வார்னரின் படையை எப்படி சமாளிக்கப் போகிறது ரெய்னா அணி? #MatchPreview #GLvsSRH

ஐபிஎல் இந்திய கிரிக்கெட் ரசிகர்களின் சம்மரை கூலாக்கும் எனர்ஜிடிக் உணவு. இன்று மாலை  நான்கு மணிக்கு நடக்கும் போட்டியில் குஜராத் லயன்ஸ் அணியும், சன் ரைசர்ஸ் ஹைதராபாத் அணியும் மோதுகின்றன. இந்த போட்டி, ஹைதராபாத்தில் உள்ள ராஜிவ் காந்தி ஸ்டேடியத்தில் நடக்கிறது. 

இரன்டு அணிகளும் தங்களது முதல் போட்டியை முடித்துவிட்டன. இதில் ஹைதராபாத்  பெங்களுருவை 35 ரன்கள் வீழ்த்தியது. குஜராத் பத்து விக்கெட்டுகள் வித்தியாசத்தில் தோற்றது.  சன் ரைசர்ஸ் பொறுத்தவரை, சென்ற வருடம் இருந்த அதே துடிப்போடு இந்த சீசனிலும் விளையாடி வருகிறது. கடந்த சீஸனில் வலுவான பந்துவீச்சை வைத்தே பாதி போட்டிகளில் எதிரணியை காலி செய்தது ஹைதராபாத். இந்த சீசனில் வலுவான பேட்டிங்கும் அமைய தெம்புடன் களமிறங்குகிறது.

குஜராத் அணி vs ஹைதரபாத் அணி

தவான் உள்ளூர் போட்டிகளில் வெளுத்து வாங்கியதால் அவர் ஹைதராபாத்துக்கு நல்ல ஓபனராக இருப்பார் என நம்பலாம். கேன் வில்லையம்சன் கடந்த போட்டியில் விளையாடவில்லை. அவர் வந்தால் ஃபீல்டிங், பேட்டிங் என இரண்டிலும் ஜொலிப்பார் என்பது ரசிகர்களின் நம்பிக்கை. யுவராஜ் திடீரென்று விஸ்வரூபம் எடுத்தது அனைவருக்கும் இன்ப அதிர்ச்சி. ஹென்ரிக்ஸும் நல்ல ஃபார்மில் உள்ளார். பென் கட்டிங் ஆல்ரவுண்டராக ஜொலிப்பார் என்று எதிர்பார்த்த நிலையில், முதல் போட்டியில் பவுலிங்கில் சுமாராகவே வீசினார்.

ஹைதரபாத்தை  பொறுத்தவரையில் ஒருவர் சொதப்பினால், இன்னொருவர்  தோள் கொடுத்து வெற்றி பெற வழிவகுக்கின்றனர். எந்தவொரு குறிப்பிட்ட வீரரை மட்டுமே நம்பி அணி இல்லை. இது பாசிட்டிவான அம்சம். இந்தியாவுக்கு எதிரான டெஸ்ட் போட்டிகளில் சொதப்பிய வார்னர், இன்னமும் தனது பார்மை மீட்டெடுக்கவில்லை.  வார்னரின் அதிரடி போதவில்லை  என்பது சன் ரைசர்ஸ்  ரசிகர்களின் பெருத்த ஏக்கம். அவருடைய இடத்தை யுவி பூர்த்தி செய்வார் என்ற நம்பிக்கையை அளித்திள்ளது யுவியின் அரை சதம். 

பந்துவீச்சை பொருத்தவரையில், முஸ்தஃபிகுர் இல்லாதது சற்று பின்னடைவு தான். ஆனால், அந்த இடத்தை நிரப்ப இரண்டு ஆப்கானிஸ்தான்  வீரர்களை களமிறக்கு அசத்தியுள்ளது சன் ரைசர்ஸ். பெங்களூருக்கு எதிரான முதல் போட்டியில், மற்ற பவுலர்கள் சராசரியாக 10 ரன்களுக்கு மேல் விட்டுத்தர, அபாரமான பந்துவீச்சால்  சற்றே குறைவான ரன்களை விட்டுத்தந்து இரண்டு விக்கெட்டுகளை வீழ்த்தினார் ரஷீத். குஜராத் அணியில் ரெய்னா, தினேஷ் கார்த்திக் தவிர மற்றவர்கள் சுழற்பந்து வீச்சில் சுமாராகவே ஆடுவார்கள். ஆனால் வலுவான பேட்டிங் வரிசையை கொண்டுள்ள குஜராத்  லயன்ஸை  ரஷீத் கட்டுப்படுத்தினால், அவருக்கு இந்த தொடரில் அணியில் உறுதியான இடம் கிடைக்க வாய்ப்புண்டு.

