`இப்போது நான் இரட்டைக்குழல் துப்பாக்கி!' - தேர்தல் ஜோரில் மதுசூதனன்

அ.தி.மு.க. சார்பில் ஆர்.கே.நகர் இடைத்தேர்தலில் போட்டியிடுவதற்கான வேட்புமனுவைத் தாக்கல்செய்த பின்னர் செய்தியாளர்களைச் சந்தித்த மதுசூதனன், `இரட்டை குழல் துப்பாக்கி போல் இப்போது இருக்கிறேன். அதனால், கண்டிப்பாக வெற்றிதான்' என்று கூறியுள்ளார்.

ஜெயக்குமாருடன் மதுசூதனன்

செய்தியாளர்கள் மத்தியில் பேசிய மதுசூதனன், `இப்போது நான் இரட்டைக் குழல் துப்பாக்கி. அதனால் வெற்றி வாய்ப்பு பிரகாசமாக இருக்கிறது' என்று கூறியவரிடம், `தினகரனுக்கு ஆர்.கே.நகர் வாக்காளர்கள் மத்தியில் சென்ற இடைத்தேர்தலில் இருந்தே பெரிய ஆதரவு இருந்தது. இப்போதும் பெரும் திரளான மக்கள் அவருக்காக கூடினர். அதைப் பற்றி என்ன நினைக்கிறீர்கள்' என ஒருவர் கேட்க, `அவருடைய கனவுகள் நிறைவேறட்டும்' என்று பதிலளித்தார். உடனேயே மதுசூதனனை இடைமறித்துப் பேச ஆரம்பித்த ஜெயக்குமார், `இது ஒரு தடைசெய்யப்பட்ட பகுதி. இங்கு ஐந்து பேருக்கு மேல் வரவே கூடாது.

ஆனால், தினகரன் ஆதரவாளர்கள் 200-க்கும் மேற்பட்டவர்கள் சட்டத்துக்குப் புறம்பாக இங்கு கூடியுள்ளனர். எங்கள் தொண்டர்கள் பல்லாயிரக்கணக்கானவர்கள் திரண்டபோதும், அவர்களை இங்கு வர வேண்டாம் என்று கூறி அனுப்பிவிட்டோம். ஆனால், அவர்கள் சட்டத்துக்குப் புறம்பாக நடந்துள்ளனர். இதுகுறித்து தேர்தல் ஆணையத்திடம் புகார் கொடுப்போம்' என்றவர் தொடர்ந்து, `அ.தி.மு.க கட்சிக் கொடியை தினகரன் தரப்பினர் பயன்படுத்துவது தவறு. அதற்கு அவர்களுக்கு உரிமையே கிடையாது. எம்.ஜி.ஆரின், ஜெயலலிதாவின் சின்னத்துக்கு எதிராக களமிறங்கும் தினகரன், கொடியைப் பயன்படுத்துவதற்கு என்ன உரிமை இருக்கிறது. தேர்தல் ஆணையத்தில் இதுகுறித்து முறையிடுவோம்' என்று முடித்துக்கொண்டு கிளம்பினார்.

Do you like the story?

Please Appreciate the Author by clapping!