வெளியிடப்பட்ட நேரம்: 07:49 (21/04/2018)

கடைசி தொடர்பு:07:49 (21/04/2018)

"எந்த ஊருக்குப் போனாலும் ஒரு கலக்கு கலக்கணும்..!" - ராஜஸ்தானைப் புரட்டி எடுத்த சென்னை #CSKvsRR

தொடர்ந்து 3 மேட்ச்கள் கடைசி ஓவர் வரை இழுத்து ரசிகர்களுக்கு பிரஷரைத் தந்த சென்னை, இந்த முறை ஒரு ரிலாக்ஸ் வெற்றியைத் தந்திருக்கிறது. இந்த சீசன் சென்னையின் பன்ச் ஒன்றுதான். “ஃபைனல்  நிச்சயம்; கப் லட்சியம்”.

ஐ.பி.எல் ஓரளவுக்கு கணிக்க முடியும் நிலைமைக்கு வந்திருக்கிறது. எந்த டீம் கெத்து, எந்த ப்ளேயர் வெய்ட்டு, எந்த பவுலர் ரைட்டு என்பதை கொஞ்சம் கணிக்க முடிகிறது. அந்த வகையில் சென்னையும் ராஜஸ்தானும் மோதிய மேட்ச்சில் சென்னை ஜெயிக்கும் என்பதே நிலைமை. ஆனால், இப்படி ஒரு 'வாவ்' வெற்றியை தோனியே நினைத்திருக்க மாட்டார். 

“இனி நம்ம ஊரு புனே… இன்னைக்கு எதிரி கோன் ஹே” என மஞ்சள் ஆர்மி கெத்து காட்டியது. ஹவுஸ்ஃபுல் ஆகவில்லை என்றாலும் நல்ல கூட்டம். டாஸ் ஜெயித்த ரஹானேவை தோனி “அதான” என்பது போல பாக்க, ‘அதேதான்’ என சேஸிங்கைத் தேர்ந்தெடுத்தார் ராஜஸ்தான் கேப்டன். சென்னை அணியில் விஜய்க்கு பதிலாக ரெய்னாவும், ஹர்பஜனுக்கு பதிலாக கார்ன் ஷர்மாவும் மாறியிருந்தார்கள். ராஜஸ்தானிலும் இரண்டு மாற்றங்கள். சென்ற போட்டியில் நன்றாக ஆடியும் ஷார்ட்டுக்கு பதிலாக க்ளாஸினும் குல்கர்னிக்கு பதில் பின்னியும் களமிறங்கினார்கள்.

முதல் ஓவரின் முதல் பாலே நோ பால். பின்னி போட்ட ஃப்ரீ ஹிட்டை பவுண்டரிக்கு அனுப்பினார் வாட்ஸன். அடுத்தும் 4 என அந்த ஓவரிலே 14 ரன்கள். ஆனால் கடைசிப் பந்தில் ஸ்லிப்பில் வாட்சன் தந்தக் கேட்ச்சை திரிபாதி தவற விட்டார்.  இன்னொரு வாய்ப்பும் தந்தார் வள்ளல் வாட்ஸன். பாயின்ட்டில் வந்த அந்தக் கடினமான கேட்ச்சையும் தவறவிட்டது ராஜஸ்தான். இத்தனை லைஃப் கிடைத்தால் சும்மா இருப்பாரா? 4,6 என ஆக்டிவ் மோடுக்கு மாறினார் ஆஸி அழகன். இந்தப்பக்கம் ராயுடு அவுட் ஆனதும் வந்த ரெய்னா தொடர்ந்து நான்கு பவுண்டரிகள் அடிக்க, பவர் ப்ளே முடிவில் ஒரு விக்கெட் இழப்புக்கு 69 ரன் அடித்திருந்தது தோனி அண்ட் கோ.

