வெளியிடப்பட்ட நேரம்: 22:48 (25/06/2018)

கடைசி தொடர்பு:22:48 (25/06/2018)

அரணாய் அசத்திய உருகுவே; மூன்றாவது போட்டியையும் வென்று புள்ளிப்பட்டியலில் முதலிடம்!

உலகக் கோப்பை குரூப் ஏ போட்டியில் தொடரை நடத்தும் ரஷ்யாவை வீழ்த்தியது உருகுவே. தொடக்கம் முதலே ஆதிக்கம் செலுத்திய உருகுவே அணி 3-0 என்ற கோல் கணக்கில் வெற்றி பெற்றது. ஏற்கெனவே அடுத்த சுற்றுக்குத் தகுதி பெற்றதால் உருகுவே அணி சில மாற்றங்கள் செய்தது. இந்தப் பிரிவில் முதலிடம் பிடிக்கவேண்டுமென்ற நோக்கில் ரஷ்யா முழு பலத்தோடு களமிறங்கியது.

உருகுவே

9-வது நிமிடத்தில் உருகுவே வீரர் பென்டன்கரை, கஸின்ஸ்கி பாக்சுக்கு வெளியே தள்ளிவிட ஃப்ரீ கிக் தரப்பட்டது. அதை அடிக்கத் தயாரானார் லூயிஸ் சுவாரஸ். கோல் போஸ்டின் டாப் கார்னருக்குக் குறிவைப்பார் என்று நினைக்கையில், அழகாகப் பாட்டம் கார்னருக்கு உருட்டிவிட்டு கோலடித்தார் சுவாரஸ். 

23-வது நிமிடத்தில் உருகுவே இரண்டாவது கோலடித்தது. உருகுவே அணி எடுத்த கார்னரை, ரஷ்ய வீரர்கள் கிளியர் செய்ய, அது பாக்சுக்கு வெளியே இருந்த உருகுவே வீரர் லக்சல்ட் வசம் சென்றது. அதை அவர் கோல் நோக்கி ஷூட் அடிக்க, ரஷ்ய வீரர் செரிஷேவ் காலில் பட்டு கோலானது. 

முதல் இரண்டு போட்டிகளிலும் டிஃபன்ஸ், முன்களம் என இரண்டு ஏரியாவிலும் பட்டையைக் கிளப்பிய ரஷ்யா, இந்தப் போட்டியில் இரண்டு ஏரியாவிலுமே பின்வாங்கியது. உருகுவே அணியின் அரண் போன்ற டிஃபன்ஸை அவர்களால் உடைக்கவே முடியவில்லை. இந்நிலையில் அந்த அணிக்கு இன்னொரு பெரிய அடி விழுந்தது. 

கவானி

27-வது நிமிடம் கவானியை ஃபௌல் செய்ததற்காக யெல்லோ கார்டு பெற்றார் ரஷ்ய வீரர் இகோர் ஸ்மால்நிகோவ். அடுத்து 36-வது நிமிடத்தில் லக்சல்டை ஃபௌல் செய்து இரண்டாவது மஞ்சள் அட்டைப் பெற்று, ஆட்டத்திலிருந்து வெளியேறினார். இதனால் ரஷ்யா அணி 10 வீரர்களுடன் விளையாட வேண்டிய நிலைக்கு ஆளானது. 

இரு அணிகளும் அதன்மேல் ஏதும் கோல் போடாததால் முதல் பாதி 2-0 என்ற கோல் கணக்கில் முடிவுக்கு வந்தது. அப்போதே உருகுவே அணியின் வெற்றி உறுதிசெய்யப்பட்டுவிட்டது. இரண்டாவது பாதியில் உருகுவே அணி அவ்வப்போது அட்டாக்கிங் ஆட்டம் ஆடியபோதும் கஷ்டப்பட்டு அதைத் தடுத்தது ரஷ்யாவின் பின்களம். 

உருகுவே

90-வது நிமிடத்தில் கார்னர் மூலம் இன்னொரு கோலை அடித்தது உருகுவே, இம்முறை கோலடித்தவர் ஸ்ட்ரைக்கர் கவானி. இதன்மூலம் உருகுவே அணி 3-0 என வெற்றி பெற்றது. லீக் சுற்றின் 3 போட்டிகளிலும் உருகுவே ஒரு கோல்கூட விடாமல் மிகச்சிறப்பாகச் செயல்பட்டுள்ளது. ஏ பிரிவில் உருகுவே முதலிடமும், ரஷ்யா இரண்டாம் இடமும் பிடித்தன.