அப்போதிலிருந்து பாகிஸ்தான் முன்னேறாதது இதில்தான்! - 1987 உலகக் கோப்பை கிரிக்கெட்.. தெரிந்ததும் தெரியாததும்! Gentleman to CommonMan மினி தொடர் பாகம் 5

1987 உலகக் கோப்பை

பாகம் 1/ பாகம் 2பாகம் 3 / பாகம் 4

1987 உலகக் கோப்பையில் வெற்றி பெற்று கிரிக்கெட் உலகின் கவனத்தைத் தன் மேல் குவித்த ஆஸ்திரேலிய அணி அந்தப் பெருமையிலேயே காலத்தைக் கழிக்கவில்லை. அடுத்து என்ன? அடுத்து என்ன? என தனக்குள்ளேயே கேட்டுக் கொண்டிருந்தது. கிரிக்கெட்டுக்கான உள் கட்டமைப்பு வசதிகளைப் பொறுத்தவரையில் தன்னிகரற்று விளங்கிய ஆஸ்திரேலியா, பொதுவாகவே விளையாட்டுச் சம்பந்தமான மற்ற துறைகளிலும் வல்லுநர்களையும்,கட்டமைப்புகளையும் கொண்டிருந்தது. விளையாட்டு மருத்துவம் என்ற துறை சிறந்த வளர்ச்சி கொண்டிருந்த முக்கியமான நாடு ஆஸ்திரேலியாதான். மூட்டு வலி, முதுகு வலி என எந்த மாதிரியான பிரச்னை ஆனாலும் சிகிச்சைக்கு உலகம் முழுவதிலும் உள்ள கிரிக்கெட் ஆட்டக்காரர்களின் முதல் புகலிடமாக ஆஸ்திரேலியாதான் இருந்தது. 

தன்னுடைய சேனலில் ஆஸ்திரேலிய கிரிக்கெட் போட்டிகளை ஒளிபரப்புவதற்காக கேட்டு, அது கிடைக்காததால் உலக தொடர் கோப்பை ஒன்றைத் தானே நடத்த முன்வந்தார். அப்போது கிரிக்கெட் வீரர்களுக்குக் கொடுக்கப்பட்ட சம்பளம் என்பது குறைவு. இவர் அவர்கள் எதிர்பார்த்திராத ஒரு தொகையைக் கொடுக்கவும், பல நட்சத்திர ஆட்டக்காரர்களும் தங்கள் நாட்டுக்காக விளையாடுவதை விட்டுவிட்டு கெர்ரி பேக்கர் சீரிஸ் ஆடவந்தார்கள். 1977ல் தொடங்கி 79 வரை நடந்த அந்தத் தொடரை ஐ சி சி அங்கீகரிக்காவிட்டாலும், அந்தத் தொடரால் கிரிக்கெட் உலகில் பல மாற்றங்கள் நடந்தன. வண்ண சீருடைகள், இரவு பகல் ஆட்டம், மஞ்சள் பந்துகள் என கெர்ரி பேக்கர் கிரிக்கெட்டிற்கு பல அறிமுகங்களைச் செய்தார். அந்தத் தொடர் நிறுத்தப்பட்டாலும் அதற்கு இணையாக தன்னுடைய நிர்வாகத்தை நடத்த வேண்டிய கட்டாயம் ஆஸ்திரேலிய கிரிக்கெட் போர்டுக்கு இருந்தது  .

உலகக் கோப்பை

எனவே கிரிக்கெட் அகாடமிகளில் ஆர்வம் காட்டியது. திறமைகளை வளர்த்தெடுக்க சிறுவர்களுக்கும் இளைஞர்களுக்கும் நிறைய அகாடமிகளைத் திறந்தது. அது மட்டுமல்லாமல் விளையாட்டை முன்னேற்ற பல ஆய்வுப்பணிகளையும் மேற்கொண்டது முக்கியமாக ஃபீல்டிங்கில். எடுத்துக்காட்டாக ஒரு ஃபீல்டர் வலது கைப் பழக்கம் உடையவராக இருந்தால் அவர் வலது கையால்தான் பந்தை எடுப்பார். பந்து அவரின் இடப்புறமாகச் சென்றால் அவர் அதை எடுக்க தன்னைத் திருப்பி எடுக்க வேண்டும். ஆனால் இரு கைகளையும் சமமாகப் பயன்படுத்த முயன்றால் ஃபீல்டிங்கில் இன்னும் அதிக எபிசியன்ஸி கிடைக்கும். இது ஸ்லிப் கேட்சுகள் மற்றும் அருகே நின்று ஃபீல்டிங் செய்யும்போதும் மிக உதவிகரமாக இருக்கும். இது மாதிரியான பயிற்சி கொடுக்கும் முயற்சிகளை எடுத்தது. இது 100%பயனளிக்கவில்லை என்றாலும் ஆஸ்திரேலிய அணியின் ஃபீல்டிங் முன்னேற வாய்ப்பளித்தது.   