ஃபீல்டிங் கட்டுப்பாடுகள் தளர்ந்தாலும் வாட்ஸன் தளரவில்லை. 28 பந்துகளில் 50 ரன் அடித்தவர், கெளதம் வீசிய ஓவரில் 6,4,6 என பந்தை பவுண்டரிக்கு பார்சல் செய்தார். “நீ ஆடு தல” என்பது போல ரெய்னா தந்த சப்போர்ட்டும் பக்கா சொக்கா.

சென்னை

10 ஓவருக்கு பிறகு ரெய்னாவும் அதிரடி கிளப்ப, ரன்ரேட் மெர்சல் ஆனது. 46 ரன் அடித்திருந்தபோது ரெய்னா அவுட் ஆனார்.அதன்பின் களம் வந்தவர் தோனி. 

தோனியின் ஆட்டத்தில் சென்ற போட்டியிலும் இந்தப் போட்டியிலும் முக்கியமான மாற்றத்தைக் காண முடிந்தது. முதல் பந்தில் ஒரு ரன் அடித்தவர் அந்தப் பந்தை பவுண்டரிக்கு விளாசினார். ஆரம்பத்தில் பந்தைச் சாப்பிடுகிறார் தோனி என்ற விமர்சனம் காரணமா அல்லது கொஞ்சம் டாப் ஆர்டரில் வருவதால் ரிஸ்க் குறைவு என்ற எண்ணம் காரணமா தெரியவில்லை. ஆனால், மூன்றாவது பந்தை சிக்ஸருக்கு அனுப்ப நினைக்க, ஜம்ப் செய்து ஜாக்பாட்டை கைவசமாக்கினார் கெளதம். அதன்பின் சென்னையின் ரன்ரேட் குறையத் தொடங்கியது.

வாட்ஸனுக்கு ஷார்ட் பாலாக போட்டது ராஜஸ்தான். அதையும் நேராக லாங் ஆனில் அடிக்கும் அளவுக்கு அசால்ட் செய்தார் வாட்ஸன். ஆரம்பத்திலே இரண்டு கேட்ச்கள் வாட்ஸன் தந்த போதே இரண்டு ஸ்லிப் நிற்க வைத்திருக்கலாம். ரஹானே தவற விட்ட வாய்ப்பு அது. விளைவு, 51 பந்தில் சதமடித்தார் வாட்ஸன். சீசனின் இரண்டாவது சதத்தை அடித்தவரும் 35 வயதைக் கடந்தவர். 

220 ரன்னைக் கடக்கும் என்ற எதிர்பார்ப்பை சென்னையால்,அதைப் பூர்த்தி செய்ய முடியவில்லை. தொடர் விக்கெட் இழப்பால் 204 மட்டுமே எடுக்க முடிந்தது. ஆனால், அதுவே வெற்றிக்கு போதும் என்பது அப்போதே தெரிந்தது. ஸ்ரேயாஸ் கோபால் மட்டும் 20 ரன் விட்டுக்கொடுத்து 3 விக்கெட் கைப்பற்றினார் (4 - 0 - 20 - 3 ). தோனி, ரெய்னா, பில்லிங்ஸ் என ஃபார்மான பிளேயர்களை அவர் அவுட் ஆக்கியிருந்தாலும், அதில் ஃபீல்டர்களின் பங்கு அதிகம் என்பதையும் குறிப்பிடவேண்டும். 

'நீங்க நோ பால் போட்டா நாங்க வைடு போடுவோம்' எனத் தொடங்கினார் தீபக். இரண்டாவது பாலே க்ளாஸீன் தந்த ஸ்லிப் கேட்ச்சைத் தவற விட்டார் வாட்ஸன். “என் கேட்ச்சை நீங்க விட்டிங்க இல்லை. தானிக்கு தீனி சரியா போச்சு” என்பது போல இருந்தது வாட்ஸனின் பார்வை. அந்த ஓவரில் ஏறி வந்து ரஹானே அடிச்ச ஸ்டிரெய்ட் சிக்ஸ் லவ்லி. சரியான டைமிங், சரியான பேலன்ஸ். சென்னை முதல் ஓவரில் அடித்த அதே 14 ரன்னை ராஜஸ்தானும் அடித்தது. சபாஷ் சரியான போட்டி என்றுதான் அப்போது தோன்றியது. 

