வெளியிடப்பட்ட நேரம்: 22:30 (06/06/2018)

கடைசி தொடர்பு:09:53 (07/06/2018)

`துப்பாக்கிச் சூட்டுக்கு அரசும் காவல்துறையும் தீட்டிய சதியே காரணம்' - ராமதாஸ் பகீர் குற்றச்சாட்டு!

தூத்துக்குடியில் அப்பாவி பொதுமக்கள் 13 பேரின் உயிரைப் பறித்த காவல்துறையின் துப்பாக்கிச் சூட்டுக்கு ஆணையிட்டது யார் என்பது குறித்து அதிர்ச்சியூட்டும் உண்மைகள் அடுத்தடுத்து வெளியாகிவருகின்றன. காவல்துறையினரின் துப்பாக்கிச் சூட்டுக்கு எதிர்பாராத தூண்டல் காரணமல்ல... அரசும் காவல்துறையும் தீட்டிய சதிதான் காரணம் என்பது இந்த உண்மைகளின் மூலம் உறுதியாகியுள்ளது என பா.ம.க நிறுவனர் ராமதாஸ் தெரிவித்துள்ளார். 

ராமதாஸ்

இதுகுறித்து ராமதாஸ் வெளியிட்டுள்ள அறிக்கையில்,  ``தூத்துக்குடியில் துணை வட்டாட்சியர்கள் ஆணையிட்டதன் அடிப்படையில்தான் துப்பாக்கிச் சூடு நடத்தப்பட்டதாகக் காவல்துறை பதிவுசெய்த முதல் தகவல் அறிக்கையில் தெரிவிக்கப்பட்டுள்ளது. மாவட்ட ஆட்சியர், காவல்துறை தலைமை இயக்குநர், முதலமைச்சர் ஆகியோரைத் தாண்டி, துணை வட்டாட்சியர்தான் அதிகாரம் படித்தவர் என்பது போன்ற தோற்றத்தை ஏற்படுத்தி, அவர்கள்மீது பழியை சுமத்தி தப்பிக்க நினைப்பது நகைப்புக்குரியது மட்டுமல்ல... மிகவும் கண்டிக்கத்தக்கதும் ஆகும். ஆனால், தமிழக ஆட்சியாளர்களின் இந்த நாடகமும் அம்பலமாகிவிட்டது. போராட்டத்தின்போது வன்முறை ஏற்பட்டால், அதைச் சமாளிக்க மேற்கொள்ளப்படவேண்டிய நடவடிக்கைகள்குறித்து தீர்மானிப்பதற்காக ஒவ்வொரு பகுதிக்கும் பொறுப்பு அதிகாரிகளாகத் துணை வட்டாட்சியர் நிலையிலுள்ள அதிகாரிகள் நியமிக்கப்பட்டிருந்தனர். 

அதன்படி, திரேஸ்புரம் பகுதிக்கு சேகர் என்ற துணை ஆட்சியரும், மாவட்ட ஆட்சியர் அலுவலகம் அமைந்துள்ள பகுதிக்கு ராஜ்குமார் தங்கசீலன் என்ற தனி வட்டாட்சியரும் பொறுப்பு அதிகாரியாக நியமிக்கப்பட்டிருந்தனர். துப்பாக்கிச் சூடு நடத்த ஆணையிடும் அதிகாரம் இவர்களுக்கு வழங்கப்பட்டிருந்ததாக அரசு கூறுவது உண்மை என்று வைத்துக்கொண்டால்கூட இவர்கள்தான் துப்பாக்கிச்சூட்டுக்கு ஆணையிட்டிருக்க வேண்டும். ஆனால், இவர்களுக்குப் பதிலாக வேறு இடத்தில் இருந்த அதிகாரிகளிடமிருந்து ஆணை பெறப்பட்டு, துப்பாக்கிச் சூடு நடத்தப்பட்டதாகக் காவல்துறை முதல் தகவல் அறிக்கையில் கூறப்பட்டுள்ளது. அதிகம் பேரை பலிவாங்கிய மாவட்ட ஆட்சியர் அலுவலக துப்பாக்கிச் சூட்டுக்கு அங்கிருந்து 5 கி.மீ தொலைவில் உள்ள திரேஸ்புரம் பகுதிக்கு பொறுப்பான சேகர் என்ற தேர்தல் துணை வட்டாட்சியர் ஆணையிட்டதாகக் கூறப்பட்டுள்ளது. 