ஆஸ்திரேலிய அணியின் பெரும் பலமே தொடர்ச்சியாக அவர்களது உள்ளூர் போட்டிகளிலும், பயிற்சி அகாடமிக்களில் இருந்தும் சிறந்த வீரர்கள் உருவாகி வருவதே. இங்குதான் இங்கிலாந்திற்கும் ஆஸ்திரேலியாவிற்குமான வேறுபாடு உள்ளது. ஆஸ்திரேலிய அணி தன்னுடைய தேசிய அணி ஆட்டங்களுக்குத்தான் அதிக முன்னுரிமை கொடுக்கும். முக்கிய ஆட்டக்காரர்கள் ஐ பி எல் போன்ற தொடர்களில் பங்குபெறக்கூடத் தடை விதிக்கும் அளவுக்குக் கவனம் செலுத்தும். அதேபோல எவ்வளவு பெரிய ஆட்டக்காரராக இருந்தாலும் விதிமுறைகளைத் தளர்த்துவதோ, கூடுதல் மதிப்புக் கொடுப்பதோ இருக்காது.

1987 உலகக் கோப்பைக்கு ‛ஆடுவாங்க ஆனா கோப்பையை வாங்குவது கஷ்டம்’ என்ற நிலையில் களமிறங்கிய ஆஸ்திரேலிய அணி 1992  உலகக் கோப்பைக்கு ‛ஹாட் பேவரைட்டாக’ இறங்கியது. புக்கிகள் ஆட்டம் தொடங்கும் முன் ஆஸ்திரேலிய அணி வெற்றி பெறுவதாக பந்தயம் கட்டினால் ஒரு ரூபாய்க்கு ஒரு ரூபாய் 10 காசுகள் தான் தருவதாகவே சொன்னார்கள். ஆனால் இந்திய அணிக்கெல்லாம் ஒரு ரூபாய்க்கு நான்கு ரூபாய் முதல் ஏழு ரூபாய் வரை தருவதாகச் சொன்னார்கள். அந்த உலக்கோப்பையில் தோற்றாலும் அடுத்த இரண்டு ஆண்டுகளில் யாராலும் வீழ்த்த முடியாத அளவுக்கு பரிணமித்தது. 15 ஆண்டுகளாக டெஸ்ட் கிரிக்கெட்டில் நம்பர் 1 அந்தஸ்தில் இருந்த மேற்கு இந்தியத் தீவுகள் அணியை அவர்கள் நாட்டிலேயே சென்று வென்றது. அதன்பின்னர் 1999, 2003, 2015 உலகக் கோப்பை, வெற்றிகள், டெஸ்ட் அரங்கில் பல ஆண்டுகள் முன்னணியில் இருந்தது என இன்றுவரை கிரிக்கெட் உலகின் தலைசிறந்த அணியாகவே கருதப்பட்டு வருகிறது. 

உலகக் கோப்பை 1987

ஆஸ்திரேலியா அளவிற்கு இல்லாவிட்டாலும் இன்றுவரை உலகக் கிரிக்கெட் அரங்கில் ஒரு தவிர்க்க முடியாத சக்தியாக இருந்து வருவது பாகிஸ்தான் அணி. 1987 உலகக் கோப்பை அரை இறுதியில் தோல்வி அடைந்ததும் பாகிஸ்தான் அணியின் கேப்டன் இம்ரான்கான் கிரிக்கெட்டிலிருந்து ஓய்வு பெற்றுக்கொள்வதாக அறிவித்தார்.ஆனால் அதன்பின்னர் அணி சரியாக விளையாடாத நிலையில் அவரையே மீண்டும் அணிக்கு வந்து தலைமைப் பொறுப்பை ஏற்றுக்கொள்ளச் சொன்னது. 1992 உலகக் கோப்பையை வென்று கொடுத்து அவர் ஓய்வு பெற்றுக் கொண்டார். 