இரண்டாவது ஓவரில் க்ளாஸீனை க்ளீன் போல்ட் ஆக்கினார் ஷ்ரதுல் தாக்கூர். நேராக ஸ்டம்புக்கு வந்தப் பந்தைச் சுத்தமாக கணிக்கத் தவறினார் க்ளாஸின். ராஜஸ்தானின் ஷார்ட் பால் டெக்னிக்கையே சென்னையும் பின்பற்றியது. ஆனால் சாம்சனால் அதைச் சமாளிக்க முடியவில்லை. வந்த ஷார்ட் பாலை லெக்சைடில் அடிக்க, கேட்ச். ராஜஸ்தானுக்கு மிகப்பெரிய இடியாக இருந்தது அந்த விக்கெட். 

தொடர்ந்து, ரஹானேவும் க்ளீன் போல்ட் ஆக, மேட்ச் ஒன் சைடு ஆனது. ஸ்டோக்ஸ் புனேவுக்காக ஆடியவர். அவர் களத்திலிருந்தது நம்பிக்கையான விஷயம் என்றாலும் 204-ஐ சேஸ் செய்ய 6 ஓவரில் 37 அடித்திருக்கக் கூடாது இல்லையா? 

சென்னை

10வது ஓவரில் ஈஸி ரன் அவுட். அதையும் மிஸ் ஃபீல்டு செய்தார் கார்ன் ஷர்மா. ஏற்கெனவே ஒரு மிஸ் ஃபீல்டு என்பதால், அடுத்த மேட்ச் தோனி வாய்ப்பு தருவாரா என்பது சந்தேகமே. 

11வது ஓவரை வீச வந்த பிராவோவுக்கு முதல் பந்திலே ஆச்சர்யம். பட்லர் அடித்த ஷாட் தாஹீர் கையில் தஞ்சமானது. அதன் பின் நடந்ததை எல்லாம் சொல்வது என்பது ராஜஸ்தான் ரசிகர்களுக்கு ரண வேதனையைக் கொடுக்கலாம் என்பதால் சென்னை வென்றது என்பதோடு நிறுத்திக் கொள்ளலாம்.

இந்தப் போட்டியின் பாசிட்டிவ் விஷயமாக சென்னை பவுலிங்கை எடுத்துக் கொள்ளலாம். ஆனால், கடைசி நேர பேட்டிங்கை பட்டி டிங்கரிங் பார்க்க வேண்டும். ராஜஸ்தான் ஆரம்பத்தில் 4 போட்டிகளில் ஆட்களை மாற்றாமல் ஆடிவிட்டு, செட் ஆன ஷார்ட்டைத் தூக்கியதைத் தவிர்த்திருக்க வேண்டும்.  சந்தேகத்துக்கு இடமின்றி மேன் ஆஃப் த மேட்ச் வாட்ஸனுக்கே தரப்பட்டது. பந்து வீச்சிலும் 3 ஓவரில் 13 ரன்கள் மட்டுமே தந்து ஒரு விக்கெட்டை எடுத்திருந்தார் வாட்ஸன்.

தொடர்ந்து 3 போட்டிகளில் கடைசி ஓவர் வரை இழுத்து ரசிகர்களுக்கு பிரஷரைத் தந்த சென்னை, இந்த முறை ஒரு ரிலாக்ஸ் வெற்றியைத் தந்திருக்கிறது. இந்த சீசன் சென்னையின் பன்ச் ஒன்றுதான். “ஃபைனல்  நிச்சயம்; கப் லட்சியம்”.

ஆனால் இன்னும் இருக்கிறது ஐபிஎல். பார்ப்போம்.

 

 

நீங்க எப்படி பீல் பண்றீங்க


டிரெண்டிங் @ விகடன்