24 ஆண்டுகளில் முதல் வெற்றி... எகிப்தை வீழ்த்தி சவுதி அரேபியா அபாரம்!

ரஷ்யாவில் தற்போது 21 -வது உலகக்கோப்பை கால்பந்துத் தொடர் நடைபெற்று வருகிறது. சவுதி அரேபியா மற்றும் எகிப்து அணிகள் 'ஏ' பிரிவில் மோதிய ஆட்டம், வோல்கோகிராட் மைதானத்தில் இன்று நடைபெற்றது. இப்போட்டியில் 2-1 என்ற கோல் கணக்கில் எகிப்து அணியைத் தோற்கடித்து, சவுதி அரேபியா ஆறுதல் வெற்றி பெற்றது.

சவூதி அரேபியா

இவ்விரு அணிகளும் இதற்கு முன் மோதிய இரண்டு ஆட்டங்களிலும் வெற்றி ஏதும் பெறவில்லை. இதனால் இப்போட்டியில் ஆறுதல் வெற்றியாவது பெற, இரண்டு அணிகளும் கடுமையாக மோதின.  `அதிக வயதில் உலகக்கோப்பையில் விளையாடியவர்' என்ற சாதனையை எகிப்து அணியின் கோல் கீப்பர் எல்-ஹதாரி(45) இன்றைய போட்டியில் படைத்தார்.

அதிக வயதில் உலகக்கோப்பையில் விளையாடி சாதனை படைத்த எல்-ஹதாரி

முதல் பாதியில் சவுதி அரேபியா அட்டாக்கிங் ஆட்டத்தில் ஈடுபட்டபோதும், அந்த அணியால் கோல் ஏதும் அடிக்க முடியாதபடி எகிப்து அணியின் டிஃபண்டர்களும், கோல்கீப்பர் எல்-ஹதாரியும் சிறப்பாகச் செயல்பட்டனர். ஆட்டத்தின் 22-வது நிமிடத்தில் எகிப்து அணியின் நட்சத்திர வீரர் முகமது சலா ஆட்டத்தின் முதல் கோலை அடித்தார். இது உலகக்கோப்பையில் அவர் அடிக்கும் இரண்டாவது கோல் ஆகும்.

முதல்பாதி முடிவை நெருங்கிக் கொண்டிருந்தபோது எகிப்து அணியின் டிஃபண்டர் செய்த தவறால், சவுதி அரேபியாவுக்கு பெனால்டி வாய்ப்பு கிடைத்தது. ஆனால், ஃபஹத் அல்-முவாலத் அடித்த பந்தை, எகிப்து கோல் கீப்பர் எல்-ஹதாரி அழகாக சேவ் செய்து அசத்தினார். எகிப்து அணிக்கு இந்த மகிழ்ச்சி அதிகநேரம் நீடிக்கவில்லை. சிறிது நேரத்தில் எகிப்து டிஃபண்டர் அலி காபர் செய்த தவறால், சவுதி அரேபிய வீரர்கள் பெனால்டி வாய்ப்பு கேட்டனர்.  VAR சிஸ்டம் மூலமாக வீடியோ ஃபுட்டேஜ்களைப் பார்வையிட்ட ரெஃப்ரி, சவுதி அரேபியாவுக்கு மீண்டும் பெனால்டி வாய்ப்பளித்தார். இவ்வாய்ப்பை அந்த அணி இம்முறை சரியாகப் பயன்படுத்திக்கொண்டது. சல்மான் அல்-ஃபராஜ் சவுதி அரேபியா அணிக்காகக் கோல் அடித்தார். இதனால் முதல்பாதி முடிவடையும்போது ஆட்டம் 1-1 என்ற கோல் கணக்கில் சமன் ஆனது.

முகமது சலா

இரண்டாம் பாதி தொடங்கியதிலிருந்து இரு அணிகளும் தங்களுக்குக் கிடைத்த வாய்ப்புகளைப் பயன்படுத்திக்கொள்ள முடியாமல் திணறினர். டிராவை நோக்கி ஆட்டம் சென்றுகொண்டிருந்தது. இந்நிலையில் கூடுதலாக வழங்கப்பட்ட நிறுத்த நேரத்தில் சவுதி அரேபிய வீரர் சலீம் அல்-தவ்சாரி, தனது அணிக்காக இரண்டாவது கோலை அடித்தார். இதனால் 2-1 என்ற கோல் கணக்கில் எகிப்து அணியை வீழ்த்தி சவுதி அரேபியா ஆறுதல் வெற்றி பெற்றது. 24 ஆண்டுகளுக்குப் பிறகு சவுதி அரேபியா வெல்லும் முதல் உலகக்கோப்பை போட்டி இது. உலகக்கோப்பை போட்டிகளில் எகிப்து அணி இதுவரை ஒரு போட்டியில் கூட வெற்றிபெறவில்லை என்பது குறிப்பிடத்தக்கது.

Do you like the story?

Please Appreciate the Author by clapping!