``ஏற்றுக்கொள்ளவே முடியாது; மன்னிப்பு கேட்க வேண்டும்” -பாகிஸ்தான் கேப்டனுக்கு எதிராகச் சீறிய அக்தர் | Pakistan captain sledging in controversy

வெளியிடப்பட்ட நேரம்: 07:15 (24/01/2019)

கடைசி தொடர்பு:08:43 (24/01/2019)

``ஏற்றுக்கொள்ளவே முடியாது; மன்னிப்பு கேட்க வேண்டும்” -பாகிஸ்தான் கேப்டனுக்கு எதிராகச் சீறிய அக்தர்

கிரிக்கெட் விளையாட்டில் ஸ்லெட்ஜிங்கும் ஒரு பகுதிதான் என்பதை யாரும் மறுக்க மாட்டார்கள். ஒரு வீரர் தொடர்ச்சியாக சிறப்பாக விளையாடிக்கொண்டிருக்கும்போது, அவரின் கவனத்தை திசைதிருப்பும் விதமாக அவரிடம் வம்பிழுப்பதை சிலர் தொடர்ச்சியாகச் செய்து வருகின்றனர். நடந்து முடிந்த இந்திய ஆஸ்திரேலிய தொடரில், பலமுறை ஸ்லெட்ஜிங்கைப் பார்த்தோம். ஆனால், எல்லாம் எல்லை மீறாமல் இருக்கும் வரைதான். 

சர்ஃப்ராஸ் அகமது

ஸ்லெட்ஜிங் என்ற பெயரில் இனவெறியையோ நிறவெறியையோ தூண்டும் விதமாகப் பேசப்படும் கருத்துக்கள், எப்போதுமே பெரும் சர்ச்சையையும் சம்பந்தப்பட்ட வீரர்களுக்குச் சிக்கலையும் ஏற்படுத்தும். அதற்குப் பல சான்றுகள் உள்ளன. தற்போது, இந்தப் பட்டியலில் புதிதாக இணைந்திருப்பது பாகிஸ்தான் அணியின் கேப்டன் சர்ஃப்ராஸ் அகமது

தென்னாப்பிரிக்காவில் சுற்றுப்பயணம் மேற்கொண்டுள்ள பாகிஸ்தான் அணி,  சமீபத்தில் நடைபெற்ற 2 -வது ஒருநாள் போட்டியில் தோல்வியைத் தழுவியது. 204 ரன்கள் எடுத்தால் வெற்றி என்ற இலக்குடன் களமிறங்கிய தென்னாப்பிரிக்கா அணியின் விக்கெட்டுகள் ஒருபுறம் விழுந்தாலும், டூசன் மற்றும் பெஹ்லுகுவயோ ஆகியோரின் சிறப்பாக ஆட்டத்தால் வெற்றிபெற்றது தென்னாப்பிரிக்கா அணி. 

பாகிஸ்தான்

இவர்கள் இருவரின் விக்கெட்டை வீழ்த்த முடியாத காரணத்தால் கடுப்பான பாகிஸ்தான் அணியின் கேப்டன் சர்ஃப்ராஸ் அகமது, பெஹ்லுகுவயோவிடம்,  ``ஹே கறுப்பு மனிதனே... உனது தாய் எங்கே இருக்கிறார்?” என உருது மொழியில் சொன்னது ஸ்டம்பில் இருக்கும் மைக்கில் தெளிவாகப் பதிவானது.

பாகிஸ்தான் கேப்டனின் இந்தக் கருத்து பெரும் சர்ச்சையை ஏற்படுத்தியுள்ளது. உலகம் முழுவதிலும் இருந்தும் சர்ஃப்ராஸ் அகமதுவுக்கு எதிர்ப்புகள் வலுத்துவருகின்றன. பலர், சர்ஃப்ராஸ் மன்னிப்பு கேட்க வேண்டும் என்றும் சிலர் சர்ஃப்ராஸ் மீது நடவடிக்கை தேவை எனவும் கூறிவருகின்றனர். 

அக்தர்

இந்நிலையில், இந்தச் சம்பவம் தொடர்பாகக் கருத்து தெரிவித்துள்ள பாகிஸ்தான் அணியின் முன்னாள் அதி வேகப்பந்து வீச்சாளரான அக்தர், இதனை ஏற்றுக்கொள்ளவே முடியாது என்றார். ட்விட்டரில் பேசியுள்ள அக்தர்,  ``ஒரு பாகிஸ்தானியாக இதனை என்னால் ஏற்றுக்கொள்ள முடியாது. போட்டியின் தாக்கத்தில் அப்படி பேசியிருப்பார் என்று நினைக்கிறேன். அவர் பொது தளத்தில் மன்னிப்பு கேட்க வேண்டும்” என்றார் ஆவேசமாக...