸுக்கே திணறினார். இந்த ஓவரில் கொல்கத்தா மூன்று ரன்கள் மட்டுமே எடுக்க, மழை குறுக்கிட்டது. 8.30 மணிக்கு மழையால் ஆட்டம் நிறுத்தப்பட, மழை நின்று ஆட்டம் மீண்டும் தொடங்கப்பட்டபோது மணி 9.30. ஒரு மணி நேரம் ஆட்டத்தின் இடையே பிரேக் விழுந்திருந்தாலும் ஓவர்கள் எதுவுமே குறைக்கப்படாமல் ஆட்டம் தொடர்ந்தது.

KKRvSRH

லின்னைத் தவிர ஆள் இல்லை!

8-வது ஓவரில் ஸ்டான்லேக்கின் பந்தில் அவுட் ஆனார் ரானா. அவர் 1 சிக்ஸர் 2 பவுண்டரி உள்பட 18 ரன்கள் எடுத்திருந்தார். 10-வது ஓவர் வீசிய கவுலின் பந்துகளை மீண்டும் சிதறடித்தார் லின். 1 சிக்ஸர் 1 பவுண்டரி என 10 ஓவர்களின் முடிவில் 2விக்கெட்டுகள் இழந்து 70 ரன்கள் எடுத்திருந்தது கொல்கத்தா. ஷகிப் அல் ஹசனின் ஓவரில் 49 ரன்களில் கிறிஸ் லின் ஆட்டம் இழக்க, அதன் பிறகு ரன் அடிக்க யாரும் இல்லாமல் திணறியது கொல்கத்தா. 

 பொறுப்பான தினேஷ் கார்த்திக்!

கேப்டன் தினேஷ் கார்த்திக் மட்டுமே பொறுப்பை உணர்ந்து பந்துகளை கவனித்து நிதானமாக ஆடினார். ஆனால், மற்றவர்கள் எல்லோரும் பேட்டை சுழற்ற, விக்கெட்டுகள் விழுந்துகொண்டேயிருந்தது. 27 பந்துகளில் 1 சிக்ஸர் 2 பவுண்டரி உள்பட 29 ரன்கள் எடுத்தார் தினேஷ் கார்த்திக். 20 ஓவர்களின் முடிவில் 8 விக்கெட்டுகளை இழந்து 138 ரன்கள் எடுத்தது கொல்கத்தா!

நோ பார்ட் டைமர்ஸ்!

இந்தப் போட்டியிலும் பார்ட் டைமர்கள் யாரிடமும் பந்தைக் கொடுக்காமல் 2 ஸ்பின்னர், 3 வேகப்பந்து வீச்சாளர்கள் என 5 பேருக்கு 4 ஓவர் என அதே பழைய பெளலிங் பிளான்தான். ஸ்டான்லேக்கும், ஷகிப்பும் ஆளுக்கு 2 விக்கெட்டுகள் எடுத்து தலா 21 ரன்கள் மட்டுமே விட்டுக்கொடுத்திருந்தனர். இவர்கள் இருவரின் பந்துவீச்சையும்தான் சமாளிக்க முடியாமல் திணறியது கொல்கத்தா. 

பொறுமையாக ஆடு!

முதல் இரண்டு போட்டிகளைப்போலவே பெளலர்கள் டார்கெட்டை குறைத்து கொடுத்திருந்ததால் பொறுமையான ஆட்டத்தையே  ஹைதரபாத் ஆடியிருக்கலாம். ஆனால், சாஹா அவசரப்பட்டார். ஜான்சன் வீசிய ஆட்டத்தின் மூன்றாவது ஓவரை பவுண்டரிகளால் சிதறடித்தார் சாஹா. மூன்று பவுண்டரிகள்.

இதே டெம்ப்போவோடு சுனில் நரேனை சஹா சந்திக்க கதை முடிந்தது. முதல் பந்திலேயே விக்கெட். பந்து பேட்டில் பட்டு எட்ஜாக மிகச்சிறப்பாக அதைப்பிடித்தார் தினேஷ் கார்த்திக். 15 பந்துகளில் 24 ரன்கள் எடுத்து சாஹா அவுட் ஆக, மீண்டும் அடுத்த சுனில் நரேன் ஓவரில் ஷிகர் தவான் அவுட். 5 ஓவர்கள் களத்தில் நின்ற தவான் வெறும் 7 ரன்கள் மட்டுமே அடித்திருந்தார்.

வில்லியம்சன், மணிஷ் பாண்டே என பார்ட்னர்ஷிப் மாறியது. ஆனால், மணிஷ் பாண்டே ரன் எடுக்கத் திணறினார். வில்லியம்சனுக்கு சிங்கிள்ஸ் மாற்றிவிடக்கூட அவரால்  முடியவில்லை. 11 பந்துகளை சந்தித்து வெறும் 4 ரன்கள் மட்டுமே எடுத்து குல்திப் யாதவின் பந்தில் அவுட் ஆனார் பாண்டே. 

KKRvSRH

பாயின்ட்ல சிக்ஸ்!

