வெளியிடப்பட்ட நேரம்: 12:40 (22/09/2018)

கடைசி தொடர்பு:12:40 (22/09/2018)

`அன்பைப் பரப்புங்கள்..!' - இந்திய தேசியகீதம் பாடிய பாகிஸ்தான் ரசிகரின் வைரல் வீடியோ

ஆசியக்கோப்பை கிரிக்கெட் போட்டியில் இந்தியா-பாகிஸ்தான் இடையிலான போட்டியின்போது, இந்திய தேசியகீதத்தைப் பாடி சமூக வலைதளவாசிகள் மனதில் இடம்பிடித்துவிட்டார் பாகிஸ்தான் ரசிகர் ஒருவர். 

பாகிஸ்தான் கிரிக்கெட் அணி ரசிகர்

இந்தியா, பாகிஸ்தான் உள்ளிட்ட 6 அணிகள் பங்கேற்கும் ஆகியக் கோப்பை கிரிக்கெட் தொடர், துபாய் மற்றும் அபுதாபியில் நடைபெற்று வருகிறது. லீக் போட்டிகள் முடிவடைந்த நிலையில், சூப்பர் 4 சுற்றுக்கு இந்தியா, பாகிஸ்தான், ஆப்கானிஸ்தான் மற்றும் வங்கதேசம்  அணிகள் தகுதிபெற்றன. முன்னதாக, செப்டம்பர் 19-ம் தேதியன்று இந்தியா- பாகிஸ்தான் அணிகள் மோதின. இப்போட்டியில், பாகிஸ்தான் அணியை வீழ்த்தி அபார வெற்றிபெற்றது இந்தியா. 

இந்த நிலையில், அன்றைய போட்டியின்போது பாகிஸ்தான் ரசிகர் ஒருவர் செய்திருந்த செயல், கிரிக்கெட் ரசிகர்கள் மனதில் வெகுவாக இடம்பிடித்துவிட்டது. பொதுவாக, போட்டி தொடங்குவதற்குமுன்பு மோதும் அணிகளின் தேசியகீதங்கள் இசைக்கப்படுவது வழக்கம். அதேபோல், அன்றைய போட்டியிலும் இரு நாட்டு தேசியகீதங்களும் இசைக்கப்பட்டன. அப்போது, இந்திய தேசிய கீதம் இசைக்கப்பட்டபோது, பாகிஸ்தான் அணியின் ரசிகர் ஒருவர், இந்திய தேசிய கீதத்தை உரத்த குரலில் பாடியிருக்கிறார். தான் பாடுவதை வீடியோவாகவும் பதிவு செய்துள்ளார். கழுத்தில், பாகிஸ்தான் தேசியக்கொடியை அணிந்திருந்த நிலையில், இந்திய தேசிய கீதத்தைப் பாடிய அந்த நபரை அருகில் இருந்த சக ரசிகர்கள் ஆச்சர்யமாகவும், ஆர்வமாகவும் பார்ந்து வியந்தனர். தற்போது, இந்த வீடியோ சமூக வலைதளங்களில் வைரலாகி உள்ளது. வீடியோ வெளியான சில நிமிடங்களிலேயே 5,000 ஷேர்களைக் கடந்துவிட்டது. 

இதையடுத்து, தேசியகீதத்தைப் பாடிய நபர் யார் என்ற தேடல்படலம் ஆரம்பமானது. வீடியோவில் இருப்பவர் அடில் தாஜ் (adil taj) என்பது தெரியவந்தது. அதன் பின்னர், இது குறிந்து அவரிடம் கேட்டதற்கு, `வீடியோவில் இருப்பது நான்தான். சமூக வலைதளத்தில் வீடியோவை ஷேர் செய்ததற்கு நன்றி. அமைதி மட்டுமே. எந்த முட்டாள்தனமான போர்களும் வேண்டாம். அன்பைப் பரப்புங்கள்!' என்று கூறினார்.