`எடப்பாடி பழனிசாமி என்ன ஏழுமலையானா?’ - அரசு விளம்பரத்தால் கொதித்த ராமதாஸ்

ராமதாஸ்

விளம்பரத்தில் முதலமைச்சர் எடப்பாடி பழனிசாமி ஏழுமலையானாகச் சித்திரிக்கப்பட்டிருப்பது அதிர்ச்சியளிப்பதாகப் பா.ம.க நிறுவனர் ராமதாஸ் குறிப்பிட்டுள்ளார்.

அண்மையில் திரையரங்கில் ஒலிபரப்பாகிய அரசு விளம்பரத்தில் முதல்வர் எடப்பாடி பழனிசாமியைக் கடவுளாகச் சித்திரிக்கப்பட்டிருந்தது. இந்த விளம்பரத்துக்குப் பலதரப்பிலிருந்து எதிர்ப்புகள் கிளம்பியது. இணையத்தில் அதிகம் விமர்சிக்கப்பட்டது. இந்நிலையில் இந்த விளம்பரம் குறித்து ராமதாஸ் அறிக்கை ஒன்றை வெளியிட்டுள்ளார். அந்த அறிக்கையில், 

“தமிழகத்தில் உள்ள திரையரங்குகளில் தமிழக அரசின் செய்தி விளம்பரத்துறை சார்பில் திரையிடப்படும் சாதனை விளக்க விளம்பரத்தில் முதலமைச்சர் எடப்பாடி பழனிசாமி ஏழுமலையானாகச் சித்திரிக்கப்பட்டு இருப்பது அதிர்ச்சியளிக்கிறது. முதலமைச்சராகப் பதவியேற்ற 15 மாதங்களில் மக்களின் நலனுக்காக எதையுமே செய்யாத பழனிசாமி கூச்சமின்றி இப்படி விளம்பரப்படுத்திக் கொள்வது கண்டிக்கத்தக்கது.

தமிழகத்தில் மாற்றுத்திறனாளிகள் நலனுக்காகப் பினாமி அரசு எந்தத் திட்டத்தையும் செயல்படுத்தவில்லை. சென்னை உயர் நீதிமன்றத்தின் ஆணைப்படி வேலைவாய்ப்பில் மாற்றுத்திறனாளிகளுக்கு 4 விழுக்காடு இட ஒதுக்கீடு வழங்க அரசாணை பிறப்பிக்கப்பட்டுள்ளது. இதைக் குறிக்கும் வகையில் தமிழக அரசு வெளியிட்டுள்ள விளம்பரத்தில், மாற்றுத்திறனாளி பெண் ஒருவர் அவரது தோழி மற்றும் உறவினருடன் கோயிலுக்குச் சென்று வழிபாடு நடத்தும்படி கோருகிறார். `யாருடைய பெயரில் வழிபாடு நடத்த வேண்டும்’ என்று கோயில் குருக்கள் கேட்கும்போது, மாற்றுத் திறனாளி பெயரில் வழிபாடு நடத்தும்படி அவரின் உறவினர் கூறுகிறார். ஆனால், அதை இடைமறிக்கும் மாற்றுத் திறனாளி, `தமது பெயரில் வழிபாடு செய்ய வேண்டாம்; சுவாமி பெயருக்கு வழிபாடு செய்ய வேண்டும்’ என்று கூறுகிறார். `எந்தச் சுவாமி பெயருக்கு’ எனக் குருக்கள் கேட்க, ‘நம்ம தமிழக முதலமைச்சர் எடப்பாடி பழனிசாமி அய்யா பெயருக்கு... அவர்தான் எனக்கு வேலை கொடுத்த சுவாமி’ என்று அந்த மாற்றுத்திறனாளி கூறுகிறார். அடுத்த விநாடி திருப்பதி வெங்கடாஜலபதி சிலையாக முதலமைச்சர் எடப்பாடி பழனிசாமி தோன்றி மறைகிறார்.

திரையரங்குகளில் இந்த விளம்பரத்தைப் பார்க்கும் மக்கள் நகைச்சுவையாகக் கருதி சிரிக்கிறார்கள் என்றாலும், இது ஒரு குரூரமான சிந்தனையாகும். தமிழகம் கடவுள் இல்லை என்று கூறிய முதல்வர்களைப் பார்த்திருக்கிறது... கடவுள் உண்டு என்று கூறிய முதலமைச்சர்களைப் பார்த்திருக்கிறது... ஆனால், நான்தான் கடவுள் என்று கூறும் முதலமைச்சரை தமிழ்நாடு இப்போதுதான் பார்க்கிறது. ஜெயலலிதா முதலமைச்சராக இருந்தபோது தன்னை அகிலாண்டேஸ்வரியாகவும் கன்னிமேரியாகவும் சித்திரித்து அ.தி.மு.க நிர்வாகிகள் பதாகை அமைத்தால் அதை நினைத்து மனதுக்குள் மகிழ்வார்; அவர்களுக்குப் பதவிகளை வாரி வழங்குவார். ஆனால், அதை ஒருபோதும் அவர் வெளிக்காட்டிக்கொண்டதில்லை. அரசு செலவில் தம்மைக் கடவுளாகச் சித்திரித்து விளம்பரப் படம் தயாரித்து வெளியிட்டுக் கொண்டதில்லை.