அதன்பின்னரும் அவர்கள் அடிக்கடி சொல்லிக்கொள்ளக்கூடிய அளவுக்கு வெற்றிகளைப் பெற்றுக்கொண்டே வந்திருக்கிறார்கள்.

அதற்கு முக்கிய காரணமே அங்கு தொடர்ச்சியாக உருவாகி வரும் உலகத்தரமான வேகப்பந்து வீச்சாளர்கள்தான். இந்திய அணியின் வேகப்பந்து வீச்சாளர் இர்பான் பதான் நன்றாக விளையாடிய காலகட்டத்தில் அவரை எல்லோரும் புகழ்ந்து கொண்டிருந்தார்கள். அப்போது பாகிஸ்தான் அணியின் முன்னாள் கேப்டன் ஜாவித் மியாண்டாட் ஒரு பேட்டியில் பாகிஸ்தானில் தெருவிற்கு நான்கு இர்பான் பதான் இருப்பார்கள் என்று கூறினார். அது ஒரு நிச்சயமான உண்மை. அதற்கு பாகிஸ்தான் அணி வேகப்பந்து வீச்சாளர்களும் அவர்களின் லெகசியுமே காரணம். 

இதை இந்திய அணியின், ஏன்... இந்திய கிரிக்கெட்டின் பேட்ஸ்மேன் செண்ட்ரிக் மனநிலையோடு ஒப்பிட்டுப் பார்க்கவேண்டும். இந்திய அணியானாலும் சரி, உள்ளூர் அணிகளானாலும் சரி அவை அனைத்தும் பேட்ஸ்மெனை மையப்படுத்தியே இயங்கிவருகின்றன. ஒரு நல்ல பேட்ஸ்மெனுக்குக் கிடைக்கும் மரியாதை அவரைவிட ஒரு நல்ல பவுலருக்குக் கிடைப்பதில்லை. 1970கள் வரை பேட்ஸ்மேன் பண்ணையார் மனோபாவத்துடன்தான் நடந்துகொள்வார்கள். அதன்பின்னர் கபில்தேவ் வந்தாலும் அவருக்கு டிரஸ்ஸிங் ரூமில் கூட உரியமரியாதை கிட்டியதில்லை. பேட்ஸ்மேன்கள் தங்களுக்குள் ஒரு குழுவாக இருந்துகொண்டு அணியின் நன்மை,தீமைகளை நிர்ணயிப்பவர்களாக இருந்து வருகிறார்கள். இது இன்றுவரை கூட மாறவில்லை. பந்துவீச்சாளர்கள் என்பதைக்கூட ஒரு சப்போர்டிங் ஸ்டாப்பாக பார்க்கும் முறையே இருந்து வருகிறது. தெரு கிரிக்கெட் முதல் இருந்தே இந்தியாவில் பேட்ஸ்மேனை தங்கத்தாம்பாளத்தில் வைத்துத் தாங்கும் பழக்கம் இருக்கிறது.

இதை இந்திய மனோபாவம் என்றும் சொல்லலாம். இதற்கு நேர் மாறான மனோபாவம் பாகிஸ்தானில். அங்கே பவுலர்களுக்கு இயல்பாகவே ஒரு மதிப்பு இருக்கும். பாகிஸ்தான் பேட்ஸ்மேன் விளையாடிக்கொண்டிருக்கும் போது பவுலர்கள் பெவிலியனில் உட்கார்ந்து பேட்ஸ்மேன் விளையாடும் ஸ்டைலை கிண்டல் செய்துகொண்டிருப்பார்கள். பவுலர்கள் ஒரு யூனிட்டாகவே எங்கும் செல்வார்கள். பேட்ஸ்மென் கேப்டனாக இருந்து அவர்களுக்கு ஒத்துழைக்காவிட்டால் வேலையைக் காட்டிவிடுவார்கள். தேவையான நேரத்தில் சரியாக பந்துவீசாமல் கழுத்தறுத்து விடுவார்கள். எனவே இயல்பாகவே பாகிஸ்தான் வீரர்களுக்குப் பந்துவீச்சாளர் ஆகவேண்டும் என்ற எண்ணமே முதலில் இருக்கும். அதற்கு அவர்கள் உடல்வாகு, உணவுப் பழக்கவழக்கங்களும் காரணம்.

எந்த இடத்தில் இருந்தால் மரியாதை கிடைக்கிறதோ அந்த இடத்தில் இருக்கத்தானே அனைவரும் விரும்புவார்கள்?

