விஷால் போட்டியிடுகிறார்.... கமல் ஆதரிக்கிறாரா...? பரபரக்கும் ஆர்.கே.நகர் தேர்தல் களம்

"நடிகர் கமலஹாசன் எதைச் செய்தாலும் சரியாகத்தான் செய்வார். அமைச்சர்களுக்கும் அவருக்குமானப் பிரச்னையில் தமிழ் திரையுலகமே அவருக்குப் பின்னால் நிற்கும்" இதைச்சொன்னவர் நடிகர் விஷால். அரசு தரப்பில் அமைச்சர்கள் கமலஹாசனை எதிர்த்துப் பேசத்துவங்கிய போது, கமலஹாசனுக்கு ஆதரவாக வலுவாக குரல் உயர்த்தியவர்களில் முதன்மையானவர் நடிகர் விஷால் தான். இவர் தான் இப்போது சுயேட்சையாக ஆர்.கே.நகர் தேர்தலில் போட்டியிடுகிறார்.

2015-ல் நடிகர் சங்கத்தேர்தல், 2017-ல்  தயாரிப்பாளர் சங்கத் தேர்தல் என இரு தேர்தல்களில் அடுத்தடுத்து வெற்றி பெற்ற விஷாலுக்கு, ஆரம்பத்தில் இருந்து உறுதுணையாக இருந்தவர் நடிகர் கமலஹாசன். தென்னிந்திய நடிகர் சங்க கட்டடத்துக்கு அடிக்கல் நாட்டு விழா விஷால் தலைமையில் நடந்தபோது, அதில் பங்கேற்று கட்டடத்துக்கு அடிக்கல் நாட்டியவர் நடிகர் கமலஹாசன். இப்படி நடிகர் கமலஹாசன் - விஷால் ஆகியோரின் நட்பு அண்மைகாலமாக மிக நெருக்கமாகவே இருந்து வருகிறது.

இந்நிலையில் தான், ஆர்.கே.நகர் தேர்தலில் தனித்துப் போட்டியிடுவதாக அறிவித்திருக்கிறார் நடிகர் விஷால். சுயேட்சையாக போட்டியிடுவதாக அறிவித்துள்ள விஷால், திங்கட்கிழமை (4ம் தேதி) வேட்புமனுத்தாக்கல் செய்ய உள்ளதாகவும் அறிவித்திருக்கிறார். இந்நிலையில், விஷாலுக்கு தனது ஆதரவை கமலஹாசன் தெரிவிக்க வாய்ப்புகள் அதிகம் இருப்பதாக சொல்லப்படுகிறது.
தீவிர அரசியலில் இறங்குவதாக நடிகர் கமலஹாசன் ஏற்கனவே முடிவெடுத்து விட்டார்.

அதற்கான ஆயத்தப்பணிகளில் அவர் ஈடுபட்டு வருகிறார். இந்த சூழலில் ஆர்.கே.நகர் இடைத்தேர்தலில் தன் தரப்பில் விஷாலை போட்டியிட கமலஹாசன் முன்மொழிந்திருப்பதாகச் சொல்லப்படுகிறது. அரசியல் கட்சி துவங்குவதற்கு முன்னால், சுயேட்சையாக களமிறங்கும் விஷாலை கமலஹாசன் ஆதரிக்கக் கூடும் என்றும், அதற்கான அறிவிப்பை கமலஹாசன் வெளியிடுவார் என்றும் சொல்லப்படுகிறது. தமிழகம் முழுவதும் மக்கள் சந்திப்பு இயக்கங்களை நடத்த திட்டமிட்டுள்ள கமலஹாசன், ஆர்.கே.நகரில் இருந்து அதைத்துவங்கக் கூடும் என்றும் சொல்லப்படுகிறது.

கடந்த சில மாதங்களாகவே அரசியல் கருத்துக்களை சொல்லி வரும் கமலஹாசன், இந்த தேர்தலில் ஒரு நிலைப்பாடு எடுப்பது என்பது மிக அவசியம். அதற்காகக்கூட விஷாலை கமலஹாசன் முன்னிறுத்தி இருக்கலாம் என்கின்றனர் அரசியல் நோக்கர்கள். விஷாலுக்கு ஆதரவாக கமலஹாசன் குரல் எழுப்புவாரா? இல்லை தனி ஆளாக விஷால் களம் காண்பாரா என்பது அடுத்த சில நாட்களில் தெரியவரும்.
 

Do you like the story?

Please Appreciate the Author by clapping!