மிரட்டும் போல்ட்... சீட்டுக்கட்டாகச் சரிந்த இந்திய வீரர்களின் விக்கெட்டுகள்! #NZvIND | Fourth ODI between India and New Zealand

வெளியிடப்பட்ட நேரம்: 07:09 (31/01/2019)

கடைசி தொடர்பு:08:44 (31/01/2019)

மிரட்டும் போல்ட்... சீட்டுக்கட்டாகச் சரிந்த இந்திய வீரர்களின் விக்கெட்டுகள்! #NZvIND

இந்தியா  நியூஸிலாந்து அணிகள் மோதும் 4 -வது ஒருநாள் போட்டியில் டாஸ் வென்ற நியூஸிலாந்து கேப்டன் வில்லியம்சன், பந்துவீச்சைத் தேர்வுசெய்தார். 

டாஸ்

Photo Credit: Twitter/BCCI

இந்திய அணி நியூஸிலாந்து நாட்டில் சுற்றுப்பயணம் மேற்கொண்டு, ஒருநாள் மற்றும் டி20 தொடரில் விளையாடிவருகிறது. தற்போது நடைபெற்றுவரும் ஒருநாள் தொடரின் முதல் 3 போட்டிகளில் வெற்றிபெற்று,  இந்திய அணி தொடரை ஏற்கெனவே கைப்பற்றிவிட்டது. இந்நிலையில், இன்று 4 -வது ஒருநாள் தொடர், ஹாமில்டன் மைதானத்தில் நடைபெற உள்ளது. 

ரோஹித் ஷர்மா

Photo Credit: Twitter/BCCI

மீதம் இருக்கும் இரண்டு ஒருநாள் மற்றும் டி20 தொடரிலிருந்து இந்திய கேப்டன் கோலிக்கு ஓய்வு வழங்கப்பட்டுள்ளது. அதனால், ரோகித் ஷர்மா தலைமையில் இந்திய அணி களமிறங் உள்ளது. ரோகித் ஷர்மாவுக்கு இது 200 -வது ஒருநாள் போட்டி என்பது கூடுதல் சிறப்பு.  தொடரைக் கைப்பற்றிவிட்ட காரணத்தால், இந்திய அணியில் இளம் வீரர்களுக்கு வாய்ப்பு வழங்கப்படுகிறது. 

கில்

Photo Credit: Twitter/BCCI

19 -வயதுக்குட்பட்டோருக்கான உலகக்கோப்பைத் தொடரில் சிறப்பாகச் செயல்பட்ட சுப்மான் கில், இன்றைய போட்டியில் அறிமுக வீரராகக் களமிறங்க உள்ளார். இளம் வீரரான அவருக்கு, போட்டிக்கான தொப்பியை தோனி வழங்கினார். 

இன்றைய போட்டியில், டாஸில் வென்ற நியூஸிலாந்து கேப்டன் வில்லியம்சன், பந்துவீச்சைத் தேர்வுசெய்தார். இந்த மைதானம் சேஸிங்கிற்கு சாதகமான மைதானம் என்பது குறிப்பிடத்தக்கது. இந்திய அணியில் இரண்டு மாற்றங்கள் செய்யப்பட்டுள்ளன. கோலிக்குப் பதிலாக சுப்மான் கில் மற்றும் ஷமிக்குப் பதிலாக கலீல் களமிறங்குகிறார்கள். தோனி, காயத்திலிருந்து இன்னும் முழுமையாகத்  தயாராகாத காரணத்தால், அணியில் இடம்பிடிக்கவில்லை. நியூஸிலாந்து அணியிலும் இரண்டு மாற்றங்கள் செய்யப்பட்டுள்ளன.

இந்திய அணியின் தொடக்க ஆட்டக்காரர்களாக தவான் மற்றும் ரோகித் ஷர்மா களமிறங்கினர். ஆட்டத்தின் தொடக்கம் முதலே நியூஸிலாந்து அணி சிறப்பாகப் பந்துவீசி இந்திய பேட்ஸ்மேன்களைத் திணறடித்தது. குறிப்பாக, போல்ட் பந்துவீச்சை இந்திய வீரர்கள் எதிர்கொள்ள கடும் சிரமப்பட்டனர். 

தவான், 13 ரன்னில் போல்ட் பந்துவீச்சில் ஆட்டமிழக்க, அடுத்து அறிமுக வீரர் கில் களமிறங்கினார். நிதானமாக ஆடிவந்த ரோகித், போல்ட் பந்துவீச்சில் அவரிடமே கேட்ச் கொடுத்து ஆட்டமிழந்தார். அடுத்து களமிறங்கிய ராயுடு மற்றும் தினேஷ் கார்திக் டக் அவுட் ஆக, இந்திய அணி திணறியது. 

அதன்பின்னர், சுப்மான் கில்லும் போல்ட் பந்துவீச்சில் ஆட்டமிழந்தார். அவர்,  9 ரன்கள் எடுத்தார். அடுத்து களமிறங்கிய ஜாதவ், 1 ரன்னில் ஆட்டமிழக்க, இந்திய அணி தற்போது 35 ரன்களுக்கு 6 விக்கட்டுகளை இழந்து தடுமாறிவருகிறது. தற்போது, பாண்ட்யா மற்றும் புவனேஷ்வர் குமார் களத்தில் உள்ளனர். போல்ட், 7 ஓவர்கள் வீசி 8 ரன் விட்டுக்கொடுத்து, 4 விக்கெட்டுகளை வீழ்த்தியுள்ளார்.