1987 அணிக்குப் பின்னால் பாகிஸ்தானுக்குக் கிடைத்த மிகச்சிறந்த பேட்ஸ்மேனை விரல்விட்டு எண்ணிவிடலாம். சயீத் அன்வர். இன்சமாம் உல் ஹக், முகமுது யூசுப், யூனிஸ் கான் என மிகச்சிலரே தொடர்ந்து விளையாடி சாதித்தவர்கள். அதிலும் கடந்த 20 வருடங்களில் எந்த பேட்ஸ்மேனாவது உங்கள் டீமுக்குப் பாகிஸ்தானிலிருந்து வேண்டுமா என்று கேட்டால், மார்க்கெட் இழந்த ஹீரோவை புக் செய்யத் தயங்கும் தயாரிப்பாளர்களைப் போலவே அனைவரும் யோசிப்பார்கள்.  இன்சமாம் உல் ஹக் மட்டுமே சச்சின் டெண்டுல்கர், பிரயின் லாரா, மார்க் வாவ் ரேஞ்சிற்கு சிலாகிக்கப்பட்டவர். எந்தப் பாகிஸ்தான் பேட்ஸ்மேனின் ஆட்டத்தை உங்கள் ஓய்வு நேரத்தில் பார்த்து ரசிக்கலாம் என நினைக்கிறீர்கள் எனக் கேட்டால் உடனடியாக யாரும் எந்தப் பதிலையும் சொல்லாமல் யோசிக்கத் தொடங்கிவிடுவார்கள்.  

இப்போது கூட விராட் கோலி, ஜோ ரூட், கேன் வில்லியம்சன் என ஒப்பீட்டளவில் பேசுகிறார்களே, அதில் எந்த பாகிஸ்தான் பேட்ஸ்மேனாவது இடம்பெற்றிருக்கிறாரா? மக்கள் சேர்ப்பதில்லை. ஆனால் அங்கே சிறந்த பேட்ஸ்மென் உருவாக ஏராளமான வாய்ப்புகள் உண்டு. சிறுவயதிலிருந்தே உலகத்தரமான பந்து வீச்சாளர்களை விளையாடிப் பழகும் வாய்ப்பு அவர்களுக்கு உண்டு.

இன்னொரு விஷயத்திலும் பாகிஸ்தான் அணி 1987 உலகக் கோப்பைக்குப் பின்னால் முன்னேறவே இல்லை என்று சொன்னால் அது ஃபீல்டிங் தான். இன்றுவரை கூட அங்கே உலகத்தரமான அவுட் ஃபீல்டரோ, ஸ்லிப் கேட்சரோ உருவாகவில்லை. 

அதனால்தான் ஆடுகளம் பேட்ஸ்மேனுக்கு மட்டுமே சாதகமாக இருந்தாலும் சரி, பேட்ஸ்மென் செட்டில் ஆகி இருந்தாலும் சரி, ஃபீல்டர்கள் கேட்சை விட்டுக்கொண்டிருந்தால் கூட நினைத்த நேரத்தில் விக்கெட்டை அனாயாசமாக எடுக்கக்கூடிய பந்துவீச்சாளர்கள் நிறைந்திருந்தாலும் அதிகளவில் அவர்களால் வெற்றிகளைப் பெறமுடியவில்லை.

அடுத்தபடியாக இருக்கும் அணி நமது அணி. நிச்சயமாக 1987ல் இருந்ததை விட உள்கட்டமைப்பிலும் ஆட்டக்காரர்களிலும் சிறப்பாகவே இருக்கிறது. இதற்கு 1987 உலகக் கோப்பை என்ன விதமான காரணியாக இருந்தது என்பதை அடுத்த பகுதியில் பார்ப்போம்.

1992ல் ஜாண்டி ரோட்ஸ் செய்த பீல்டிங்தான் மற்ற அணிகளின் பீல்டிங்கில் ஒரு பெரிய மறுமலர்ச்சியைக் கொண்டுவந்தார்...

மேற்கு நாடுகளுக்குத் தெற்காசிய நாடுகள் என்றாலே ஒரு இளக்காரம். ‘இங்கிலாந்திற்கு அடிமைப்பட்டு கிடந்த நாடுகள்தானே...

கவாஸ்கரை வெறுத்த கொல்கத்தா ரசிகர்கள்..!

காலங்காலமாக நியூசிலாந்து கறுப்புக்குதிரைதான்..! 

 

Do you like the story?

Please Appreciate the Author by clapping!