 தீபக் ஹூடா ஹைதராபாதுக்கு  செல்ல பிள்ளை. ஆல்ரவுண்டராக தனக்கு கொடுத்த வேலையை கச்சிதமாக முடிப்பார் என்ற எண்ணம் வார்னருக்கு எப்போதும் உண்டு. பௌலிங் ட்ரூப்பை நெஹ்ராவும் புவியும் வழி நடத்தி குஜாராத் பேட்டிங் ஆர்டரை குலைக்க  காத்திருக்கின்றனர். 

குஜராத்  கடந்த சீசனில் குவாலிபையர் சுற்று வரை சென்று சன் ரைசர்ஸ் அணியுடன் தோல்வியுற்றது. பேட்டிங் ஆர்டரில் குஜராத் அணி வலுவாக உள்ளது. இங்கிலாந்தின் அதிரடி ஜேசன் ராயும், நியூசிலாந்தின் மெக்கலமும் தொடக்க வீரர்களாக இறங்கி அசத்துவார்கள் என்பது குஜராத் ரசிகர்களின் நம்பிக்கை. காரணம், பாகிஸ்தான் பிரிமியர் லீக் தொடரில் ஒரே அணியில் ஓபனிங் ஆடியுள்ளனர் என்பது குறிப்பிடத்தக்கது. இவர்களை தொடர்ந்து `சிக்ஸ்ர் நாயகன்` ரெய்னா கேப்டனாகவும் பேட்ஸ்மேனாகவும் பொறுப்புடன் ஆடி அணிக்கு பக்கபலமாக இருப்பார் என நம்பலாம். அதற்கு சான்றாய் கொல்கத்தாவுடனான போட்டியில் அரை சதம் அடித்து அணியின் ஸ்கோரை உயர்த்தினார்.

புவனேஷ்வர் குமார் - ஆரோன் பின்ச்

அடுத்ததாக, ஃபின்ச் பவர்ப்ளேவில் பவுண்டரிகள் விளாசும் கெட்டிக்காரர். அவர் சென்ற போட்டியில் 2 சிக்ஸர்கள் விளாசி நம்பிக்கை கொடுத்து பெவிலியன் திரும்பினார். தமிழக அணியின் கேப்டன் தினேஷ் செம ஃபார்மில் உள்ளார். 6 பவுண்டரிகள், 2 சிக்ஸர்கள் உட்பட 47 ரன்கள் குவித்து ``நான் இருக்கிறேன் என் அணிக்கு`` என்று தைரியம் சொல்கிறார். 

ஸ்மித், ஃபால்கனர் என ஆல்ரவுண்டர்கள் இருப்பது பலம் தான்.  ப்ராவோ இல்லாதது சற்று ஏமாற்றம். ஹைதராபாத்துடன் ஒப்பிடுகையில் பௌலிங்கில் குஜராத் மைனஸ் தான். ஆக, பேட்டிங்கில் தொடக்க வீரர்கள் ரன்கள் எடுக்க வேண்டும். பந்து வீச்சில் இன்னும் நிறைய கவனம் தேவை குஜராத் அணி வீரர்களுக்கு. கொல்கத்தாவிற்கு எதிரான போட்டியில் குஜராத் அணி பௌலர்கள் அனைவர் ஓவரிலும் பாரபட்சம் பார்க்காமல் ஓவருக்கு 10 ரன்கள் எடுத்து கதிகலங்க வைத்துள்ளனர் கொல்கத்தாவின் கம்பீரும் லின்னும். 

இதுவரை, குஜராத் அணியும் ஹைதராபாத் அணியும் 3 முறை மோதியிருக்கின்றன. அதில் அனைத்து போட்டியிலும் குஜராத் அணியை ஹைதரபாத் வென்றுள்ளது என்பது குறிப்பிடத்தக்கது. மூன்று முறையுமே சன் ரைசர்ஸ் அணி இரண்டாவதாக பேட் செய்துதான் வென்றுள்ளது. இந்த முறை, குஜராத் டாஸ் வென்றால் முதலில் பந்து வீச்சை தேர்வுசெய்து ஆடினால் குஜராத் அணிக்கு சாதகமாக இருக்கும் என நம்பலாம். போட்டி ஹைதராபாத்தில் நடப்பதால் சன் ரைசர்ஸ் அணிக்கு கூடுதல் பலம். குஜராத் அணியில் தொடக்க வீரர்கள் ஆட்டமிழக்காமல் ஆடி ரன் சேர்த்தால் அணியின் மொத்த ஸ்கோர் உயர பெரும் காரணமாக இருக்கும். 

குஜராத் ஹைதராபாத்திற்கு எதிராக தன் முதல் வெற்றியை பதிக்க வேன்டும் என்ற நோக்கத்துடன் விளையாடும். சன் ரைசர்ஸ் அணி தன் பந்து வீச்சை கொண்டு குஜராத்தை மிரட்டும். ஆக, இரண்டு அணிகளுமே வெற்றி பெற முனைப்புடன் போராடும் இந்த போட்டி விறுவிறுப்பாக இருக்கும்.

- உ.சுதர்சன் காந்தி (மாணவப் பத்திரிகையாளர்)

 

 

Do you like the story?

Please Appreciate the Author by clapping!