அமெரிக்கா Vs அமெரிக்கா! - ஒலிம்பிக் டைரி குறிப்புகள் (அத்தியாயம்- 7)

அன்பு வாசகர்களே, 


முந்தைய அத்தியாயங்களைப் படிக்க : 1  2  3  4  5  6 


 

7. அமெரிக்கா Vs அமெரிக்கா

1904 - இந்த ஆண்டில் அமெரிக்கா முதன்முதலில் ஒலிம்பிக்கை நடத்தியது. அமெரிக்கர்களுக்காக மட்டுமே இந்த ஒலிம்பிக் போட்டி நடத்தப்பட்டது என்றும் சொல்லப்படுவதுண்டு. காரணம் பதக்கப்பட்டியல் அப்படி!

(இந்த ஒலிம்பிக்கில்தான் முதலிடத்தில் தங்கப் பதக்கம் அறிமுகப்படுத்தப்பட்டது.) அமெரிக்கா, 78 தங்கம் - 82 வெள்ளி - 79 வெண்கலம் என மொத்தம் 239 பதக்கங்களுடன் முதலிடத்தை ஆக்கிரமித்தது. இரண்டாவது இடத்தில் ஒடுங்கிக் கிடந்த ஜெர்மனிக்கு, 4 தங்கம் - 4 வெள்ளி - 5 வெண்கலம் என 13 பதக்கங்கள் மட்டுமே மிஞ்சிக் கிடந்தது. கலந்து கொண்ட மீதி 10 நாடுகளின் நிலைமை அதைவிட மோசம்.

அந்த ஒலிம்பிக் அமெரிக்கர்களுக்காக அமெரிக்கா நடத்திய ஒலிம்பிக்காக மாறிப்போக சில முக்கிய காரணங்களும் இருந்தன. அப்போது ரஷ்ய சாம்ராஜ்ஜிமும், ஐப்பான் பேரரசும் போரில் ஈடுபட்டிருந்தன. மஞ்சூரியாவையும் கொரியாவையும் கைப்பற்றும் நோக்கத்துடன் ரஷ்யா களமிறங்க, ஜப்பான் மார்தட்டி எதிர்த்து நின்றது. 1904 பிப்ரவரியில் போர் ஆரம்பமானது.

இந்த அசாதாரணமான சூழலில் பல ஐரோப்பிய நாடுகள், ‘அனேபிள் டூ அட்டெண்ட் ஒலிம்பிக்...’ என கமிட்டிக்கு லீவ் லெட்டர் அனுப்பிவைத்தன. தவிர, அன்றைய சூழலில் அமெரிக்கக் கண்டத்துக்குப் பயணம் செய்வதும் பல நாட்டு வீரர்களுக்கு இயலாத ஒன்றாகத்தான் இருந்தது.

ஆகவே வெறும் 12 நாடுகளைச் சேர்ந்தவர்கள் மட்டுமே ஒலிம்பிக்கில் கலந்து கொண்டனர்.

இந்த 1904 ஒலிம்பிக்கை நடத்த முதலில் சிகாகோ நகரம்தான் தேர்ந்தெடுக்கப்பட்டிருந்தது. அதேசமயத்தில் மிஸௌரியின் செயின்ட் லூயிஸ் நகரத்தில் உலக வர்த்தகக் கண்காட்சி நடைபெறவிருந்தது. கண்காட்சியின் ஒரு பகுதியாக ஒலிம்பிக்கை இங்குதான் நடத்தவேண்டும். சிகாகோவில் நடத்தினால் பதிலுக்கு நாங்களும் ஒரு சர்வதேச விளையாட்டுப் போட்டியை நடத்துவோம் என்று கண்காட்சி நடத்திய அண்ணாச்சிகள் மிரட்டினார்கள். ஆகவே, ‘எங்க வேணா நடத்திக்கோங்க. ஒலிம்பிக் நடந்தா போதும்’ என்று ஒலிம்பிக் கமிட்டி வழிவிட்டது.

1904, ஜூலை 1ல் ஒலிம்பிக் தொடக்க விழா என்ற ஒன்று நடந்தது. அதன் நிறைவு விழா 146 நாட்கள் கழித்து நவம்பர் 23 அன்று ஒருவழியாக நடந்து முடிந்தது.

