வெளியிடப்பட்ட நேரம்: 17:30 (08/12/2018)

கடைசி தொடர்பு:18:03 (08/12/2018)

`கோலிக்கு ஒரு நியாயம் எங்களுக்கு ஒரு நியாயமா?’ - ஆஸி. கோச் அப்செட்

கோலி செய்ததை எங்கள் வீரர்கள் செய்திருந்தால் மிக மோசமாகச் சித்திரிக்கப்பட்டிருப்போம் என ஆஸ்திரேலிய அணியின் பயிற்சியாளர் ஜஸ்டின் லாங்கர் தெரிவித்துள்ளார்.

விராட் கோலி

Credits: ICC

இஷாந்த் ஷர்மாவின் முதல் ஓவரின் 3-வது பந்தில் ஆஸ்திரேலியா வீரர் ஆரோன் ஃபின்ச் க்ளின் போல்ட் ஆகிறார். ஆஃப் - மிடில் ஸ்டெம்புகள் சிதறியது. பந்துவீச்சாளர் இஷாந்த் ஷர்மாவைவிட கேப்டன் விராட் கோலி ஆக்ரோஷமாகத் தனது மகிழ்ச்சியை வெளிப்படுத்தினார். ஆஸ்திரேலியா மண்ணில் அந்த அணியின் வீரர் முதல் ஓவரில் போல்டாகி வெளியேறினால் எந்தக் கேப்டனும் கொண்டாடத்தான் செய்வார். கோலி எப்போதும் சுறுசுறுப்பாக இயங்குபவர் ஆக்ரோஷமான அணுமுறையைக் கொண்டவர். ஆரோன் பின்ச்  விக்கெட்டுக்கு கோலி கொடுத்த ரியாக்‌ஷன்தான் சமூகவலைதளத்தில் ஹைலைட். இஷாந்த் ஷர்மாவின் துல்லியமான அட்டாக்கிங் கோலியின் ரியாக்‌ஷன் ஆகியவற்றால் சமூகவலைதளத்தில் இந்த வீடியோ வைரலானது. 

 

இதுதொடர்பாகக் கருத்து தெரிவித்துள்ள ஆஸ்திரேலியா அணியின் பயிற்சியாளர் ஜஸ்டின் லாங்கர், “இந்திய அணியின் கேப்டன் விராட் கோலி செய்ததுபோல் எங்கள் வீரர்கள் நடந்துகொண்டால் உலகின் மிக மோசமானவர்கள்போல் நாங்கள் சித்திரிக்கப்பட்டிருப்போம். அவர் ஒரு நட்சத்திர வீரர் மற்றும் ஓர் அணியின் கேப்டன். நீங்கள் செய்யும்போது அதை விளையாட்டின் மீதுள்ள பேஷன் என்கிறீர்கள் எனத் தெரிவித்துள்ளார்.

ஆரோன் ஃபின்ச்

ஆஸ்திரேலியாவுடனான முதல் டெஸ்ட் போட்டியின் இரண்டாம் நாள் ஆட்டம் முடிந்த பின்னர், சச்சின் டெண்டுல்கர் ஒரு ட்வீட் செய்தார். அதில் “இந்திய வீரர்கள் இந்தச் சூழ்நிலையில் மிகச் சிறப்பாகச் செயல்பட வேண்டும். குறிப்பாக, நீங்கள் உங்கள் பிடியை இழக்கக் கூடாது. தற்போது ஆஸ்திரேலிய பேட்ஸ்மேன்கள் விளையாடி வரும் தடுப்பு ஆட்டத்தை என் அனுபவத்தில் இதுவரை நான் பார்த்ததில்லை. அஷ்வின் சிறப்பாக விளையாடிவருகிறார். அவரின் ஆட்டத்தால் இந்தியா முன்னிலை வகிக்கும்” என்று பதிவிட்டிருந்தார்.

ஆஸ்திரேலியா

சச்சினின் இந்த ட்வீட்-க்கு லாங்கர் பதிலளித்துள்ளார். “ஆஸ்திரேலிய பேட்ஸ்மேன்கள் விளையாடி வரும் தடுப்பு ஆட்டத்தை என் அனுபவத்தில் இதுவரை நான் பார்த்ததில்லை என்ற சச்சின் ட்வீட்டை நான் பார்த்தேன். சச்சின் நீங்கள் இடம்பெற்றிருந்த இந்திய அணி ஆஸ்திரேலியாவுடன் விளையாடும்போது ஆலம் பார்டர், டேவிட் பூன், ஸ்டீவ் வாக், மார்க் வாக் மற்றும் ரிக்கி பாண்டிங் இருந்தனர். அவர்கள் மிகச்சிறந்த டெஸ்ட் அனுபவத்தைக் கொண்டிருந்தனர். நாங்கள் தற்போது அனுபவம் இல்லாத இளம்வீரர்களை வைத்து டெஸ்ட் கிரிக்கெட்டை விளையாடி வருகிறோம். அவர்களும் போராடி வருகின்றனர். நீங்கள் ரன்குவிப்பை மட்டுமே பார்க்கீறிர்கள். ஆனால், அவர்கள் சிறப்பாகப் பந்துவீசியுள்ளனர். அஷ்வின் சிறப்பாகச் செயல்பட்டார். அவருக்கு எதிராக வேறு திட்டத்தை செயல்படுத்த வேண்டும். நீங்கள் பார்த்த முந்தைய ஆஸ்திரேலியா அணிக்கும் தற்போதைய அணிக்கும் வித்தியாசம் உள்ளது எனத் தெரிவித்துள்ளார்.