வெளியிடப்பட்ட நேரம்: 19:48 (15/04/2018)

கடைசி தொடர்பு:19:48 (15/04/2018)

விராட் கோலி அதிரடி வீண்! - ராஜஸ்தான் அணிக்கு 2-வது வெற்றி #RCBvsRR

பெங்களூர் ராயல் சேலஞ்சர்ஸ் அணிக்கெதிரான ஐபிஎல் லீக் போட்டியில் ராஜஸ்தான் ராயல்ஸ் அணி 19 ரன்கள் வித்தியாசத்தில் வென்றது. 

விராட் கோலி

Photo: Twitter/IPL

பெங்களூரு சின்னச்சாமி மைதானத்தில் நடைபெற்ற போட்டியில் டாஸ் வென்ற பெங்களூர் ராயல்சேலஞ்சர்ஸ் அணியின் கேப்டன் விராட் கோலி ஃபீல்டிங் தேர்வு செய்தார். இதையடுத்து களமிறங்கிய ராஜஸ்தான் அணி, சஞ்சு சாம்ஸனின் அதிரடியால் 200-க்கும் மேல் ரன் குவித்தது. சாம்ஸன் 45 பந்துகளில் 92 ரன்கள் குவிக்க, அந்த அணி நிர்ணயிக்கப்பட்ட 20 ஓவர்களில் 4 விக்கெட் இழப்பிற்கு 217 ரன்கள் குவித்தது. பெங்களூர் அணியில் சஹால் மற்றும் வோக்ஸ் ஆகியோர் தலா 2 விக்கெட்டுகள் வீழ்த்தினர். நடப்பு ஐபிஎல் தொடரின் அதிகபட்ச ஸ்கோர் இதுவாகும். 

218 ரன்கள் இலக்குடன் களமிறங்கிய பெங்களூர் அணிக்குச் சரியான தொடக்கம் அமையவில்லை. முதல் ஓவரிலேயே 4 ரன்களுடன் மெக்கல்லம் நடையைக் கட்டினார். இரண்டாவது விக்கெட்டுக்கு தொடக்க வீரர் டிகாக்குடன் ஜோடிசேர்ந்த கேப்டன் கோலி, அதிரடி காட்டினார். இந்த ஜோடி 77 ரன்கள் சேர்த்திருந்த நிலையில், 26 ரன்களில் டிகாக் வெளியேறினார். 26 பந்துகளில் அரைசதமடித்த கோலியும், 57 ரன்களில் வெளியேறினார். கோலி ஆட்டமிழந்த சிறிது நேரத்திலேயே டிவிலியர்ஸும் வெளியேற, பெங்களூர் அணி தடுமாறியது. இறுதி ஓவர்களில் தமிழக வீரர் வாஷிங்டன் சுந்தர் அதிரடியாக ஆடி 35 ரன்கள் எடுத்தார். நிர்ணயிக்கப்பட்ட 20 ஓவர்கள் முடிவில் பெங்களூர் அணி 6 விக்கெட் இழப்பிற்கு 198 ரன்கள் மட்டுமே எடுத்து, 19 ரன்கள் வித்தியாசத்தில் தோல்வியடைந்தது. மந்தீப் சிங் 47 ரன்களுடனும், கிறிஸ் வோக்ஸ் ரன் ஏதும் எடுக்காமலும் ஆட்டமிழக்காமல் களத்தில் இருந்தனர். ராஜஸ்தான் அணி தரப்பில் கோபால் 2 விக்கெட்டுகள் வீழ்த்தினார்.