ஹைதரபாத்துக்கு பிரஷர் அதிகரிக்க ஆரம்பித்தது. கடைசி 5 ஓவர்களில் 1 பவுண்டரி கூட இல்லை என்கிற நிலையில் 11-வது ஓவரை குல்திப் யாதவ் கேன் வில்லியம்சனுக்கு வீசினார். அடுத்தடுத்த பந்துகளில் 2 பவுண்டரிகளை லெக் சைடில் சரியான ஃபீல்டிங் இடைவெளிக்குள் அடித்து பிரஷரைக் குறைத்தார் கேன். அடுத்த ஆண்ட்ரு ரஸிலின் ஓவரை ''இதுபோதும் எனக்கு... இது போதுமே...'' என அனுபவித்து ஆடினார் ஷகிப். கடைசி 3 பந்துகளில் 2 பவுண்டரி, 1 சிக்ஸர். அந்த சிக்ஸர்தான் அற்புதம். பந்து பாயின்ட் திசையில் பார்வையாளர்கள் மத்தியில் போய் விழுந்தது. பாயின்ட்ல சிக்ஸர் பார்க்குற அனுபவம்லாம் ஐபிஎல்-லதான் அதிகம் கிடைக்கும்.  

வில்லியம்சன், ஷிகிப் பார்ட்னர்ஷிப் யாரும் பிரிக்கமுடியாதபடிபோக முதல் முறையாக பெளலிங் அட்டாக்கை மாற்றினார்  தினேஷ் கார்த்திக். ஐபிஎல்-ல் முதல் போட்டியில் ஆடும் ஷிவம் மவிக்கு 14-வது ஓவரைக் கொடுத்தார். வில்லியம்சன், ஷகிப் என சர்வதேச அளவில் மிகச்சிறந்த பேட்ஸ்மேன்களுக்கு பந்து வீசும் பிரஷர் மவியின் பெளலிங்கில் பெரிதாகத் தெரியவில்லை என்பதே சிறப்பு. முதல் இரண்டு பந்துகளை மிகச்சிறப்பாக வீசினார் மவி. ஆனால், ஆடுவதற்கு கடினமான பந்தையும் பந்தை ஸ்கொயர் லெக் திசையில் சிக்ஸருக்கு விரட்டினார் வில்லியம்சன். 1 சிக்ஸர்தான். மற்றபடி மவி ஓவரில் ஹைதராபாத்தால் சிங்கிள்ஸ்தான் எடுக்க முடிந்தது. 

KKRvSRH

கேப்டன் கேனின் 50!

பியுஷ் சாவ்லாவின் அடுத்த ஓவரில் 27 ரன்களில் ஆட்டம் இழந்தார் ஷிகிப். அடித்து ஆடலாமா அல்லது தடுத்து ஆடலாமா என  ஷகிப் சில விநாடிகள் குழம்ப, லெக் ஸ்டம்ப்பைத் தட்டியது சாவ்லாவின் பந்து. ஒரு பக்கம் விக்கெட்டுகள் விழ, கேப்டனின் இன்னிங்ஸ் எப்படி இருக்கவேண்டும் என்பதைக்காட்டினார் வில்லியம்சன். 17வது ஓவரில் அரை சதம் அடித்தார் வில்லியம்சன். 

கடைசி 3 ஓவர்களில் 21 ரன்கள் என 20/20கிரிக்கெட்டில் செம ஈஸி டார்கெட். ஆனால், ஜான்சனின் ஓவரில் வில்லியம்சன் ஆட்டம் இழக்க, ஹைதராபாத்துக்கு டென்ஷன் கூடியது. யூசுஃப் பதானை நம்பி ஹைதராபாத் காத்து நிற்க, சரியான நேரத்தில் பவுண்டரிகளை விளாசினார் பதான்.

12 பந்துகளில் 13 ரன்கள் எடுக்கவேண்டும் என்கிற நிலையில் ரஸல் பந்து வீசினார். 1 பவுண்டரி, 1 சிக்ஸர் என கடைசி ஓவருக்கு ஆட்டத்தைக் கொண்டுபோகாமல் கொல்கத்தாவின் கதையை முடித்தார் பதான்.

ராஜஸ்தான் ராயல்ஸ், மும்பை இந்தியன்ஸ், கொல்கத்தா நைட் ரைடர்ஸ் என மூன்று அணிகளையுமே பெரிய டென்ஷன் எல்லாம் இல்லாமல் ஈஸியாகவே வென்றிருக்கிறது ஹைதராபாத். இதற்கு முழுக் காரணம் ஹைதராபாத்தின் தெளிவான பெளலிங் அட்டாக்.

கார்த்திக்கிங் பெளலிங் ரொட்டேஷன்!

சென்னையைத் தொடர்ந்து ஹைதராபாத்திடமும் வீழ்ந்திருக்கிறது கொல்கத்தா. மிட்செல் ஜான்சன், சுனில் நரேன், குல்தீப் யாதவ், பியூஷ் சாவ்லா என நல்ல பெளலர்கள் இருந்தும் அவர்களை சரியான முறையில் ரோட்டேஷன் செய்யாததுதான் தினேஷ் கார்த்திக்கின் தவறு. ஸ்பின்னர்கள் நன்றாகப் பந்துவீசிகிறார்கள் எனத் தொடர்ந்து ஸ்பின்னர்களுகே முன்னுரிமை கொடுத்தார். ஷகிப்- வில்லியம்சன் கூட்டணியைப் பிரிக்க அவர் ஜான்சனைக் கொண்டுவந்திருக்கலாம். மவிக்கும் 1 ஓவர் மட்டுமே கொடுத்து முடித்துவிட்டார். பெளலிங் பிளானை தினேஷ் கார்த்திக் மாற்ற வேண்டிய நேரம் இது.

அடுத்த போட்டியில் கிங்ஸ் லெவன் பஞ்சாப்பை சந்திக்கிறது ஹைதராபாத். இதுவும் ஹைதாராபத்துக்கு வெற்றியைத் தரும் மேட்ச்சாகவே முடியும் என எதிர்பார்க்கலாம்!

Do you like the story?

Please Appreciate the Author by clapping!