ஜெர்மனி கால்பந்து அணியில் கலகம்... இனவெறியால் மெசூட் ஒசில் விலகல்!

நான் ஒரு கால்பந்து வீரன். அரசியல்வாதி கிடையாது.

ஜெர்மனி கால்பந்து அணியில் கலகம்... இனவெறியால் மெசூட் ஒசில் விலகல்!

லகக் கோப்பை கால்பந்து தொடரில் ஜெர்மனி அணி முதல் சுற்றிலேயே தோல்வியைச் சந்தித்தது. `நடப்புச் சாம்பியன்' முதல்சுற்றுடன் நடையைக்கட்ட  அந்நாட்டு கால்பந்து ரசிகர்கள் அதிர்ச்சிக்குள்ளானார்கள். தோல்வி தந்த வலியிலிருந்து விடுபடுவற்குள் அணிக்குள் கலகம் வெடித்துள்ளது. இனவெறி புகார் காரணமாக அந்த அணியின் மிட்ஃபீல்டர் மெசூட் ஒசில் `ஜெர்மனி அணிக்காக இனிமேல் விளையாடப் போவதில்லை' என்று அறிவித்துள்ளார் உலகக் கால்பந்து ரசிகர்களிடையே இந்த அறிவிப்பு அதிச்சியை ஏற்படுத்தியுள்ளது. 

ஜெர்மனி வீரர் மெசூட் ஒசில்

மெசூட் ஒசில் துருக்கி வம்சாவளியைச் சேர்ந்தவர். லண்டனின் புகழ்பெற்ற அர்சனல் கிளப்புக்காக விளையாடி வருகிறார். கடந்த மே மாதத்தில் லண்டனுக்கு வந்த துருக்கி அதிபர் எர்டோகனை மெசூட் சந்தித்தார். அப்போது, அர்சனல் அணிக்காக தான் அணிந்து விளையாடும் ஜெர்சி ஒன்றை அவருக்குப் பரிசாக வழங்கினார். ஜெர்மனி அணியின் மற்றொரு மிட்ஃபீல்டர் குன்டோகனும் துருக்கி வம்சாவளியைச் சேர்ந்தவர்தான். மான்செஸ்டர் சிட்டி அணிக்காக விளையாடும் இவரும் லண்டனில் துருக்கி அதிபரைச் சந்தித்து, தன் ஜெர்சி ஒன்றை அன்பளிப்பாக வழங்கினார். குன்டோகன் வழங்கிய ஜெர்சியில் `To my president ' என்று எழுதப்பட்டிருந்தது. ஏற்கெனவே துருக்கி அதிபர் மீது பல்வேறு மனித உரிமை மீறல் குற்றச்சாட்டுகள் உள்ள நிலையில், இந்த இரு வீரர்களின் இந்தச் சந்திப்பு கடும் சர்ச்சையை ஏற்படுத்தியது. 

ரசிகர்கள் இருவரையும் கடுமையாக விமர்சித்தார்கள். `உங்கள்  மேல் எங்களுக்கு நம்பகத்தன்மை குறைந்து விட்டது. ஜெர்மனி அணிக்கு நீங்கள் விசுவாசமாக இருக்கிறீர்களா?' என்று கேள்விக் கணையால் துளைத்தனர். இதற்கிடையே உலகக் கோப்பைத் தொடரிலும் முதல் சுற்றில் அணி தோல்வியடைய, பத்திரிகைகளும் அரசியல்வாதிகளும் ஒசிலை கடுமையாக விமர்சித்தனர். இந்தச் சமயத்தில் ஜெர்மனி கால்பந்து சங்கம் தன்னைக் காப்பற்றத் தவறிவிட்டதாக மெசூட் கருதினார். இதையடுத்தே இத்தகைய அதிரடி முடிவை எடுத்துள்ளார். 

தன் முடிவு குறித்து மெசூட் ஒசில் விடுத்துள்ள அறிக்கையில், ``நான் ஒரு கால்பந்து வீரன். அரசியல்வாதி கிடையாது. என் வம்சாவளி நாட்டைச் சேர்ந்த உயர் அதிகாரியைச் சந்தித்த சிறு விஷயத்தை வைத்துக்கொண்டு இப்படி நடத்துவது மரியாதைக் குறைவாகக் கருதுகிறேன். இந்தப் புகைப்படத்தை வைத்துக்கொண்டு நான் அரசியலிலா ஈடுபடப் போகிறேன்? 2009-ம் ஆண்டு முதல் ஜெர்மனி அணிக்காக விளையாடி வருகிறேன். நான் அணிக்காகச் செய்த சாதனைகளை மறந்து விட்டனர். ஜெர்மனி கால்பந்து சங்கம் போன்ற மிகப்பெரிய அமைப்பு இனரீதியாகச் செயல்படுவது துரதிர்ஷ்டவசமானது. ஜெர்மனி அணி வெற்றிபெறும்போது நான் ஜெர்மனிக்காரன். அணி தோற்றால் நான் வேறுநாட்டிலிருந்து வந்து குடியேறியவனாகி விடுகிறேன். ஜெர்மனி கால்பந்து சங்கத் தலைவர் ரின்ஹார்ட் கிரின்டல் தன் இயலாமைக்கும் திறமையின்மைக்கும் என்னை பலிகடா ஆக்கப் பார்க்கிறார். பெருமையுடனும் மிகுந்த மனநிறைவுடனும் ஜெர்மனி அணியின் ஜெர்சியை அணிந்தேன். இனிமேல் அந்த ஜெர்சியை அணியப் போவதில்லை. நான் ரின்ஹார்ட் கிரின்டலின் செயலுக்காக வருத்தப்படுகிறேன். ஆனால், ஆச்சர்யப்படவில்லை'' எனக் குறிப்பிட்டுள்ளார்.

ஒசில்

உலகக் கோப்பைத் தொடரில் ஸ்வீடன் அணியுடன் ஜெர்மனி விளையாடிய போது பல ஜெர்மனி ரசிகர்கள் மெசூட் ஒசிலை கேலி செய்துள்ளனர். `துருக்கிக்குப் போ.... துருக்கிப் பன்றி ' என்றெல்லாம் ஃபேஸ்புக்கிலும் கடுமையாக விமர்சித்துள்ளனர். மெசூட்டின்  குடும்பத்தினருக்கும் கொலை மிரட்டல் விடுத்துள்ளனர். `தனக்கு இரு இதயங்கள். ஒன்று ஜெர்மனிக்காகத் துடிக்கும். மற்றொன்று துருக்கிக்காகத் துடிக்கும்' என்று கூறுவது ஒசிலின் வழக்கம். தற்போது 29 வயதான மெசூட், ஜெர்மனி அணிக்காக 92 சர்வதேசப் போட்டிகளில் விளையாடி 23 கோல்களை அடித்துள்ளார். 2014-ம் ஆண்டு ஜெர்மனி உலகக் கோப்பை வெல்ல முக்கிய காரணமாக இருந்தவர்!

Do you like the story?

Please Appreciate the Author by clapping!