இந்த 'இழுவை ஒலிம்பிக்'கில் கயிறு இழுக்கும் போட்டியும் நடந்தது. பங்குபெற்ற அணிகள் மொத்தம் ஆறு. கிரீஸ், தென் ஆப்பிரிக்கா, அமெரிக்கா... மீதி மூன்று அணிகள்? அமெரிக்காவிலேயே நான்கு அணிகள் (மில்வாக்கி கிளப், நியு யார்க் கிளப், செயின்ட் லூயிஸ் 1 & 2) கயிறு இழுத்தன. முதல் சுற்றே காலிறுதிதான். அமெரிக்க அணிகள் கிரீஸ், தென் ஆப்பிரிக்க அணிகளை அலேக்காக இழுத்துப் போட்டு வீட்டுக்கு அனுப்பின. முதல் அரையிறுதியில் அமெரிக்காவும், அமெரிக்காவும் மோதின. இரண்டாவது அரையிறுதியில் அமெரிக்காவும், அமெரிக்காவும் மோதின. அவ்விரண்டில் ஜெயித்த அமெரிக்காவும், அமெரிக்காவும் இறுதிப் போட்டியில் மோதி, அதில் ஓர் அமெரிக்க அணி (மில்வாக்கி கிளப்) வென்றது. ஆக, தங்கம், வெள்ளி, வெண்கலம் எல்லாம் அமெரிக்காவுக்கே.

கயிறு இழுக்கும் போட்டியிலாவது பெயருக்கு இரண்டு வெளிநாட்டு அணிகள் வந்து போயின. ஆனால் வில்வித்தைப் போட்டியில் அமெரிக்க வீரர்கள் மட்டுமே (23 ஆண்கள், 6 பெண்கள்) பங்கு பெற்றனர். இந்த ஒலிம்பிக்கில்தான் பெண்களுக்கான வில்வித்தைப் போட்டிகள் அறிமுகமாயின. ஆறு பிரிவுகளில் நடந்த போட்டிகளில் 17 பதக்கங்களை அமெரிக்கா தனக்கே தனக்கென வைத்துக் கொண்டது.

செயின்ட் லூயிஸ் ஒலிம்பிக்கில்தான் குத்துச்சண்டை போட்டி அறிமுகப்படுத்தப்பட்டது. அமெரிக்கர்கள் தங்கள் முகத்தில் தாங்களே மாறி மாறி குத்துகளை விட்டுக் கொண்டனர். ஆம், ஏழு எடைப்பிரிவுகளில் நடந்த குத்துச் சண்டைப் போட்டிகளில் அமெரிக்க வீரர்கள் மட்டுமே கலந்து கொண்டனர். கரோல் பர்டான் என்ற உள்ளூர்ப் பிரபல குத்துச்சண்டை வீரர் களமிறங்கினார். முதல் சுற்றுப் போட்டியில் வெற்றியும் பெற்றார். கரோல் நிச்சயம் பதக்கம் வெல்வார் என்று பேச்சு எழுந்தபோது, சிலர் கரோலின் முகத்தை உற்றுக் கவனித்தனர்.

‘இவனைப் பார்த்தா கரோல் மாதிரி தெரியலயே’ என்று சந்தேகம் எழுந்தது. ஆளைப் பிடித்து அமுக்கி விசாரித்ததில், ‘நான் கரோல் இல்லீங்க. என் பேரு ஜேம்ஸ் பொலிஞ்சர். கரோல் பேர்ல கலந்துக்கிட்டா, ஜட்ஜ் எல்லாம் என்னை ஜெயிக்க வெச்சிருவாங்கன்னு இப்படி பண்ணினேன்’ என்று ஒப்புக்கொண்டார் அந்த பிரகஸ்பதி. அவரைத் தகுதி நீக்கம் செய்து ‘ஓடிப்போயிரு’ என்று விரட்டிவிட்டனர்.

செயின்ட் லூயிஸ் ஒலிம்பிக்ஸில் குத்துச்சண்டை ரிங்கில் பெண்கள் முதன் முறையாக களம் இறங்கினர். ஆனால், அவை காட்சிப் போட்டிகளாக மட்டுமே நடத்தப்பட்டன. பதக்கங்கள் வழங்கப்படவில்லை. அதற்குப்பின் ஒலிம்பிக்கில் பெண்கள் குத்துச்சண்டை சேர்க்கப்படவே இல்லை. 108 வருடங்கள் கழித்து 2012 லண்டன் ஒலிம்பிக்கில்தான் பெண்கள் குத்துச் சண்டை அரங்கேறியது. அதில் ஃப்ளைவெயிட் பிரிவில் இந்தியாவின் மேரி கோம் வெண்கலம் வென்றார் என்பது இங்கே தகவலுக்காக.

1904 ஒலிம்பிக் ஆண்கள் கால்பந்து போட்டியில் மூன்று அணிகள் பங்கேற்றன. கனடா அணி ஒன்று. கிறிஸ்டியன் பிரதர்ஸ் காலேஜ், செயின்ட் ரோஸ் பாரிஸ் என இரண்டு அமெரிக்க அணிகள். நவம்பர் 16, 17 ந்தேதிகளில் நடந்த போட்டிகளில் கனடா அணி, இரண்டு அமெரிக்க அணிகளையும் வென்று தங்கத்தை வசப்படுத்தியது.

