வெளியிடப்பட்ட நேரம்: 03:18 (04/06/2018)

கடைசி தொடர்பு:08:12 (04/06/2018)

சசிகலா தரப்பு என்னை குறுக்கு விசாரணைக்கு அழைக்காதது ஏன்..? ஜெ. தீபா கேள்வி!

ஜெயலலிதா மரணம் தொடர்பாக விசாரணை மேற்கொண்டுள்ள ஆறுமுகசாமி கமிஷனின் விசாரணையின் போக்கு, சசிகலா மற்றும் அவரால் நியமிக்கப்பட்ட போயஸ்கார்டன் பணியாளர்களுக்கு சாதகமாகச் சென்றுகொண்டிருக்கிறதோ என்ற சந்தேகம் எழுவதாக ஜெயலலிதாவின் அண்ணன் மகள் ஜெ. தீபா கூறியுள்ளார். மேலும், விசாரணை ஆணையத்தில் குறுக்கு விசாரணைக்காக சசிகலா தரப்பு தன்னை அழைக்காதது ஏன் என்றும் அவர் கேள்வியெழுப்பியுள்ளார்.

தீபா

இதுதொடர்பாக ஜெ. தீபா வெளியிட்டுள்ள ஆடியோ பதிவில், 'ஆறுமுகசாமி ஆணையத்தைப் பொறுத்தவரை, தற்போது அதன் விசாரணையின் திசைகளைப் பார்க்கும்போது, விசாரணை கமிஷனில் சசிகலா தரப்பு வழக்கறிஞர் ராஜா செந்தூர்பாண்டியன் சாட்சிகளைக் குறுக்கு விசாரணை செய்ய வேண்டும் என்று கேட்டார். சசிகலா அப்படிக் கேட்டிருக்கும்போது, ஆணையத்திடம் அஃபிடெவிட் தாக்கல் செய்த அனைவரையும் குறுக்கு விசாரணை செய்ய வேண்டும். அப்படியிருக்க, என்னை மட்டும் அவர்கள் இதுவரை அழைத்து விசாரிக்கவில்லை. எனவே, இதில் இருந்து சசிகலா தரப்பினர் பின்வாங்குகிறார்களா அல்லது எதையாவது மறைக்கப் பார்க்கிறார்களா என்ற கேள்வியை ஆறுமுகசாமி கமிஷனில் எழுப்ப நான் விரும்புகிறேன்.  

மறுபுறம், இந்த விசாரணை ஒருதலைப்பட்சமாக, முழுமையாக சசிகலாவுக்கும், அவரின் குடும்பத்தினருக்கும், அவரால் நியமிக்கப்பட்ட போயஸ்கார்டன் பணியாளர்களுக்கும் சாதகமான ஒரு சூழ்நிலையில் மட்டுமே நடந்து கொண்டிருப்பது, இவர்களை - இந்தக் கமிஷனையும், அ.தி.மு.க. அரசையும் நம்பி வந்த மக்களையும், ஆணையத்தால் நியாயம் கிடைக்கும் என எதிர்பார்த்துக் கொண்டிருக்கும், அ.தி.மு.க-வில், ஜெயலலிதாவுக்காக உயிரையும் மாய்த்துக்கொண்ட தொண்டர்களுக்கும் ஏமாற்றம் அளிக்கிறது. மேற்படி இந்த விசாரணை முழுமையாகவோ, உண்மையாகவோ நடக்க வேண்டுமென்றால், ஆணையத்தில் என்னை அவர்கள் குறுக்கு விசாரணைக்கு அழைக்க வேண்டும். அதில் என்னுடைய கருத்துகளை நான் பதிவு செய்ய வேண்டும் என்று தெரிவித்துக் கொள்கிறேன்" குறிப்பிட்டுள்ளார். 

நீங்க எப்படி பீல் பண்றீங்க