Vikatan.com

www.vikatan.com would like to send you push notifications.

Notifications can be turned off anytime from browser settings.

உதயசந்திரனைத் தொடர்ந்து அமுதாவின் துறை பறிப்பு! சீறும் அன்புமணி

anbumani

பள்ளிக் கல்வித்துறை செயலாளர் உதயசந்திரனின் அதிகாரம் பறிக்கப்பட்டதுபோல், தொழிலாளர் நலத்துறையில் ஊழலை ஒழிக்க முயன்றதற்காக அத்துறையின் முதன்மைச் செயலாளர் அமுதாவின் அதிகாரம் குறைக்கப்பட்டிருக்கிறது என்று வேதனை தெரிவித்துள்ள பா.ம.க இளைஞரணித் தலைவர் அன்புமணி, அமுதாவின் பணியிட மாற்றத்தை தமிழக அரசு உடனடியாக ரத்து செய்ய வேண்டும் என்று வலியுறுத்தியுள்ளார்.

இது தொடர்பாக அவர் இன்று வெளியிட்டுள்ள அறிக்கையில், "தமிழ்நாட்டில் பள்ளிக்கல்வித் துறைச் செயலாளர் உதயசந்திரனைத் தொடர்ந்து, மற்றொரு நேர்மையான அதிகாரியான தொழிலாளர் நலன் மற்றும் வேலைவாய்ப்புத்துறைச் செயலாளர் அமுதாவின் அதிகாரமும் குறைக்கப்பட்டிருக்கிறது. ஊழலுக்குத் தடையாக இருப்பார் என்பதாலேயே அமுதாவிடம் இருந்த முக்கியத் துறை பறிக்கப்பட்டிருக்கிறது. ஊழலுக்காக நேர்மையான அதிகாரிகளைப் பந்தாடுவது கண்டிக்கத்தக்கது. தொழிலாளர் நலன் மற்றும் வேலைவாய்ப்புத்துறையின் முதன்மைச் செயலாளராகப் பணியாற்றி வந்த அமுதா நேற்று திடீரென அந்தப் பணியிலிருந்து மாற்றப்பட்டிருக்கிறார். அதற்குப் பதிலாக புதிய பொறுப்பு எதுவும் வழங்கப்படாமல், ஏற்கெனவே கூடுதல் பொறுப்பாக அவரிடம் இருந்து வந்த உணவுப் பாதுகாப்பு ஆணையராகப் பணியாற்றும்படி அவர் பணிக்கப்பட்டிருக்கிறார். உணவுப் பாதுகாப்பு ஆணையர் பணி என்பது இளநிலை இ.ஆ.ப அதிகாரிகளால் கவனிக்கப்படும் பொறுப்பாகும். இதற்கு அமுதா போன்ற முதன்மைச் செயலர் நிலையில் உள்ள அதிகாரி தேவையில்லை. அதே நேரத்தில் தொழிலாளர் நலன் மற்றும் வேலைவாய்ப்புத்துறை என்பது முதன்மைச் செயலாளர் நிலையில் உள்ள அதிகாரியால் கையாளப் பட வேண்டிய பணி ஆகும். அந்தப் பணியிலிருந்து அமுதாவை மாற்றிய தமிழக ஆட்சியாளர்கள், அப்பொறுப்பை ஏற்கெனவே சிறு குறு மற்றும் நடுத்தரத் தொழில்துறையைக் கவனித்து வரும் முதன்மைச் செயலாளர் மங்கத் ராம் சர்மாவிடம் கூடுதல் பொறுப்பாக தமிழக ஆட்சியாளர்கள் ஒப்படைத்துள்ளனர்.