சரி, யாருக்கு வெள்ளி, வெண்கலம் என்று தீர்மானிப்பதற்காக நவம்பர் 20 அன்று இரண்டு அமெரிக்க அணிகளையும் மோதவிட்டார்கள். ஆட்ட நேர முடிவில் இரண்டு அணிகளும் 0 கோல் போட்டிருந்தன. அப்போது ஃப்ரீ கிக், கூடுதல் நேரம் போன்றவை எல்லாம் கிடையாது. ஆகவே மறுநாளும் போட்டி நடத்தினர். அன்றும் 0-0. வெறுத்துப் போன போட்டி அமைப்பாளர்கள் நவம்பர் 23ல் மீண்டும் அதே அணிகளை மோத விட்டனர். அன்றைக்கு ஒருவழியாக கிறிஸ்டியன் பிரதர்ஸ் காலேஜ் அணியினர் கோல் போஸ்டைக் கண்டுபிடித்து இரண்டு கோல்களை அடித்தனர். வெள்ளி கிடைத்தது. எந்தப் போட்டியிலும் ஒரு கோல்கூட போடாத செயின்ட் ரோஸ் பாரிஸ் அணியினர், பெருமையுடன் வெண்கலப் பதக்கம் மார்பில் தவழ வீறுகொண்டு வீடு திரும்பினர். இந்த கால்பந்து மேட்சோடு செயின்ட் லூயிஸ் இழுவை ஒலிம்பிக் முடிவுக்கு வந்தது.

1904 ஒலிம்பிக் என்றால் இவரைப் பற்றி பேசியே தீர வேண்டும். ஜார்ஜ் எய்செர். 1870ல் ஜெர்மனியில் பிறந்தவர். பின் அவரது குடும்பம் அமெரிக்காவுக்குக் குடிபெயர்ந்தது. 1894ல் எய்செர் அமெரிக்கக் குடியுரிமை பெற்றார். செயின்ட் லூயிஸில் ஒரு தொழிற்சாலையில் கணக்கு எழுதும் வேலை பார்த்து வந்தார். அவருக்கு விளையாட்டுகளில், குறிப்பாக ஜிம்னாஸ்டிக்கில் சிறு வயது முதலே ஆர்வம் இருந்தது.
செயின்ட் லூயிஸில் ஒலிம்பிக் நடக்கப் போகிறது என்று தெரிந்ததுமே பல்வேறுவிதமான விளையாட்டுப் போட்டுகளில் தன் பெயரைப் பதிவு செய்தார். உற்சாகமாகக் கலந்துகொண்டார்.

நீளம் தாண்டுதல், குண்டு எறிதல், சில ஜிம்னாஸ்டிக் பிரிவு விளையாட்டுகளில் தொடர் தோல்விகளே கிடைத்தன. எய்செர் தளர்ந்துவிடவில்லை. நம்பிக்கை குறையாமல் அடுத்தடுத்த போட்டிகளில் களம் இறங்கினார். அதன் பலனாக, ஒரே நாளில் ஆறு பதக்கங்கள் எய்செரின் கழுத்தில் வந்து விழுந்தன.
கயிறு ஏறும் போட்டி, உயரம் தாண்டும் போட்டி, குழுவாக விளையாடும் பார் விளையாட்டு என மூன்றில் தங்கம். Pommel Horse மற்றும் இன்னொரு பிரிவு ஜிம்னாஸ்டிக் என இரண்டு வெள்ளி. கிடைச்சட்டம் (Horizontal Bar) பிரிவு ஜிம்னாஸ்டிக்கில் வெண்கலப் பதக்கம். அசத்தலாக ஆறு பதக்கங்கள்.

சரி, திறமையுள்ள ஒருவர், அதுவும் அசமந்தமாக அன்று நடந்த ஒலிம்பிக் போட்டிகளில் அசத்தலாக ஆறு பதக்கங்கள் வெல்வது என்பது ஆச்சரியமான விஷயம் இல்லைதான். ஆனால் எய்செரின் விஷயத்தில் ஆச்சர்யம் அதிகமாவே உண்டு. ஆம், ஜார்ஜ் எய்செர் தனது சிறுவயதில் ரயில் விபத்து ஒன்றில் இடது காலைப் பறிகொடுத்தவர். செயற்கைக் கட்டைக் காலைப் பொருத்திக் கொண்டுதான் ஒலிம்பிக்கில் அந்தக் கடினமான போட்டிகளில் கலந்துகொண்டார்.

(டைரி புரளும்.)

அடுத்த அத்தியாயம் : ஒரு தபால்காரரின் கதை!

- முகில்

Do you like the story?

Please Appreciate the Author by clapping!