அதேபோல, திரேஸ்புரத்தில் நடத்தப்பட்ட துப்பாக்கிச் சூட்டுக்கு அங்கிருந்து 10 கிலோ மீட்டர் தொலைவில் பணியில் இருந்த கண்ணன் என்ற துணை ஆட்சியர்தான் காரணம் என்று கூறப்பட்டுள்ளது. துப்பாக்கிச்சூட்டுக்கு ஆணையிடும் அதிகாரிகள் அப்பகுதியில் நிலவும் சூழலை ஆய்வுசெய்துதான் துப்பாக்கிச் சூட்டுக்கு ஆணையிட வேண்டும். அதற்காகத்தான் பொறுப்பு அதிகாரிகள் நியமிக்கப்பட்டுள்ளனர். ஆனால், பொறுப்பு அதிகாரியிடம் அனுமதி பெறாமல் எங்கோ உள்ள ஓர் அதிகாரியிடம் ஆணை பெற்று, துப்பாக்கிச் சூடு நடத்தியதாகக் கூறப்படுவது இமாலயப் பொய் ஆகும். இது மக்களையும் நீதித்துறையையும் முட்டாள்களாக்கும் முயற்சி ஆகும்.

அதேபோல, எஃப்.சி.ஐ. ரவுண்டானா பகுதியில் துப்பாக்கிச் சூடு நடத்த, அப்பகுதியின் பொறுப்பு அதிகாரியான வட்டார வழங்கல் அலுவலர் கோபால் ஆணையிட்டதாக சில நாள்களுக்கு முன் பதிவுசெய்யப்பட்ட முதல் தகவல் அறிக்கையில் கூறப்பட்டிருந்தது. ஆனால், அந்தப் பகுதியில் எந்தக் கலவரமும் நடக்கவில்லை; துப்பாக்கிச் சூடு நடத்த தாம் ஆணையிடவில்லை என்று அந்த அதிகாரி மறுத்துவிட்டார். துப்பாக்கிச் சூடு சதி அம்பலமானதால், எஃப்.சி.ஐ. ரவுண்டானா பகுதியில் பொறுப்பு அதிகாரியை தேடிக் கண்டுபிடிக்க முடியாததால், தாமே துப்பாக்கிச் சூட்டுக்கு ஆணையிட்டதாகக் காவல் ஆய்வாளர் மீனாட்சி நாதன் என்பவர் கூறியதாக முதல் தகவல் அறிக்கையில் திருத்தம் செய்யப்பட்டிருக்கிறது. இது அபத்தத்திலும் அபத்தமாகும்.

தூத்துக்குடியில் எந்த இடத்திலுமே துப்பாக்கிச் சூடு நடத்த வட்டாட்சியர்கள் ஆணையிடவில்லை என்று தெரிகிறது. ஆட்சியாளர்கள் மற்றும் உயரதிகாரிகள் நிலையில் தீட்டப்பட்ட சதித் திட்டத்தின்படி, காவல்துறை அதிகாரிகளைக்கொண்டு துப்பாக்கிச் சூடு நடத்திவிட்டு, துணை வட்டாட்சியர்கள் ஆணைப்படி துப்பாக்கிச் சூடு நடத்தப்பட்டதாக திரைக்கதை எழுதப்பட்டிருக்கிறது. திரேஸ்புரம், மாவட்ட ஆட்சியர் அலுவலகம் ஆகிய பகுதிகளின் பொறுப்பு அதிகாரிகளாக நியமிக்கப்பட்டிருந்த துணை வட்டாட்சியர்கள், இந்த சதித் திட்டத்துக்கு ஒப்புக்கொள்ள மாட்டார்கள் என்பதால், இந்த சதி நாடகத்தில் அவர்களுக்குப் பதிலாக வேறு இரு துணை வட்டாட்சியர்கள் புதிய கதாபாத்திரங்களாகச் சேர்க்கப்பட்டிருக்கின்றனர் என்பதுதான் மறுக்க முடியாத உண்மை.

எந்த வகையில் பார்த்தாலும் தூத்துக்குடி துப்பாக்கிச் சூட்டுக்கு சூத்திரதாரிகள் தமிழக ஆட்சியாளர்கள்தான். அவர்களின் சதிக்கு அதிகாரிகளைப் பகடைக்காய்களாகப் பயன்படுத்தித் தப்பிக்க முயல்கின்றனர். இந்தச் துப்பாக்கிச்சூடுகுறித்து விசாரிக்க அமைக்கப்பட்டுள்ள பொம்மை ஆணையத்தால் எந்தப் பயனும் விளையாது. இதுகுறித்து பணியிலுள்ள உயர் நீதிமன்ற நீதிபதிகளைக்கொண்டு விசாரணை நடத்த ஆணையிட வேண்டும். அதுமட்டுமின்றி, துப்பாக்கிச் சூட்டுக்குக் காரணமான பினாமி அரசு, உடனடியாகப் பதவி விலக வேண்டும்" என்று தெரிவித்துள்ளார்.

நீங்க எப்படி பீல் பண்றீங்க