வெளியிடப்பட்ட நேரம்: 16:45 (23/09/2018)

கடைசி தொடர்பு:16:48 (23/09/2018)

பிளேயிங் லெவனில் மாற்றமில்லாமல் களமிறங்கும் இந்தியா! - இரண்டாவது முறையாகப் பேட்டிங் தேர்வுசெய்த பாகிஸ்தான்! #INDvPAK

இந்திய அணிக்கெதிரான ஆசியக் கோப்பை சூப்பர் ஃபோர் சுற்றுப் போட்டியில் டாஸ் வென்ற பாகிஸ்தான் கேப்டன் சர்ஃபராஸ் அகமது பேட்டிங் தேர்வு செய்தார்.

இந்தியா  பாகிஸ்தான்

Photo Credit: ICC

ஆசியக்கோப்பை கிரிக்கெட் தொடரின் சூப்பர் ஃபோர் சுற்றுப் போட்டியில் இந்தியா பாகிஸ்தான் அணிகள் மோதுகின்றன. லீக் சுற்றில் இந்திய அணி, பாகிஸ்தானை எளிதில் வீழ்த்தியது. அந்த வெற்றிக்கு இந்திய அணியின் பந்துவீச்சு முக்கியக் காரணமாக அமைந்தது. புவனேஷ்வர் குமார், கேதர் ஜாதவ், பும்ரா தொடர்ச்சியாகச் சிறப்பாக பந்து வீச, இந்திய அணி பாகிஸ்தானை எளிதில் வீழ்த்தியது. இந்திய அணியின் பேட்டிங் மற்றும் பந்துவீச்சு என இரண்டும் சம பலத்துடன் இருக்கிறது. பாகிஸ்தான் அணியை பொறுத்த வரை பந்துவீச்சில் பலமாக இருந்தாலும் பேட்டிங்கில் பெரும்பாலும் மாலிக்கை சார்ந்துதான் உள்ளது. 

டாஸ்
Photo Credit: BCCI

இன்றைய போட்டி, கடைசியாக இந்தியா பாகிஸ்தான் அணிகள் மோதிய அதே துபாய் மைதானத்தில் நடைபெறுகிறது. இங்கு சூப்பர் 4 சுற்றின் முதல் ஆட்டத்தில் இந்திய அணி வங்கதேசத்தை எளிதில் வீழ்த்தியது. ஆனால் ஆஃப்கானிஸ்தான் பாகிஸ்தான் அணிக்குத் தோல்வி பயத்தைக் காட்டிவிட்டது. இறுதிவரை பரபரப்பாகச் சென்ற அந்தப் போட்டியில் பாகிஸ்தான் கடைசி ஓவரில் த்ரில் வெற்றிபெற்றது. இன்றைய போட்டியில் டாஸ் வென்ற பாகிஸ்தான் அணி, பேட்டிங்கை  தேர்வு செய்தது. வங்கதேச அணிக்கெதிராக விளையாடிய அதே பிளேயிங் லெவனுடன் இந்திய அணி களமிறங்குகிறது. பாகிஸ்தான் அணியில் இரண்டு மாற்றங்கள் செய்யப்பட்டுள்ளது. ஹரீஸ் சொஹைல் மற்றும் உஸ்மான் கான் ஆகியோருக்குப் பதிலாக முகமது ஆமீர் மற்றும் சதாப் கான் ஆகியோர் அணியில் சேர்க்கப்பட்டுள்ளனர். `பேட்டிங்கிற்குச் சாதகமான இந்த மைதானத்தில் முதல் பேட் செய்வது எளிதாக இருக்கும். இன்றைய போட்டியில் 250 ரன்களுக்கு மேல் குவிப்போம் என்று நம்புகிறேன்’ என பாகிஸ்தான் கேப்டன் சர்ஃப்ராஸ் அகமது கூறினார்.