சிறு குறு மற்றும் நடுத்தரத் தொழில்துறையைக் கவனிக்கவே அத்துறையின் செயலாளருக்கு நேரம் இருக்காது எனும்போது மற்றொரு பெரிய துறையைக் கூடுதல் பொறுப்பாக அவரிடம் ஒப்படைப்பது இரு துறைகளின் சீரழிவுக்கு மட்டுமே வழிவகுக்கும். இத்தனை பாதிப்புகளையும் கருத்தில் கொள்ளாமல் இ.ஆ.ப அதிகாரி அமுதாவை இடமாற்றம் செய்திருப்பதற்குக் காரணம் தொழிலாளர் நலன் மற்றும் வேலைவாய்ப்புத் துறையில் அவர் நீடிக்கக் கூடாது என ஆட்சியாளர்கள் துடித்ததுதான். ஆட்சியாளர்களின் ஊழலுக்கு அமுதா தடையாக இருப்பார் என்பதால்தான் அவரை மாற்ற ஆட்சியாளர்கள் விரும்பினர். தொழிலாளர் நலன் மற்றும் வேலைவாய்ப்புத் துறையின் கட்டுப்பாட்டில் இயங்கும் தொழிற்பயிற்சி நிலையங்களில் காலியாக உள்ள 329 இளநிலை பயிற்சி அலுவலர் பணியிடங்களை நிரப்பத் தீர்மானித்து அதற்கான அறிவிக்கை 12.01.2016 அன்று வெளியிடப்பட்டு, 21.02.2016 அன்று எழுத்துத் தேர்வுகள் நடத்தப்பட்டன. அதன் முடிவுகள் 01.03.2016 அன்று வெளியிடப்பட்டு, அடுத்தகட்டமாக முதன்மைத் தேர்வின் ஓர் அங்கமாக செய்முறை மற்றும் நேர்முகத் தேர்வுகள் நடத்தப்படவிருந்த நிலையில், தமிழக சட்டப்பேரவைத் தேர்தல் அறிவிக்கப்பட்டதாலும், இது தொடர்பாக தொடரப்பட்ட வழக்கை விசாரித்த சென்னை உயர் நீதிமன்றம் அடுத்தகட்ட நடவடிக்கைகளுக்குத் தடை விதித்ததாலும் அனைத்துப் பணிகளும் நிறுத்தி வைக்கப்பட்டன. தேர்தல் முடிந்த பிறகும் உயர் நீதிமன்றத் தடை நீடித்ததால் முதன்மை மற்றும் நேர்முகத் தேர்வுகள் நடத்தப்படவில்லை. இந்த நிலையில், உயர் நீதிமன்றம் விதித்திருந்த தடை கடந்த 12.07.2017 அன்று நீக்கப்பட்டதைத் தொடர்ந்து நேர்முகத் தேர்வுகளை நடத்த தீர்மானிக்கப்பட்டுள்ளது.

இந்நேர்காணலை மிகவும் நேர்மையான முறையில் நடத்தத் தொழிலாளர் நலன் மற்றும் வேலைவாய்ப்புத் துறை முதன்மைச் செயலாளர் அமுதா திட்டமிட்டிருந்தது அத்துறையின் அமைச்சர் நிலோபர் கபிலுக்குப் பிடிக்கவில்லை என்று கூறப்படுகிறது. இளநிலை பயிற்சி அலுவலர் வேலைக்கு ரூ.15 லட்சம் வரை அமைச்சர் தரப்பு வசூலித்திருப்பதாகவும், அவர்களை நியமிக்கும் வகையில் நேர்காணலில் முறைகேடுகளைச் செய்ய அமுதா முட்டுக்கட்டை போட்டதுதான் இடமாற்றத்துக்குக் காரணம் என்று பேசப்படுகிறது. மாநிலத்தை ஆள்வது அரசியல்வாதிகள் என்றாலும், நிர்வாகத்தை இயக்குபவர்கள் அதிகாரிகள்தான். அதிகாரிகள் நேர்மையாகச் செயல்படும்போது அவர்களை ஆட்சியாளர்கள் பாராட்டி ஊக்குவிக்க வேண்டும். ஆனால், தமிழகத்திலோ கமிஷன் வாங்கித் தரும் அதிகாரிகளுக்கு உயர்ந்த பொறுப்புகள் வழங்கப்படுவதும், நேர்மையான அதிகாரிகள் பழிவாங்கப்படுவதும் வாடிக்கையாகி வருகிறது. பள்ளிக் கல்வித்துறையில் சீர்திருத்தங்களைச் செய்ததற்காகவும் ஊழலை ஒழித்ததற்காகவும் அதன் செயலாளர் உதயச்சந்திரனின் அதிகாரம் பறிக்கப்பட்டது. அதேபோல், தொழிலாளர் நலத்துறையில் ஊழலை ஒழிக்க முயன்றதற்காக அத்துறையின் முதன்மைச் செயலாளர் அமுதாவின் அதிகாரம் குறைக்கப்பட்டிருக்கிறது.

அமுதா எவ்வளவு நேர்மையான அதிகாரி என்பது அவரது கடந்த காலப் பணிகளை அறிந்தவர்களுக்குத் தெரியும். நேர்மையான அதிகாரிகளை ஊழல் ஆட்சியாளர்களைப் பழிவாங்குவதைவிட பெருங்கொடுமை உலகில் எதுவும் கிடையாது. இந்த நிலை மாற்றப்பட வேண்டும். அமுதாவின் பணியிட மாற்றத்தை உடனடியாக ரத்து செய்வதுடன், முக்கியமான துறைகளின் செயலாளர்களாக நியமிக்கப்படுபவர்கள் குறைந்தபட்சம் இரு ஆண்டுகள் அப்பணியில் நீடிப்பதை ஆட்சியாளர்கள் உறுதி செய்ய வேண்டும்" என்று வலியுறுத்தியுள்ளார்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement