நெல்லுக்கான குறைந்தபட்ச ஆதார விலை அதிகரிப்பு! - 1,564 நேரடி நெல் கொள்முதல் நிலையங்கள் அமைக்கத் திட்டம்

நெல்லுக்கான குறைந்தபட்ச ஆதார விலையை உயர்த்தி தமிழக அரசு அறிவித்துள்ளது. 

paddy

இதுகுறித்து முதல்வர் எடப்பாடி பழனிசாமி வெளியிட்ட தகவல் அறிக்கையில், 

உழவர் பெருமக்களின் வாழ்வு வளம்பெறும் வகையில், வேளாண் உற்பத்தியைப் பெருக்க நடவடிக்கைகள் எடுக்கப்பட்டு வருவதோடு, விளைபொருள்களுக்கு உரிய விலை கிடைப்பதற்கான நடவடிக்கைகளையும் தமிழ்நாடு அரசு எடுத்து வருகிறது. எனவேதான் நெல்லுக்கு மத்திய அரசு நிர்ணயிக்கும் கொள்முதல் விலையைவிட தமிழ்நாடு அரசு அதிக விலையை விவசாயிகள் பயன்பெறும் வகையில் ஆண்டுதோறும் நிர்ணயித்து வழங்கிவருகிறது. 

அந்த வகையில், நடப்பு கொள்முதல் பருவம் 2017-18-ல் மத்திய அரசு நெல்லுக்கான குறைந்தபட்ச ஆதாரவிலையாகக் குவிண்டால் ஒன்றுக்கு சன்ன ரகத்துக்கு ரூ.1,590/-ம் பொது ரகத்துக்கு ரூ.1,550/-ம் நிர்ணயம் செய்துள்ளது. விவசாயிகளின் நலன் கருதி ஊக்கத்தொகையாகக் குவிண்டால் ஒன்றுக்கு சன்ன ரகத்துக்கு ரூ.70/-ம் பொது ரகத்துக்கு ரூ.50/-ம் கூடுதலாக வழங்க தமிழ்நாடு அரசு ஆணையிட்டுள்ளது. அதன்படி, நெல் குவிண்டால் ஒன்றுக்கு சன்ன ரகத்துக்கு ரூ.1,660/- மற்றும் பொது ரகத்துக்கு ரூ.1,600/- என நிர்ணயம் செய்யப்பட்டுள்ளது.

மத்திய அரசின் பரவலாக்கப்பட்ட நெல் கொள்முதல் திட்டத்தின் கீழ் தமிழ்நாடு நுகர்பொருள் வாணிபக் கழகம் மூலம் தமிழ்நாடு முழுவதும் 1,564 நேரடி நெல் கொள்முதல் நிலையங்கள் திறக்கவும் 20 லட்சம் மெட்ரிக் டன் நெல் விவசாயிகளிடமிருந்து கொள்முதல் செய்யவும் திட்டமிடப்பட்டுள்ளன. வேளாண் பெருமக்களுக்குத் தேவைப்படின் கூடுதலாகப் புதிய நேரடி நெல் கொள்முதல் நிலையங்களைத் திறக்கவும் நான் அறிவுறுத்தியுள்ளேன்.

இதற்காக சென்னை மற்றும் நீலகிரி மாவட்டங்களைத் தவிர்த்து, அனைத்து மாவட்டங்களிலும் விவசாயிகளுக்குத் தேவையான இடங்களில் நேரடி நெல் கொள்முதல் நிலையங்களைத் திறந்திட மாவட்ட ஆட்சியர்களுக்கு நான் உத்தரவிட்டுள்ளேன். இதன் காரணமாக, விவசாயிகள் நீண்ட தூரம் பயணம் செய்யாமல், உற்பத்தி செய்யப்படும் நெல்லை, தமிழ்நாடு அரசு நிர்ணயித்த விலைக்கு நேரடி கொள்முதல் நிலையங்களில் விற்பனை செய்ய இயலும். எனது இந்த நடவடிக்கை விவசாய பெருங்குடி மக்களுக்கு மிகுந்த பயனுள்ளதாக அமையும்" என்று குறிப்பிட்டுள்ளார். 

Do you like the story?

Please Appreciate the Author by clapping!