`மாணவர்களைப் போராட்டங்களில் ஈடுபடுத்தினால் நடவடிக்கை!' எச்சரிக்கும் கலெக்டர் | Action will be taken if the students are involved in the fight, warns thoothukudi collector

வெளியிடப்பட்ட நேரம்: 16:15 (13/02/2018)

கடைசி தொடர்பு:18:09 (13/02/2018)

`மாணவர்களைப் போராட்டங்களில் ஈடுபடுத்தினால் நடவடிக்கை!' எச்சரிக்கும் கலெக்டர்

``பள்ளி மாணவர்களை முன்னிறுத்தி போராட்டம் நடத்துவது தவறு. மாணவர்களைப் போராட்டத்தில் ஈடுபடுத்தினால் நடவடிக்கை எடுக்கப்படும்” எனத் தூத்துக்குடி மாவட்ட ஆட்சியர் வெங்கடேஷ் தெரிவித்துள்ளார்.

தூத்துக்குடி மாவட்டத்தில் அரசுக்கு எதிரான போராட்டத்தில் பள்ளி மாணவர்கள் அதிகளவில் பங்கெடுத்து வருகிறார்கள். இலவச பஸ் பாஸ் கேட்டு நடந்த போராட்டத்திலும், ஸ்டெர்லைட் ஆலை விரிவாக்கத்தை எதிர்த்து குமரெட்டியாபுரத்தில் நடந்த போராட்டத்திலும் பள்ளி மாணவர்கள் அதிகளவில் பங்கெடுத்தார்கள். இது அரசு நிர்வாகத்துக்கும் காவல்துறைக்கும் நெருக்கடியை ஏற்படுத்தியது. 

துாத்துக்குடி மாவட்டத்தில், அரசுக்கு எதிரான போராட்டங்களில் பள்ளி மாணவர்களை முன்னிறுத்தும் கலாசாரத்தை என்.ஜி.ஓ-களும் சில சமூக அமைப்புகளும் உருவாக்கி வருகின்றன. சமீபத்தில், தூத்துக்குடியில், இலவச பஸ் பாஸ் வைத்திருக்கும் பள்ளி மாணவர்களைப் பேருந்துகளை ஏற்றாமல் செல்கின்றனர் எனச் சொல்லி, உள்ளூர் சமூக ஆர்வலர் ஒருவரின் தூண்டுதலின் பேரில், பள்ளி மாணவர்கள் ஆட்சியர் அலுவலகத்தில் போராட்டத்தில் ஈடுபட்டனர். இதில் பல மாணவர்கள் என்ன காரணத்துக்காகப் போராட வந்தோம் எனத் தெரியாமலேயே வந்தனர்.

தூத்துக்குடி மாவட்டத்தில் இயங்கி வரும் ஸ்டெர்லைட் தாமிர ஆலையின் விரிவாக்கத்தை எதிர்த்து குமரெட்டியாபுரம் ஊர்மக்கள் நடத்திய போராட்டத்திலும் தங்கள் குழந்தைகளைப் பள்ளிக்கு அனுப்பாமல் நிறுத்தி வைத்து மாணவர்களைப் பள்ளிச்சீருடையில் முன்வரிசையில் அமர வைத்திருந்தனர். காவல்துறையின் நடவடிக்கைக்குப் பயந்து பள்ளி மாணவர்களைக் களத்தில் இறக்கி இருப்பதாகவும் இதன் மூலம் போராட்டம் நடத்துபவர்கள் தப்பித்துக்கொள்ள நினைப்பதாகவும் கூறப்படுகிறது. பெற்றோர்களே பள்ளி மாணவர்களைப் பள்ளி செல்லவிடாமல் போராட்டத்தில் ஈடுபடுத்துவதும், அதற்குச் சில அமைப்புகள் துணை நிற்பதும் கண்டிக்கத்தக்கது எனவும் அடுத்த மாதம் அரசுத் தேர்வுகள் ஆரம்பமாகும் நிலையில், மாணவர்கள் போராட்டத்தில் ஈடுபடுவது அவர்கள் படிப்பைப் பாதிக்கும் என்கின்றனர் சமூக ஆர்வலர்கள்.

இந்தநிலையில்  செய்தியாளர்களிடம் பேசிய மாவட்ட ஆட்சியர் வெங்கடேஷ், “பள்ளிக்கூடத்துக்கு படிக்கச் செல்லும் மாணவர்களைப் போராட்டங்களில் ஈடுபடுத்துவது தவறு. மாணவர்களின் படிப்பு தடைபடுவதை அனுமதிக்க முடியாது. அவ்வாறு போராட்டத்தில் ஈடுபடுத்தினால் மாவட்டக் கல்வி அதிகாரிகள், பள்ளி நிர்வாகத்திடம் விளக்கம் கேட்கப்பட்டு நடவடிக்கை எடுக்கப்படும்” என்றார்

 

 

நீங்க எப்படி பீல் பண்றீங்க