வெளியிடப்பட்ட நேரம்: 13:06 (20/07/2018)

கடைசி தொடர்பு:13:06 (20/07/2018)

`டிப்ஸ் மட்டும் 16 லட்சம்!' - ஹோட்டல் ஊழியர்களை இன்ப அதிர்ச்சியில் மூழ்கடித்த ரொனால்டோ

கால்பந்து சூப்பர் ஸ்டார் கிறிஸ்டியானோ ரொனால்டோ, ஹோட்டல் ஊழியர்களை ஆச்சர்யத்தில் மூழ்கவைத்த சம்பவம் தெரியவந்துள்ளது.

கிறிஸ்டியானோ ரொனால்டோ

போர்ச்சுக்கல் கால்பந்து அணியின் நட்சத்திர ஆட்டக்காரர் கிறிஸ்டியானோ ரொனால்டோ. தனது திறமையான ஆட்டத்தால் உலகம் முழுவதும் ரசிகர்களைக் கொண்டுள்ளார். இவர், சமீபத்தில் எடுத்த முடிவு, அவரது ரசிகர்களை அதிர்ச்சியில் உறையவைத்துள்ளது. அதாவது, கடந்த 9 ஆண்டுகளாக ரியல் மாட்ரிட் கிளப் அணிக்காக விளையாடிவந்த ரொனால்டோ, தற்போது யுவெண்டஸ் கிளப் அணிக்காக விளையாட ஒப்பந்தம்செய்துள்ளார்.  இதற்காக, இவருக்கு இந்திய மதிப்பில் ரூ.902 கோடி வழங்கப்பட உள்ளது. ரியல் மாட்ரிட் அணிக்காக 451 கோல்கள், பல்வேறு விருதுகள், சாதனைகள் படைத்த இவர், தற்போது யுவெண்டஸ் அணிக்காக விளையாட உள்ளது, அவரது ரசிகர்களிடம் சற்று அதிருப்தியை ஏற்படுத்தியுள்ளது. ஆனால்,``எனது முடிவைப் புரிந்துகொள்ளுங்கள்'' என்று அவர் தனது ரசிகர்களுக்கு அன்பு வேண்டுகோள் விடுத்துள்ளார். இந்நிலையில், ரொனால்டோ தனது காதலி மற்றும் குடும்பத்துடன் தற்போது கிரீஸ் நாட்டுக்கு சுற்றுலா சென்றுள்ளார். 

அங்கு, கோஸ்டா நவரினா என்ற நட்சத்திர ஹோட்டலில் தங்கியிருந்துள்ளார். அங்கிருந்து கிளம்பும்போது, ஊழியர்களுக்கு ரொனால்டோ இன்ப அதிர்ச்சிகொடுத்துள்ளார். ரொனால்டோ தங்கியிருந்தபோது ஹோட்டல் ஊழியர்கள் அவருக்கு  சிறப்பாக விரும்தோம்பல் செய்துள்ளனர். ஊழியர்களின் விரும்தோம்பலில் ரொனால்டோ மெய்சிலிர்த்துப்போனதால், ஊழியர்களுக்கு டிப்ஸாக 17 ஆயிரத்து 850 யூரோவை வைத்துவிட்டுச் சென்றுள்ளார். இது, இந்திய ரூபாய் மதிப்பில் ரூ.16 லட்சத்துக்கும் அதிகமாகும். இதை எதிர்பாராத ஊழியர்கள் இன்ப அதிர்ச்சியில் ரொனால்டோவைப் புகழ்ந்துவருகின்றனர். அவரது ரசிகர்களும் வலைதளங்களில் புகழ்ந்து பதிவிட்டுவருகின்றனர்.

நீங்க எப்படி பீல் பண்றீங்க