வெளியிடப்பட்ட நேரம்: 21:00 (09/02/2018)

கடைசி தொடர்பு:21:00 (09/02/2018)

5 அம்ச கோரிக்கையை வலியுறுத்தி சேலம் கலெக்டர் அலுவலகத்தை முற்றுகையிட்ட ஓய்வூதியதாரர்கள்!

தமிழ்நாடு ஓய்வூதிய சங்கத்தினர் 5 அம்ச கோரிக்கைக்களை வலியுறுத்தி சேலம் கலெக்டர் அலுவலகத்தின் எதிரே ஆர்ப்பாட்டத்தில் ஈடுபட்டனர்.

இந்த ஆர்ப்பாட்டத்தில் சேலம், நாமக்கல், தர்மபுரி, கிருஷ்ணகிரி அடங்கிய மண்டல ஓய்வூதிய சங்க நிர்வாகிகள் மாதவன், ஜெயபால், பெருமாள், நாராயணன், சண்முகசுந்தரம் உட்பட 50-க்கும் மேற்பட்டோர் கலந்துகொண்டனர்.

இதுகுறித்து சேலம் மாவட்டத் தலைவர் மாதவன் கூறுகையில், ''தமிழக அரசு ஓய்வூதியர்களுக்கும், குடும்ப ஓய்வூதியர்களுக்கும், 7-வது ஊதியக் குழுப் பரிந்துரைப்படி 1.1.2016 முதல் 30.9.2017 வரையில் ஊதிய உயர்வு நிலுவைத் தொகையை உடனே ரொக்கமாக வழங்கிட வேண்டும்.

ஓய்வுபெற்ற அங்கன்வாடி மற்றும் சத்துணவு பணியாளர்களுக்கு ஓய்வூதியத் தொகையை ரூ. 2000-த்திலிருந்து ரூ.5000 ஆக உயர்த்தி வழங்க வேண்டும். பழைய ஓய்வூதியத் திட்டத்தை அமல்படுத்திட வேண்டும். மருத்துவக் காப்பீட்டுத் திட்டத்தில் உள்ள குறைபாடுகளை நீக்கிட வேண்டும். ஓய்வூதியர்களுக்கான மருத்துவப்படியை ரூ.300-லிருந்து ரூ.1000 ஆக உயர்த்தி வழங்கிட வேண்டும்'' என்றார். இந்த ஆர்ப்பாட்டத்தை அடுத்து ஓய்வூதிய சங்க நிர்வாகிகளை சேலம் கலெக்டர் ரோஹிணியைச் சந்தித்து, தங்கள் கோரிக்கைகள் அடங்கிய மனுவை அளித்தனர்.