ஆனால், மக்களால் நேரடியாகத் தேர்ந்தெடுக்கப்படாமல், சட்டப்பேரவை உறுப்பினர்களை விலை கொடுத்து வாங்கி முதலமைச்சரான எடப்பாடி பழனிசாமி, ஆட்சியில் இருப்பவர்கள் கடைப்பிடிக்க வேண்டிய அனைத்து நாகரிகங்களையும் காலில் போட்டு மிதித்துவிட்டு தம்மை முன்னிலைப்படுத்திக்கொள்கிறார். முதலமைச்சர் பதவியில் இருந்துகொண்டு மக்கள் நலனுக்கான திட்டங்களைச் செயல்படுத்தினால், மக்களே ஆட்சியாளர்களைக் கடவுளாகக் கருதி வழிபடுவார்கள். சிங்கப்பூரின் லீ குவான் யூ-வையும் தென்னாப்பிரிக்காவின் நெல்சன் மண்டேலா, கியூபாவின் ஃபிடல் காஸ்ட்ரோ, தமிழகத்தின் ஓமந்தூரார், காமராஜர் ஆகியோரையும் மக்கள் கடவுளாகத்தான் கருதினர். அதுதான் மக்கள் தரும் அங்கீகாரம் ஆகும். ஆனால், போட்டிகளில் வெற்றி பெற்று விருது வாங்க முடியாதவர், பாத்திரக்கடையில் கேடயம் வாங்கிப் பெருமைப்பட்டுக் கொள்வதைப் போலத்தான் எடப்பாடி பழனிசாமியின் செயல்கள் அமைந்துள்ளன.

தமிழகத்தில் ஒன்றரை கோடி பேர் படித்துவிட்டு வேலையில்லாமல் தவித்துக்கொண்டிருக்கிறார்கள். தொழில் முதலீட்டை ஈர்ப்பதில் கடைசி இடத்துக்கும் கீழே ஏதேனும் இடம் இருக்குமா என்று தேட வேண்டிய நிலையில்தான் தமிழகம் உள்ளது. நீட் தேர்விலிருந்து விலக்கு பெற முடியாததால் ஆண்டுதோறும் அனிதாக்களை இழந்துகொண்டிருக்கிறோம். நிதி ஆணையத்தின் அதிகார வரம்பு மாற்றப் பட்டதால் தமிழகத்துக்கு கிடைக்க வேண்டிய ரூ.40,000 கோடி வருவாய்க்கு ஆபத்து ஏற்பட்டுள்ளது. இந்தப் பிரச்னைகளுக்குத் தீர்வு காண ஆட்சியாளர்களுக்குத் திறமை இல்லை. மணல் கொள்ளையும் மது விற்பனையும்தான் இந்த ஆட்சியின் அடையாளங்களாக மாறியிருக்கின்றன. ரோம் நகரம் தீப்பிடித்து எரிந்துகொண்டு இருந்தபோது நீரோ மன்னன் பிடில் வாசித்துக்கொண்டிருந்ததைப்போல, காவிரி உரிமைக்காகத் தமிழ்நாட்டு மக்கள் போராடிக்கொண்டிருக்கும் நிலையில் முதலமைச்சர் எடப்பாடி பழனிசாமி தம்மை கடவுளாகக் காட்டிக்கொண்டிருப்பது ஆணவம் மட்டுமல்ல... அநாகரிகத்தின் உச்சமும் ஆகும். இதுபோன்ற செயல்களைத் தமிழ்நாட்டு மக்கள் ஒருபோதும் மன்னிக்க மாட்டார்கள்.

தமிழகம் 7,00,000 கோடி ரூபாய் கடன் சுமையில் தவித்துக்கொண்டிருக்கும் நிலையில் மக்களின் வரிப்பணத்தை சுய விளம்பரத்துக்காக எடப்பாடி பழனிசாமி வீணடிப்பதை ஏற்க முடியாது. திருப்பதி ஏழுமலையானாகத் தம்மைக் காட்டிக்கொள்ளும் எடப்பாடி பழனிசாமியின் மலிவான செயல்களால், இறைவழிபாட்டில் நம்பிக்கை கொண்ட மக்கள் கொந்தளித்துக்கொண்டிருக்கின்றனர். மக்களை மட்டுமின்றி, கடவுளையும் அவமதிக்கும் வகையிலான விளம்பரப் படத்தை, தமிழக அரசு திரும்பப் பெற வேண்டும். இல்லாவிட்டால் மக்கள் தாங்களாகவே வீதிகளில் இறங்கிப் போராடுவதைத் தவிர்க்க முடியாது” என்று காட்டமாகத் தெரிவித்துள்ளார். 

Do you like the story?

Please Appreciate the Author by clapping!